Шикоятҳои сокинони шаҳри Бохтар, маркази вилояти Хатлон аз шароити баду бадбӯи кӯчаву хиёбонҳои он афзоиш ёфтааст.
21-уми августи соли 2024 корбаре дар гуруҳи инстаграмии “Бохтар Қурғонтеппа” бо интишори навори видеоие аз шароити бади шаҳри Бохтар хабар дод ва дар вокуниш ба он даҳҳо нафари дигар аз сокинони ин шаҳр гуфтанд, ки масъулини шаҳрдорӣ сари вақт ба тозову озода нигоҳ доштани кӯчаву хиёбонҳо дар маркази вилоят дуруст аҳамият намедиҳанд.
Дар ин навори видеоӣ дида мешавад, ки яке аз ҷуйборҳои шаҳр ба сабаби саривақт тоза накардан танба шуда, об ба роҳи машингард ҷори шуда, бархе роҳҳои дохилишаҳриро низ хороб карда, ҳаракати мошинҳоро мушкил кардааст. Ин корбар шикоят карда мегӯяд, сабаби ин мушкилот таваҷҷӯҳ накардани ҳукумати шаҳр аст ва аз Раиси шаҳр талаб мекунад, ки аз курсияш хеста мушкилоти шаҳрро бартараф намояд.
Ҳамзамон бархе сокинони шаҳр мегӯянд, ин ягона ва танҳо мушкили шаҳри Бохтар набуда, масъулин сари вақт партовгоҳҳо тоза намекунанд ва бо зиёд шудани партовҳо бӯйи ғализи онҳо то даҳҳо метр дуртар аз партовгоҳҳо мардумро озор медиҳанд. Ба қавли онҳо, маҳз ҳамин партовгоҳҳои беназорат боиси хурӯҷи баъзе бемориҳо дар шаҳр гардида ба паҳншавии ҳаргуна касалиҳои сироятӣ мусоидат мекунанд.
Ин дар ҳолест, ки Давлаталӣ Саид, раиси вилояти Хатлон дар нишасти матбуотии ахир худ аз мушкилоти коммуналӣ дар шаҳри Бохтар хабар дода, гуфта буд, дар ҳоли ҳозир масъулини ин шаҳр тавони ҳалли мушкили партовгоҳоро надоранд ва наметавонанд сари вақт партовҳои маркази шаҳрро тоза кунанд.
Ба гуфтаи масъулин, барои вилоят чанд сол пеш бо маблағи 1 миллиону 229 ҳазор доллар техникаҳои коммуналӣ харидорӣ карда буданд. Аммо як қисми техникаҳо корношоям шуда, ниёз ба таъмир доранд.
Гуфта мешавад, Давлаталӣ Саид, раиси вилояти Хатлон дар нишасти матбуотии худ гуфта буд, ки барои таъмири техникаҳои харобшуда аз буҷети вилоят 300 ҳазор сомонӣ ҷудо шуда буд, аммо аз ин маблағ 70 ҳазор сомонияш аз ҷониби масъулони корхонаи коммуналӣ дуздида шудааст. Масъулини ин вилоят сабаби нотавонии худ дар ҳали мушкилоти шаҳри Бохтарро дар набудани техникаҳои нави коммуналӣ ва дуздиву фасод дар ин идора медонанд. Аммо ба суоли он, ки чаро масъулини мақомот сари вақт пеши роҳи ин ҳама дуздиву фасодкориҳоро дар маркази вилоят намегиранд, бархе сокинон мегӯянд, ки “об аз боло лой аст!”
