Субҳи имрӯз раиси вилояти Суғдро дар шаҳри Хуҷанд иҷозат надоданд, ки болои қолинҳои сурх ва сафеде, ки дар фурӯдгоҳ ва толори пазироӣ фарш карда буданд, роҳ равад.

Бино ба иттилои расмӣ, субҳи имрӯз, 29-уми марти соли 2023 сафари Президенти Тоҷикистон ба вилояти Суғд оғоз шуд, аммо тавре дар аксу наворҳои нашршуда дида мешавад, масъулини ҳукумат бархе ҳаракатҳо ва тараддудҳои раиси вилоятро маҳдуд кардаанд.

Дар аксу наворҳое, ки аз рафти пазироии Эмомалӣ Раҳмон дар фурӯдгоҳи шаҳри Хуҷанд нашр шуда, дида мешавад, ки ба раиси вилоят иҷозат надоданд, ки паҳлӯи Эмомалӣ Раҳмон рӯи қолинҳои сурх, ки ба дарозои ҳудуди сад метр фарш гардида буданд, ҳаракат кунад.

Инчунин ба Раҷаббой Аҳмадзода, раиси вилояти Суғд иҷозат надодаанд, ки дар толори пазироии фурӯдгоҳи шаҳри Хуҷанд, маркази маъмурии ин вилоят болои қолини сафеде, ки ба дарозои даҳҳо метр ба истиқболи Эмомалӣ Раҳмон фарш гардида буд, дар паҳлӯ не, балки ба он наздик шавад.

Дар ин аксу наворҳо дида мешавад, раиси вилоят се метр дуртар рост истода аз пушти сутуни гулҳо дуздида-дуздида ба Эмомалӣ Раҳмон, ки рӯи қолин ҳаракат мекунад, нигоҳ мекунад.

Гуфтанист, тавре дар аксу наворҳо дида мешавад, мақомоти вилояти Суғд танҳо барои истиқболи Эмомалӣ Раҳмон дар фурӯдгоҳи шаҳри Хуҷанд наздик ба 600 нафар аз донишомӯзону донишҷӯён ва дигар ҷавононро барои пазироӣ ва рақсидану по куфтан истихдом кардаанд.

Ин сафари Эмомалӣ Раҳмон ба шаҳру ноҳияҳои вилояти Суғд ба муддати чор рӯз идома пайдо хоҳад кард ва дар ин муддат тавре пештар дар расонаҳо гуфте мешуд, ҳар гуна ҳаракти воситаҳои нақлиёти шахсӣ ва ҷамъиятӣ дар хеле аз роҳҳои кӯчаҳои марказии шаҳрҳои Хуҷанд, Гулистон, ноҳияҳои Бобоҷон Ғафуров, Спитамен ва Зафаробод маҳдуд мешавад, ки ин боиси саргардонии мардум хоҳад шуд.

Амруллоҳи Низом

Раёсати Бозрасии давлатии автомобилии Вазорати корҳои дохилии Тоҷикистон дар вилояти Суғд аз роҳбандӣ дар бархе шаҳру ноҳияҳо хабар додааст.

Бино ба иттилои расмӣ, 1-уми апрели соли 2023 Эмомалӣ Раҳмон бо сафари корӣ ба маҳаллаи Хитойи ноҳияи Бобоҷон Ғафуров сафар мекунад ва ба хотири таъмини ин сафар ба муддати 4 рӯз ҳаракати воситаҳои нақлиёт дар шоҳроҳи Хуҷанд-Бобоҷон Ғафуров маҳдуд карда мешаванд.

Ба қавли манбаъ, барои таъмини ин сафар ҳаракати воситаҳои нақлиёт дар “кӯчаҳои марказии шаҳри Гулистон, шоҳроҳи Хуҷанд-Бобоҷон Ғафуров ва Хуҷанд-Конибодом то гардиши ҷамоати Хистеварзи ноҳияи Бобоҷон Ғафуров, роҳи Конибодом-Деҳмой аз ҷамоати Исфисор то Деҳмой, роҳи автомобилгарди ҷамоати Овчӣ-Қалача, деҳаи Навободи ҷамоати Ғозиён, Деҳмой то ҷамоати Ёваи ноҳияи Бобоҷон Ғафуров, пули ҷашнии маҳаллаи Сартуқай (Хитой) то маҳаллаи 3, кӯчаҳои Р. Ҳоҷиев, И. Сомонӣ, Фирдавсӣ ва Ҷӯра Зокирии шаҳри Хуҷанд, шоҳроҳи Хуҷанд Ғафуров, кӯчаҳои марказии шаҳри Гулистон” маҳдуд карда мешаванд.

Инчунин дар назар аст, ҳаракати воситаҳои нақлиёт дар кӯчаҳои марказии шаҳри Бӯстон, шоҳроҳи Хуҷанд-Б.Ғафуров,  кӯчаҳои марказии шаҳри Гулистон, роҳи Гулистон Хуҷанд то Боғи миллӣ низ 29-уми марти соли ҷорӣ маҳдуд карда мешаванд.

Гуфта мешавад, ҳаракати мошинҳо рӯзҳои 30-уми март ҳам кӯчаҳои марказии шаҳри Истиқлол, шоҳроҳи Хуҷанд-Б.Ғафуров ва 31-уми март низ қисман кӯчаҳои ноҳияҳои Спитамен ва шаҳраки Зафарободи ноҳияи Зафаробод маҳдуд карда мешаванд.

Ин роҳбандиҳо ба хотири сафари Раҳмон ба вилояти Суғд ва баргузории ҷашни Наврӯз сурат мегирад. Дар чунин шароит то рафтани раисҷумҳур аз вилоят мардум ба мушкилоти зиёде рӯбарӯ хоҳанд шуд. Аз ҷумла, сари вақт расидани донишҷӯён ба дарсҳо ва ё кормандони давлатӣ ба ҷойҳои корӣ хеле мушкил мегардад.