Айбдоркунандаи давлатӣ дар мурофиаи дуввум аз додрас ба рӯзноманигор ва блогери шинохтаи тоҷик Далери Имомалӣ 10,5 соли зиндон талаб кардааст.

Радиои Озодӣ дар истинод ба манобеаш хабар медиҳад, ки мурофиаи ин рӯзноманигор рӯзи 12-уми октябр дар Боздоштгоҳи муваққатии шаҳри Душанбе баргузор гардида, он ба марҳилаи ниҳоӣ расидааст ва дар мурофиаи оянда Далер сухани охиринашро ироа мекунад.

Ба гуфтаи манбаъ, додситон аз додрас барои ин рӯзноманигор 10,5 соли зиндон талаб кард ва дар мурофиаи оянда баъд аз шунидани сухани охирини Далер додрас барои қабули ҳукм ба хонаи машваратӣ меравад.  

То ҳол маълум нест, Далери Имомалӣ ба талаби додситон чӣ вокуниш кардааст. Пайвандонаш низ бо расонаҳо суҳбат намекунанд.

Гуфта мешавад, нахустин баррасии додгоҳии ин рӯзноманигор рӯзи 7-уми октябр баргузор шуда буд. Парвандаи Далери Имомалӣ аз сӯи Даврон Назарзода, додраси Додгоҳи ноҳияи Шоҳмансур баррасӣ мешавад.

Мақомот блогер ва рӯзноманигори шинохтаи тоҷик Далери Имомалиро рӯзи 15-уми июн боздошт ва баъдан ӯро ба соҳибкории ғайриқонунӣ, расондани хабари дурӯғ ва узвият дар созмонҳои мамнуъ (Гурӯҳи-24) муттаҳам кард. Худи Далер дар бозпурсиҳо иттиҳоми соҳибкории ғайриқонуниро қабул карда, вале ҳамкориро бо созмонҳои мамнуъ напазируфтааст. Ҳамзамон Ҳаракати сиёсии “Гурӯҳи 24” ҳама гуна ҳамкорӣ бо Далери Имомалиро рад карда буд.

Дар ҳамин ҳол имрӯз, 13-уми октябр мурофиаи додгоҳии рӯзноманигори дигари боздоштшуда, Абдусаттор Пирмуҳаммадзода дар Боздоштгоҳи муваққатии Душанбе бе ҳузри пайвандон шуруъ шуд.

Яке аз наздиконаш ба Радиои Озодӣ гуфтааст, ки “Вакили мудофеъ дар бораи оғози мурофиа моро огоҳ карда буд. Шиносномаҳоро гирифта омадем, вале иҷозат надоданд, ки ба дарун дароем”.

Ёдовар мешавем, ки мақомот дар рӯзи иди Қурбон, 9-уми июли соли ҷорӣ рӯзноманигор ва блогери шинохта Абдусаттор Пирмуҳаммадзодаро боздошт карда, баъдан ӯро ба ифротгароӣ муттаҳам кард. Ба ӯ аз 3 то 5 сол зиндон таҳдид мекунад. Наздиконаш мегӯянд, ӯ зери фишори муфаттишон ба гуноҳ иқрор карда, аммо дар асл худро бегуноҳ мешуморад.

Боздошти Далери Имомалӣ ва Абдусаттор Пирмуҳаммадзода дар пайи боздошту фишор болои рӯзноманигорон сурат гирифта буд. Созмонҳои ҳуқуқи башар раҳои рӯзноманигорони зиндониро талаб карда буданд, аммо мақомот мисли ҳамеша ба ин талаби созмонҳо эътибор надоданд.

Рӯзноманигори зиндонӣ Абдуллоҳ Ғурбатӣ ду ҳафта пеш аз эълони ҳукм “зери фишор” ва “бо ваъдаи озодӣ” дар наворе иқрори гуноҳ кардааст.

Радиои Озодӣ дар истинод ба манобеаш аз боздоштгоҳи муваққатии Душанбе, менависад, ки “Маъмурони умури дохилӣ Абдуллоҳ Ғурбатиро зери фишор ва бо ваъдаи инки озод хоҳанд кард, дар назди дурбин ба суҳбат маҷбур намуданд ва гуфтанд, суҳбаташ дар телевизиони давлатӣ пахш хоҳад шуд”.

То ҳол Вазорати корҳои дохилаи кишвар ин қазияро шарҳ надодааст.

Дар ҳамин ҳол пайвандони ин рӯзноманигори ҷавон низ ин хабарро дар суҳбат бо Радиои Озодӣ тасдиқ карда, гуфтаанд, Абдуллоҳ Ғурбатӣ ба онҳо низ хабар додааст, ки маҷбуран дар назди дурбини видео “суҳбатҳои зиёд кард” ва агар он нашр шавад, ба ягон суханаш бовар накунанд.

Гуфта мешавад, навори сабткардаи кормандони ВКД то ҳол дар ҷое нашр нашудаааст ва маълум нест, дар мурофиаи додгоҳӣ истифода шудааст ё не.

Мурофиаи ахири рӯзноманигори ҷавон Абдуллоҳ Ғурбатӣ ҳафтаи пеш дар боздоштгоҳ пушти дарҳои баста ва бидуни ҳузури пайвандонаш сурат гирифта буд. Додгоҳ ӯро ба 7,5 соли зиндон маҳкум кард. Пайвандонаш аз ин ҳукм розӣ нестанд ва вакили дифои ин рӯзноманигор низ гуфта буд, ки аз болои ҳукм ба зинаҳои болоӣ шикоят мебарад. Созмонҳои байналмилалӣ раҳоии ӯро талаба карданд.

Ин бори аввал нест, ки хабари зери фишору шиканҷа эътироф кардани “гуноҳ” аз ҷониби боздоштшудаҳо дар расонаҳо нашр мешавад. Аз ҷумла, ҳафтаи пеш пайвандони рӯзноманигори дигари боздоштшуда Абдусаттор Пирмуҳаммадзода гуфта буданд, ки ӯ зери фишору шиканҷа ба гуноҳ “эътироф” карда, вале тавассути вакили мудофеаш расондааст, ки гуноҳ надорад.

Инчунин дар гузашта даҳҳо навори шахсони боздоштшуда нашр шуда буд, ки мегуфтанд, “гунаҳкоранд” ва “шиканҷа нашудаанд”.

Дар боздоштгоҳҳову зиндонҳои Тоҷикистон кормандони мақомот барои гирифтани “эътироф” аз шиканҷаву фишор истифода мебаранд, ки ин нигаронии пайвандони боздоштшудаҳоро ба бор овардааст. Бо вуҷуди шикояти пайвандон ба сохторҳои дахлдор, расонаӣ кардани он ва талаби созмонҳои байналмилалӣ барои решакан кардани шиканҷа, то ҳол ин масъала ҳалли худро наёфтааст. Дар бештари мавридҳо баъд аз расонаӣ кардан ва шикояти пайвандони боздоштшудаҳо, фишор болояшон бештар мешавад.