Ҷустуҷӯ кунед
Ҷустуҷӯ
30.9 C
Dushanbe
Хона блог саҳифа 39

Оё раводиди байи Эрон ва Тоҷикистон пурра бекор шуд?

Аз ҷониби
Azda TV
-
0

Зимни сафари раисҷумҳури Эрон ба Тоҷикистон Эмомалӣ Раҳмон аз лағви пурраи низоми раводид байни ду кишвар хабар дод.

Дар мулоқотҳои якҷоя Масъуд Пизишкиён хабари лағви пурраи раводидро тасдиқ кард. Дар ҳамин ҳол расонаи тоҷикии “Asia Plus” дар истинод ба манобеи худ хабар медиҳад, ки рӯзҳои ахир чанде аз шаҳрвандони Тоҷикистон бидуни раводид аз Туркия вориди Эрон шудаанд.

Таҳлилгарон бар асоси баёнияҳои мустақим ва ғайри мустақими раисҷумҳурони кишварҳои Тоҷикистон ва Эрон мегӯянд, ин ду кишвар раводид байни ҳамдигарро пурра лағв кардаанд. Ҳарчанд мақомоти Тоҷикистон ҳанӯз ин хабарро рад ё тасдиқ накардаанд. 

16-уми январ, дар шаҳри Душанбе Эмомалӣ Раҳмон зимни мулоқот бо ҳамтои эронии худ Масъуд Пизишкиён гуфт: “Раводидро аз байн бардоштам, ҳоло шаҳрвандони Эрон метавонанд ҳар вақт, ки хоҳанд, бо аҳли оилаашон ба Тоҷикистон сафар кунанд”.

Дар ин бора Масъуд Пизишкиён ҳам дар Душанбе гуфт, ки пеш аз сафар ба Тоҷикистон низоми раводидро миёни тамоми шаҳрҳо лағв кардааст. Ӯ гуфт: “Баҳси раводид қабл аз омадани мо ҳал шуд. То ҷое, ки битавонем, раванди рафту омад байни Эрон ва Тоҷикистонро соддатар мекунем. Ин барои ҳарду кишвар судманд хоҳад буд”.

Пешниҳоди лағви раводид ба тамомии шаҳрҳо бори аввал аз ҷониби Тоҷикистн матраҳ шуд, ки ҷониби Эрони равиши эҳтиёткоронаеро пеш гирифта, шарт гузошт, ки дар навбати аввал низоми бераводид танҳо аз парвозҳои байни Душанбев ва Теҳрон ва баръакс анҷом дода шавад ва шаҳрвандони ду кишвар, ки аз дигар маконҳо парвоз анҷом диҳанд, ин низом барои онҳо ҷорӣ намегардад.

Ёдовар мешавем, ки бори нахуст Иброҳим Раисӣ, собиқ раисҷумҳури Эрон моҳи ноябри соли 2023 ба Тоҷикистон сафар дошт, ки зимни он байни ду кишвар Ёддошти тафоҳум дар мавриди лағви раводид ба имзо расид.

Бештар аз 9 моҳ тӯл кашид то масъулони кишварҳо санадҳои лозимаро тартиб дода, дар парлумони кишварҳо тасдиқ кунанд ва ниҳоятан аз 10-уми августи соли 2024 низоми раводид ба ҳамон қарордоди аввала миёни Тоҷикистону Эрон лағв шуд.

Номаи мухолифи тоҷик ба Трамп

Аз ҷониби
AZDA-TV
-
0

Шарофиддин Гадоев, раиси Ҷунбиши Ислоҳот ва Рушди Тоҷикистон бо навиштани номае ба Президенти тозаинтихоби Амрико Доналд Трамп аз мушкилоти Тоҷикистон гуфтааст.

Дар ин нома, ки 20-уми январи соли ҷорӣ навишта шудааст, аз Трамп хоста шуда, ки аз озодии фаврӣ ва беқайду шарти маҳбусони сиёсӣ, қатъи таъқибу фишор ба фаъолон ва ташкили интихоботи озоду шаффоф дар Тоҷикистон пуштибонӣ кунад.

Ҳамзамон Гадоев гуфтааст, дар Тоҷикистон буҳрони сиёсӣ ва башарӣ шиддат гирифта, режими Эмомалӣ Раҳмон озодиҳои шаҳрвандиро пайваста саркӯб намуда, намояндагони мухолифин, расонаҳои мустақил ва ҳомиёни ҳуқуқро таъқиб мекунад. Ба гуфтаи ӯ, ин амалҳо на танҳо ба мардуми Тоҷикистон, балки ба амнияти минтақа ва ҷаҳон таҳдид менамоянд.

“Суботи Тоҷикистон дар таъмини амнияти Осиёи Марказӣ ва ҷомеаи ҷаҳонӣ нақши калидӣ дорад. Мо омодаем бо маъмурияти шумо барои пешбурди ислоҳоти демократӣ, ҳимояи ҳуқуқи инсон ва таҳкими волоияти қонун дар Тоҷикистон ҳамкорӣ намоем”, – таъкид кардааст Гадоев.

Раиси Ҷунбиши Ислоҳот ва Рушди Тоҷикистон дар номааш гуфтааст, ки Президент Трамп ва Иёлоти Муттаҳида, ҳамчун ҳомии пешбари арзишҳои демократӣ, метавонанд дар ҳалли буҳрон ва расидан ба сулҳи пойдор дар Тоҷикистон нақши ҳалкунанда бозанд ва даъват кардааст, ки ташаббуси муколамаи созанда байни мухолифини тоҷик ва режими Эмомалӣ Раҳмонро дастгирӣ намояд.

Номаи Шарофиддин Гадоев дар ҳоле навишта шудааст, ки Доналд Трамп, намояндаи Ҳизби ҷумҳурихоҳ дар интихоботи моҳи ноябри соли 2024 дар Амрико пирӯз шуд ва рӯзи 20-уми январ ба ҳайси президент савганд ёд кард.

Доналд Трамп ҳамчун 47-умин раисҷумҳури Амрико савганд ёд кард

Аз ҷониби
Azda TV 3
-
0

Рӯзи 20-уми январ Доналд Трамп раисҷумҳури тозаинтихоби Амрико барои оғози кораш савганд ёд кард.

Доналд Трампи 78-сола аз рӯи тартиб 47-умин раисҷумҳури Амрико шуд. Ӯ пас аз 4 соли таваққуф бори дуюм аст, ки соҳиби курсии расҷумҳурии Амрико мешавад. Трамп бори аввал соли 2017 раисҷумҳури кишвараш интихоб шуда буд. Аммо дар интихоботи соли 2021 дар баробари Ҷо Байден курсии президентиро бохт.

Доналд Трамп, ки Ҳизби ҷумҳурихоҳро намояндагӣ мекунад, дар ин интихоботи ахир Камола Ҳаррис, намояндаи Ҳизби демократро шикаст дод. Ҷо Байден ба сабабҳои нотавонии ҷисмӣ аз ворид шудан ба сабқати интихобот канорагирӣ кард ва баҷои ӯ муовинаш Камола Ҳаррис бо Доналд Трамп вориди рақобат шуд.

Маросими савгандёдкунии Доналд Трамп бо ҳузури шахсиятҳои машҳур, раисҷумҳурони собиқи ин кишвар, тоҷирон ва сиёсатмадорон дар бинои Конгресс баргузор шуд.

Трамп зимни суханрони худ дар робита ба “сулҳу ваҳдати ҷаҳонӣ” гуфт, ки таҳлилгарон ин ишораи ӯро ба ҷанги Русия ва Украина марбут медиҳанд. Ӯ пештар ҳам ваъда дода буд, ки ба ҷанги Украина ва Русия хотима хоҳад дод.

Ӯ низ ишораи кӯтоҳе ба таҳавулоти Ховари Миёна, аз ҷумла сулҳ дар Ғазза ва табодули асирон байни Исроил ва ҲАМОС кард.

Трамп инчунин зимни суханронияш такид кард, ки номи Халиҷи Мексикаро тағйир дода Халиҷи Амрико ном хоҳад гузошт.

Дар идомаи суханрониҳояш Трамп канали Панамаро “туҳфаи аблаҳона” ба Панама номид ва ваъда дод, ки дар ин замина иқдом хоҳад кард. Трамп ҳушдор дод, ки “мо онро бозпас мегирем”.

Раисҷумҳури Амрико дар масъалаи боло бурдани молиёт ба маҳсулотҳои хориҷӣ ҳушдор дода гуфт: “Мо ба кишварҳои хориҷӣ андозҳо ҷорӣ мекунем, то шаҳрвандони худро сарвадман гардонем.”

Бахши дигари суханрониҳои Трамп ба масъалаи муҳоҷирати ғариқонунӣ бахшида шуда буд. Ӯ гуфт, ки қасд дорад чандин фармонҳои зарурӣ, аз ҷумла дар мавриди мубориза бо муҳоҷирати ғайриқонунӣ имзо мекунад.

“Ҳамагуна вуруди ғайриқонунӣ қатъ карда мешавад, раванди баргардонидани миллионҳо муҳоҷири ғайриқонуниро ба ҷое, ки онҳо омадаан, оғоз мекунем.” – гуфт Доналд Трамп.

Раисиҷумҳури ҷадиди Амрико ҳамчунин аз Эрон ёдовар шуд ва гуфт, пас аз инфиҷори пейҷерҳои нерӯҳои “Ҳизбуллоҳ”-и Лубнон ва кушта шудани раҳбарони ин гурӯҳ дар ҳамалоти Исроил ва ҳадафи ҳамла қарор гирифтани сохтори дифои ҳавоии ин кишвар дар ҳамлаҳои Исроил, Эрон хеле заиф шудааст.

Дар ҳамин ҳол Марко Рубио, вазири корҳои хориҷии Трамп ва яке аз сенатороне, ки нисбат ба сиёсатҳои Эрон “бадбин” гуфта мешавад, мегӯяд, бо ҷорӣ кардани сиёсати “фишори ҳадди аксар” қасд дорад Эронро дар бораи барномаи ҳастаӣ ва дахолати он ба минтака ба мизи музокирот бикашонад.

Доналд Трамп пас аз ширкат ва суханронӣ дар маросими савгандёдкунӣ шоми душанбе вориди Кохи Сафед шуд ва дар он ҷо фармонҳои зиёдеро имзо кард.

Ҷойивазкунии мақомдорон дар Тоҷикистон идома дорад

Аз ҷониби
AZDA-TV
-
0

Дар Тоҷикистон бо фармони Эмомалӣ Раҳмон мавсими тағйири кадрҳо ё худ ҷойивазкунии мақомдорон идома дорад. 

Дар пайи ин ҷойивазкуниҳо Нуриддин Саид аз вазифаи раиси Кумитаи телевизион ва радио озод ва ба ҷои ӯ Носир Саид, ки то ин дам роҳбари телевизиони “Сафина” буд, ба ин мансаб таъйин гардидааст. Ба ҷои Носир Саид, Садриддин Шамсиддинзода, собиқ раиси телевизиони “Ҷаҳоннамо” ба курсии раисии телевизиони “Сафина” нишаст.

Раиси нави телевизиони “Ҷаҳоннамо” Соҳибназари Ғоиб, собиқ раиси телевизиони “Хатлон” ва писари Шоири халқии Тоҷикистон Муҳаммад Ғоиб таъйин гардидааст. Ҷойнишини ӯ дар телевизиони “Хатлон” то ҳол маълум нест.

Гуфта мешавад, Нуриддин Саид, ки дар мақомҳои баланди давлатӣ, аз ҷумла вазири маорифи кишвар кор карда ва дар расонаҳо бо қарорҳои баҳсбарангезу ибораи “латукӯбизатся” маъруф аст, бознишаста шудааст.

Ҳамчунин имрӯз, 21-уми январ Эмомалӣ Раҳмон номзадии Шермуҳаммад Шоҳиёнро барои барканорӣ аз вазифаи раиси Додгоҳи олии Тоҷикистон ба маҷлиси миллӣ пешниҳод намуда, Рустам Мирзозодаи 50-сола, ки то ҳол раиси Додгоҳи олии имқтисодии Тоҷикистон буд, ҳамчун раиси Додгоҳи олӣ пешҳниҳод кардааст. Шермуҳаммад Шоҳиён аз рӯйхати Ҳизби халқӣ-демократӣ номзад ба вакили парлумон, ки моҳи марти соли ҷорӣ баргузор мегардад, мебошад. 

Дар пайи ин ҷойивазкуниҳо Гулнора Ҳасанзода аз вазифаи вазири меҳнату муҳоҷират ва шуғли аҳолии Тоҷикистон озод ва ба ҷои ӯ Солеҳа Холмаҳмадзода, ки вакили парлумони кишвар буд, вазир таъйин шудааст.

Инчунин бо фармони дигари Раҳмонов, Рустам Назарзода аз мансаби раиси Кумитаи ҳолатҳои фавқулода озод гардида, ба ҷои ӯ Раҳмоналӣ Раҷабалӣ, ки то ин дам сардори нурӯҳои марзбонии Тоҷикистон буд, раиси нави ин кумита таъйин гардид.

Курсии Раҳмоналиро муовини якумаш Муродалӣ Раҷабзода соҳиб гаштааст, ки ҳамзамон муовини аввали раиси Кумитаи давлатии амнияти миллӣ таъйин гаштааст. 

Бо фармони дигаре имрӯз Дилмурод Давлатзода директори Агентии суғуртаи иҷтимоӣ ва нафақаи Тоҷикистон таъйин шуд. Вазифаи нави Ҳалимзода Абдураҳмон Достӣ раиси ин агентӣ то ҳол маълум нест. 

Эмомалӣ бо як фармони дигар Абдуллозода Аҳтамро аз вазифаи сардори Саридораи сири давлатии Тоҷикистон гирифта, ба ҷойи Барно Саидвализола сардори Хадамоти иҷрои назди Тоҷикистон таъйин кардааст.

Ҳамзамон Олимҷон Муҳаммадҷонзода аз вазифаи раиси Кумитаи забон ва истилоҳт барканор ва ба ҷои ӯ Сахидод Раҳматуллозода, ки муовинаш буд, раиси Кумитаи забон ва ислоҳоти таъйин шуд.

Пештар аз ин низ дар дигар ниҳодҳо, шаҳру ноҳияҳо ва сохторҳои қудратии кишвар ҷойивазкуниҳо сурат гирифта буд ва ин раванд чанд дар ҳукумати Эмомалӣ рӯзи дигар идома хоҳад кард.

Тибқи маъмул дар Тоҷикистон ҳар сол моҳи январ тағйироти кадрӣ сурат мегирад, аммо аксари коршиносон ин тағйиротро шаклӣ медонанд. Зеро ба гуфтаи онҳо, одатан Эмомалӣ Раҳмон дар тақсимоти мансабҳо ихтисос ва донишу маҳоратро меъёр қарор намедиҳад, балки меъёр дар интихоби кадрҳо бештар шинос будану наздик будан ба хонавода аст.

Коршиносон тағйироти кадрӣ дар вазорату кумитаҳои Тоҷикистонро танҳо ҷойивазкунӣ меноманд, чун аксар мақомдорон аз як вазифа барканор шуда, бидуни дар назар гирифтани дастовардҳои шахсӣ ва донишу маҳорат ба вазифаи дигар таъйин мегарданд.

Тазоҳуроти навбатӣ барои озодии Абдуллоҳ ва Дилмурод

Аз ҷониби
AZDA-TV
-
0

Гурӯҳе аз фаъолони муқими Олмон бо талаби озодӣ ба Абдулоҳи Шамсиддин ва Дилмурод Эргашев дар назди бинои кор бо муҳоҷирони шаҳри Дортмунд гирдиҳамоӣ карданд. 

Ин гирдиҳамоӣ 18-уми январи соли 2025 бо ташаббуси Корнели Суҳан ва Себастиан Розе баргузор шудааст. Ҷамъомадагон дар даст аксҳои Абдуллоҳ ва Дилмуродро дошта, аз мақомоти Олмон талаб кардаанд, ки ин ду фаъоли ихроҷшударо ба Олмон баргардонанд.

Ин бори аввал нест, ки фаъолони ҳуқуқибашарӣ ва ҷомеаи шаҳрвандии Олмон, инчунин фаъолони тоҷики муқими ин кишвар дар назди ниҳодҳои давлатии Олмон барои раҳоии Абдуллоҳ ва Дилмурод даст ба эътироз мезананд.

Гуфта мешавад, бар иловаи эътирозҳо борҳо созмонҳои байналмилалӣ, фаъолони олмонӣ ва тоҷик аз мақомоти расмии Тоҷикистон раҳоии Дилмурод ва Абдуллоҳро талаб кардаанд, аммо режими имрӯзаи Тоҷикистон мисли ҳамеша ин талаби созмонҳоро нодида мегирад.

Ёдовар мешавем, ки 18-уми январи соли ҷорӣ мақомоти Олмон фаъоли сиёсии тоҷик Абдуллоҳи Шамсиддин, писари узви аршади ҲНИТ-ро аз тариқи Туркия ба Тоҷикистон ихроҷ карда буданд ва дар фурӯдгоҳи Душанбе мақомоти тоҷикистонӣ билофосила ӯро боздошт ва сипас бо ҳукми додгоҳ ба 7 соли зиндон маҳкум карданд ва Абдуллоҳ ду сол аст, ки дар зиндон аст.

Пас аз эътирозҳои пайдарпайи наздикону дӯстони Абдуллоҳи Шамсиддин вазири корҳои хориҷии Олмон моҳи июни соли ҷорӣ дар назди вакилони парлумони ин кишвар ихроҷи ӯро ба Тоҷикистон кори иштибоҳи мақомоташ хонда буд.

Аммо мақомоти Олмон аз ихроҷи фаъолони тоҷик даст набардошта, узви “Гурӯҳи 24”-ро ба Тоҷикистон истирдод кард, ки дар натиҷа ин фаъоли мухолифин низ барои 10 сол равонаи зиндон гардид.

Ҳомиёни ҳуқуқи башар мегӯянд, амалкарҳои Олмон хилофи қонунҳои байналмилалӣ аст, зеро ин қавонин баргардонидани афродро ба кишварҳое, ки дар он ҷо шиканҷа ё таъқиб онҳоро таҳдид мекунад, манъ мекунад.

Дертар мақомоти Олмон 6-уми ноябри соли 2024 узви Ҷунбиши ислоҳот ва рушди Тоҷикистон Дилшод Эргашевро, ки аз соли 2011 дар Олмон ба сар мебурд ва дар эътирозҳои осоишта алайҳи режими Эмомалӣ Раҳмон ширкат кардааст, тариқи Туркия ба Тоҷикистон истирдод кард.

Пас аз истирдод ин фаъолро кормандони Кумитаи давлатии амниятии миллии Тоҷикистон дар фурӯдгоҳи Душанбе боздошт карда, барои 2 моҳ ба ҳабси пешакӣ гирифта буданд, вале дар ҳоли ҳозир аз вазъияти ӯ чизе гуфта намешавад.

Бояд гуфт, Эргашев дар остонаи ихроҷаш, 5-уми ноябри соли ҷорӣ қасди худкушӣ карда, рагҳои дасту пойи худро бурида буд ва ба эҳтимоли зиёд дар Тоҷикистон мавриди шиканҷа қарор гирифта, дар шифохона бистарӣ гашт.

Оташбас дар Ғазза барқарор шуд

Аз ҷониби
AZDA.TV
-
0

Рӯзи якшанбе, 19-уми январ соати 8:30 субҳ ба вақти маҳаллӣ оташбас дар Ғазза барқарор шуд ва мардум барои изҳори шодӣ ба кӯчаҳо баромаданд.

Исроил 471 рӯз Ғаззаи кӯчакро бо сангинтарин силоҳҳо бомброн кард, ки ҳоло, ба хусус дар минтақаи шимол ҳеч хонае вуҷуд надорад ва ҳама ба саҳро ва талутеппа мубаддал шудааст.

Қарор аст, марҳилаи аввали оташбас 42 рӯз идома ёфта, дар ин муддат 33 асири исроилӣ ва 1900 асири фаластинӣ озод шаванд. Аллакай дирӯз, 3 асири исроилӣ ва 90 зиндонии фаластинӣ озод шуда, ба хонаҳои худ баргаштанд.

Тибқи тавофуқоти дуҷониба, дар ин миён наздики 300 нафар аз зиндониёни фаластиние, ки дар зиндонҳои Исроил барои якумра маҳкум шуда буданд, озод мешаванд, аммо 230 нафари онҳо ба шарти берун шудан аз хоки Фаластин озод мешаванд ва ҳаққи ворид шудан ба хоки кишвари худро надоранд.

Ва ҳамчунин расонаҳо хабар медиҳанд, тибқи бандҳои оташбас дирӯз барои бори аввал 600 мошин кумакҳои башардӯстона вориди Ғазза шудааст. То ин дам ворид шудани шудани мошинҳои ҳомили кумакҳои башардӯстона, хусусан ба шимоли Ғазза мамнуъ буд ва ё хеле кам ворид мешуд.

Кумитаи ҳолатҳои фавқулоддаи Ғазза мегӯяд, аз дирӯз танҳо дар минтақаи Рафаҳ 97 ҷасадро аз кӯчаҳо ва аз зери овораҳо берун овардаанд. Ин ниҳод мегӯяд, ба сабаби бомборонҳои Исроил 99 корманд ҳангоми корҳои кумакрасонӣ ҷони худро аз даст дода, беш аз 350 нафар боздошт шудаанд, ки то ҳол тақдири онҳо маълум нест.

Дар ҳамин ҳол Доналд Трамп, ки имрӯз ҳамчун президенти 47-уми Амрико бояд қасам ёд кунад, оташбаси Ғаззаро “бузургтарин дастовард” хонад ва афзуд, ки ин оғози сулҳи доимӣ дар Ховари Миёна аст.

Аммо Бинёмин Натанёҳу, сарвазири Исроил мегӯяд, тамоми асирон баргардонида мешаванд, вале ин оташбас муваққатӣ аст ва бояд ҲАМОС дар Ғазза аз байн бурда шавад.

Ёдовар мешавем, ки Исроил бо кумаки кишварҳои абарқудрат аз 7-уми октябри соли 2023 Ғаззаро ба хоку хун кашид ва дар ин минтақаи кӯчак, ки беш аз 2 миллион нафар зиндагӣ мекунанд, даст ба наслкушӣ зад. То кунун 157 ҳазор нафар кушта ва захмӣ баҷо гузошт, ки беш аз 70% онҳоро занону кӯдакон ташкил мекунанд. Ба гуфтаи масъулини Кумитаи ҳолатҳои фавқулоддаи Ғазза, ҳоло беш аз 11 ҳазор ҷасад зери овораҳо мондааст, ки натавонистаанд онҳоро берун бароранд. Инчунин дар пайи бомборонҳои шадид ва дар ҳоли гуруснагӣ нигоҳ доштани аҳолии Ғазза низ даҳҳо кӯдаку пиронсол ҷони худро аз даст додаанд, ки инро фоҷеаи бузурги инсонӣ дар дунё номиданд.

Зиндонӣ шудани як муҳоҷири тоҷик бо иттиҳоми “бадномкунии низомиёни рус”

Аз ҷониби
Azda Tv
-
0

Як шаҳрванди Тоҷикистон дар шаҳри Новосибисрки Русия бо иттиҳоми “бадномкунии низомиён” ба ҳафт соли зиндон маҳкум шуд. 

Тибқи иттилои Додгоҳи ноҳияи Калининскии шаҳри Новосибирск, шаҳрванди Тоҷикистон Далерҷон Очилов, ки дар маркази савдои Новосибирск ба гуштфурӯшӣ машғул будааст, “аз моҳи феврали соли 2022 то марти 2024 маълумоти бардурӯғро дар бораи ҷанги Ураина нашр карда, Путин ва тасмими ҳукумати Русия барои ҳамала ба хоки Украинаро маҳкум кардааст.” Додгоҳ Далерҷонро дар таҳқири занони рус низ гунаҳкор медонад. 

Додгоҳ ҳукмашро 16-уми январи соли 2025 содир кардааст. Тибқи ин ҳукм, Додгоҳи ноҳияи Калинини шаҳри Новосибирск Ачилов Далерҷонро дар содир намудани ҷиноят “паҳн кардани маълумоти бардурӯғ дар бораи Қувваҳои мусаллаҳи Русия бар асоси кинаю хусумати сиёсӣ, идеологӣ, нажодӣ, миллӣ ё динӣ ва иттиҳоми авбошӣ” гунаҳкор медонад.

Аммо сомонаи ҳомии ҳуқуқи башари “Мемориал” навишта, ки моҳи марти соли 2024 Очилов бо яке аз занҳои фурӯшанда дар бозор муноқиша кардааст. Ва ин зан бар болои Далерҷон шикоят бурда ва даъво карда, ки Очилов “Амалиёти махсуси низомиро маҳкум кардааст ва ба русҳо нафрат дорад”.

Дар аввал пулис гуфта, ки ҳеҷ далели гуноҳи Очиловро пайдо накардаанд. Аммо пас аз ҳамлаи террористии “Крокус Сити Холл”, ки чанд тан аз шаҳрвандони Тоҷикистон бо гумони иштирок дар ин ҳамла боздошт шудаанд, Кумитаи тафтишоти Русия дигарбора шикояти барзидди Очиловро баррасӣ карда, алайҳи ӯ парвандаи ҷиноӣ боз карданд. Дар ниҳоят додгоҳ бо иттиҳоми бадном кардани нерӯҳои мусаллаҳи Русия ин шаҳрвнади Тоҷикистонро ба 7 соли зиндони низомаш умумӣ аз озодӣ маҳрум кард.

Вакили дифои Далерҷон, Наталя Воронтсова ба “SotaVision” гуфтааст, ки зерҳимояаш гуноҳашро эътироф намекунад ва парвандаи ӯ бо далелҳои беасосо сохта шудааст. Ба гуфтаи вакили мудофеи ин шаҳвранди Тоҷикистон, аксари шоҳидони айбдоркунанда натвонистаанд шунидани дашномҳо аз сӯи Далерҷонро исбот кунанд.

Ба боварии ҳуқуқшиносон Далерҷон қурбонии раванди муҳоҷирбадбинӣ дар Русия шуда аст.

Режими Раҳмонов фишор болои дигарандешонро сахттар кардааст

Аз ҷониби
AZDA-TV
-
0

Дидбони Ҳуқуқи Башар (HRW) бо нашри гузорише аз идомаи саркӯби озодии баён ва боздошти фаъолону мухолифин, рӯзноманигорон ва ҳомиёни ҳуқуқ дар Тоҷикистон изҳори нигаронӣ кард.

Дар гузориши ин созмон, ки рӯзи 16-уми январ нашр шудааст, гуфта мешавад, дар соли 2024 Суҳроби Зафар, раҳбари зиндонии Ҳаракати сиёсии “Гурӯҳи 24” ва Насимҷон Шарифов, узви ин ҳаракат дар Туркия нопадид шуда, баъдан дар Тоҷикистон якумӣ ба 30 ва дигарӣ ба 20 соли зиндон маҳкум гардида, мавриди шиканҷа қарор гирифтаанд.

Ҳамзамон ДҲБ аз истирдоди фаъоли мухолифин Дилмурод Эргашев, ки моҳи ноябри соли гузашта аз Олмон ба Тоҷикистон ихроҷ шуда буд, ёдовар шуда мегӯяд, Эргашев дарҳол пас аз истирдодаш боздошт ва бо қарори додгоҳ ба ҳабси пешакӣ фиристода шуд.

Дар соли 2024 иддае аз ҳомиёни ҳуқуқ, рӯзноманигорон ва нависандагон боздошт ва равонаи зиндон гардиданд. Аз ҷумла? Шокирҷон Ҳакимов, муовини раиси Ҳизби сотсиал-демократи Тоҷикистон ва ҳуқуқшинос бо иттиҳоми “хиёнат” боздошт шуд ва мурофиаи додгоҳии ӯ идома дорад.

Инчунин дар моҳи феврали соли ҷорӣ ҳукми нависандаҳо Абдуқоддири Рустам, Абдухалил Холиқзода ва ношир Сeҳроб Раҷабзода содир шуда буд.

Дар моҳи августи соли 2024 Аҳмади Иброҳим, сардабири нашрияи мустақили “Пайк” боздошт шуд ва дар моҳи январи соли 2025 ба 10 соли зиндон маҳкум шуд. Ҳукми ӯ дар ҳолест, ки чандин рӯзноманигори дигар солҳо боз дар зиндон қарор доранд.

Ҳамзамон дар гузориши ДҲБ гуфта мешавад, ки то ҳол узви аъзаои баландпояи Ҳизби наҳзати исломии Тоҷикистон (ҲНИТ), ки ҳукумат онҳоро барои солҳои тӯлонӣ равонаи зиндон кардааст, бо вуҷуди талаби озодии беқайду шарти онҳо аз ҷониби созмонҳои байналмилалии ҳомии ҳуқуқ ва ҳатто СММ ҳоло ҳам дар зиндон қарор доранд. Дар миёни онҳо Зубайдулло Розиқи 80-сола низ ҳаст, ки моҳи август ба иллати бемории қалб дар бемористон бистарӣ шуда буд.

Созмони ДҲБ мегӯяд, мақомоти Тоҷикистон барои тафтиш ва ба ҷавобгарӣ кашидани саркӯби маргбори эътирозҳои осоишта дар солҳои 2021 ва 2022 дар Вилояти Мухтори Кӯҳистони Бадахшон (ВМКБ) кореро анҷом надодааст ва зодагони ВМКБ то ҳол зери таъқибу фишори мақомот қарор доранд. Танҳо дар моҳи августи соли ҷорӣ 7 сокини ҷамоати Язгуломи ин вилоят бо иттиҳоми иртибот бо “Ансоруллоҳ” боздошт шуданд.

Хабарнигори шинохтаи зодаи ин вилоят Анора Саркорова бо иттиҳоми “даъватҳои оммавӣ ба фаъолияти ифротгароӣ” мавриди пайгард қарор дорад.

Ин созмони ҳуқуқӣ аз риоя нашудани ҳуқуқи занон, назорати либоси сокинон ва тарошидани риши мардон дар Тоҷикистон мақомотро интиқод кардааст.

Дар охири гузориши солонааш ДҲБ аз бештар шудани фишор болои муҳоҷирони тоҷик дар Русия, ихроҷи иҷбории онҳо ва маҷбурӣ фиристодани онҳо ба ҷанг бо Украина низ ёдовар шудааст.

Ин бори аввал нест, ки режими имрӯзаи Тоҷикистон барои саркӯби озодии баён ва риоя накардани ҳуқуқи башар мавриди интиқод қарор мегирад. Аммо мақомоти кишвар ҳамеша чунин гузоришҳоро нодида гирифта, сол ба сол вазъият дар Тоҷикистон бадтар мешавад.

Ҳаво сард мешавад! Ҳушдори КҲФ ба сокинони кишвар

Аз ҷониби
Azda TV 3
-
0

Бино ба иттилои Агентии обуҳавошиносии Тоҷикистон, аз 17-ум то 20-ум январ дар кишвар ҳавои сард, боридани барфу борон пешбинӣ мешавад.

Ин ниҳод мегӯяд, дар ин рӯзҳо пастшавии ҳарорати ҳаво, фаромадани туман ва дар минтақаҳои кӯҳӣ ва ҳамворӣ боридани барфу борон дар назар аст. Ҳамчунин хатари яхбандии роҳҳо, сарозер шудани тарма ва резиши санг дар бузургроҳҳои Душанбе-Чанок, Душанбе-Рашт-Лахш, Нуробод-Сангвор, Душанбе-Хор низ аз эҳтимол дур нест.

Ба сабаби вазъияти номуносиби обу ҳаво, Кумитаи ҳолатҳои фавқулодда ба шаҳрвандон тавсия медиҳад, ки дар чунин шароити эҳтиёткор бошанд.

КҲФ аз он нигаронӣ мекунад, ки бо вуҷуди додани ҳушдорҳо сокинон тасияҳоро нодида гирифта, дар рӯзҳои номуносиб ба сафарҳои дур ва кӯҳӣ баромада ҷони худ ва дигаронро ба хатар мегузоранд. Ин ниҳод аз сокинон хоста, ки дар чунин шароит “аз сафарҳои кӯҳӣ ва дур худдорӣ намоянд ва дар ин рӯзҳо барои ҷамъоварии ҳезум ба кӯҳҳо нараванд.”

Ёдовар мешавем, ки ҳарсол дар фасли зимистон ба сабаби саридии ҳаво ва бориши зиёди барф дар кишвар маҳдудияти қуваи барқ ҷорӣ карда мешвад ва сокинон маҷбур мешванд барои гарм нигаҳ доштан хонаҳи худ аз ҳезум ва ангишт истифода кунад, ки ин дар бисёр ҳолат сабаби сӯхтори манзил ва марги сокинон мешвад.

Ҳиндустон густариши фарҳангии худро дар Тоҷикистон бештар мекунад

Аз ҷониби
Azda TV
-
0

Сафири Ҳиндустон дар Тоҷикистон Раҷеш Уйке бо вазири фарҳанги Тоҷикистон, Сатториён Матлубахон Аминзода мулоқот анҷом дод.

Мулоқоти ҷонибҳо дар робита ба роҳҳои тақвияти фарҳангӣ, илмӣ ва адабӣ байни ду кишвар сурат гирифта, рушди равобит байни ин ду миллат, аз ҷумла ҷашнгирии муштараки мусиқӣ, филмҳо, фестивалҳо ва дигар анъанаҳои фарҳангии ду миллатро баррасӣ карданд.

Маркази фарҳангии “Свами Вивеканандар” дар Душанбе ҳамеша давраҳои омӯзишии мусиқии ҳиндӣ, шаклҳои рақси классикӣ, йога ва омӯзиши забони ҳиндӣ баргузор мекунад. Ба гуфтаи таҳлилгарон, ин талошҳо дар ривоҷи фарҳанги ҳиндӣ дар кишвар муассир будааст.

Дар ин нишаст Раҷеш Уйке аз нақши муассири Маркази фарҳангии “Свами Вивекананда” дар Душанбе ёдовар шудааст, ки ба гуфтаи ӯ, ин марказ дар таблиғи мусиқӣ ва рақси классикии Ҳиндустон ва тақвияти робитаҳои фарҳангии байни ду кишвар саҳми ҷиддӣ гузоштааст.

Ба андешаи фарҳангшиносон, Тоҷикистон ва Ҳиндустон дорои робитаҳои таърихӣ, фарҳангӣ ва забонӣ мебошанд, ки баъзе аз унсурҳои фарҳанги ҳиндӣ дар байни мардуми тоҷик тарафдорони худро дорад.

Ба гуфтаи онҳо, филмҳо ва сериалҳои телевизионии Ҳиндустон, ки ба забонҳои русӣ ва форсӣ трҷума шудаанд, дар миёни қишре аз ҷавонон ва хонумҳо маҳбубият дорад.

Бино ба иттилои расонаҳои ҳиндӣ, Шӯрои робитаҳои фарҳангии Ҳиндустон (ICCR) дар моҳи январи соли 2019 дар Донишгоҳи миллии Тоҷикистон кафедраи ҳиндӣ-урдуро таъсис дод, ки омӯзиш ва таблиғи забонҳои ҳиндиро дар минтақа ба уҳда дорад.

Тибқи гузоришҳо, сафорати Ҳиндустон дар донишгоҳҳо ва муассисаҳои Тоҷикистон якчанд “Шуъбаҳои омӯзиши забони ҳиндӣ” таъсис додааст, ки ин шуъбаҳо ҳоло ба марказҳои фарҳангӣ ва илмӣ табдил ёфтаанд.

1...383940...674саҳифаи 39 аз 674

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
scattered clouds
31.1 ° C
31.1 °
31.1 °
30 %
1kmh
40 %
Tue
41 °
Wed
38 °
Thu
37 °
Fri
37 °
Sat
39 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст