Уфти қурби рубли русӣ дар баробари асъори хориҷӣ

-

14/08/2023

Раиси Додгоҳи олии Тоҷикистон вуҷуди додрасҳои ҷинояткор дар ниҳодҳои қазоии кишварро эътироф карда гуфт, ки камбудӣ аз ҷониби раҳбарият сурат гирифтааст.

Имрӯз, 14-уми августи соли 2023 Шермуҳаммад Шоҳиён раиси Додгоҳи олии Тоҷикистон дар нишасти матбуотиаш ба журналистон гуфт, ки соли гузашта 4 нафар ва дар шашмоҳаи аввали соли ҷорӣ ҳам ду нафари дигар аз додрасҳо бо сабаби содир кардани ҷиноят боздошт шудаанд.

Раиси Додгоҳи олии Тоҷикистон гуфт, ки дар соли гузашта 4 нафар аз додрасҳои ниҳоди зертобеаш ба ҷиноятҳои коррупсионӣ даст зада буданд ва онҳо боздошт ва ба ҷавобгарии ҷиноятӣ дар намуди маҳрум кардан аз озодӣ маҳкум шудаанд.

Инчунин дар нимсолаи аввали соли ҷорӣ низ ду нафари дигар аз додрасҳо, аз ҷумла собиқ раиси Додгоҳи ноҳи Ҷаббор Расулов дар вилояти Суғд даст ба ҷиноят задааст. Парвандаи вай дар ҳоли баррасӣ қарор дорад, вале то ҳол ба Додгоҳи олӣ ворид нагардидааст. Парвандаи дигар нисбат ба Қодирзода Зафар, додраси Додгоҳи Вилояти Мухтори Кӯҳистони Бадахшон баъди баррасӣ ба Додгоҳи олӣ ворид шуда, нисбати вай ҷазо дар намуди ҷарима татбиқ карда шудааст.

Гуфта мешавад, дар низоми додгоҳҳои Тоҷикистон 443 нафар додрас дар додгоҳҳои шаҳру ноҳия ва вилоятҳо фаъолият мекунанд. Бархе коршиносони соҳа бар ин боваранд, ки ҳаҷми кор зиёд ва соатҳои кории додрасҳо қариб дубароба камтар аст. Биноан, аксари парвандаҳо дуруст баррасӣ карда намешаванд.

Ҳукми Хуршед Фозиловро бетағйир гузоштанд

Аз ҷониби

-

14/08/2023

Додгоҳи вилояти Суғд 7-сол ҳукми зиндони рӯзноманигор Хуршед Фозиловро бетағйир гузоштааст.

Имрӯз, 14-уми август зимни нишасти хабарӣ масъулони Додгоҳи олии Тоҷикистон гуфтаанд, ки Додгоҳи вилояти Суғд шикояти Хуршед Фозилов ва вакилони дифои ӯро дар мавриди бекор кардани ҳукми Додгоҳи шаҳри Панҷакент рад кардаанд.

Шикояти Фозилов ва вакилонаш 12-уми июли имсол рад шуда, маълум нест, ки онҳо ба зинаи сеюми додгоҳ шикоят мебаранд ё на.

Пештар аз ин, Додгоҳи марҳалаи назоратии шаҳри Душанбе ҳам ҳукми 7,5 соли зиндони Абдуллоҳ Ғурбатӣ, яке аз рӯзноманигорони тоҷикро бетағйир гузошта буд.

Ёдовар мешавем, ки рӯзноманигори тоҷик Хуршед Фозилов 26-уми майи соли ҷорӣ дар мурофиаи додгоҳие дар Боздошгоҳи шаҳри Хуҷанд ба иттиҳои ҳамкорӣ бо созмонҳои мамнуъ ба ҳафт соли зиндон маҳкум шуд. Пайвандону наздиконаш аз ҳукми додгоҳ розӣ нестанд.

Хуршед Фозилов 6-уми марти соли ҷорӣ аз ҷониби кормандони Кумитаи амнияти шаҳри Панҷакент боздошт шуд. Баъд аз боздошт мақомот ӯро ба узвият дар созмонҳои мамнуъ (моддаи 307, иловаи 3, қисми 2-и Кодекси ҷиноӣ) гумонбар донистанд. Аммо худи Фозилов иттиҳоми мақомотро рад карда гуфтааст, ки танҳо дар доираи қонун фаъолият дошт.

Ин рӯзноманигор дар суҳбат бо вакилаш гуфтааст, мақомоти амниятии кишвар ӯро маҷбур кардаанд то бар зидди худаш шаҳодат диҳад.

Хуршед Фозилов аз боздошти худсарона, риоя накардани дахлнопазирии шахсӣ ва маҷбуран шоҳидӣ додан алайҳи худ, ба додситонии вилояти Суғд шикоят бурда буд, аммо он рад шуд.

Фозилов 37 сол дошта, соҳиби 3 фарзанд мебошад ва аз минтақаи Зарафшон барои расонаҳои мустақил хабару гузоришҳои иҷтимоӣ менавишт. Пештар ӯро барои ҳамкорӣ бо собиқ сомонаи хабарии “Ахбор.ком” ҳамроҳи чанд рӯзноманигори дигар дар яке аз барномаҳои телевизиони Тоҷикистон намоиш дода буданд.

Дар як соли охир мақомоти кишвар чанд тан аз рӯзноманигорону блогерони шинохтаро бо иттиҳомоти сохта равонаи зиндон карданд. Созмонҳои ҳомии ҳуқуқ борҳо аз мақомоти Тоҷикистон раҳоии онҳоро талаб кардаанд, аммо Тоҷикистон мисли ҳамеша тавсия ва талаби созмонҳоро нодида мегирад.

Саркӯби рӯзноманагирон, блогерон ва фаъолони маданӣ дар кишвар боис гаштааст, ки Тоҷикистон дар Шохиси озодии матбуот поёнтар аз Афғонистон, ки онҷо зимоми қудратро Толибон дар даст доранд, қарор бигирад.

Ҷамъомади фарҳангии тоҷикӣ дар Варшава

Аз ҷониби

-

14/08/2023

Рӯзи 12-уми августи соли 2023 дар шаҳри Варшаваи Лаҳистон ҷамъомади фарҳангии тоҷикон баргузор гардид.

Ин ҷамъомадро Ассотсиатсияи лаҳистонии “Mova-język bez barier” дар ҳамкорӣ бо тоҷикони муқими ин кишвар ташкил кардаанд.

Баргузоркунандагон ҳадаф аз ташкили ин ҷамъомадро ошно намудани мардуми таҳҷоӣ бо фарҳангу ҳунарҳо ва сари як суфраи тоҷикӣ ҷамъ овардани тоҷикони муқими Лаҳистон мегӯянд.

Эла Кравчиковска, яке аз раҳбарони Бунёди “Mova, język bez barier” дар суҳбат бо Azda.tv гуфт, ки дар умум ҷамъомадӣ фарҳангии чанд қавму миллатҳои гуногун ташкил карда шуд, аз ҷумла аз курдҳо, Афғонистон, Тоҷикистон, Сурия, Украина ва Беларус.

Ба гуфтаи хонум Крачиковска, бо ташкили ин ҷамъомадҳо хостанд мардуми таҳҷоиро бо фарҳанги кишварҳое, ки бо он кам шиносанд ва ё фақат аз ҷангу мушкилоташон медонанду назари манфӣ дар бораи онҳо доранд, ошно кунанд.

“Хостем нишон диҳем, ки ҳама инсонҳо ҳуқуқи баробар доранд, фарҳангӣ худро доранду дар аксар ҳолатҳо бо хости худашон муҳоҷир намешаванд, яъне маҷбуранд ба муҳоҷират раванд” – мегӯяд Эла Крачиковска.

Гуфта мешавад, дар ҷамъомадҳои фарҳангӣ зодагони Тоҷикистон, Лаҳистон, Афғонистон, Украина, Эрон, Покистон, Беларус ва ғайра иштирок карда, бо фарҳангу хӯрокҳои якдигар ошно шудаанд.

Ҷалолиддини Маҳмуд, собиқ узви ҲНИТ дар зиндон даргузашт

Аз ҷониби

AZDA.TV

-

14/08/2023

Ҷалолиддини Маҳмуд, яке аз мақомдорони аршад ва собиқадорони Ҳизби наҳзати исломии Тоҷикистон дар зиндони шаҳри Ваҳдат шаби 12-уми августи соли ҷорӣ дар 63-солагӣ аз олам даргузашт.

Мақомоти зиндони мазкур рӯзи якшанбе, 13-уми август ба хонаводааш занг зада онҳоро аз даргузашти ӯ огоҳ кардаанд. Марҳумро худи ҳамон рӯз дар зодгоҳаш, шаҳри Ҳисор дафн карданд.

Паймони миллии Тоҷикистон, эътилофи чанд созмони мухолифони тоҷик дар хориҷ аз кишвар зимни нашри изҳороте марги Ҷалолиддин Маҳмудро ба “муносибати зиддиинсонӣ”-и мақомоти зиндонҳои кишвар марбут донист.

“Шӯрои ПМТ бар ин бовар аст, ки даргузашти мазлумонаи Ҷалолиддини Маҳмуд баёнгари муносибати ғайриқонунӣ ва зиддиинсонии ҳукумат нисбати зиндониёни сиёсӣ мебошад.”, омадааст дар изҳороти ПМТ.

Паймони миллии Тоҷикистон дубора маҳкум шудани Ҷалолиддини Маҳмудро “бо баҳонаи кӯмак ба зиндониёни сиёсӣ ва хонаводаҳояшон далели дигари амалҳои барномарезишудаи мақомот барои фишор болои зиндониёни сиёсӣ” донистааст.

Исломҷон Саидов, масъули Дастгоҳи иҷроияи Паймони миллии Тоҷикистон рӯзи 14-уми август дар суҳбат ба Azda tv гуфт: “Ин ки ПМТ сабаби марги Ҷалолиддин Маҳмудро аз муносибати зиддиинсонии мақомоти зиндон донистааст, аз таҷриба аст. Ин бори аввал нест, ки чунин ҳодиса рух медиҳад. Кушторҳои бидуни додгоҳӣ дар зиндонҳои Тоҷикистон кам нашудааст. Ва мо шоҳид ҳастем, ки дар зиндони Хуҷанд, дар роҳ ба Душанбе, дар зиндони Ваҳдат ва ҳодисаҳои зиёди дигаре ҳаст, ки ин нуктаро тақвият медиҳад.“

Саидов ҳамчунин дар идома афзуд, ки “дигарбора зиндонӣ шудани Ҷалолиддини Маҳмуд худ баёнгари муносибати зиддииинсонии мақомот аст, ки бо ҳар навъ фишор болои чеҳраҳои сиёсӣ мехоҳанд, ки ҳам садои онҳоро хомӯш кунанд ва ҳам худи онҳоро то метавонанд аз байн бибаранд.“

Ӯ ҳамчунин дар идома афзуд, ки ПМТ қасд дорад қазияи зиндониёни сиёсиро ба гуши ҷомеаи ҷаҳонӣ бирасонад.

Ҳамзамон рӯзи душанбе Абдусаттор Бобоев, раиси Кумитаи шаҳрвандии наҷоти гаравгонҳо ва зиндониёни сиёсии Тоҷикистон дар суҳбат ба Azda tv гуфт, ки “Ҷалолиддини Маҳмуд бори аввале, ки зиндонӣ шуда буд ва ҳатто вақте озод шуд, аз ҳеч беморие ранҷ намебурд. Аммо бори дуюм вақте зиндонаш карданд, аз фишори зиёди мақомот ва шароити номусоиди инсонӣ дар зиндон ба баъзе бемориҳо мубтало гашт.“

Ба гуфтаи ӯ, Ҷалолиддини Маҳмуд ба эҳтимоли зиёд зери фишори мақомот ҷон бохтааст на аз беморӣ.

Бобоев ҳамчунин афзуд, ки кумитаи онҳо барои расонидани хабари шиканҷа шудани зиндониёни сиёсӣ ва мушкилоти онҳо дар дохили зиндонҳои Тоҷикистон ба созмонҳои байналмилалии ҳуқуқи башар борҳо муроҷиат карданд, вале касе чорае нандешид.

Ёдовар мешавем, ки Ҷалолиддини Маҳмуд узви Раёсати олии ҲНИТ бори аввал моҳи феврали соли 2015, замоне ки узви Комиссия марказии интихобот ва раъйпурсӣ буд, бо иттиҳоми “нигоҳдории ғайриқонунии силоҳ” боздошт гардида ва ба 5 соли зиндон маҳкум шуд. Ӯ соли 2019 10 моҳ мондан ба охири муҳлати ҷазо аз зиндон раҳо шуд. Вале пас аз чанд моҳи озодӣ моҳи августи соли 2020 дигарбора бо иттиҳоми “ҳамкорӣ бо мухолифони дар пайгард қарордошта” боздошт ва ба 6,5 сол маҳкум шуд.

Ҷалолиддини Маҳмуд дар мақомҳои гуногуни дохили ҳизбӣ, аз ҷумла муовини раиси ҲНИТ, раиси бахши ҳизб дар навоҳии тобеи марказ ва дигар масъулиятҳо кор кардааст. Ӯ инчунин берун аз ҳизб, аз ҷумла ҳамраиси Комисияи назорат бар оташбаси миллӣ, узви Комиссияи оштии миллӣ ва инчунин узви Комиссияи марказии интихобот ва раъйпурсии Тоҷикистон кор кардааст.

Ӯро дӯстонаш рӯҳонии огоҳ аз улуми динӣ, фақеҳи барҷастаи исломӣ медонанд. Ба гуфтаи Муҳаммадсаид Ризоӣ, узви Раёсати олии ҲНИТ, Ҷалолиддини Маҳмуд “дар баробари доштани донишҳои фаровон ҳам соҳиби раъй ва ҳам ҷуръати баён кардани онро дошт.”

Лайкгузорӣ роҳи чор сокини ноҳияи Ванҷро ба зиндон боз кардааст

Аз ҷониби

-

11/08/2023

Мақомоти интизомии Тоҷикистон чор сокини ноҳияи Ванҷи Вилояти Мухтори Кӯҳистони Бадахшонро барои “лайк” гузоштан зери наворҳо боздошт кардаанд.

Имрӯз, 11-уми августи соли 2023, Домулло Назрӣ, хатиби масҷиди ҷамоати деҳоти Маҳмадулло Абдуллоев ноҳияи Ванҷ дар вақти хутбаи намози ҷумъа дар бораи боздошти 4 сокини ин ноҳия, ки 3 нафари онҳо аз ҳамин ҷамоат ҳастанд, хабар дод.

Ба гуфтаи ӯ, ин афроди боздоштшуда, ки 4-5 соли зиндон онҳоро таҳдид мекунад, “одамони шинохта ва афроди баобурӯ” дар ҷомеа ҳастанд. Вай аз дигар намозгузорон ҳам хост, ки ба гурӯҳҳои мухолифин, ки дар хориҷи кишвар қарор доранд, ҳамроҳ нашаванд ва падарону модарон ҳам дар ин амр бояд пеши роҳи фарзандони худро бигиранд, то ба “гурӯҳҳои мамнӯъ” дохил нашаванд.

Хатиби масҷиди ҷамоати деҳоти Маҳмадулло Абдуллоеви ноҳия Ванҷ, ки хутбаи пеш аз намози ҷумъаашро аз рӯи варақи аз ҷониби мақомот ирсолшуда қироат мекард, тасдиқ карда, ки ҷонибдорони мухолифин ва дигар гурӯҳҳои мамнӯъ дар Тоҷикистон дар ин ноҳия хеле зиёд шудааст.

Гуфта мешавад, аксари сокинони ноҳияи Ванҷ бар ин боваранд, ки дар ин минтақа яке аз роҳҳо таъсиргузорӣ ба мардум ва бахусус ҷавонон минбарҳои масҷидҳо мебошанд. Дар ин минбарҳо ба ҳисоби миёна ҳар ҳафта дар вақти хутбаҳои намози ҷумъа имомхатибон чанд дақиқаи вақти худро дар “таблиғ”-и гурӯҳҳои мамнӯъ ва бавежа мухолифини ҳукумати Эмомалӣ Раҳмон, ки дар хориҷи кишвар қарор доранд, сарф мекунанд. Аксари ҷавонон ҳам баъд аз ин “таблиғот” сӯроғи паёму наворҳои мухолифин дар шабакаҳои иҷтимоӣ мераванд.

Беш аз 1000 нафар бо иттиҳоми терроризму экстремизм дар пайгард қарор доранд

Аз ҷониби

-

11/08/2023

Тоҷикистон зиёда аз 1000 нафар аз шаҳрвандони худро бо иттиҳомӣ “терорризм” ва “экстримизм” дар пайгарди ҷаҳонӣ қарор додааст.

Рамазон Раҳимзода, вазири корҳои дохилии Тоҷикистон имрӯз, 11-уми август зимни нишасти хабарӣ дар Душанбе гуфт, ки беш аз 1000 нафар шаҳрвандони Тоҷикистон бо иттиҳоми терроризму экстремизм дар пайгард қарор доранд.

Ба гуфтаи вазир дар шаш моҳи аввали ҷорӣ аз шумораи умумии нафарони бо иттиҳоми терроризм дар пайгард қарор дошта, 32 нафарошон боздошт ва 130 нафари дигар аз хориҷ “ихтиёран” ба ватан баргардонда шудаанд.

Рамазон Раҳимзода дар идома қайд кард, ки 36 нафар шаҳрванди Тоҷикистон, ки аъзои ташкилотҳои террористиву экстремистӣ будаанд дар кишварҳои хориҷӣ, аз ҷумла 18 нафар дар Русия, 15 нафар дар Туркия, боқимонда дар Олмону Лаҳистон ва ғайра боздошт ва ба Тоҷикистон баргардонда шудаанд.

Инчунин, вазири корҳои дохилӣ гуфт, ки “дар натиҷаи бурдани корҳои фаҳмондадиҳӣ” 150 нафар аъзоёни ташкилотҳои террористӣ, ки дар хориҷи кишвар дар ҷангҳо иштирок кардаанд, “ихтиёран ва бо хоҳиши худ” ба Ватан баргардонда шудаанд. Аз ин шумора 131 нафарашон аз Русия, аз Туркия 7 нафар, аз Қазоқистон 5 нафар, Сурияву Ироқу Миср 6 нафар ва аз Қирғизистон 1 нафар будаанд.

Рамазон Раҳимзода дар ин нишаст иддао кард, ки таълимоти ғайриқонунии динӣ дар хориҷ ва дохили кишвар омили асосии пайвастани ҷавонон ва калонсолон ба равияву ташкилотҳои террористӣ буда, мақомот аз 52 шаҳрванди Тоҷикистон 18 нафарашонро бо ин баҳона аз хориҷ ба Ватан овардаанд.

Рамазон Раҳимзода дар тамоми нишаст, ки навораш дар шабакаҳои иҷтимоӣ нашр шудааст ва кайфияти хеле паст дорад, аз ягон ташкилоти терористиву экстремистӣ, нафарони боздоштшуда ва дар кадом кишвар ҷангидани зодагони Тоҷикистон ном набурд. Инчунин вазир нагуфт, ки аз шумораи умумии боздоштшудаҳо ва ба Тоҷикистон баргаштаҳо чанд нафарашон дар зиндон қарор доранду чанд нафарашон дар озодӣ.

Дар нишасти матбуотӣ аз вазир дар бораи истирдоди фаъоли тоҷик Низомиддин Насриддинов аз Белорусия пурсиданд, аммо Раҳимзода дар ин бора маълумоти пурра надода гуфт, ки Насриддинов барои содир кардани ҷиноятӣ экстремистӣ дар пайгард қарор дошту боздошт шудааст ва ҳоло дар тафтиши КДАМ қарор дорад.

Ба гуфтаи огаҳони умур, дар миёни боздоштшудаҳо ва дар пайгард қарор доштаҳо мухолифон ва фаъолони тоҷик кам нестанд, чун мақомоти Тоҷикистон асосан ба ин гурӯҳҳо иттиҳоми экстремизму терроризмро мезанад.

Афзоиши воридоти мошинҳои кӯҳна ба Тоҷикистон

Аз ҷониби

-

11/08/2023

Хадамоти гумруки Тоҷикистон дар нишасти матбуотии худ аз афзоиши воридоти мошинҳои кӯҳна ба Тоҷикистон хабар дод.

Бино ба иттилои расмӣ, дар шаш моҳи аввали соли 2023 ба ҳудуди Тоҷикистон зиёда аз 36 ҳазор адад мошинҳои бароришашон то соли 2013 ворид шудааст, ки нисбат ба ҳамин давраи соли 2022 21.6% зиёдтар аст.

Ба қавли Хуршед Каримзода, раиси Хадамоти гумруки Тоҷикистон, ин теъдод дар соли 2022 беш аз 45 ҳазор ададро ташкил дода буд ва дар соли 2021 бошад, воридоти мошинҳои бароришашон то соли 2013 зиёда аз 27 ҳазор ададро ташкил дода аст.

Раиси Хадамоти гумруки Тоҷикистон дар бораи иҷроиши Қарор Ҳукумати Тоҷикистон бораи манъи воридони мошинҳои бароришашон то соли 2013 ба расонаҳо гуфт, ки иҷроиши ин қарор аз 2-уми октябри соли ҷорӣ оғоз мешавад.

Гуфта мешавад, тибқи оморҳои расмӣ, айни замон дар Тоҷикистон ҳудуди 600 ҳазор мошин ба қайд гирифта шудааст, ки беш аз 500 ҳазор адади онҳоро мошинҳои сабӯкрав ташкил медиҳад.

Эътирофи Эмомалӣ Раҳмон ба нақзи ҳуқуқи инсон дар Тоҷикистон

Аз ҷониби

-

11/08/2023

Ҳукумати Эмомалӣ Раҳмон эътироф карда, ки нақзи ҳуқуқи инсон дар Тоҷикистон вуҷуд дорад, вале дар муддати 15 соли оянда ин мушкил оҳиста-оҳиста камтар хоҳад шуд.

Бино ба иттилои расмӣ, имрӯз, 11-уми августи соли 2023 ҳукумати кишвар “Стратегияи миллии Ҷумҳурии Тоҷикистон дар соҳаи ҳифзи ҳуқуқи инсон барои давраи то соли 2038”, тасдиқ кард.

Эмомалӣ Раҳмони 71-сола, ки яке аз дарозумртарин диктаторҳои дунё дар минтақа шинохта мешавад, ин иқдоми худро “дар асоси қарори Ҳукумати Ҷумҳурии Тоҷикистон аз 5 августи соли 2023, №357 тасдиқ” кардааст.

Иҷроиши ин санад барои 15 соли оянда бо баргузории бархе чорабиниҳо ба нақша гирифта шудааст, ва гумон аст, ки то вақте ҳукумати Эмомалӣ Раҳмон, ки тибқи раддабандиҳои ҷаҳонӣ яке аз фасодзадатирини низомҳо ва ситамкортарини ҳукуматҳо дар ҳаққи мардум ва сокинони кишвар шинохта шудааст, ба нақзи ҳуқуқи инсон дар Тоҷикистон хотима гузорад.

Мақомоти расмӣ дар Тоҷикистон таъкид мекунанд, ки “Стратегияи мазкур тамоми нақшаҳои миллии мавҷуда вобаста ба иҷрои тавсияҳои ниҳодҳои СММ оид ба ҳуқуқи инсон ва ҳуҷҷатҳои дигари самти ҳуқуқи инсонро дар худ таҷассум карда, механизм ва расмиёти иҷрои уҳдадориҳои байналмилалиро дар самти ҳуқуқи инсон такмил медиҳад.”

Аммо ҳамин ҳукумати Эмомалӣ Раҳмон, тавсияҳои ниҳодҳои СММ оид ба ҳуқуқи иснон ва дигар созмонҳои байналмилалиро дар бораи зиндониҳои сиёсӣ, фаъолони мазҳабӣ ва ҷомеи маданӣ ва рӯзноманигоронро қабул надорад.

Дар 7 соли ахир чандин маротиба ниҳодҳои СММ оид ба ҳуқуқи ва дигар созмонҳои байналмилалии ҳомии ҳуқуқи инсон аз Тоҷикистон хоста буданд, ки фаъолони мазҳабӣ ва ҷомеаи маданӣ, рӯзноманигорон ва зиндониёни сиёсии кишварро, ки бегуноҳ пушти деворҳои зиндон шиканҷа мешаванд, бидуни қайду шарт раҳо кунад, аммо Эмомалӣ Раҳмон тамоми ин тасвиҳоро нодида гирифта, нақзи ҳуқуқи инсон дар Тоҷикистонро зиёдтар кардааст..

Гуфта мешавад, “ҳуҷҷати мазкур аз ҷониби гурӯҳи кории байниидоравӣ бо назардошти стандартҳои байналмилалӣ дар соҳаи ҳуқуқи инсон, тавсияҳои ниҳодҳои соҳавии СММ, инчунин Ҳадафҳои рушди устувор таҳия ва қабул гардидааст.” Аммо, то замоне, ки ин ҳукумати фасодзада дар сари қудрат аст, иҷроиши ин санад, зери суол қарор мегирад.

Омбудсмени тоҷик дар Варшава

Аз ҷониби

-

11/08/2023