Пас аз ҳодисаи фурӯдгоҳи Кишинёв вазири дохилаи Молдова истеъфо дод

-

14/07/2023

Имрӯз, 14-уми июл дар Қасри миллат ҷаласаи машваратии Ҳукумат бо сардории Эмомалӣ Раҳмон ва писараш шаҳрдори Душанбе Рустами Эмомалӣ ва дигар масъулон баргузор шуд.

Бино ба иттилои дафтари матбуоти Президент, дар ин нишасти машваратӣ масъулини Ҳукумат роҳҳои беҳтар намудани рушди иқтисодӣ, вусъат додани ҳисоббаробаркунии ғайринақдиро мавриди баррасӣ қарор додаанд.

Масъулини Ҳукумат дар нишасти мазкур низ роҳҳои рушди маҷмӯи маҳсулоти дохилӣ, рушди соҳаҳои воқеии иқтисодиёт ва хидматрасониҳо, баланд бардоштани рақобатнокии корхонаҳои саноатии кишварро баррасӣ карданд.

Масъалаи дар ҷойгоҳи паст қарор доштани Тоҷикистон дар радабандиҳои ҷаҳонӣ масъулини Ҳукуматро нигарон карда, дар ин нишасти навбатӣ ҳамзамон дар бораи беҳтар гардонидани ҷойгоҳи кишвар дар шохисҳои созмонҳои байналмилалӣ гуфтугӯ карданд.

Гуфта мешавад, дар ин нишаст Эмомалӣ Раҳмон ба Ҳукумати кишвар ва дигар вазорату идораҳои марбута дар бораи “таъмин намудани суръати баланди интернет ва дастрас будани нархи он” дастур додааст. Ин дар ҳолест, ки Тоҷикстон тибқи радабандиҳои ахири ҷаҳонӣ, интернети аз ҳама гарон ва суръати аз ҳама поёнро дорад.

Эмомалӣ Раҳмон моҳи декабри соли гузашта, зимни ироаи паёмаш ба парулмони кишвар аз суръати пасти интенрент дар Тоҷикистон ва нархи гарони он интиқод карда, ба қудояш Бек Сабур, ки сардори Хадамоти алоқа ва масъулини таъмини бо сифати интернет аст, дастур дода буд, ки ин мушкилӣ бартараф карда шавад, вале то ҳанӯз ин масъала ҳалношуда боқӣ мемонад.

СММ дар бораи манъи иҳонат ба Қуръони Карим қатънома қабул кард

Аз ҷониби

-

13/07/2023

Рӯзи чоршанбе, 12-уми июли соли ҷорӣ Шӯрои ҳуқуқи Созмони Миллаи Муттаҳид дар пайи сӯзондани Қуръони Карим қатънома дар бораи нафратпарокании диниро қабул кард.

Қатъномаи мазкур бо 28 раъйи мувофиқ, 12 раъйи мухолиф ва 7 раъйи бетараф қабул гардид. Аз ҷумлаи кишварҳое, ки бо ин қатънома мухоилфат кардаанд, Амрико ва бархе кишварҳои аврупоӣ будаанд. Кишварҳои мухолиф бар ин назаранд, ки қатъномаи мазкур бо дидгоҳи онҳо дар мавриди ҳуқуқи башар ва озодии баён созгор нест.

Аммо дар қатъномаи Шӯрои ҳуқуқи башари СММ аз раиси ин шӯро хоста шуда, ки аз давлатҳо бихоҳад зимни баррасии қавонини дохилии худ дар мавриди нафрати динӣ, “халоҳоеро, ки мумкин аст монеи пешгирӣ ва пайгарди қонунии чунин иқдомот шавад, бартараф кунанд.”

Тарҳи ин қатънома аз ҷониби кишвари Покистон пешниҳод шудааст. Ҳамзамон Созмони ҳамкории исломӣ низ аз Шӯрои ҳуқуқи башар хоста буд, ки дар робита ба такрори иҳонати муқаддастарин китоби мусалмонон Қуръони Карим нишасти махсусе доир намуда, қазияи нафратпарокании диниро баррасӣ кунад.

Комиссари Ҳуқуқи башари СММ Фолкер Турк, зимни нишасте дар Женева, мақарри ин созмон, ки барои баррасии оташ задани Қуръон дар Суед (Шветсия) доир шуда буд, аз нафратпароканӣ дар ҳамаҷои дунё интиқод кард ва афзуд, ки ин иттифоқот барои барангехтани хашм ва эҷоди тафриқа дар ҷамеаҳо эҷод шудааст.

Ёдовар мешавем, ки рӯзи 28-уми июни соли ҷорӣ, ки рӯзи аввали Иди Қурбон буд, марди ироқитабори суедӣ бо номи Силвон Мумико дар муқобили масҷиди бузурги Стокҳолм дар Суед Қуръони Каримро оташ зад. Ин амали ӯ хашми мусалмонони саросари дунёро барангехт ва амали ӯро маҳкум карданд. Инчунин аз кишвари Сеуд хостанд ба чунин иқдомоти таҳрикомез иҷозат надиҳад, чун ин иқдомро наметавон озодии баёну андеша номид.

Дар пайи сӯзондани Қуръон ҳазорҳо нафар дар Покистон, Афғонистон, Туркия, Ироқ, Фаластин, Сенегал ва дигар кишварҳои исломӣ бо барпо кардани тазоҳуроти густарда маҳкум карданд. Попи Франсис, раҳбари католикҳои ҷаҳон низ ин иқдомро маҳкум кард.

Бузургмеҳр Ёров 20 соли дигар дар зиндон мемонад

Аз ҷониби

-

13/07/2023

Додгоҳи шаҳри Ваҳдат ба ҳукми зиндони адвокати шинохтаи тоҷик Бузургмеҳр Ёров боз даҳ соли дигар илова кард.

Муҳокимаи ин маҳбуси сиёсӣ рӯзи 10-уми июл дар Боздоштгоҳи рақами 1-и пойтахт баргузор шуд, аммо мақомот пайвандонашро нагузоштанд дар рафти муҳокима ширкат кунанд.

Додрас Бузургмеҳр Ёровро ба “қаллобӣ дар ҳаҷми махсусан калон” гумонбар донистааст. Худи Ёров иттиҳомоти мақомотро дар муҳокимаҳои гузашта сохта номида буд.

Ҷамшед Ёров, бародари Бузургмеҳр Ёров ва раиси бунёди “Бузургмеҳр” дар суҳбат ба Аzda.tv ин ҳукмро туҳмат ва бераҳмона номид. Ёров мегӯяд, мурофиаи бародараш пушти дарҳои баста гузашт ва Бузургмеҳр ба адвокат дастрасӣ надоштааст.

Гуфта мешавад, баъди ҳашт соли дар маҳбас будан ва татбиқи қонуни афв аз ҳукми Бузургмеҳр 10 солу 2 моҳ боқӣ монда буд. Бо ҳукми нав, муҳлати ҷазои ин маҳбуси сиёсӣ баробар ба 20 солу 2 моҳ шуд, ки аз ин 2 солашро дар Боздоштгоҳи пӯшида ва 18 соли боқимондаро дар маҳбаси Қурғонтеппа адо хоҳад кард.

Ёдовар мешавем, ки 24-уми ноябри соли 2022 адвокати тоҷик Бузургмеҳр Ёров аз зиндони шаҳри Ваҳдат барои 2 сол ба зиндони низомаш пӯшида ва пурзӯри маъруф ба “критий”-и шаҳри Душанбе интиқол ёфта буд.

Баъд аз ин Раёсати тафтишотии Вазорати корҳои дохилӣ нисбати ӯ парвандаи нав (парвандаи чорум)-ро бо иттиҳоми қаллобӣ боз кард ва то эълони ҳукм бо талаби худаш ӯро ба Боздоштгоҳи муваққатии рақами 1 гузарониданд.

Ин парванда бар асоси шикояти Ҳасан Ҳасанов, як зиндонии маҳбаси “Ваҳдат” боз шуда буд. Ҳасан Ҳасанов иддао кардааст, ки Бузургмеҳр Ёров бо ваъдаи озодӣ аз маҳбас аз ӯ 42 ҳазору 500 сомонӣ гирифтааст. Бузургмеҳр Ёров бо навиштани нома аз дохили зиндон чунин муомила бо Ҳасан Ҳасановро рад карда, онро туҳмати навбатии мақомот номида буд.

Пайвандони Бузургмеҳр Ёров ин иттиҳоми нави мақомотро сиёсӣ номида, мегӯянд, ки ба мисли дигар парвандаҳои мухолифини режими Эмомалӣ Раҳмон ва ё фаъолони ҷомеаи шаҳрвандӣ дар фазои дурӯғ, пинҳонкорӣ, бо фишору шиканҷа нисбати гумонбарон ва шоҳидону наздикони онҳо сохтаву бофта шудааст.

Адвокати шинохта ва маҳбуси сиёсии тоҷик Бузургмеҳр Ёров 28-уми сентябри соли 2015 баъди эълони омодагӣ ба ҳимоят аз ҳуқуқи аъзои боздоштшудаи ҲНИТ дастгир ва дар ҷиноятҳои мухталиф, аз ҷумла қаллобиву сохтакорӣ ва таҳқири Президент айбдор шуд. Бар ин асос додгоҳ ӯро ба 28 соли зиндон маҳкум кард. Худи ӯ ва тарафдоронаш ин иттиҳомотро рад карда, ҳукмро дорои ангезаҳои сиёсӣ меноманд.

То ҳол кишварҳои ғарбӣ ва чандин созмонҳои ҳомии ҳуқуқи башар борҳо аз мақомоти Тоҷикистон хостаанд, ки Бузургмеҳр Ёровро бидуни қайду шарт аз зиндон раҳо кунанд, вале мақомоти кишвар дар ҳеч маврид дархости ниҳодҳои ҳуқуқиро ба инобат нагирифтааст.

Чаро Эрон сафири Русия дар ин кишварро эҳзор кард?

Аз ҷониби

-

12/07/2023

Вазорати корҳои хориҷии Эрон дар пайи судури баёнияи муштараки кишварҳои арабии Халиҷи Форс ва Русия сафири ин кишвар дар Теҳронро эҳзор кард.

Рӯзи сешанбе Носир Канъонӣ, сухангӯи Вазорати корҳои хориҷии Эрон дар суҳбат бо расонаҳо матолиби дарҷёфта дар баёнияи муштараки кишварҳои Шӯрои ҳамкории Халиҷи Форс ва Русияро дар хусуси ҷазираҳои сегона рад кард ва ҳамзамон изҳор дошт, ки “ин ҷазоир тааллуқи абадӣ ба Эрон дошта ва судури ин гуна баёнияҳо бо равобити дӯстонаи Эрон ва ҳамсоягон муғйират дорад.“

Эрон ҷазираҳои Тунби Бузург, Тунби Кӯчак ва Абумусоро ҷузъи қаламрави худ меҳисобад ва мегӯяд, ин мавзуъ “ғайри қобили гуфтугӯ” аст. Аммо Имороти Муттаҳидаи Араб онҳоро хоки худ меҳисобад ва борҳо талаб карда, ки бо роҳи мусолиматомез ин ҷазираҳо ба ин кишвар баргардонида шаванд. Ва ҳатто масъаларо то ба Созмони Миллали Муттаҳид ҳам бардоштааст.

Нишасти Шӯрои ҳамкории кишварҳои арабии Халиҷи Форс ва Русия рӯзи душанбе, 10-уми июл дар Маскав баргузор гашт. Дар ин нишаст вазирони хориҷии кишварҳои Арабистони Саудӣ, Имороти Муттаҳидаи Араб, Уммон, Баҳрайн, Кувайт, Қатар ва Русия ширкат карданд.

Аъзои Шӯрои ҳамкорӣ дар поёни нишаст баёнияеро имзо карданд, ки дар он гуфта мешавад, парвандаи ин се ҷазира бори дигар ба Девони байналмилалии додгустарӣ фиристода шавад ва ин кишварҳо “хостори ҳаллу фасли ин масъала мутобиқи қавонини байналмилалӣ” шудаанд.

Русия аз мавзеи кишварҳои арабӣ дар хусуси ин се ҷазира пуштибонӣ кард, ки ин мавзеъгирӣ хашми Теҳронро ба бор овард ва бо ин далел сафири Маскав дар Теҳрон эҳзор шуд.

Ихроҷи 7 ҳазор муҳоҷир аз Русия

Аз ҷониби

-

12/07/2023

Мақомоти Русия мегӯянд, дар пайи тафтишҳои ахири муҳоҷирони корӣ дар ин кишвар қарор аст 7 ҳазор муҳоҷир ихроҷ шаванд.

Кормандони Вазорати корҳои дохилии Русия дар марҳилаи аввали тафтиш ё “рейд”-и муҳоҷирон бо номи “Нелегал-2023” дар бораи ихроҷи маъмурӣ ва истирдоди шаҳрвандони хориҷӣ аз ин кишвар ҳудуди 7 ҳазор қарор қабул кардаанд.

Намояндаи расмии ВКД-и Русия Ирина Волк ба расонаҳои русӣ гуфтааст, ки “дар робита ба ташкили муҳоҷирати ғайриқонунӣ, муомилоти ғайриқонунии воситаҳои нашъадор ва моддаҳои психотропӣ, муомилоти ғайриқонунии аслиҳа ва убури ғайриқонунии сарҳади давлатӣ зиёда аз 2000 парвандаи ҷиноӣ боз шудааст”.

Ба гуфтаи Ирина Волк, дар ҷараёни ин амалиёт кормандони Вазорати корҳои дохилӣ ва Хадамоти федеролии амнияти Русия ҳудуди 45 000 ҳолати нақзи қонуни муҳоҷират, аз ҷумла зиёда аз 33 ҳазор ҳолатҳои риоя накардани қоидаҳои вуруд, гузаштан тариқи транзит ва будубоши шаҳрвандони хориҷӣ дар қаламрави Русияро ошкор кардаанд.

Мақомоти Русия мегӯянд, дар беш аз 12 ҳазор ҳолати риоя нашудани анҷоми фаъолияти кориро аз ҷониби хориҷиён ҳуҷҷатгузорӣ намуда, 273 нафарро, ки дар ҷустуҷӯи федералӣ ва байналмилалӣ қарор доштаанд, ошкор карданд

Маълум нест, ки миёни муҳоҷироне, ки қоидаи будубошро дар Русия вайрон караанд чанд нафари онҳо шарвандони Тоҷикистон аст.

Амалиёти “Нелегал-2023”-и мақомоти рус аз 19-уми июн оғоз шуда, то 25 июн идома кардааст. Аммо муҳоҷирон мегӯянд, ки “рейд”-ҳо пештар аз ин шурӯъ шуда буданд ва то ҳол дар шаҳру ноҳияҳои Русия идома доранд.

Ба гуфтаи муҳоҷирон, чанд рӯзи охир дар шаҳру ноҳияҳои Русия тафтишу боздошти муҳоҷирон дигарбора авҷ гирифтааст ва мақомоти интизомии ин кишвар ҳангоми гузарондани “рейд”-ҳо даст ба қонуншиканиҳои зиёде мезананд.

Мақомоти рус иддао мекунанд, ки ҳадафи аслии амалиёти “Нелегал-2023” ба эътидол овардани вазъи муҳоҷират дар қаламрави кишварҳои узви Созмони Паймони Амнияти Дастаҷамъӣ аст.

Аммо дар шабакаҳои иҷтимоӣ наворҳои зиёде нашр шуда, ки дар онҳо дида мешавад, мақомоти интизомии ин кишвар муҳоҷиронро гурӯҳ-гурӯҳ боздошт намуда, ба боздоштгоҳҳо мебаранд. Инчунин, дар баъзе наворҳо дида мешавад, ки муҳоҷирон дастҳо пушти сар дар замин хобидаанд ва аз ҷониби мақомоти рус нисбати онҳо таҳқир ва рафтори номуносиб сурат мегирад.

Идораи динии мусалмонони вилояти Маскав бо нашри изҳороте амали афсарони ОМОН-ро дар вақти “рейд”-ҳо “ваҳшиёна” номида, онро тафтиши таҳқиромез номид ва онро аз рӯи усулаш бештар на ба тафтиши ҳуҷҷатҳо, балки ба амалиёти боздошти ҷинояткорони махсусан хавфнок монанд карда буд.

Тағйироти кадрӣ дар сохторҳои Вазорати корҳои дохилаи Тоҷикистон

Аз ҷониби

-

12/07/2023

Рӯзи 12-уми июли соли 2023 бо фармони раиси Ҳукумат Эмомалӣ Раҳмон дар чанде аз бахшҳои Вазорати корҳои дохилаи Тоҷикистон тағйири кадрӣ сурат гирифт.

Тибқи иттилои маркази матбуоти Президент, имрӯз Раҳмон бо як фармон Қурбонзода Суҳробро аз вазифаи сардори Раёсати Бозрасии давлатии автомобилии Тоҷикистон озод намуд ва бо як фармони дигар ба ҷои ӯ Мирзомуродзода Рустамро ҷойгузин кард.

Раисҷумҳур ҳамчунин сардори Раёсатҳои Вазорати корҳои дохилӣ дар минтақа ва ноҳияи Рашт, сардори Воҳиди махсуси ВКД оид ба самтҳои ҳаракати Президент ва меҳмонони олиқадр, сардори Раёсати экологӣ ва сайёҳӣ ва инчунин сардори Раёсати Бозрасии давлатии автомобилӣ дар шаҳри Душанберо иваз кард.

Гуфта мешавад, ба хотири вуҷуди қонуншиканиҳои зиёд дар байни кормандони БДА-и ВКД, аз ҷумла рондани мошинҳои бе рақами қайди давлатӣ, итоат накардан ба талаботи қоидаи ҳаракат ва дигар қонуншиканиҳо, дастур дода шудааст, ки тамоми кормандони БДА аз аттестатсия гузаронида шаванд.

Аксари корбарон бар ин назаранд, ки дар пайи чанд тасодуфи мудҳиши як моҳи ахир, ки сабаби марги даҳҳо нафар гардид, пок кардани сафи кормандони БДА ба маврид аст. Зеро, ба гуфтаи онҳо, кормандони ин ниҳод ҳуҷҷатҳои ронандагиро мефурӯшанд ва ё аз бисёри қонуншиканиҳои роҳ бар ивази гирифтани ришва чашм мепӯшанд.

Саидумар Саидов ба 6 соли зиндон маҳкум шуд

Аз ҷониби

-

12/07/2023

Саидумар Саидов, хоҳарзодаи Шамсиддин Саидов, узви аршади Ҳизби наҳзати исломии Тоҷикистон ба 6 соли зиндон маҳкум шуд.

То ҳол маълум нест, ки мурофиа кай ва дар куҷо баргузор шудааст ва Саидумарро бо чӣ ҷурме равонаи зиндон кардаанд.

Мақомот аз замони боздошти Саидумар то ҳол чизе нагуфтааст.

Аммо Шамсиддин Саидов дар саҳфаи фейсбукиаш навишт, ки додрас Аҳлиддин Назарзода Саид “Саидумарро бе ягон далел фақат ба хотири ин, ки дар ҳаққи тағояш Абдуллоҳ дуъо кардааст, 6 сол ҳукми зиндон додааст”.

Мақомоти шуъбаи Вазорати корҳои дохилии ноҳияи Кӯшонинён 18-уми апрели соли ҷорӣ Саидов Саидумар, хоҳарзодаи Шамсиддини Саидро даъват карда, пас аз чанд соати бозпурсӣ дар бораи тағояш ӯро боздошт ва алайҳаш мувофиқи моддаи 307-и Кодекси ҷиноятии Тоҷикистон парванда боз карданд.

Бино ба иттилои манбаъ, Саидов Саидумар, ки оиладор ва интизори таваллуди аввалин фарзандаш буд, ба он муттаҳам мешавад, ки гӯё бо худи Шамсидддини Саид дар иртибот будааст, аммо Шамсиддини Саид мегӯяд, наздиконаш “аз тарси фишори мақомот ҳеч иртиботе бо ман надоштанд.”

Ин узви аршади ҲНИТ пештар ба Azda.tv гуфта буд, ки боздошти хоҳарзодааш идомаи фишорҳои мақомот болои ӯст. “Пас аз ҳукми 7 соли зиндон ба Абдуллоҳи писарам боздошти хоҳарзодаамро идомаи фишорҳо болои хеш меҳисобам.”

Ёдовар мешавем, ки мақомоти тоҷик пас аз ихроҷи Абдуллоҳи Шамсиддини, писари Шамсиддини Саид аз Олмон ба Тоҷикистон 29-уми марти соли ҷорӣ ӯро бо моддаи 307 қисм 1-и Кодекси ҷиноятии Тоҷикистон гунаҳкор дониста, 7 сол аз озодӣ маҳрум сохт. Худи Абдуллоҳ ва пайвандонаш иттиҳомоти мақомотро сохта медонанд ва онро қабул надоранд. Фаъолон ва созмонҳои байналмилалӣ зиндонӣ шудани Абдуллоҳро ба фаъолиятҳои падараш рабт медиҳанд ва борҳо озодии ӯро аз мақомот талаб карда буданд.

Бо пайдо шудани маълумоти нав хабар такмил мешавад.

Корманди ҳарбӣ бо ҷурми қаллобӣ ба 10 соли зиндон маҳкум шуд

Аз ҷониби

-

11/07/2023

Як корманди Комиссариати ҳарбии ноҳияи Фирдавсии шаҳри Душанбе бо ҷурми қаллобии дар ҳаҷми калон барои 10 сол аз озодӣ маҳрум шуд.

Додситонии кулли Тоҷикистон 10-уми июли соли ҷорӣ хабар дод, ки иҷрокунандаи масъул оид ба назорати мудофиаи ҳудудии зершуъбаи сафарбарии Комиссариати ҳарбии ноҳияи Фирдавсии шаҳри Душанбе, прапоршик Мирсалимов Рустам Обидҷонович танҳо дар давоми қариб се моҳ 31 нафарро дар ҳолатҳои гуногун фиреб дода, дар маҷмӯъ аз онҳо наздики 700 ҳазор сомонӣ гирифта, азхуд кардааст.

“Дар рафти тафтишот муайян шуд, ки Мирсалимов Р.О. бо мақсади ғараз ва тасарруфи молу мулки ғайр ё ба даст овардани ҳуқуқ ба молу мулки ғайр бо роҳи фиреб ё сӯиистифодаи боварӣ дар давраи аз моҳи июл то моҳи сентябри соли 2022 дар 9 ҳолат ба содир намудани чинояти қаллобӣ даст зада, 31 нафар шаҳрвандонро фиреб дода, ба онҳо дар маҷмуъ ба маблағи 689493 сомонӣ зарари моддӣ расонидааст.“, омадааст дар хабари Додситонии кул.

Ба иттилои манбаъ, номбурда бо либоси ҳарбӣ ба боғчаи кӯдаконаи №31-и ноҳияи Синои шаҳри Душанбе рафта, худро ҳамчун намояндаи Комиссариати ҳарбии ноҳияи Фирдавсӣ муаррифӣ намуда, гуфта, ки аз ҷониби Арабистони Саудӣ кумаки хайриявӣ барои ниёзмандон дарёфт кардааст ва ба шарти додани он кумак аз кормандони он 6793 сомонӣ ҷамъоварӣ намуда гирифтааст.

“Инчунин, Мирсалимов Р.О. амалҳои ҷинояткоронаи худро давом дода, 2 октябри соли 2022 бо либоси низомӣ ба бозори “Меҳргон”, воқеъ дар ноҳияи И.Сомонии шахри Душанбе рафта, бо сохибкор Абдураҳимов М. вохӯрда, худро ҳамчун корманди Комиссарияти ҳарбӣ муаррифӣ карда, бо роҳи фиреб ва сӯиистифодаи боварӣ арз намудааст, ки ба ӯ чорсад халта орд лозим буда, бояд ба қисмҳои харбии Вазорати мудофиаи ҷумҳурӣ тақсим намояд. Баъди пурра тақсим намудан маблағи ордҳоро ҳатман пардохт менамояд.

Номбурда баъди гирифтани 350 халта орди навъи якум ба маблағи 115500 сомонӣ онро ба дигарон фурӯхта, маблағҳои бадастовардаро ба манфиати шахсияш истифода бурда, ба шаҳрванд Абдураҳимов М. ба миқдори махсусан калон зарари моддӣ расонидааст.“, таъкид мешавад дар хабар.

Додситонии кулли кишвар мегӯяд, нисбати номбурда бо иттиҳоми қаллобӣ ба миқдори махсусан калон (бо моддаи 247 қисми 4 банди “б” Кодекси ҷиноятии Ҷумҳурии Тоҷикистон) парвандаи ҷиноятӣ боз шуда, додгоҳ низ ҳукми зиндонии ӯро содир кард.

Гуфта мешавад, Додгоҳи ҳарбии гарнизони Душанбе барои Мирсалимов “ҷазои маҳрум сохтан аз озодӣ ба муҳлати 10 сол, бо маҳрум кардан аз ҳуқуки ишғоли мансабҳои муайян ё машғул шудан ба фаъолияти муайяни мансубияти ҷавобгарии молу мулкидошта ба муҳлати 3 сол, бо адои ҷазо дар колонияи ислоҳии дорои низомаш пурзӯр” ҳукм баровард.

Намозгузорони Котелники аз рафтори ғайриқонунии ОМОН ба Путин шикоят карданд

Аз ҷониби

-

11/07/2023