Ҷустуҷӯ кунед
Ҷустуҷӯ
31.9 C
Dushanbe
Хона блог саҳифа 218

Як мухолифи тоҷик дар Белорус боздошт шудааст

Аз ҷониби
firuzihait
-
0

Мақомоти Беларус мехоҳанд як мухолифи тоҷикро ба Тоҷикистон истирдод кунанд.

Низомиддин Насриддинови 44-соларо, ки 8-уми январи соли ҷорӣ ҳангоми гузаштан аз Литва ба Беларус аз ҷониби мақомоти интизомии ин кишвар дастгир шуда буд, хатари истирдод ба Тоҷикистон ва шиканҷаву зиндон таҳдид мекунад.

Радиои Озодӣ рӯзи 14-уми март дар истинод ба Энира Бронитская масъули созмони ҳуқуқии “Human Constanta” менависад, ки Додситонии кулли Тоҷикистон рӯзи 21-уми феврали имсол истирдоди Насриддиновро талаб карда, Додситонии кулли Беларус паноҳандагии ӯро дар Олмон ба назар нагирифта, барои истирдод розӣ шудааст.

Бино ба иттилои манбаъ мақомоти Тоҷикистон Низомиддин Насриддиновро ба “даъвати оммавӣ ба ифротгароӣ” (моддаи 307, замимаи 1-и Кодекси ҷиноӣ) гумонбар медонанд.

Ба гуфтаи Энира Бронитская маълум нест, ки нисбати ин фаъоли тоҷик кай парванда боз шудааст, аммо дар парванда гуфта шуда, ки Насриддинов “дар Фейсбук маводи вобаста ба ҲНИТ-ро нашр карда, дар YouTube ҳам кадом видеоеро дар бораи президенти Тоҷикистон гузоштааст”.

Гуфта мешавад, Насриддинов аз замони боздошташ дар боздоштгоҳи шаҳри Гроднои Беларус қарор дорад ва аз қарори Додситонии кулли Беларус шикоят кардааст. Интизор меравад, даъвои ӯро 30-юми марти имсол дар додгоҳи вилоятии Гродно баррасӣ кунанд.

Гуфта мешавад, Низомиддин Насриддинов аз соли 2015 бо хонаводааш дар кишвари Олмон зиндагӣ мекунад ва мақоми паноҳандагии ин кишварро низ дорад.

Ӯ дар гузашта дар нишастҳои Созмони Амният ва Ҳамкорӣ дар Аврупо ширкат ва суханронӣ карда, худро аъзои Ҳаракати сиёсии “Гурӯҳи 24” гуфта буд. Аммо соли 2020 аз узвияти ин ҳаракати сиёсӣ ихроҷ карда шуда, вақтҳои охир ба тиҷорати мошин машғул будааст.

Эрон равобити худ бо кишварҳои арабиро оддӣ месозад

Аз ҷониби
amrullokhi
-
0

Ҷумҳурии Исломии Эрон, ки ахиран бо миёнҷигарии Чин равобити худ бо Арабистони Саудиро оддӣ кард, тасмим гирифта бо дигар кишварҳои арабӣ низ оддӣ бисозад.

Бино ба иттилои расонаҳои эронӣ, Ҷумҳурии исломӣ тасмим гирифтааст, ки пас аз оддӣ кардани равобити худ бо Арабистони Саудӣ инак муносибатҳои дипломатии худро бо кишварҳои Миср ва Баҳрайн ҳам аз сар бигирад.

Ба қавли ин расонаҳо, Носир Канъонӣ, сухангӯи вазири умури хориҷаи гуфта, ки “диплумосӣ натиҷаи худро ба хубӣ нишон додааст. Аз сар гирифтани равобити сиёсии Эрону Арабистон нишонаи муассир будан ва муваффақ будани роҳкори диплумотик барои рафъи сӯи тафоҳумот ва гом гузоштан дар масири ҷадиде барои тавсеи муносибот бар мабнои масолеҳ ва манофеи муштарак аст.”

Аз сӯи дигар, мақомоти расмие дар кишварҳои Баҳрайн ва Миср ҳам дар суҳбат бо расонаҳо таъйид карданд, ки ба хотири рафъи нофаҳмиҳо ва ҳаллу фасли мушкилоти мавҷуд масъулони дипломатӣ кори худро идома медиҳанд ва дар ояндаи наздик Теҳрону Манома ва Қоҳираву Теҳрон ҳам равобити дипломатии худро аз сар хоҳанд гирифт.

Гуфта мешавад, пас аз оғози “баҳори арабӣ” дар соли 2011-2013 дар кишварҳои арабии Шимоли Африқо ва Ховари Миёна Эрон ба зоҳир аз эътирозҳои мардумӣ дар кишварҳои арабӣ ва дар Сурия аз ҳукумати Башшор Асад ҳимоят мекард.

Инчунин вақте дар соли 2014 ҳам Ҳусиҳо дар Яман сари қудрат омаданд, ангушти иттиҳомоти кишварҳои арабӣ алайҳи Эрон зиёдтар шуд. Кишварҳои арабии ҳавзаи Халиҷи Форс ва Миср то ҳол Эронро ба дахолат кардан дар умури дохилии арабӣ, ба мисли Ироқу Сурия, Лубнон ва Яман муттаҳам мекунанд.

Аз сӯи дигар, Эрон ҳам Арабистони Саудӣ ва дигар кишварҳои арабиро ба дахолат кардан дар умури дохилии худ аз тариқи расонаҳои мухталиф ва шабакаҳои иҷтимоӣ муттаҳам мекунад. Ҳамин масъалаҳои дахолат дар умури дохилии кишварҳо боис гардида буд, ки равобити Эрон бо Арабистони Саудӣ, Баҳрайн ва Миср камранг ва пас аз ҳамла ба сафорат ва консулгарии Арабистон дар Теҳрон қатъ гардад.

Дар Тоҷикистон наздик ба як миллион нафар дар гуруснагӣ ба сар мебаранд

Аз ҷониби
amrullokhi
-
0

Намояндагии Созмони Милали Муттаҳид дар Тоҷикистон мегӯяд, ки наздик ба як миллион нафар аз норасоии ғизои солим дар кишвар ранҷ мебаранд.

Дафтари намояндагии ЮНИСЕФ дар Тоҷикистон дар саҳфаи твиттерии худ эълон карда, ки ҷанг дар Украина, КОВИД-19 ва тағйирёбии обу ҳаво сабаб шуда, ки зиёда аз 800 ҳазор нафар дар Тоҷикистон аз ноамнии шадиди ғизоӣ ранҷ бибаранд.

ЮНИСЕФ дар Тоҷикистон бо задани ин занги хатар аз дигар созмонҳои кумаккунандаи ҷаҳонӣ низ хостааст, ки бо таваҷҷуҳ ба осебпазир будани ҷамъият, аз ҷумла кӯдакон “ба хотири арзёбӣ ва посухи сареъ додан” ба ин масъала дар кишвар вориди амал шаванд.

Гуфта мешавад, мақомоти Тоҷикистон тайи чанд соли ахир аз минбарҳои баланд даъво доранд, ки бо сабаби сиёсатҳои пешгирифтаи ҳукумат ва талошҳои он сатҳи камбизоатӣ дар кишвар коҳиш ёфтааст, вале маълум мешавад, ин иддаоҳои ҳукуматдорон асоси воқеӣ надоранд.

Мурофиаи навбатии гумонбари қатли Ҳувайдои 5-сола

Аз ҷониби
firuzihait
-
0

Мурофиаи навбатии додгоҳии Александр Сёмин, нафари муттаҳам ба таҷовуз ва қатли Ҳувайдои 5-cола, тақрибан баъд аз 2 соли танаффус фардо 15-уми март баргузор мегардад.

Абдусалом Саидов, падари Ҳувайдо Тиллозода дар суҳбат ба расонаҳо гуфтааст, ки пагоҳ, 15-уми март соати 11 ба вақти маҳаллӣ онҳоро ба Додгоҳи вилояти Маскав даъват кардаанд. Саидов мегӯяд, умедвор аст, ки баъд аз 5 соли мубориза Александр Сёмин ҷазои сазовор хоҳад гирифт ва ин охирин мурофиа хоҳад буд.

Гуфта мешавад, ки мурофиа ин шахси муттаҳам ба қатл ва таҷовузи духтарачаи 5-солаи тоҷик, бори охир 22-юми июни соли 2021 баргузор гардида буд, ки бенатиҷа поён ёфта буд.

Ёдовар мешавем, ки Ҳувайдои хурдсол 22-уми июли соли 2018 бераҳмона кушта шуд. Ӯ аввал аз ҳавлии як хона дар ноҳияи Серпухови шаҳри Маскав дуздида шуд ва пас аз як рӯз ҷасадаш аз дохили як халтаи варзишӣ пайдо гардид. Санҷиши судӣ нишон дод, ки Ҳувайдои хурдсол аввал таҷовуз шуда ва сипас бо корд кушта шудааст.

Дар ин қазия як сокини 28-солаи маҳаллӣ Александр Семин бо гумони даст доштан дар қатли ин кӯдак боздошт шуд.

Дар манзили ӯ муфаттишон изи пойафзоли духтар ва изи ангушти ӯро пайдо карданд. Тибқи яке аз фарзияҳо, гумонбари куштор духтарро ҳангоми бозиаш дар ҳавлӣ бо додани бозича ҷалб карда, сипас ӯро рабудааст.

Ҷасади Ҳувайдоро рӯзи 25 июли соли 2018 ба Тоҷикистон оварданд ва дар зодгоҳаш дар шаҳри Кӯлоб дафн карданд.

Дар моҳи декабри соли 2019 додгоҳ қарор баровард, ки Александр Семин воқеан дар ин амали куштор даст дорад. Аммо худи айбдоршаванда Семин дар муҳокимаҳо ширкат накард, вакили мудофеаш иттиҳомоти алайҳи Семин эълоншударо рад кардааст.

Мурофиаҳои додгоҳӣ муддати панҷ сол аст, ки бо таъхирҳои дароз баргузор мешавад ва маълум нест, ки мурофиае, ки фардо баргузор мешавад, мурофиаи охир хоҳад буд ё на.

Сафари Эмомалӣ Раҳмон ба ИМА, Олмон ва Британия

Аз ҷониби
amrullokhi
-
0

Президенти Тоҷикистон барои иштирок ва мизбонии як конфронси ҷаҳонӣ дар Созмони Милали Муттаҳид озими Иёлоти Муттаҳидаи Амрико мешавад.

Бино ба иттилои расмӣ, аз 22-ум то 24-уми марти соли 2023 дар бинои Созмони Милали Муттаҳид (СММ) дар шаҳри Ню-Йорк конфронси “Об барои рушди устувор, 2018-2028” баргузор мегардад.

Конфронси СММ оид ба баррасии миёнамуҳлати Даҳсолаи байналмилалии амал “Об барои рушди устувор, солҳои 2018-2028” дар Амрико баргузор мешавад.

Ин конфрости ҷаҳонӣ дар бинои Созмони Милали Муттаҳид бо раисии Президенти Ҷумҳурии Тоҷикистон Эмомалӣ Раҳмон ва Подшоҳи Нидерланд Виллем-Александр гузаронида хоҳад шуд.

Гуфта мешавад, тайи ду соли ахир намояндагиҳои дипломатии Тоҷикистон ҳамроҳ бо намояндагиҳои дипломатии Подшоҳи Нидерланд дар дохил ва хориҷи кишвар барои бо шукӯҳ гузаронидани ин чорабинии сатҳи ҷаҳонӣ хеле талош кардаанд.

Дар назар аст Эмомалӣ Раҳмон баъд аз поёни сафари худ ба Иёлоти Муттаҳидаи Амрико озими Олмон шавад ва рӯзҳои 25-26-уми март дар Берлин бо мақомоти ин кишвар дидор кунад ва сипас вориди Ландан шуда, рӯзҳои 27-28 марти соли ҷорӣ ҳам бо мақомоти расмӣ дар шоҳигарии Британияи Кабир низ мулоқот хоҳад кард.

Боздошти мудири кӯдакистон бо иттиҳоми тасарруфи беш аз $200 ҳазор

Аз ҷониби
AZDA TV
-
0

Мудири кӯдакистони №27 шаҳри Хуҷанд ҳамроҳ бо як корманди ташкилоти қарзии “Имон интернешнл” бо иттиҳоми сохтакории ҳуҷҷатҳо ва тасарруфи амволи зиёд боздошт шуданд.

Бино ба гузориши дафтари матбуоти Агентии назорати давлатии молиявӣ ва мубориза бо коррупсияи Тоҷикистон, мудири кӯдакистони №27 шаҳри Хуҷанд Раупова Мадинаҷон Абдулатифовна “бо маслиҳати пешакӣ бо мутахассиси қарзии ҶСП ТАҚХ “Имон интернешнл” Раҳимбоев Маликхуҷа Мӯминҷонович бо сӯиистифодаи ваколат бархилофи дастурамалҳои Бонки миллии Тоҷикистон амал намуда, бо роҳи сохтакории ҳуҷҷатҳои бонкӣ ба ному насаби 11 нафар гӯё барои рушди тиҷорат ва таъмири хона маблағи умумии 161 050 доллари ИМА ва 727 500 сомонӣ қарзҳои бонкӣ тартиб додаанд.”

Ба иттилои манбаъ, гумонбарон бо таррафуи ин миқдор маблағи зиёд ба ташкилоти қарзӣ зарараи калон ворид карда, маблағҳоро ба манфиати шахсии худ сарф кардаанд.

Аммо, назари худи муттаҳамон ва ё вакили дифоу наздиконашон дастраси расонаҳо нест.

Агентӣ нисбати Раупова Мадинаҷон бо моддаҳои 246 қисми 3 банди “б”,  340 қисми 2 бандҳои “а,б” ва нисбати Раҳимбоев Маликхуҷа бо моддаҳои 246 қисм 3 банди “б”, 340 қисми 2 бандҳои “а,б” ва 265 Кодекси ҷиноятии Ҷумҳурии Тоҷикистон парвандаи ҷиноятӣ боз кард.

Гуфтам мешавад, аллакай таҳқиқи парванда ба поён расида, барои тасдиқи фикри айбдоркунӣ ба додгоҳ фиристода шуд.

Тиҷорати Бек Сабур ва мушкилоти сокинони Ваҳдат

Аз ҷониби
AZDA TV
-
0

Сокинони шаҳри Ваҳдат аз набудани Интернет ва таътили кори бонкҳои ин шаҳр шикоят доранд. Гуфта мешавад, бо сабаби тахриби бинои Почтаи куҳна дар ин шаҳр чунин мушкилот пеш омадааст.

Як сокини шаҳри Ваҳдат бе зикри ном дар суҳбат бо Azda tv гуфт, як ширкати сохтмонии мутааллиқ ба Бек Сабур, қудои Эмомалӣ Раҳмон бинои Почтаи ин шаҳрро бидуни огоҳии ширкатҳои интернетӣ ва ё кӯчондани онтенаҳои онҳо ба дигар макон, тахриб кардааст.

Ба гуфтаи манбаъ, айни замон ба сабаби тахриби бинои Почтаи шаҳр онтенаҳои ширкатҳои интернетӣ ҳам тахриб шудааст ва аз ин рӯ, бонкҳои мавҷуда дар шаҳр, ки корашон бо Интернет васл аст, аз кор мондаанд ва мардум ҳам дар назди бонкҳо мунтазиранд, ки кай корро аз нав оғоз мекунанд.

Гуфта мешавад, ширкати сохтмонии Бек Сабур дар макони Почтаи давлатии шаҳри Ваҳдат бинои баланди 25-табақадор месозад.

Ин дар ҳолест, ки мақомоти кишвар то ҳол ба аксар биноҳои сохтаи ширкатҳои марбут ба Бек Сабур баҳои хуб надодаанд ва ҳатто аксари биноҳои сохтаи ӯ аз комиссияи давлатӣ нагузаштаанд. Вале бо вуҷуди ҳама мушкилот ширкатҳои ӯ иҷозати фаъолият доранд.

Низом Мирзозода, раиси Кумитаи меъморӣ ва сохтмони кишвар, рӯзи 8-уми феврали соли ҷорӣ зимни нишасти матбуотӣ ба рӯзноманигорон гуфт, ки тибқи дастуру супоришҳои Рустами Эмомалӣ дар назди шаҳрдори Душанбе комиссияи корӣ ташкил шудааст ва онҳо дар робита ба биноҳои ширкати “Комил-2010” корбарӣ карда истодаанд. Ба гуфтаи Мирзозода, Хадамоти назорати сохтмон ҳангоми санҷиш дар ин иншоот камбудиҳоро ошкор кардааст.

Ҳамзамон 5-уми феврали соли 2021 Маҳмадсаид Зувайдзода, раиси собиқи Кумитаи меъморӣ ва сохтмони назди Ҳукумати Тоҷикистон зимни нишасти матбуотӣ ба хабарнигорон гуфта буд, ки Бег Сабур биноҳои нотамомашро ба анҷом расонад, иҷозатномаашро бозпас мегиранд ва ӯ аз рӯзноманигорон хоста буд, ки ба дигарон бирасонанд то бо ширкатҳои марбут ба Бег Сабур ҳамкорӣ накунанд.

Дар гузашта, баъд аз шикоят аз кори ширкатҳои хонасозии марбут ба Бег Сабур, раиси собиқи шаҳри Кӯлоб Баҳром Иноятзода аз ҷониби мақомот боздошт ва бо иттиҳоми қаллобӣ барои 12 сол равонаи зиндон гардида буд. Ба гуфтаи бархе огоҳони умур, Иноятзода маҳз ба хотири интиқоди шадид кардан аз қудои Эмомалӣ Рҳамон зиндонӣ шуд.

Мулоқоти подшоҳи Ҳоланд бо диктатори Тоҷикистон

Аз ҷониби
ofis
-
0

Ба гузориши расонаҳои ҳоландӣ, подшоҳи ин кишвари аврупоӣ барои ширкат дар Конфронси СММ вобаста ба об ба шаҳри Ню-Йорки Амрико сафар хоҳад кард.

Бино ба иттилои расонаҳо, Подшоҳ Виллем Александр (King Willem-Alexander) рӯзи чаҳоршанбе 22-уми марти соли ҷорӣ дар ифтитоҳия Конфронси Созмони Милалли Муттаҳид вобаста ба об суханронӣ кунад. Конфронси мазкур аз 22-ум то 24-уми март идома хоҳад кард.

Гуфта мешавад, кишвари Ҳоланд ин конфронси байналмилалиро бо ҳамраисии Тоҷикистон баргузор мекунад ва қарор аст Эмомалӣ Раҳмон низ дар ин конфронс ширкат ва суханронӣ намояд.

Интизор меравад, рӯзи 21-уми март пеш аз оғози кори конфронс Подшоҳ Виллем Александр бо Эмоалӣ Раҳмон дар шаҳри Ню-Йорк мулоқот дошта бошанд.

Ин дар ҳолест, ки Эмомалӣ Раҳмон беш аз 30 сол аст, конфронсҳои байналмиллалии оби тоза баргузор мекунад, вале сокинони Тоҷикистон, аз ҷумла пойтахти он шаҳри Душанбе ба оби нӯшидании тоза дастрасӣ надоранд.

Ифтитоҳи бинои ду мактаби нав дар пойтахт

Аз ҷониби
amrullokhi
-
0

Дар шаҳри Душанбе, пойтахти Тоҷикистон бинои ду мактаби нави замонавӣ мавриди баҳрабардорӣ қарор гирифт.

Бино ба иттилои расмӣ, субҳи имрӯз, 13-уми марти соли 2023, дар шаҳри Душанбе бинои ду мактаби нави муосир мавриди ифтифода қарор дода шуд, ки ҳар ду тавассути соҳибкорони ватанӣ сохта шудаанд.

Ба қавли манбаъ, барои 560 нафар хонанда дар ноҳияи Фирдавсии пойтахт Муассисаи таҳсилоти умумии ғайридавлатии «Мактаби ҷаҳон» (Global school) ифтитоҳ шуд. Ин мактаб аз ҷониби Ҷамъияти дорои масъулияти маҳдуди «Глобал Лизинг» сохта шудааст, ки дар

Инчунин бинои нави Литсейи равияи табиию риёзии Донишгоҳи миллии Тоҷикистон, ки қабал барои 311 хонандаи пешбинӣ шуда буд, аз ҷониби соҳибкори ватанӣ Абдухалил Ғуломов барои 1280 нафар хонанда бунёд гардида аст.

Гуфта мешавад, ҳар ду мактаб муассисаҳои хусусӣ буда, аз ҷониби соҳибкорони ватанӣ бунёд гардидаанд. Аммо Президент ва писари шаҳрдораш барои худнамоӣ ва рекламаи худ дар кори ифтитоҳи онҳо ширкат кардаанд.

Нисбати Хуршед Фозилов иттиҳоми расмӣ эълон шуд

Аз ҷониби
firuzihait
-
0

Кумитаи амнияти шаҳри Панҷакент баъд аз ҳафт рӯзи хомӯшӣ иттиҳоми рӯзноманигори боздоштшуда Хуршед Фозиловро ба пайвандонаш гуфтанд.

Хушбахт Фозилов бародари ин рӯзноманигори боздоштшуда, 13-уми марти соли ҷорӣ дар суҳбат ба Радиои Озодӣ гуфт, ки ҳамроҳи вакили дифоъ бо бародараш дирӯз, 12-уми март дар боздоштгоҳи муваққатии шаҳри Панҷакент (СИЗО) мулоқот кардаанд.

Ба гуфтаи Фозилов мақомот бародарашро бар асоси моддаи 307, қисми 2, банди “г”-и Кодекси ҷиноӣ (Даъвати оммавӣ барои бо роҳи зӯроварӣ тағйир додани сохти конститутсионӣ бо истифодаи воситаҳои ахбори омма ё шабакаи интернет) гумонбар медонанд. Ин банди қонуни ҷиноӣ аз се то ҳашт сол зиндонро дар назар дорад.

Пайвандони рӯзноманигор ин иттиҳоми мақомотро беасос медонанд. Худи Хуршед низ дар суҳбат бо бародараш иттиҳомро комилан рад карда, дар ҳаққаш туҳмат донист.

То ҳол мақомоти расмӣ шарҳ надодаанд, ки кай ва дар куҷо ин рӯзноманигори боздоштшуда ба тағйири сохти конститутсионии кишвар даъват кардааст.

Ба гуфтаи Хуршед Фозилов бародари боздоштшудааш “аз саломатияш шикоят надошт ва осори шиканҷа ҳам дар ӯ дида намешуд, аммо хароб шудааст”. Аммо ба гуфтаи огаҳони умур аксар нафароне, ки бо ин иттиҳомот боздошт мешаванд, мақомот барои гирифтани “эътироф”-и онҳо аз фишору шиканҷа истифода мебаранд ва дер ё зуд хабари шиканҷаи онҳо расонаӣ мешавад.

Дар ҳоле мақомоти амниятӣ бо гузашти беш аз ҳафт рӯзи боздошти ин рӯзноманигор нисбаташ айб эълон мекунанд, ки саҳфаҳои фейкии наздик ба мақомот, ки миёни мардум бо номи “фермаи ҷавоб” шинохта шудаанд, маъракаи бадномкунии Хуршед Фозиловро шуруъ карда, ӯро “мардумфиреб” ва “бесавод” номидаанд.

Пайванданош дар ҷавоб ба ин туҳматҳо гуфтаанд, ки Хуршед Фозилов хатмкардаи Донишгоҳи миллии Тоҷикистон буда, чандин маротиба аз тарафи мақомоти Панҷакент ифтихорнома гирифтааст. Дар яке аз аксҳое низ дида мешавад, ки намояндаи Ҳизби Халқии Демократии Тоҷикистон дар Панҷакент ба ӯ туҳфа дода истодааст.

Ёдовар мешавем, ки рӯзноманигори тоҷик Хуршед Фозилов рӯзи 6-уми марти соли ҷорӣ тақрибан соати 15:00-15:30 аз ҷониби ду шахси ношинос, ки дар тан либоси мулкӣ доштаанд аз дохили Идораи меҳнат, муҳоҷират ва шуғли аҳолии шаҳри Панҷакент дастгир ва ба макони номаълум бурда шуд.

Дертар маълум гашт, ки ӯро кормандони Кумитаи амнияти шаҳри Панҷакент боздошт кардаанд.

Гуфта мешавад, ҳоло компютери кориву шахсӣ ва телефонаш дар дасти кормандони Кумитаи амнияти Панҷакент мебошад.

Хуршед Фозилов 37 сол дошта, соҳиби 3 фарзанд мебошад ва аз минтақаи Зарафшон барои расонаҳои мустақил хабару гузоришҳои иҷтимоӣ менавишт. Пештар ӯро барои ҳамкорӣ бо собиқ сомонаи хабарии “Ахбор.ком” ҳамроҳи чанд рӯзноманигори дигар дар яке аз барномаҳои телевизиони Тоҷикистон намоиш дода буданд.

1...217218219...668саҳифаи 218 аз 668

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
few clouds
32.1 ° C
32.1 °
32.1 °
25 %
3kmh
20 %
Sat
35 °
Sun
37 °
Mon
39 °
Tue
41 °
Wed
42 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст