Ҷустуҷӯ кунед
Ҷустуҷӯ
7.9 C
Dushanbe
Хона блог саҳифа 39

Трамп: “Ҷанги Ғазза Исроилро дар дунё мунзавӣ кардааст”

Аз ҷониби
AZDA TV-2
-
0
Бобмборони Ғазза, санаи 5-10-2025

Тарҳи сулҳ

29-уми сентябри соли 2025 раисҷумҳури Амрико Доналд Трамп тарҳи баҳсбарангези худро барои барқарор кардани сулҳ дар Ғазза ҳамроҳи Бенямин Нетаняҳу (муттаҳам бо ҷумри ҷинояти ҷангӣ ва наслкӯшӣ аз ҷониби Додгоҳи байналмилалии Лоҳа-Гаага) дар Вашенгтон муаррифӣ кард.

Нахуствазири Исроил таъкид кард, ки акнун бо иҷрои ин тарҳ ҳама талошҳои ҲАМОС, ки Исроилро дар арсаи байналмилалӣ ба инзиво кашондааст, аз байн бурда, худи ҲАМОС-ро дар олам мунзавӣ мекунанд. Бар асоси ин тарҳ, ки аз 21 банд иборат аст, ба гуфтаи Бенямин Нетаняҳу, иҷрои он метавонад ҳадафҳои асосии ҷанги Исроил дар Ғаззаро бароварда карда, ҳама гаравгонҳоро озод ва ҲАМОС-ро халъи силоҳ намояд ва аз ҳукумати он дар Ғаззаро барҳам диҳад.

Шӯрои мудирият

Трамп дар муаррифии ин тарҳи сулҳаш эълон кард, ки дар Ғазза сулҳу суботро барқарор мекунад ва барои идораи Ғазза як Шӯрои байналмилалии мудирияти Ғазза бо раҳбарии худи ӯ таъсис дода мешавад. Тони Блэр, собиқ нахуствазири Бритония ҳамчун ҳокими Ғазза дар ҳайати раҳбарони ин Шӯро амал мекунад. Баъдтар расонаҳо фош карданд, ки дар раъси раҳбарии ин Шӯро 7 нафар аст. Фаластиниҳо ҳама иҷро кунанда, ва як нафар ҳам дар ҳайати раҳбарии ин Шӯро аз Фаластин вуҷуд надорад.

Раисҷумҳури Амрико бо пешниҳоди ин тарҳ иддаъо кард, ки бо иҷрои он на танҳо ҷанги Ғаззаро ба поён мерасонад, балки ихтилофоти 3000-солаи Ховари Миёнаро низ ҳаллу фасл карда, сулҳи пойдореро барои ҳамзистии мусолиматомез бо Ирсоил дар минтақа ба армуғон меорад. Теъдоди кишварҳои узви “Созишномаи сулҳи иброҳимӣ”-ро ки Исроилро дар минтақа ба расмият шинохта, муносибатҳои сиёсӣ ва дипломатии худро бо он барқарор мекунанд, меафзояд. Ҳатто Эрон ҳам Исроилро ба расмият хоҳад шинохт ва ба ҷамъи аъзои созишнома хоҳад пайваст.

Таҳсину офарин

Эълони ин тарҳи сулҳи Трамп дарҳол ба вокунишҳои зиёде рӯбарӯ шуд. Кишварҳо ва созмонҳои ҷаҳонии зиёде ба унвони раисҷумҳури Амрико таҳсину офарин хонда, барои пешниҳоди ин тарҳ ва қасди хотима додан ба ҷанг дар Ғазза аз Доналд Трамп таъриф ва тамҷид карданд.

Нақши бархе кишварҳои арабӣ ва исломӣ, ба мисли Мисру Қатар, Арабистони Саудӣ ва Урдун, Покистону Туркия ва Индонизия низ ба гуфтаи мақомоти амрикоӣ, ки дар Амрико Доналд Трамп пеш аз эълони ин тарҳ бо онҳо мулоқот карда буд, дар таҳия ва банду басти тарҳи сулҳ ва таъсиргузорӣ ба ҲАМОС ва дигар гурӯҳҳои фаластинӣ назаррас буд. Пас аз эълони ин тарҳ, раҳбарони ин кишварҳо ҷузви аввалинҳое буданд, ки бо нашри як баёния аз он истиқбол карданд.

Раҳбарони хеле аз кишварҳои ғарбӣ ва муттаҳидони онҳо дар Шарқу Ғарб ва созмонҳои ҷаҳонӣ на танҳо ҲАМОС ва дигар гурӯҳҳои фаластиниро ба пазириши он даъват карданд, балки аз кишварҳо ва созмонҳои таъсиргузор бар ҲАМОС ва дигар гурӯҳҳои фаластинӣ хостанд, ки болои онҳо фишор биоранд, то ин тарҳи пешниҳодшударо бипазиранд ва зудтар мурда ва зиндаи 48 нафар асири исроилӣ дар Ғаззаро бозпас таҳвил бидиҳанд. Аммо дасти кам 30 дарсади онҳо нагуфтанд, ки Исроил ҳам бидуни қайду шарт 13 ҳазор асири фаластиниро, ки дар байни онҳо ҳудуди 1500 кӯдаки ноболиғ низ вуҷуд доранд, озод намояд.

Сулҳ таслим шудан нест

Аммо дар вокуниш ба ин тарҳи сулҳ Моҳаммад Ишоқ Дар (Mohammad Ishaq Dar) вазири корҳои хориҷии Покистон гуфт, ин тарҳ на он тарҳест, ки Доналд Трамп дар ҷамъи вазирони корҳои хориҷӣ ба раҳбарони кишварҳои исломӣ, ба мисли Покистону Туркия, Мисру Урдун, Арбастони Саудӣ ва Индонезия дар ҳошияи нишастҳои Созмони Миллали Муттаҳид дар ИМА муаррифӣ карда буд. Чанд расонаи Ғарбӣ ҳам ин иддаъои Дарро бо истинод ба манобеи худ нашр карда, гуфтанд, ки нахуствазири Исроил ҳамроҳ бо раисҷумҳури ИМА бархе бандҳои тарҳи сулҳро тағйир додаанд.

Аз сӯи дигар, раисҷумҳури Колумбия Густаво Петро (Gustavo Petro) хитоб ба президенти ИМА гуфт: “Трампро зарур аст, ки тарҳи пешниҳодии сулҳашро бо судури фармоне ҷаҳонӣ барои ворид кардани ғизо ва даво ба Ғазза шуруъ кунад ва пас аз он ки мардум ғизояшонро бихӯранд, беҳтар фикр мекунанд. Сулҳ таслим шудан нест, балки гуфтушуниди баробари дутарафа мебошад.”

Муҳлати 72 соат

Сипас, Доналд Трапм таъкид ва таҳдид кард, ки агар ҲАМОС (Ҳаракати Муқовимати Исломии Фаластин-Ҳамос, ки ИМА ва Иттиҳоди Аврупо онро як созмони террористӣ медонанду дигар кишварҳо онро як созмони муқовимати мардумӣ дар Фаластин) тарҳи сулҳашро дар зарфи 72 соат напазирад, ҷаҳаннамеро болои сари онҳо ба вуҷуд хоҳад овард. Трамп аз сокинони Ғазза ҳам хост, ки ба ҷое амнтар панаҳ бибаранд, то зинда бимонанд. Вай таъкид кард, ки акнун тӯп дар майдони ҲАМОС аст, бояд оташбасро бипазирад.

Пеш аз он ки ин муҳлати 72-соата ба поён бирасад, ҲАМОС бо интишори як баёния иборат аз 9 банд ба сурати расмӣ посухи худашро дар бораи тарҳи сулҳи Трамп нашр карда гуфт, БАЛЕ, он чи дар ин тарҳ марбут ба ин ҳаракат аст, қабул дорад, вале барои иҷрои онҳо вақт ва тавзеҳ мехоҳад. Дар баёния зикр кард, ки Ғазза хоки Фаластин аст. Дар бораи чӣ касе Ғаззаро баъд аз ҷанг идора мекунад, тамоми фаластиниҳо тасмим мегиранд ва ин ҳаракат ҷузъи онҳост. Фаластин кадрҳои зиёде дар дохил ва хориҷ дорад, ки метавонанд сарнавишти худ ва идораи Ғаззаро ба даст бигиранд. Силоҳи ҲАМОС барои муҳофизат аст, на барои ҳуҷум. ҲАМОС силоҳашро ба давлати фаластинӣ, ки Ғаззаро ҳам идора кунад, таслим мекунад.

Машварат ва маслиҳат

Мусо Абу Марзуқ, яке аз раҳбарони барҷастаи ҲАМОС, ки дар ин бора бо “Алҷазира” суҳбат мекард, гуфт, дар бораи ин тарҳ бо дигар гурӯҳҳои фаластинӣ дар дохилу хориҷ ва намояндаҳои бархе кишварҳои дӯсту бархе созмонҳо ва ҳуқуқшиносон ҳам машварат ва маслиҳат кардаанд. Ба гуфтаи ӯ, тарҳи Трамп бандҳо ва нуқтаҳои баҳсбарангези зиёде дорад, ки амалан иҷро кардани онҳо дар муҳлати замони муайяне, ки раисҷумҳури Амрико мехоҳад, ғайри имкон аст.

Барои мисол, ҲАМОС ва дигар гурӯҳҳои фаластинӣ наметавонанд зери оташ ва бидуни ҳамоҳангӣ ва муайян кардани замону макони таслими асирон ҳамаи гаравгонҳоро дар як вақт ва ё дар як рӯз озод кунанд. Зеро, вазъ дар Ғазза мусоид нест. Ҳамон тавре ҳазорҳо нафар аз фаластиниҳо зери оворҳои хонаҳои бобмбороншуда беномунишон хобидаанд, ҷасади чанд нафар аз асирони исроилӣ низ ҳамроҳи онҳо зери овораҳост. Барои поксозӣ ва пайдо кардани онҳо шояд чанд ҳафта ва ё чанд моҳ вақт тӯл бикашад. Ба ҳамин хотир, иҷрои ин тарҳ ба музокирот ниёз дорад.

Дигар гурӯҳҳои фалалстинӣ, аз ҷумла Ҷиҳоди Исломӣ ва Фатҳ ҳам аз ин иқдоми ҲАМОС барои пазириши тарҳи Трамп истиқбол карданд. Ҷиҳоди Исломӣ гуфт, ки мо якҷо бо дигарон дар бораи ин посух бо ҳам машварат кардем ва ин посухнома мавқеи гурӯҳии моро баён кардааст.

Намоиши бе маслиҳат

Ҳанӯз аз нашри баёнияи ҲАМОС камтар 40 дақиқа нагузашта буд, ки раисҷумҳури Амрико ба ҳадафи намоиш як дастовард тарҷумаи англисии онро дар саҳифаи худаш дар шабакаи иҷтимоии “Truth Social” нашр карда гуфт, маълум аст, ки “ҲАМОС ҳам сулҳ мехоҳад.”

Дар ин миён ҷолиб он буд, ки то вақте раисҷумҳури ИМА ба посухи ҲАМОС вокуниш накард, дар бораи чигунагии он қариб ҳама раҳбарони исроилӣ ва мақомоти он ба сурати аланӣ чизе нагуфтаанд. Баъдтар расонаҳои исроилӣ фош карданд, ки Девони нахуствазир ва дигар мақомот интизор доштанд, ки ҲАМОС мустақим НА мегӯяд.

Иқдоме, ки хеле аз исроилиҳо ва ҳомиёни онҳо аз Трапм интизор надоштанд, ки ба ин зудӣ ва ба ин шева ризояти худро дар бораи посухномаи ҲАМОС ба намоиш бигузорад. Бархе коршиносони исроилӣ ҳам бо ибрози нороҳатӣ аз ин иқдом гуфтанд, ки ин бори чандум аст, ки Трамп бидуни машварат бо Исроил аҷулона чунин рафтор мекунад. Аммо ҲАМОС зирактар аз он буд, ки онҳо тасаввур мекарданд. ҲАМОС гуфт, БАЛЕ, вале НА ба он шаклу шевае, ки шумо мехоҳед.

Интиқод аз Тромп

Бархе расонаҳои исроилӣ, ки дар ин шабу рӯз хеле фаъол ҳастанду дар чунин масоил ҳеле кунҷковӣ мекунанд, ҳуҷуми нармеро алайҳи Трамп оғоз карда, ӯро ба ҷоҳталабӣ ва касби шуҳрат муттаҳам карда гуфтанд, ки ӯ барои ноил шудан ба Ҷоизаи сулҳи Нобел Бенямин Нетаняҳу ва манофеи Исроилро зери по кардааст.

Раисҷумҳури Амрико дар шаш моҳи ахир борҳо аз минбарҳои мухталиф иддаъо кардааст, ки вай оташи 7 ҷангро байни давлатҳо дар муҳлати кӯтоҳ хомӯш кардаасту сазовори ноил шудан ба Ҷоизаи сулҳи Нобел аст, вале ҳайтаи мудираи Ҷоизаи суҳли Нобел онро ба касе дигар тақдим кардан мехоҳанд.

Аз сӯи дигар, иҷро кардани тарҳи сулҳи Трамп тавре худи ӯ мегӯяд, дар як муҳлати кӯтоҳ корест нашуданӣ. Вазири корҳои хориҷии ИМА Марко Рубё (Marco Rubio) ҳам гуфтааст, ки вақте дар Ғазза ҷанг идома дорад ва бомбҳо партофта мешаванд, амалан озод кардани гаравгонҳо имкон надорад. Барои раҳо кардани асирон шароит ва имконоти лозимро (дар Ғазза) ба вуҷуд овардан даркор.

Ҳадаф аз тарҳи сулҳ

Аммо бар хилофи он чи расонаҳо ва коршиносони исроилӣ дар бораи ин вокуниши Трамп гуфтанд, худи раисҷумҳури Амрико мегӯяд, Исроил дар ҷанги Ғазза хеле фаротар (аз ҳудуди худ амал карда, дур) рафтааст. Ҷанги Ғазза Исроилро аз арасаи байналмилалӣ мунзавӣ кардаасту ман онро дубора ба арсаи байналмилалӣ бар мегардонам. Трамп мегӯяд, иҷрои тарҳи сулҳи ӯ барои Исроил як дастоварди бузург аст.

Дастоварди бузург ба он маъност, ки он чи Исроил дар муддати ду соли ҷанг дар Ғазза ва харобу вайрон кардани 90% биноҳои ҳукуматӣ, ҷамъиятӣ ва манзилҳои истиқоматии мардум ва қурбон кардани беш аз 65 ҳазор нафар ва замхӣ шудани беш аз 165 ҳазори дигар натавонист дар ҷанги Ғазза ба даст биорад ва ба қавли Бенямин Нетаняҳу ҳадафҳои ҷангро бароварда карда, гаравгонҳоро озод кунад ва ҲАМОС-ро дар арсаи низомӣ ва сиёсӣ шикаст дода, аз майдони набард хориҷ кунад, аз роҳи сиёсӣ ва фишорҳои зиёди байналмилалӣ бо имзои ин оташбас ҳамаи онҳоро ба даст хоҳад овард.

Оғози музокирот

Ба гуфтаи коршиносон, ҲАМОС бо БАЛЕ, вале НА гуфтанаш ба ин тарҳи сулҳ Вашингтону Телавивро маҷбур кард, ки фавран дубора ва ба сари мизи музокирот бо вай баргарданд. Амрико аз соли 1997 ба ин сӯ ҲАМОС-ро як ҳаракати террористӣ медонад ва тайи ду соли ахир ва дар ин музокирот ҳам ба намояндагӣ аз Исроил бо намояндаҳои ҲАМОС аз Мисру Қатар музокира мекунад.

Аз сӯи дигар Вазорати корҳои хориҷии Миср эълон кардааст, ки шуруъ аз 6-уми окятбри соли ҷорӣ барои оғози музокирот дар бораи тарҳи Трамп мизбони гурӯҳҳои фаластинӣ, исроилӣ, амрикоӣ ва қатарӣ хоҳад буд. Исроил чанд нафар аз намояндаҳои барҷастаи худро барои эҳёи музокирот ба Қоҳира мефиристад. Амрико ҳам гуфта, Стив Витков, намояндаи Вашингтон дар Ховари Миёна ҳамроҳ бо Ҷаред Кушнер (Jared Kushner), домоди Трмпро барои ширкат дар ин музокирот ба Қоҳира мефиристад. Намояндаҳои гурӯҳҳои фаластинӣ ҳам бо даъвати Миср вориди Қоҳира шудаанд.

Ба ҷои хулоса

Гуфтанист, нахуствазири Исроил дар дохили кишвараш бо чанд парвандаи фасоди молӣ муттаҳам асту дар Додгоҳи байналмилалии Лоҳа-Гаага ҳам бо иртикоби ҷиноятҳои ҷангӣ ва наслкушӣ мавриди пайгарди қонунӣ қарор гирифтааст, дар чорроҳаи маргу зиндагии эътибори сиёсӣ қарор гирифтааст.

Ба гуфтаи бархе расонаҳои исроилӣ, мухолифонаш ӯро ба он муттаҳам мекунанд, ки вай ба хотири мондан дар қудрат хоҳони идомаи ҷанг аст, на сулҳ. Ҳокон Фидон, вазири корҳои хориҷии Туркия ҳам гуфтааст, эҳтимол дорад, ин дафъа ҳам Нетаняҳу ба хотири идома додани ҷанг коре карда “пеши роҳи сулҳро бигирад.”

Такрори сенария

Ҷанг дар Ғазза идома дорад. Бар хилофи иддаъоҳои раисҷумҳури Амрико ва Исроил, тавре расонаҳои фаластинӣ ва фаъолони Ғазза дар шабакаҳои иҷтимоӣ мегӯянд, артиш то ҳол ҷанг ва ҳамалоти худро алайҳи фаластиниҳо дар Ғазза қатъ накардааст.

Артиши Исроил гуфта, ки агар сулҳ ҳам шавад, қасди хориҷ шудан аз меҳвари асосии Ғаззаро дар чанд соли оянда надорад. Ин кор хилофи тарҳи Трамп ва посухномаи ҲАМОС аст, ки гуфтааст ба тарҳи сулҳи Трамп ба шарти оташбаси пойдор ва хуруҷи комили нерӯҳои Исроил аз Ғазза мувофиқат мекунад.

Аммо ҳоло ин мавқеъгирии артиши Исроилро ҲАМОС такрори “сенарияи Ҷануби Лубнон*” медонад. Ба ҳамин хотир, агар дар ин масъала ба тавофуқ нарасанд, яъне артиши Исроил пурра аз Ғазза хориҷ нашавад, сулҳе пойдор барқарор нахоҳад шуд.

_____________________

*Сенарияи Ҷануби Лубнон чунин аст: Исроли як сол қабл бо Ҳизбуллоҳи Лубнон сулҳ кард, тибқи он созишномаи сулҳ, ки ИМА ва Фаронса ҳам миёнарав буданд, артиши Исроил бояд хоки Лубнонро тарк мекард, вале то кунун аз 5-6 мавзеи ишғолкардааш хориҷ нашудааст. Озодии амал дар Лубнонро дорад ва ҳар рӯз бо баҳонаҳои мухталиф як ё чанд амалиёти низомӣ анҷом медиҳад ва аз лубнониҳо қурбонӣ мегирад.

Амруллоҳи НИЗОМ, махсус барои Azda.Tv

Узбекистон: Имтиҳони муҳоҷирон дар Русия содда карда шавад

Аз ҷониби
AZDA-TV
-
0

Мақомоти Узбекистон ба мақомоти Русия пешниҳод додаанд, сабки имтиҳоноте, ки муҳоҷирон барои гирифтани иҷозати кор дар Русия месупоранд, осонтар карда шаванд.

Директори Агентии муҳоҷирати назди Ҳукумати Узбекистон Беҳзод Мусаев 2-юми октябр бо мақомоти Русия зарурати ҳифзи ҳуқуқи шаҳрвандонашро, ки дар ин кишвар кору зиндагӣ доранд, баррасӣ намуда, масъалаи озодии ҳаракат ва соддагардонии тартиби гирифтани иҷозати корро матраҳ кардааст.

“Мо пешниҳод мекунем, шаҳрвандоне, ки мехоҳанд дар Русия фаъолият кунанд, тавонанд имтиҳони забонро дар ватани худ, аз ҷумла дар минтақаҳо супоранд. Дар худи имтиҳон саволҳои мураккаб ва начандон зарур аз фанҳои таърих ва қонунгузорӣ ҷой доранд. Мо ин мисолҳоро овардем ва аъзои Шӯрои ҳуқуқи инсони Русия дурустии суханони моро дарк карданд”, — гуфтааст роҳбари Агентӣ.

Агентии муҳоҷирати Узбекистон мегӯяд, ки тақрибан 1,3 миллион шаҳрвандони Узбекистон муваққатан дар Русия кор мекунанд ва шумораи муҳоҷирон вобаста ба мавсим ва ниёзҳои корфармоён тағйир меёбад. Аммо Шӯрои рушди ҷомеаи шаҳрвандӣ ва ҳуқуқи инсони Русия мегӯяд, дар Русия 2 миллион узбек кору зиндагӣ доранд.

Ин пешниҳоди ҷониби Узбекистон дар мавриди содагардони имтиҳон барои дарёфти иҷозати корӣ дар ҳолест, ки вакилону фаъолони рус талош доранд қонунҳои муҳоҷиратро дар ин кишвар сахттар кунанд.

Путин: Эмомалӣ Раҳмон бо автомат вориди Душанбе шуд

Аз ҷониби
AZDA-TV
-
0

Владимир Путин, раисҷумҳури Русия зимни суханронияш дар Клуби байналмилалии мубоҳисавии “Валдай” дар бораи сафари қарибулвуқуаш ба Тоҷикистон ва аз рӯйдодҳои солҳои 1990 дар ин кишвар гуфт.

Ба иддаои Путин, президенти Тоҷикистон Эмомалӣ Раҳмон замоне ба сари қудрат омада, ки Душанбе ба дасти гурӯҳҳои исломгаро афтода буд.

“Баъди ғасби ҳокимият аз ҷониби исломгароёни радикалӣ, президенти амалкунандаи Тоҷикистон, ҷаноби Раҳмон, бо автомат ба пойтахти кишвараш, ба шаҳри Душанбе ворид шуд. Фаҳмидед? … Албатта, бо чунин одамон суҳбат кардан ҷолиб ва муфид аст”, — таъкид мекунад Путин.

Президенти Русия ҳамчунин қайд кард, ки дар доираи нишасти Иттиҳоди Давлатҳои Мустақил дар Душанбе қасд дорад бо Раҳмон мулоқот кунад ва таъкид намуд, ки таҷрибаи чунин роҳбарон барои муколама дар фазои пасошӯравӣ муҳим аст.

Гуфта мешавад, нишасти сарони кишварҳои узви ИДМ ва нишасти кишварҳои Осиёи Марказӣ бо Русия рӯзҳои 9-10-уми октябр дар Душанбе баргузор мегарданд.

Иддаои Путин дар бораи дар дасти гурӯҳҳои радикали исломӣ будани Душанбе дар ҳоле аст, ки вақте нерӯҳои мусаллаҳи “Фронти халқӣ”, ки худи Эмомалӣ Раҳмон низ узви он буд, охири соли 1992 ба Душанбе ворид шуданд, дар кишвар расман Ҳукумати муросои миллӣ амал мекард.

Ва “Фронти халқӣ” бо раҳбарии Сангак Сафаров Ҳукумати муросои миллиро сарнагун карда, Эмомалӣ Раҳмонро ба сари қадрат овард ва дар кишвар ҷанги шаҳрвандӣ оғоз ёфт ва ин ҷанг то соли 1997 идома кард. Ҳукумати муросои миллӣ аз нерӯҳои ҳукуматӣ ва Иттиҳоди нерӯҳои оппозитсиони тоҷик, ки ҳам нерӯҳои демократӣ ва ҳам исломиро дар бар мегирифт, ташкил шуда буд.

Пештар изҳороти монанд ба Путинро президенти Белорус Александр Лукашенко низ баён карда буд. Ӯ дар суханрониҳояш гуфта буд, ки “Касе намедонад, ки чӣ гуна дӯстам Раҳмон бо пулемёт вориди пойтахти Тоҷикистон шуд, то тартиботро ҷорӣ кунад. Чандин нафар он ҷо мурд. Чӣ гуна бо ришдорҳо мубориза мебурданд”.

Аммо Додоҷон Атовуллоев, яке аз чеҳараҳои шинохта ва мухолифи сиёсатҳои Эмомалӣ Раҳмон рӯзи ҷумъа дар тамоси катбӣ ба Azda Tv гуфт, ки суханони Лукашенко ва Путин дар мавриди Раҳмон “баргирифта аз афсонаҳои худи президенти Тоҷикистон аст, ки солҳои охир гуфтааст.”

Ба гуфтаи мусоҳиби мо, то замони зинда будани Ислом Каримов ва сари қудрат будани Назарбоев Эмомалӣ Раҳмон ҷуръати гуфтани чунин суханҳоро надошт ва акнун, ки “майдонро холӣ ёфта, дар назди Путину Лкашенко аз худ Рембо ё Спартак нишон медиҳад.“

Атовуллоев дар идомаи суханонаш афзуд, ки дар Тоҷикистон ҳеч гоҳ ҳукумати исломӣ набуд. “Ба чор подшоҳ маълум аст, ки Русия ва Ӯзбекистон Эмомалӣ Раҳмоновро ба танк шинонда ба Душанбе оварданд. Баъди сессияи Хуҷанд Раҳмонов дар Тирмиз менишаст ва интизор буд, ки кай аскарону афсарони Русияву Ӯзбекистон Душанберо аз мухолифон «тоза» мекунанду ӯ вориди Қасри ҳукумат мешавад!“

“Эмомалӣ Раҳмон дар майдони набард набуд. Аммо тамоми қатлу кушторҳо бо амри ӯ сурат гирифтаанд. Яке аз барномаҳои онҳо «то охирин кӯдаки гаҳвораи мухолифонро куштан» буд.
Ин суханонро худам шахсан аз забони Абдумаҷид Достиев дар Исломободи Покистон шунидаам. Дар яке аз давраҳои музокироти сулҳ.“, таъкид мекунад Атовуллоев.

Аз забони раҳбарони кишварҳое чун Русия ва Белорусия садо додани ин ҷумла, ки “Раҳмон бо силоҳ вориди Душанбе шуд”, дар ҳолест, ки худи Эмомалӣ Раҳмон борҳо ҷанги шаҳрвандиро “ҷанги таҳмилӣ” меномид ва ҳамеша ҷониби оппозисиюнро гунаҳкор мешуморид.

Ба назири бархе коршиносон, пас аз ин гуфтаҳои алании Путину Лукашенко, метавон ин эҳтимолро дод, ки худи Эмомалӣ Раҳмон дар оғоз ёфтани ҷанги шаҳрвнадӣ ва қатлу куштори шаҳрвандон даст дорад.

Тоҷикистон сиёсаташро бо Толибон тағйир дод

Аз ҷониби
AZDA.TV
-
0

Мақомоти Тоҷикистон пас аз омадани Толибон ба сари қудрат дар Афғонистон на танҳо муносибаташ бо онҳоро нарм накард, балки мухолифони онҳоро дар худ ҷой дод.

Дар гузориши наве шабакаи “Ал-Ҷазира” мегӯяд, дар байни кишварҳои Осиёи Марказӣ аз ҳама бештар муносибати шадидтар ва эҳтиёткоронаро бо Толибон Тоҷикистон дошт, аммо вақтҳои охир ин кишвар муносибаташ бо Афғонистонро тағйир дода, забони гуфторашро нармтар кардааст.

Гуфта мешавад, Тоҷикистон дар байни кишварҳои ҳамсоя танҳо кишварест, ки то ҳанӯз ба таври расмӣ бо Толибон муносибати дипломатӣ надорад, вале ба таври ғайрирасмӣ муносибатҳое дар ҷараён ҳаст. Аз ҷумла, ҳузури консулгарии Толибон дар шаҳри Хоруғи Вилояти Мухтори Кӯҳистони Бадахшон яке аз далоили муносибатҳои ғайриалании ҳукумати Эмомалӣ Раҳмон бо Толибон аст.

Собиқ сафири Афғонистон дар Тоҷикистон Ваҳидуллоҳ Маҳмудӣ ба “Ал-Ҷазира” гуфта, ки Тоҷикистон ягона кишваре буд, ки соли 2021 бо ҷой додани мухолифони Толибон дар худ мисли солҳои 90-уми асри гузашта рафтор кард. Ва шаҳри Душанбе давоми 3 сол – то соли 2024, мизбони мухолифони Толибон буд.

Аммо, ба гуфтаи собиқ сафир, “Тоҷикистон аз оғози соли 2025 муносибаташ бо Толибонро иваз кард ва онҳоро амалан ҳамчун ҳукумат пазируфт.” Аз ҷумла, бозгушоии 5 бозори наздимарзиро аз сиёсатҳои тағйири рафтори Эмомалӣ Раҳмон бо Толибон унвон кардааст.

Заминларзае, ки чанде пеш шаҳру вилоятҳои Афғонистонро ба шиддат ларзонд, Тоҷикистон бо ирсоли 3000 тонна маводи ғизоӣ ва кумакҳои башарӣ барои зарардидагон дар байни дигар кишварҳои ҳамсоя дар мақоми аввал истод, ки ин ҳам баёнгари тағйири рафтор дар ҳукумати Эмомлаӣ Раҳмон нисбати Толибон арзёбӣ мешавад.

Дар ин робита сафири Тоҷикистон дар Афғонистон Ҷаъфар Саидӣ ба “Ал-Ҷазира” гуфтааст, ки “Ҷомеаи ҷаҳонӣ ва Тоҷикистон мехоҳанд дар Афғонистон амният таъмин бошад ва ҳамсояҳо ҳеч хатареро аз онҳо эҳсос накунан ва Толибон бо ташкили ҳукумати фарогир муаррифгари тамоми қавмиятҳои ин кишвар ҳисобида шаванд.”

Мақомоти тоҷик мегӯянд, амну истиқрор дар Афғонистон ба истиқрори Тоҷикистон ва минтақа таъсири бевосита дорад. Аз ин рӯ, ҳукумати Эмомалӣ Раҳмон ба ин хулоса расида, ки муносибати душманона бо Толибон натиҷа намедиҳад ва маҷбур аст бо онҳо рафтори худро тағйир диҳад.

Ҳамзамон коршиноси тоҷик Ваҳидуддин Умаров дар мусоҳиба ба ин расона гуфтааст, ки “Дар ҳақиқат оҳанги хитоби Тоҷикистон бо Толибон нисбат ба солҳои аввали омадани онҳо ба сари қудрат тағйир ёфтааст. Тоҷикистон ба Толибон ҳамчун сарчашмаи таҳдиди мустақим нигоҳ мекард, вале ҳоло бо сабабҳои амниятӣ аз зурарати ҳамкорӣ сухан мегӯяд.”

Ба гуфтаи ин коршиноси тоҷик, “Баъд аз оне, ки кишварҳои аҳмсоя, аз ҷумла Узбекистон, Қазоқистон ва Туркманистон муносибатҳои худро бо Толибон оғоз карданд, Тоҷикистон худро дар минтақа канормонда ва танҳо эҳсос кард ва ин сабаб шуд, ки сиёсатҳо ва лаҳни гуфторашро бо идоранишинони Кобул иваз кунад.”

Дар ҳамин ҳол Забиҳуллоҳ Муҷоҳид, сухангӯи Толибон зимни суҳбаташ бо “Ал-Ҷазира” гуфтааст, ки қабл аз расидан ба сари қудрат дар музокироти Давҳа таъкид карда будем, ки ба ҳеч кишвари ҳамсоя аз хоки Афғонистон осеб намерасад. “Бар ин асос, кишварҳои Осиёи Марказӣ муносибатҳои худро бо мо хуб роҳандозӣ кардаанд, ба ҷуз Тоҷикистон, ки то ҳанӯз муҳтотона муносибат мекунад.”, мегӯяд Муҷоҳид.

Ба иттилои коршиносон, пас аз рушди муносибатҳои Чин, Русия ва инчунин кишварҳои Осиёи Марказӣ бо Толибон, Тоҷикистон дарк кард, ки дар минтақа ба танҳоӣ наметавонад қувваи мухолифи сиёсатҳои минтақа бошад ва рафтораш натиҷаи хубе нахоҳад дод. Ва ин таваҷҷуҳ назари мақомдорони тоҷикро нисбати Толибон иваз кард.

Ёдовра мешавем, ки Тоҷикистон бо Афғонистон беш аз 1300 километр марзи муштарак дорад ва пас аз омадани Толибон даҳҳо нуқтаҳои марзбонӣ ба хотири ҳимояи марз аз ҳамлаҳои эҳтимолӣ ва қочоқи маводи мухаддир роҳандозӣ кард. Гуфта мешавад, Тоҷикистон бо гуморидани беш аз 20 ҳазор сарбоз дар марзҳо бо Афғонистон ва гузаронидани тамринҳои низомӣ марзҳои худ бо Афғонистонро ташдид бахшид.

Иҷрои пурраи нақшаи даъвати ҷавонон дар баъзе вилоятҳо

Аз ҷониби
AZDA-TV
-
0

Нақшаи даъвати тирамоҳии ҷавонон ба артиш дар Тоҷикистон давоми як рӯзи аввал 55 дарсад иҷро шудааст.

Бино ба иттилои сухангӯи Вазорати мудофиаи кишвар Илҳом Ализода, 1-уми октябр нақшаи даъвати ҷавонон ба артишро Вилояти Мухтори Кӯҳистони Бадахшон 101% иҷро намуда, шаҳри Норак, ноҳияҳои Вахш ва Балҷувони вилояти Хатлон ва Сангвор низ аввалин шуда, аз иҷрои нақша гузориш додаанд.

Дар ҳамин ҳол имрӯз, 2-уми октябр расонаҳои ҳукуматӣ аз иҷрои пурраи нақшаи даъват дар 9 ноҳияи дигари вилояти Хатлон, аз ҷумла Фархор, Ховалинг, Левакант, Бохтар, Норак, Хуросон, Данғара, Муъминобод, Дӯстӣ ва Ҷамоатҳои деҳоти Ворух ва Чоркӯҳи шаҳри Исфара хабар доданд.

Инчунин мақомот дар мавсими тирамоҳии имсол аз ҷалби фарзандони мансабдорон ба хидмати ҳарбӣ гуфта истодаанд, аммо миёни онҳо фарзандони мансабдорони калидӣ, ба монанди вазирону вакилон дар шаҳри Душанбе, ҳатто хешу табори онҳо вуҷуд надорад.

Ёдовар мешавем, ки даъвати тирамоҳӣ ба артиш аз 1-уми октябр оғоз шуда, то 30-уми ноябри соли ҷорӣ идома хоҳад кард ва ҷавононе, ки солҳои таваллудашон 1998-2007 мебошад, ба артиш бурда мешаванд.  

Мақомоти кишвар пурра иҷро шудани нақшаро дар минтақаҳои гуногуни кишвар дар рӯзҳои аввал ба зиёд шудани шумораи ҷавонони ихтиёрӣ ва ба корҳои фаҳмондадиҳии комиссияҳои даъватӣ рабт медиҳанд.

Аммо хабару гузоришҳо аз дохили кишвар акси гуфтаҳои мақомотро нишон дода, дар рӯзи аввал ҳадди ақал ду навори ҷалби иҷбории ҷавонон ба артиш нашр шуд.

Ҳатто мақомот маҷбур шудаанд барқро дар баъзе деҳаҳо пурра қатъ кунанд ва бар ивази додани барқ сарбоз ё пул талаб кардаанд.

Инчунин мақомот аз роҳҳои дигар низ ба мисли додани ҳуҷҷати ронандагӣ бар иваз хидмат ва асир гирифтани наздикони сарбозон, истифода бурда истодаанд.

Яке аз сабабҳои гурезон шудани ҷавонон ин бадрафторӣ бо сарбозон ва кушта шудани ҷавонон бар асари лату кӯб дар қимсҳои низомии кишвар гуфта мешавад.

Ва мақомоти Тоҷикистон барои пур кардани сафи артиши кишвар аз усули “облава” ё ҳамон сарбозшикор истифода намуда, ҷавононро аз хонаву кӯчаҳо ва ҳатто донишҷӯёнро аз назди донишгоҳҳо ва баъзе нафарони бемору маъюбро низ боздошт карда, зӯран ба артиш мебаранд.

Чанд соли охир Вазирони дифои кишвар ғайричашмдошт вуҷуди мушкилотҳоро эътироф карда, аз зердастони худ хоста буданд, ки зимни даъвати тирамоҳии ҷавонон ба артиш даст ба қонуншиканӣ назананд

Аммо коршиносон бар ин назаранд, ки то дар системаи Вазорати дифоъ тағйироти куллӣ сурат нагирад, бо дастуру супоришҳо ин мушкилот бартараф нахоҳанд шуд.

Боздошти корвони киштиҳои “Сумуд” аз ҷониби Исроил

Аз ҷониби
AZDA.TV
-
0

Ба иттилои расонаҳои исроилӣ, артиши ин кишвар шоми 1-уми октябр бар киштиҳои ҷаҳонии кумакрасони “Сумуд”, ки ба сӯи Ғазза равон буданд, ҳамла кард.

Баргузоркунандагони корвони киштиҳои “Сумуд” эълом карданд, ки дар ҷараёни ҳамлаи нерӯҳои исроилӣ фаъолони байналмилалиро боздошт шудаанд. Ба ин гуфтаи ин гурӯҳ, 15 киштӣ шомгоҳи рӯзи чоршанбе ва 8 киштии дигар субҳи рӯзи панҷшанбе боздошт шуданд.

Дар як баёнияе, ки аз ҷониби баргузоркунандагони ин корвон нашр шуд, гуфта мешавад, ки нерӯҳои Исроил киштиҳоро дар обҳои байналмилалӣ мутаваққиф кардааст, ки ин ғайриқонунӣ аст. Ҳамчунин дар баёнияи зикр мешавад, ки аз сарнишинони ин киштиҳо то кунун беш аз 443 нафар аз 47 кишвари дунё боздошт шудаанд.

Низ гуфта мешавад, ки ҳангоми наздик шудан, нерӯҳои исроилӣ бар сари сарнишинони киштиҳо фозилоб (ахлот) пошиданд ва бо обпош ба онҳо ҳамла карданд ва иртиботи электронии киштиҳоро пурра қатъ карданд.

Ташкилкунандкгони ин ҳаракати ҷаҳонӣ мегӯянд, ҳамлаи Исроил болои киштиҳо ва боздошти сарнишинон дар обҳои байналмилалӣ ҷинояти ҷангӣ ва нақзи ошкори қавонини байналмилалӣ маҳсуб мешавад.

Дар ҳамин ҳол вазоратҳои хориҷии Туркия, Испания, Партугалия, Британия ва дигарон ин ҳамлаи артиши Исроилро маҳкум карданд. Туркия мегӯяд, ҳамла бар киштиҳои ҳомили маводи кумакӣ ба Ғазза, дар обҳои байналмилалӣ сурат гирифтааст, ки ин нақзи ошкори ҳуқуқи байналмилалӣ ва як иқдоми террористӣ мебошад, ки ҷони ғайринизомиёнро таҳдид мекунад.

Ҳамчунин Вазорати хориҷии Испания низ субҳи панҷшанбе дар эътироз ба ҳамлаи Исроил ба киштиҳои “Сумуд” кордори Исроил дар Мадридро эҳзор кард ва хостори озодии фаврии фаъолони ҳуқуқи башар шуд. Ҳамчунин кишвари Колумбия дар вокуниш ба ин боздоштҳо фармони ихроҷи ҳайати исроилӣ аз ин кишварро содир кардааст.

Дар вокуниш ба ин ҳамлаи Исроил болои киштиҳои “Сумуд”, созмонҳо ва фаъолони ҷаҳонӣ вокуниш нишон дода, мегӯянд, ки дар он киштиҳо аз даҳҳо кишвар фаъолони ҷомеаи шаҳрвандӣ, рӯзноманигорон, чеҳраҳои шинохта ҳузур доштанд ва ҳуҷуму боздошти онҳо нишонаи он аст, ки сиёсатҳои зӯргӯӣ ва наслкушии Исроил на танҳо бар алайҳи фаластиниён аст, балки тамоми афрод, новобаста аз қавму миллаташон, агар аз сиёсатҳои Исроил интиқод кунанд, мавриди ҳадаф қарор мегиранд.

Ба иттилои расонаҳои ҷаҳонӣ, то кунун беш аз 20 киштӣ мавриди ҳамлаи Исроил қарор гирифта, сарнишинонашон боздошт шудаанд ва ҳоло 24 киштии дигар дар роҳ ба сӯи Ғазза ҳастанд. Гуфта мешавад, баъзе киштиҳо то 9 милии соҳили Ғазза наздик рафта буданд, ки ин бори аввал аст, киштиҳои кумакӣ то ин ҳад ба Ғазза наздик мешаванд.

Шуруъ аз моҳи марти соли ҷорӣ Исроил тамоми гузаргоҳҳоро ба рӯи Ғазза баст ва воридоти маводи ғизоӣ ва кумакҳои башардӯстонаро пурра мамнуъ эълон кард. Пас аз манъи воридоти маводи ғизоӣ, қаҳтии шадид Ғаззаро фаро гирифта, рӯзона даҳҳо зану кӯдак ва калонсолон аз гуруснагӣ ҷон медиҳанд.

Созмони Милали Муттаҳид ва дигар созмонҳои байналмилалӣ мегӯянд, Исроил аз як сӯ Ғаззаро ба шиддат бомборон дорад ва аз сӯи дигар гуруснагиро низ ҳамчун силоҳ бар зидди фаластиниён истифода мебарад.

Бар асоси иттилои Вазорати беҳдошти Фаластин, аз моҳи октябри соли 2023 то кунун бар асари ҳамлаҳои Исроил беш аз 66 ҳазор аҳолии Ғазза кушта шуда, наздики 170 ҳазор нафар захмӣ шудаанд. Ва ҳамчунин байни 10 то 15 ҳазор нафари дигар зери овораҳо монда, беному нишон гаштаанд.

Ёдовар мешавем, ки корвони киштиҳои “Сумуд” аз авоили моҳи сентябри соли ҷорӣ бо 45 киштии маданӣ аз кишварҳои мухталиф бо ҳадафи маъмурияти интиқоли кумакҳои башардӯстона, ҷалби таваҷҷуҳи ҷаҳонӣ ва шикастани муҳосираи тӯлонии Ғазза ва кушодани роҳи баҳрӣ барои расондани кумакҳо ба ин борика ташкил шуда буд.

Талоқ дар Тоҷикистон гарон шуд

Аз ҷониби
Azda TV 3
-
0

Дар Тоҷикистон арзиши асноди расмӣ барои талоқ байни зану шавҳар дар идораҳои марбута гарон шудааст.

Аз 1-уми октябр бо фармони Президент Эмомалӣ Раҳмон ба Қонун “Дар бораи боҷи давлатӣ” тағйирот ворид шуд, ки тибқи он маблағи пардохт барои бекор кардани ақди никоҳ афзоиш ёфт.

Гуфтам мешавад, қаблан ҳаққи ҷудошавӣ дар идораҳои сабти асноди шаҳрвандон аз 75 то 525 сомонӣ буд, ҳоло он аз 150 то 1050 сомонӣ расидааст. Махсусан агар як ҳамсар танҳо ариза диҳад 150 сомонӣ пардохт мекунад, ки қаблан дар ин ҳолат 75 сомонӣ пардохт мешуд.  

Дар сурати зану шавҳар якҷоя ариза диҳанд 750 сомонӣ боя пардохт кунанд, ки қаблан дар чунин ҳолат 375 сомонӣ мепардохтанд.  

Дар ин тағйироти ҷадид гуфта мешавад, агар ҷудошавӣ байни зану шавҳар бо қарори додгоҳ сурат гирад, бояд 1050 сомонӣ пардохт кунанд, ки ин ҳолат қаблан 525 сомонӣ арзиш дошт.  

Ин дувумин маротиба аст, ки дар як сол ҳаққи расмии талоқ дар кишвар боло бурда мешавад. Мақомот мегӯянд, ҳадаф коҳиш додани шумори талоқҳо мебошад. Аммо бархе аз сокинон ин афзоишро ҳамчун фишор болои шаҳрвандони оддӣ арзёбӣ мекунанд.

Марги панҷ нафар дар се рӯз

Аз ҷониби
AZDA-TV
-
0

Аз 27 то 29-уми сентябри соли ҷорӣ дар минтақаҳои гуногуни Тоҷикистон бар асари садамаҳои нақлиётӣ панҷ кас ҷони худро аз даст дода, чанд нафари дигар ҷароҳатҳои вазнин бардоштанд.

Бино ба иттилои Вазорати корҳои дохилии Тоҷикистон, 27-уми сентябр дар ноҳияи Данғара ду мошини тамғаи Opel-Astra ба ҳам бархӯрда, дар натиҷа як мусофир дар ҷойи ҳодиса ба ҳалокат расида, ду нафари дигар бо ҷароҳатҳои вазнин ба беморхона интиқол ёфтанд.

Ҳамон рӯз дар роҳи “Душанбе–Турсунзода” ронандаи мошини “Daewoo Lacetti” пиёдагарди ноболиғеро зер мекунад, ки баъд аз муддате он кӯдак дар беморхона вафот кард.

28-уми сентябр дар шоҳроҳи “Панҷакент–Айнӣ” байни мошинҳои “SsangYong Musso” ва “Hyundai Avante” садама рух дода, ронандаи Hyundai дар ҷойи ҳодиса ҳалок шуда, се нафари дигар ҷароҳатҳои вазнин бардоштанд.

Худи ҳамон рӯз дар ноҳияи Шаҳритӯс ронандаи мошини Opel-Zafira ҳангоми ҳаракат дар ҳудуди ҷамоати деҳоти Пахтаободи ноҳияи мазкур аз уҳдаи идораи воситаи нақлиёт набаромада, духтари панҷсоларо пахш намуд, ки ин духтарак бар асари ҷароҳатҳои вазнин дар ҷойи ҳодиса ҷон бохтааст.

Инчунин 29-уми сентябри соли ҷорӣ, дар ноҳияи Зафаробад ронандаи Opel-Astra идораи мошинро аз даст дода, ба дарахт бархӯрдааст. Ронанда бо ҷароҳатҳои вазнин ба беморхона интиқол ёфт, вале дар он ҷо вафот кардааст. Аз рӯи ҳамаи ин ҳодисаҳо тафтишот идома дорад. 

Гуфта мешавад, чанд вақти охир дар роҳҳои Тоҷикистон ҳолати садамаҳои маргбор бисёр шудааст ва агар аз омилҳои асосии афзоиши садамаҳо дар Тоҷикистон суръатбаландӣ ва сифати пасти роҳҳо бошад, яке аз масъалаҳои дигари он бо додани пора гирифтани шаҳодатномаҳои ронандагӣ мебошад ва одамоне паси чанбари мошин мешинанд, ки қоидаҳои роҳро хуб намедонанд.

Як модари тоҷик дар Русия маҳкум ба зиндон шуд

Аз ҷониби
AZDA-TV
-
0

Як модари тоҷик дар шаҳри Митишии вилояти Маскав бо иттиҳоми қаллобӣ ба 4 соли зиндон маҳкум шуд.

Мақомоти Русия модари серфарзанд Таҳмина Самадоваро, ки шаҳрвандии ин кишварро дорад ба додани маълумоти нодуруст дар бораи даромади оила ва чанд маротиба камтар нишон додани он барои мақоми камбизоатӣ гирифтан, гунаҳкор донистааст.

Додгоҳ бо ин иттиҳом ба Самадова чор соли маҳрумият аз озодӣ таъйин кардааст, вале иҷрои ҳукмро ба муҳлати 18 сол мавқуф гузошт, яъне то ба балоғат расидани писари хурдиаш.

Назари худи ин модари тоҷик то ҳол дастраси расонаҳо нашудааст.

Ёдовар мешавем, ки 13-уми январи соли ҷорӣ раиси шаҳри Митиши Юлия Купетская ба Таҳмина Самадова шаҳодатномаи давлатии хариди манзил ба маблағи зиёда аз 24 миллион рублро тақдим карда буд.

Купетская дар шабакаи телеграми худ тақдими хона ба оилаи Самадоваро як хурсандии солинавӣ номида, аз Таҳмина Самадова ҳамчун як модари фаъол дар ҳаёти ҷамъиятии мактабу кӯдакистон ва ҳам корманди ихтиёрии фондҳои хайрияи маҳаллӣ ва нақши мусбати ҳамсараш дар тарбияи фарзандон ситоиш карда буд.

Аммо ин хабар дар шабакаҳо ва расонаҳои русӣ вокуниши зиёд ва хашми миллатгароёни Русияро ба бор оварда, ин оиларо ба фасодкорӣ ва бевафоӣ ба Русия муттаҳам карданд. Баъзеҳо навиштаҳои шавҳари Самадоваро дар фейсбук, ки аз Тоҷикистон пуштибонӣ карда, гуфта буд, ки “готов порвать любого за таджикский флаг” мисол овардаанд.

Пас аз вокуниши миллатгароёни рус, 20-уми январ раиси Кумитаи тафтишотии Русия Александр Бастрикин, ки дар расонаҳо бо мавқеъгириҳои зидди муҳоҷирияш машҳур аст, талаб намуд, ки дар бораи ин қазия ҳисобот пешниҳод кунад ва дар натиҷа нисбат ба ин ҳодиса бо моддаи қаллобӣ (қисми 4-и моддаи 159.2 Кодекси ҷиноятии Федератсияи Русия) парвандаи ҷиноӣ боз шуд.

Дертар Кумитаи тафтишотии Русия дар вилояти Маскав Таҳмина Самадоваро, ки 14 сол аст шаҳрвандии ин кишварро дорад, бо иттиҳоми қаллобӣ, боздошт кард ва ин модари ҳафт фарзанд барои ҳомила буданаш то поёни баррасии парванда дар ҳабси хонагӣ қарор дошт.

Ба иддаои дафтари матбуотии Кумитаи тафтишотии Русия, Самадова даромади шавҳараш Рамазон Раҳимовро чанд маротиба кам нишон додааст, то оилаи онҳо ҳамчун оилаи камбизоат эътироф шавад. Ҳамчунин ӯ дар ҳуҷҷатҳо нишон додааст, ки ҳамроҳ бо ӯ дар як хона 13 нафар, аз ҷумла бародараш бо 2 фарзандаш истиқомат мекунанд, дар ҳоле, ки онҳо дар Тоҷикистон қарор доранд.

Пас аз ин ҳодиса расонаҳо аз боздошти муовини раиси шаҳри Митиши хабар дод.

Ин мақомдори рус ба нодуруст санҷидани даромад ва аъзои оилаи зодаи Тоҷикистон Таҳмина Самадова айбдор шуда буд.

Кумитаи тафтишот мегӯяд, ки муовини шаҳрдор сардори комиссияе буда, ки Таҳмина Самадова ва шавҳару фарзандонашро ҳамчун хонаводаи камбизоат эътироф карда, сертификати хонаро додааст.

Нисбати ин мақомдори рус бо иттиҳоми хунукназарӣ (моддаи 293-и Кодекси ҷиноии Русия) парвандаи ҷиноӣ боз шуда, то ҳол тақдираш норушан боқӣ мондааст.

Дар чанд моҳи охир ҳадди ақал се маротиба тақдими хона ба зодаҳои Тоҷикистон дар Русия баҳсбарангез гашта буд.

Додани хона ба оилаи зодаи Тоҷикистон Акрам Масаидов, ки чор фарзанд дорад ва дорои шаҳрвандии Русия аст, дар шаҳри Качканари вилояти Свердлов ва додани хона ба Муҳиддин Холзода ва хонаводааш аз тарафи шаҳрдории шаҳри Нижнекамски Ҷумҳурии Тотористон низ боиси хашси миллатгароҳои рус гашта буд.

СПАД аз таҳдидҳои навини низомӣ нигарон аст

Аз ҷониби
Azda TV 3
-
0

Кишварҳои узви Созмони Паймони Амнияти Дастаҷамъӣ (СПАД) қасд доранд дар муқобили таҳдидҳо ҳангоми истифодаи силоҳҳои навин, иқдомоти дастаҷамъӣ роҳандозӣ намоянд.

Аъзои фаъоли СПАД, мисли кишварҳои Русия, Беларусия, Қазоқистон, Қирғизистон, Тоҷикистон ва Арманистон ҳамагӣ дар ин тасмими дастаҷамъӣ ҳамроҳанд.

Баррасии созишномаи марбут рӯзҳои наздик дар шаҳри Санкт-Петербург, дар ҷаласаи Комиссияи доимии Ассамблеяи парлумонии СПАД оид ба дифоъ ва амният баргузор хоҳад шуд.

Дар ин бора раиси Комиссия Анатолий Виборний ба Парламентская газета иттилоъ додааст, хабар медиҳад дафтари матбуоти Кумитаи иҷроияи ИДМ.

Ба гуфтаи Виборний, ҳамкорӣ миёни кишварҳои узв омӯзиш, табодули иттилоот ва таҷрибаи истифодаи амалии ин технологияҳоро дар бар мегирад. Ӯ афзуд, ки сухан дар бораи механизмҳои ҳуқуқӣ ва ташкилии истифодаи навъҳои ҷадиди аслиҳа ва техника меравад.

Лоиҳаи созишнома бо таваҷҷуҳ ба ҳамоҳангии амалиёти дастаҷамъӣ таҳия мешавад, то ки кишварҳои СПАД тавонанд ба таҳдидҳо ва чолишҳои нав посухи саривақтӣ диҳанд. Виборний таъкид намуд, ки имзои ин санад сиёсати ягона ва ҳамоҳангшудаи кишварҳоро дар истифодаи силоҳ ва фанновариҳои нав таъмин мекунад.

Ба гуфтаи ӯ, ин ҳамкориҳо на танҳо банақшагирӣ ва ҳамкории муштарак, балки гузаронидани экспертиза ва дастгирии иттилоотиро низ фаро мегиранд. Виборний зикр кард, ки муҳим аст навовариҳо ба як бартарии ҳалкунанда дар таъмини амнияти дастаҷамъӣ табдил ёбанд, ҳамон тавре ки замоне тӯп, ҳавопаймо ва танкҳо қудрати низомиро дигар карда буданд.

1...383940...738саҳифаи 39 аз 738

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
broken clouds
8.1 ° C
8.1 °
8.1 °
93 %
6kmh
75 %
Tue
10 °
Wed
8 °
Thu
8 °
Fri
14 °
Sat
12 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст