Консулгарии Тоҷикистон дар Новосибирски Русия ба изҳороти тундлаҳни вакили Шӯрои вакилони шаҳри Новосибирск, Ростислав Антонов вокуниш кард.

Вакили Шӯрои вакилони шаҳри Новосибирск Ростислав Антонов диаспораи тоҷикони шаҳри Новосибирскро ба он муттаҳам карда, ки аз хонаводаи духтари 17-солаи кушташудаи рус аз ҷониби як шаҳрванди 27-солаи Тоҷикистон узр напурсидааст.

Ба иттилои расонаҳои русӣ, ин вакили рус бо нашри паёме гуфтааст, ки интихобкунандагони норизо ба ин шӯро муроҷиат кардаанд, то ба қазияи куштори духтари рус аз тарафи муҳоҷири тоҷик дахолат кунад.

“Мехоҳам бо ин муроҷиатномаи саркушода ба раиси диаспораи тоҷикон дар Новосибирск Минҳоҷиддин Каримов муроҷиат кунам, ки ин рӯзҳо вонамуд мекунад, ки ин ҳодиса ба ӯ дахле надорад. Шумо намехоҳед ба хонаводаи кушташуда аз ҷониби ҳамватани худ ҳадди ақал ба таври расонаӣ узр хоҳед (дар мавриди кумак ман ҳатто чизе намегӯям) ва байни ҳамватанони худ корҳои фаҳмондадиҳӣ гузаронед ва ба онҳое, ки ҳоло қоидаҳои ҳамзистӣ дар ҷомеаи мутамаддинро намедонанд, фаҳмонед”, – изҳор дошт Ростислав Антонов.

Ҳамчунин Ростислав Антонов пешниҳод кард, ки диаспораи тоҷикон аз маблағгузорӣ маҳрум карда шавад.

“Ман фикр мекунам пас аз ин ҳодиса маблағгузории фаъолияти диаспораи мазкур дар шакли грант ва ёрии моддӣ аз буҷаа давлатӣ комилан қатъ карда шавад”, – навиштааст Ростислав Антонов дар саҳифаи расмии худ дар ВКонтакте.

Вале гуфта мешавад тасмими ниҳоиро бояд Шӯрои машваратӣ оид ба рушди этнофарҳангӣ ва муносибатҳои байни миллатҳои назди ҳукумати шаҳр қабул кунад.

Консулгарии Тоҷикистон дар Новосибирск дар вокуниш ба ин изҳороти вакил гуфтааст, ки ҳамаи маълумоти мавҷударо ба мақомоти дахлдори Тоҷикистон интиқол додааст.

“Бале, куштор аз ҷониби шаҳрванди мо содир шудааст. Консули генералии мо бо волидони ин ҷавон сӯҳбат кард. Мо бояд муайян кунем, ки ӯ дар қайди мақомоти дахлдор ҳаст ё не”, – гуфтааст корманди консулгарӣ Фирӯз Муродзода.

Тавре қаблан расонҳо хабар доданд, 26 июл дар Новосибирск муҳоҷири 27-солаи тоҷик Хушнуд Хамроев як духтари мактабхони 17-соларо куштааст. Хушнудро дар дигар шаҳр боздошт кардаанд ва ба қавли мақомоти Русия, ӯро ҳангоми фирор ба Тоҷикистон боздошт карданд. Дар пайи ин қазия парвандаи ҷиноятӣ бо моддаи 105 қисми 1 (куштор) оғоз карда шудааст.

Ба иттилои Раёсати нақлиёти шаҳри Маскав, дар ин шаҳр дар маҷмуъ 220 000 ронандаи мусофиркаш сабти ном шудаанд, ки 59,4 ҳазор ё 27%-и онҳоро муҳоҷирони кории хориҷӣ ташкил мекунанд.

Гуфта мешавад, аз ин шумора (59,4 ҳазор) 44,6 ҳазорашро шаҳрвандони Қирғизистон, 5,2 ҳазор шаҳрвандони Тоҷикистон ва 3,4 ҳазор нафари дигаршро шаҳрвандони Узбакистон ташкил медиҳанд.

Ба иттилои шаҳрдории Маскав, дар пойтахт барои худравҳои мусофиркашонӣ аз моҳи августи соли 2021 системаи ягонаи идоракунӣ ҷорӣ шуда, ки дар он ба ҳар як ронанда ID-и ягонаи рақамӣ таъин шудааст ва дар он маълумот дар бораи мавҷудияти шаҳодатномаи ронандагии эътибордошта, иҷозат барои интиқоли мусофирон, миқдори соатҳои корӣ ва ҷаримаҳо мавҷуд аст.

Шаҳрдории Маскав умедворӣ мекунанд, ки бо низоми ҷоришуда, тартиботи кори ронандаҳоро назорат карда, аз садамаҳои нақлиёт ҷилавгирӣ мекунанд.

Бино ба маълумоти ғайрирасмӣ, зиёда аз 2 миллион шаҳрванди Тоҷикистон дар РУсия кору зиндагӣ мекунанд. Одатан муҳоҷирони кории тоҷик бештар дар сохтмонҳо ва корҳои душвор машғул ҳастанд, аммо дар корҳои ба монанди мусофиркашонӣ хеле кам фаъолият мекунанд.

Бино ба маълумоти Вазорати корҳои дохилии Русия, аз аввали соли 2022 то имрӯз беш 121 ҳазор нафар аз сокинони кишварҳои Осиёи Марказӣ шаҳрвандии Русияро дарёфт кардаанд, ки тоҷикон дар ҷои аввал меистанд.

Тавре охири моҳи гузашта расонаҳои маҳаллӣ бо такя ба мақомоти расмии Русия хабар доданд, дар миёни (121089 нафар) гирандагони шиносномаи Русия тоҷикон дар ҷои аввал бо 74162 нафар қарор доранд ва дар ҷои дуюм Қазоқистон бо 21647 нафар, дар ҷои сеюм Узбекистон бо 13099 нафар будаанд. Ҳамчунин 10632 шаҳрванди Қирғизистон ва 1549 шаҳрванди Туркманистон шаҳрванди Русия шуданд. Аммо ба гуфтаи мақомот, ба таври умум дар шаш моҳ гузашта 287503 нафар шаҳрвандии Русияро гирифтанд, ки 104168 нафарашон шаҳрвандони Украина мебошанд.

Ба иттилои мақомоти Русия, ҳоло 109593 тоҷик, 78705 узбек, 44856 қазоқ, 14137 қирғиз ва 3775 туркман иҷозаи иқомат дар Русия доранд.

Соли 2021 беш аз 205000 шаҳрвандони кишварҳои Осиёи Марказӣ шаҳрвандии Русияро гирифтанд. Тибқи маълумоти расмӣ, соли гузашта аз рӯи теъдоди шиносномаҳои гирифташуда низ Тоҷикистон дар ҷои аввал қарор дошт, ки 103700 нафар  шаҳрвандии Русияро ба даст оварда буданд. Дар ҷои дуюм сокинони Қазоқистон – 49900 нафар, дар ҷои сеюм узбекҳо – 31900 нафар, дар ҷои чорум Қирғизистон – 19200 нафар қарор гирифтанд. Дар маҷмӯъ, дар соли 2021 735400 нафар шаҳрвандони хориҷӣ шаҳрванди Русия шуданд, ки ин аз соли 2000 ҳисоби рекордӣ ба шумор меравад.

Тибқи маълумоти расмӣ, тоҷикистониён дар гирифтани шаҳрвандии Русия дар соли 2021 аз ҳисоби ҳамаи шаҳрвандони хориҷӣ 14,1% ва аз миёни шаҳрвандони Осиёи Марказӣ 50,5%-ро ташкил додаанд.

Дар нимсолаи якуми соли 2022 бошад, ин омор ба 26, 4% аз шумори умумӣ шаҳрвандони хориҷӣ ва 61,2% дар байни шаҳрвандони Осиёи Марказӣ баробар аст.

Гуфта мешавад, агарчи тоҷикон дар нимсолаи аввали 2022 аз украиниҳо дар гирифтани шаҳрвандии Русия қафо монда бошанд ҳам, вале дар байни кишварҳои Осиёи Марказӣ ҷои аввалро ишғол менамоянд.