Мақомоти Тоҷикистон дар ҷамоати Яккатути ноҳияи Абдураҳмони Ҷомӣ ду ҷавонро барои навиштани “даъвату таҳдид” дар девори мактабу мағоза ва сартарошхона боздошт кардаанд.
Имрӯз, 22-уми августи соли 2024, Радиои Озодӣ дар истинод ба манобеаш менависад, ки гуё ин ду ҷавон дар девори мағоза, сартарошхона ва мактаби ба номи Горкийи ҷамоати Яккатути ноҳияи Абдураҳмони Ҷомӣ навиштаанд, ки “аккаунтҳо ва адресҳои телефонҳоятонро иваз кунед” ва “хонаи онҳоеро, ки моро ба мақомот мефурӯшанд, оташ мезанем”.
Мақомоти корҳои дохилӣ ва ҷамоатҳо пас аз ин ҳодиса тафтишро шурӯъ карда, падару модаронро ҷамъ овардаанд ва масъалаи ёфтани гумонбаронро ҷиддӣ дар миён гузоштанд.
Гуфта мешавад, ин ду ҷавонро, ки яке аз онҳо 23-сола будааст рӯзи 18-уми август бо истифода аз дурбинҳои назоратии бинои мактаб ёфтаанд, аммо то ҳол пурсиши сокинон ба поён нарасида, кормандони милиса ҳанӯз ҳам ба хонаҳои сокинон рафта, дар бораи он ду ҷавон пурсуҷӯ мекунанд.
Дар ҳукумати ноҳияи Абдураҳмони Ҷомӣ рӯзи 22-юми август дар суҳбат ба Радиои Озодӣ боздошти ҷавонҳоро тасдиқ кардаанд, аммо ба сабаби гӯё махфӣ будани парванда ва надоштани иҷозаи суҳбат ҷузъиёт надодаанд.
То ҳол назари боздоштшудаҳо ва ангезаи чунин рафторашон маълум нест. Наздикону пайвандонашон ҳам хомӯшанд ва Вазорати корҳои дохила низ боздошти ин ду ҷавонро ҳанӯз шарҳ надодааст.
Гуфта мешавад, ин бори аввал нест, ки баъзе аз сокинони кишвар барои навиштани шиор дар дару деворҳо боздошт мешаванд. Мақомот дар соли 2014 ду сокини ҷавони Душанберо ба иттиҳоми таблиғи “Гурӯҳи 24” ва навиштани шиор алайҳи ҳукумати Тоҷикистон дар наздикии Наврӯзгоҳи пойтахт боздошт карда буданд.
Ичнунин шиорҳои даъват ба истеъфои президент Эмомалӣ Раҳмон ва ҳукумати ӯ дар пиёдароҳе дар шаҳри Хуҷанд ва яке аз гузаргоҳҳои зеризаминии Душанбе низ навишта шуда буданд. Тақдири онҳое, ки ин шиорҳоро навишта буданд то ҳол маълум нест.
