Дилшод Саидмуродов, гумонбари асосии куштори Шуҳрат Исматуллоев, муовини аввали раиси “Ориёнбонк” ҳангоми бозпурсӣ ҷузъиёти зиёди ин парвандаро фош кард.

Пйогоҳои хабарии “Бомдод” рӯзи 20-уми октябр чанд навори кӯтоҳеро аз ҷараёни бозпурсии Дилшод Саидмуродов, маъруф бо “Дилшоди СБ” ва ё “Дилшоди Красавчик” дар робита ба қазияи рабудани Шуҳрат Исматуллоев ва қатли ӯ нашр кард.

Дар наворҳо дида мешавад, ки Дилшод ҳангоми бозпурсӣ ва зоҳиран дар ҳузури адвокаташ иқрор мешавад, ки ӯ ин кушторро бо супориши Қамар Азизов, соҳибкор ва бародари сарояндагони гурӯҳи “Анис”, Азизовҳо анҷом додааст. Дилшод Саидмуродов мегӯяд, аз ин соҳибкор барои қатли Исмоилов 50 ҳазор доллар пешпардохт гирифтааст. Дар наворҳо сабти садо хуб шунида намешавад, вале зоҳиран Дилшод мегӯяд, Қамар барои “аз байн бардоштани Шуҳрат” якуним миллион доллар ба ӯ ва дастааш ваъда карда будааст.

Дилшод Саидмуродов дар ин бозпурсӣ мегӯяд, ки Қамар Азизов бо Исматуллоев тиҷорати муштараки хонасозӣ дошта ва аз ӯ қарздор будааст. “Қамар ба ман гуфт, Шуҳрат безор дорад, пула те пула те гуфта, намешавад ҳаминро як нима кунем?“, – мегӯяд Дилшод. Ӯ ҳамчунин шарҳ медиҳад, ки Шуҳрат ба Қамар Азизов ду миллион доллар ва ё бештар аз он барои хонасозӣ маблағ дода будааст.

Дилшод мегӯяд, бо он 50 ҳазор долларе, ки ҳамчун пешпардохт аз Қамар гирифта буд, ҳамроҳи дастааш як мошин мехаранду барои иҷрои нақша дар деҳаи Шодоби ноҳияи Варзоб як хонаеро иҷора мегиранд. Ӯ тафсилоти қазияи шиканҷа ва куштори Шуҳратро чунин шарҳ медиҳад: “Рӯзи 23-уми июн гирфтем Шуҳратро бурдем, камтар шиканҷа кардем, дар ҳолати шиканҷа гуфт, “Биткоин” надорам. Қамара занг задам, гуфтам, ки ин “Биткоин” надоштааст. Ӯ гуфт, нобуди “Биткоин” корро буд кунед, ман Маскав меравам ва аз онҷо маблағро мефиристаму ту ба бачаҳо медиҳӣ.” Ӯ дар идома мегӯяд, пас аз суҳбат бо Қамар шиканҷаро идома додааст, ки “ҳангоми шиканҷа Шуҳрат ҷон дод.“

Ҳамчунин Дилшод Саидмуродов дар ин бозпурсӣ иддао мекунад, ки Қамар ба ӯ пешниҳод кардааст, ки Шералӣ Кабир, вазири саноат ва технологияҳои Тоҷикистон ва менҷери собиқи ширкати алюминсозии ТАЛКО-ро “аз миён бардоранд.” Гӯё Қамар Азизов ба Дилшод гуфта, ки вазири саноатро ба хотири он ки “аз Шуҳрат дида ӯ пули бисёртар дорад”, аз миён бардоранд. “Вале мо қабул накардем, чунки Шералиро мешиносам вай ба ҳама ёрдам мекунад, дасти кушод дорад”.

Ёдовар мешавем, ки 23 июни соли 2023 хабари рабуда шудани муовини раиси “Ориёнбонк” Шуҳрат Исматуллоев расонаӣ шуд. Мақомот пас аз ҷустуҷӯи зиёд 12-уми август тавонистанд ҷасади Шуҳратро аз аз мавзеи Саразми Панҷакент пайдо кунанд.

Мақомот дар робита ба рабудан ва куштани Шуҳрат, Дилшод Саидмуродов, Акбар Ахмедов, Рустам Ашӯров, ки баъдан дар фурӯдгоҳи Молдова кушта шуд, Шоҳрух Хӯҷаев, Бахтовар Сафаров ва чанд нафари дигарро гумонбар дониста, алайҳи онҳо парвандаи ҷиноятӣ кушод. То ҳол ҳукми додгоҳии ин гурӯҳ эълон нашудааст.