Владимир Путин амр кардаст, ки тамоми сокинони ғайринизомии Херсон, ки тоза ба хоки Русия ҳамроҳ карда буд, аз ин минтақа хориҷ карда шаванд.

Бино ба иттилои Rueters, Владимир Путин имрӯз дар Маскав эътироф кардааст, ки вазъият дар Херсон хеле хатарнок аст, ва ба ин хотир амр карда, онҳое, ки дар Херсон зиндагӣ мекунанд, бояд аз минтақа хориҷ карда шаванд ва набояд мардуми мулкӣ (дар асари даргириҳо) зарар бибинанд.

Ин фармони Президенти Русия дар ҳоле содир шуда, ки тайи як ҳафтаи ахир ҳамлаҳои Русия ба шаҳру ноҳияҳои Украина афзоиш ёфтааст ва дар рафти ин ҳамлаҳо зерсохторҳои давлатӣ ва ҷамъиятӣ зери борони ҳамлаҳо қарор гирифта, зарар дидаанд.

Мақомоти Украина ҳам субҳи имрӯз эълон кардаанд, ки бар асари ҳамлаҳои Русия ба зеристгоҳҳои барқӣ ва харобу валангор кардани онҳо айни замон беш аз 4,5 миллон нафар аз истифодаи нерӯи барқ маҳрум шудааст.

Гуфта мешавад, Херсон яке аз вилоятҳои Украина аст, ва ахиран Русия бо баргузории як раъйпурсие, ки на Киев ва на дигар давлатҳои дунё аз нигоҳи қонунӣ сиҳати онро эътироф накарданд, ба хоки худ ҳамроҳ кард, вале бо ин вуҷуд нерӯҳои украинӣ низ барои боз гирифтани ин минтақа талошҳои худро афзоиш додаанд ва ҷанг дар он шиддат гирифтааст.

Владимир Зеленский, расиҷумҳури Украина дар паёми видеоие гуфт, ки бар асари ҳамлаҳои Русия бар зерсохторҳои энержии ин кишвар зиёда аз 4,5 миллон нафар бебарқ мондаанд.

Раисҷумҳури Украина мегӯяд Русия ба нобуд кардани зерсохторҳои энержӣ даст задааст ва афзуд, ки Кремлин ба “терроризми энержӣ” рӯ овардааст.

Бино ба қавли Зеленский, шаби гузашта тақрибан дар 10 минтақаи ин кишвар, аз ҷумла дар шаҳри Киев барқ умуман вуҷуд надоштааст.

Ӯ афзуд, ки ҳамлаҳои густардаи Русия қариб сеяки зерсохторҳои энержии ин кишварро хароб када ва ҳоло барои тақрибан 4,5 миллион истеъмолкунанда барқ муваққатан қатъ карда шудааст.

Ба гуфтаи ӯ, сокинон дар 10 минтақа: Киев, Днепропетровск, Житомир, Запороже, Сумӣ, Кировоград, Харков, Чернигов, Хмелнитский ва Черкасӣ аз нерӯи барқ ​​маҳрум мондаанд. Раисиҷумҳур афзуд, аз эҳтимол дур нест, ки дар минтақаҳои дигар низ интиқоли нерӯи барқ ​​қатъ шавад.

Зеленский аз мақомоти маҳаллӣ хост, ки сарфаи барқро дар саросари кишвар назорат кунанд ва нагузоранд дар чунин вазъият барқ беҳуда масраф шавад. Ӯ дар хитоб ба масъулин таъкид кард, ки “ҳоло вақти равшан кардани витринаҳо, лавҳаҳо, таблиғҳо ва дигар равшании ба инҳо монанд нест”.

Расиҷумҳури Украина ҳамчунин аз масъулини кишвараш хост ба мардум фаҳмонанд, ки барқ аз онҳо кай ва барои чӣ қатъ карда мешавад.

Дар ҳафтаҳои ахир Русия ҳамлаҳои мушакӣ ва паҳподии густардаи худро ба таъсисоти барқи Украина оғоз кард. Ин ҳамлаҳо дар ҳоле анҷом мешаванд, ки бар асоси баъзе гузоришҳо, эҳтимоли ақибнишинии нерӯҳои Русия аз шаҳри муҳими Херсон, ҷануби Украина вуҷуд дорад.

Гуфта мешавад, пас аз пешрафти чашмгири нерӯҳои украинӣ дар баъзе ҷабҳаҳо, Русия ба ҳамлаҳои тактикӣ ва дур аз минтақаи ҷангро пеш гирифтааст, то пешравии нерӯҳои украиниро коҳиш диҳад.

2-уми ноябри соли ҷорӣ, Лаҳистон дар марзи 210-километрияш бо Русия ба сохтани девор, ки дувуним метр баландӣ дорад, оғоз кард.  

Мариуш Блашак, вазири дифои Лаҳистон дар ин бора мегӯяд, ки “бинобар он, ки фурӯдгоҳи Калининград барои парвозҳо аз Ховари Миёна ва Африқо боз шудааст, ман тасмим гирифтам, ки барои таҳкими амнияти сарҳад чораҳо биандешам. Имрӯз сарбозон дар марзи Лаҳистон бо вилояти Калининград ба сохтани садди муваққатӣ шуруъ мекунанд”.

Дар идома ӯ изҳор дошт, ки тасмим гирифта шудааст, ки “девор ҳарчи зудтар сохта мешавад ва барои он ҳар қадаре, ки лозим бошад, сарбозон ҷалб карда мешаванд”.

Гуфта мешавад, мақомоти Лаҳистон мехоҳанд, ба ин восита аз даромадани муҳоҷирони зиёде ба ин кишвари аврупоӣ пешгирӣ кунанд.

Дар ҳамин ҳол, Вазорати умури дохилии Эстония низ эълом кард, ки манотиқи муҳофизатӣ дар марз бо Русияро аз 10 то 300 метр васеъ мекунад. Сардори шуъбаи сиёсати марзӣ ва муҳоҷирати Эстония Янек Маги гуфта буд, ки дар ин минтақа, ки он низ таҳти назорати камераҳо қарор дорад, иншооти иловагии зерсохторӣ бунёд хоҳад шуд.

Пештар аз ин дар моҳи январ, дар пасманзари буҳрони муҳоҷирон, Лаҳистон бо арзиши 353 миллион евро ба бунёди девор дар марз бо Беларус шуруъ кард, ки баландии панҷуним метр ва 186 километр дарозӣ дорад.

Литва низ дар марзаш бо Белорус бо маблағи 152 миллион евро девори 502-километрӣ сохт.