Бархе сокинони шаҳри Душанбе бо истинод ба шабакаҳои тақсимоти барқи пойтахт мегӯянд, ки лимити барқ дар шаҳри Душанбе ҳам ҷорӣ шудааст.
Имрӯз, 13-уми марти соли 2024, садои эътирозии сокинони пойтахт дар робита ба ҷорӣ шудани маҳдудиятҳо дар интиқоли нерӯи барқ ба сокинони пойтахт баландтар шудааст.
Журналисти шинохтаи тоҷик ва сокини пойтахт Фахриддини Холбек бо нашри як матлаб дар бораи сол то сол бадтар шудани маҳдудиятҳо дар интиқоли нерӯи барқ ба сокинони кишвар гуфтааст: “Барқкушӣ аз деҳот ба пойтахт гузашт, ки набояд чунин бошад.” Вай дар робита ба роҳи ҳалли ин масъала мегӯяд, ки “аз дигар муттаҳид кардани ширкатҳои барқ аст. Таҷрибаи Қирғизистон ҳам ноком буд, ин ҳам ба ҷое намерасад. Се ниҳод, се муҳосибот – бухгалтерия, се буҷет ва ин (бебарқӣ дар пойтахт,- ИА) натиҷа.”
Абӯалӣ Некрӯзов, журналист ва сокини пойтахт ҳам дар бораи интиқоли нерӯи барқ ба сокинони кишвар ва бахусус дар шаҳри Душанбе гуфтааст, ки “ин лимити барқ он лимитҳои солҳои пештар буд, нест. Ба мисли ибораи “Кулли явмин бадтар” шудагӣ аст.”
Ба қавли Абӯалӣ Некрӯзов, субҳи имрӯз “дар маҳалаҳои гирду атрофи Масҷиди нав ба номи Имоми Аъзам, нисфи бозори Кушониен ва маҳалаҳои гирду атрофи он аз соати 08:48-и субҳ то инҷониб энергияи барқ нест.”
Фахриддини Холбек мегӯяд, имрӯз дар “микрорайони болои 9 км саҳар соати 9 ба ин тараф барқ нест! Ҳоло соат 3!” Ва дар посух ба он хабарнигори дигари тоҷик Умаралӣ Сафаралӣ таъкид карда, ки “дар 7-ум км ҳам вазъ ҳамин. Аз 9 интараф нест. Ҳоло ҳам.”
Хабарнигори тоҷик Хуршеди Атовулло, ки сокини маҳаллаҳаи 102 пойтахт аст, таъкид дорад, ки: “Оби гарм як моҳ зиёд шуд гум аст, барқашро дина ба куштан сар карданд.” Хабарнигори дигар тоҷик Абдураҳмон Раҳмонов ҳам гуфта, ки :Дар мо дирӯз об набуд..Ин беобӣ аз бебарқӣ мушкилтар будааст.”
Жаруланист ва сокини пойтахт Раҷаби Мирзо ҳам гуфтааст: “Дина мо то соати 17 барқу об надоштем. Дар навбатдории шаҳрдорӣ, вақте занг задем, гуфтанд соати 16 мешавад. Ҳарчанд ошкор нагуфтанд, ки лимит муқаррар шудааст, аммо аз тарзи баён маълум: бо навбат шаҳраку маҳаллаҳоро лимит кардаанд! Аммо чаро ин корро, агар ин қадар вазъият бад ва ҷиддист, расман эълон накунанд? Оё ин беҳтар нест, ки қаблан бигӯянд аз фалон соати фалон рӯз то фалон дар фалон кӯча барқу об намешавад…”
Назрулу Амиров, корбари дигаре дар бораи сабабҳои зиёд шудани ин маҳдудиятҳо таъкид мекунад, ки муттаҳами асосӣ бархе кормандони худи ширкати “Барқи тоҷик” ҳастанд ва “аз ҳама хиёнаташон ин аст, бисёрашон ширкатҳои хусусӣ доранд ё миёнараванд, ки “Барқи тоҷик”-ро бо маводҳои пастсифат ва нархи гарон таъмин мекунанд, баъд онҳо парвои мардум доранд?”
Гуфта мешавад, садои эътирозии хабарнигорони муқими шаҳри Душанбе дар ҳоле баланд шуда, ки дирӯз, Арвинд Гуҷрал, мудири кулли ҶСК “Шабакаҳои тақсимоти барқ” бо нашри як барқия гуфта буд, ки раҳбарони филиалҳои ин ширкатро вазифадор кардааст, то аз 11-уми март ба аҳолӣ дар як шабонарӯз 8 соат барқ бидиҳанд.
Арвинд Гуҷрал, мудири кулли ҶСК “Шабакаҳои тақсимоти барқ”-и Тоҷикистон аст. Вай шаҳрванди Ҳиндустон мебошад. Тайи ду соли раҳбарӣ то ҳол дар ҳеч як аз нишастҳои матбуотии ширкати “Барқи тоҷик” рӯбарӯ бо хабарнигорони кишвар мулоқот накардааст.
Ба гуфтаи Бижан Муҳаббатшоев, фаъоли ҷомеаи мадании тоҷик “Арвинд Гуҷрал мутахассис ва собиқ раиси “EV Motors India” ширкате, ки машғули таҷҳизонидан ва ба роҳ мондани, гуфтаи мардак, заправкаҳои барқӣ мебошад. Аз миёни тоҷикистониён, ки неругоҳҳои Норак, Қайроқум, силсилаи неругоҳҳо дар руди Вахш, Помир-1, имруз Роғун месозанд, як мутахассиси таъмину тақсими барқ ёфт намешавад, ки устои зарядкаи акумуляторро аз Ҳиндустон оварда тақсимкун мемонем)(?).”
