Ҷустуҷӯ кунед
Ҷустуҷӯ
16.9 C
Dushanbe
Хона блог саҳифа 393

Дар Тоҷикистон содироти маҳсулот бештар шудааст

Аз ҷониби
firuzihait
-
0

Тоҷикистон дар шаш моҳи аввали соли ҷорӣ ба маблағи 1 миллиарду 215,2 миллион доллар маҳсулот содир кардааст, ки дар муқоиса ба ҳамин давраи соли гузашта 1,6 миллион доллар бештар аст.

Шавкат Бобозода, директори Агентии содироти назди Ҳукумати Тоҷикистон 3-юми августи соли ҷорӣ зимни нишасти матбуотӣ ба хабарнигорон гуфт, ки ҳаҷми содироти маҳсулоти саноатӣ дар якҷоягӣ бо нерӯи барқ ​​1,18 миллиард долларро ташкил додааст.

Ҳаҷми содироти маҳсулоти кишоварзӣ дар моҳҳои январ-июни соли 2022 беш аз 27 миллион долларро ташкил додааст, ки нисбат ба ҳамин давраи соли 2021 15,5 миллион доллар ё 28,1 дарсад зиёд мебошад.

Ҳаҷми содироти маҳсулоти кишоварзӣ дар умум беш аз 110 ҳазор тонна, аз ҷумла беш аз 75 ҳазор тонна сабзавот, 19 ҳазор тонна меваи хушк, беш аз 15 ҳазор тонна мева ва дигар навъҳои маҳсулоти кишоварзиро ташкил додааст.

Тоҷикистон асосан чунин навъҳои маҳсулоти кишоварзӣ, аз қабили пиёз, меваи хушк, сабзӣ, олу, ангур, зардолу, карам, лимӯ ва ғайраро содир мекунад.

Дар ҳоле Шавкат Бобозода аз зиёд шудани содироти маҳсулоти кишоварзӣ мегӯяд, ки нархи пиёз дар бозорҳои кишвар аз 1,5-3 сомонии қабл то 8 сомонӣ расидааст.

Дар робита ба ин Зафар Маҳмадиев, сардори Раёсати минтақавии гумрукӣ дар вилояти Суғд зимни нишасти хабарӣ гуфт, ки ба хотири коҳиши нархи пиёз дар бозорҳои дохилӣ ва захираи ин навъи маҳсулот содироташ ба Русия манъ шуд.

Қарор аз охири моҳи июл амал мекунад, вале нархи пиёз дар бозорҳо тағйир накардааст.

Эъдоми як нерӯи собиқи амниятии Афғонистон дар зиндон

Аз ҷониби
AZDA TV
-
0

Бино ба иттилои расонаҳои маҳаллӣ, нерӯҳои Толибон Муҳаммад Зобулӣ, собиқ узви нерӯҳои амниятии ҳукумати Ашраф Ғаниро дар зиндоне дар вилояти Дойкундӣ дар назди писараш эъдом карданд.

Пойгоҳи хабарии 8-и субҳи Афғонистон хабар дод, ки Толибон Муҳаммад Зобулиро дар пеши чашмони писараш эъдом карданд, аммо ба наздиконаш гуфтаанд, ӯ аз тарси зиёд худкушӣ кардааст.

Аз сӯи дигар манобеи маҳаллӣ мегӯянд, оғои Зобулӣ ба сабаби шиканҷаи зиёд ҷон бохтааст.

Гуфта мешавад, Муҳаммад Зобулӣ, собиқ узви нерӯҳои амниятӣ дар ҳукумати пешини Афғонистон пас аз тасаллути Толибон ба ин кишвар ба Эрон фирор карда буд, аммо пас аз дастгир шудани писари 10-солааш аз ҷониби Толибон ба Афғонистон баргашт ва зиндонӣ шуд.

Аз ин пештар созмонҳои байналамилалии ҳуқуқи инсон борҳо ҳукумати Толибонро ба он муттаҳам карданд, ки бо вуҷуди эълони афви умумӣ садҳо нафаре, ки собиқ дар ҳукумати Афшраф Ғанӣ кор мекарданду ба умеди афв ба ватанашон баргаштанд, зиндонӣ ва ё кушта шуданд. Аммо мақомоти Толибон ин иттиҳомотро рад мекунанд.

Оғози размоиши бузурги Чин дар марзи Тайван

Аз ҷониби
AZDA TV
-
0

Имрӯз, 4-уми августи соли 2022 артиши Ҷумҳурии мардумии Чин дар фосилаи 20-километрии марзи Тайван размоиши бузурги низомиро оғоз кард.

Гуфта мешавад, ин размоиши бузурги низомии Чин дар эътироз ба сафари Нэнси Пелоси, раиси Маҷлиси намояндагони Амрико ба Тайван баргузор мешавад.

Тайван мегӯяд, Чин ин размоишро дар роҳҳои обии байналмилалӣ ва масирҳои ҳавонавардӣ анҷом медиҳад, ки мухолифи муқаррароти Созмони Миллали Муттаҳида аст. Бо ин далоил Тайван размоиши Чинро “ғайримашруъ ва ғайримасъулона” хонда, мегӯяд, ки Чин талош дорад авзои амниятиро дар минтақа ноором созад.

Пелоси рӯзи чоршанбе пас аз дидору гуфтугӯ бо раисҷумҳури Тайван ва намояндагони баландмақом он, ин кишварро ба қасди Куриёи Ҷанубӣ тарк кард.

Раиси Маҷлиси намояндагони Амрико зимни зиёраташ аз Тайван аз низоми демократӣ ситоиш намуд ва таъкид кард, ки Амрико ба ҳамбастагии худ бо Тайван пойбанд мемонад ва хашми Чин наметавонад раҳбарони ҷаҳонро аз сафар ба ин ҷазира боз дорад.

Чин дар эътироз ба ин сафар, сафири Амрико дар Пекинро эҳзор кард ва инчунин воридоти маҳсулоти кишоварзии Тайванро низ мутаваққиф кардааст. Бар илова, размоиши низомии қавиеро эълом кард.

Ба иттилои расонаҳо, Чин ин размоишро дар 6 минтақаи ҷазираи Тайван оғоз карда ва он то рӯзи якшанбе идома хоҳад кард.

Чин Тайванро як минтақаи ҷудоиталаби худ медонад, аммо Тайван ба истиқлол ва худмухторияш исрор дорад.

Нопадид шудани боз як зодаи Бадахшон дар Русия

Аз ҷониби
firuzihait
-
0

Руслан Пулодбеков, дӯсти наздики Амриддин Аловатшоев, ки охири моҳи июл барои нақзи қоидаҳои муҳоҷират дар Маскав боздошт шуда буд, нопадид шудааст.

Пайвандони Пулодбеков дар суҳбат бо Радиои Озодӣ гуфтаанд, ки Руслан дар яке аз боздоштгоҳҳои Маскав нигаҳдорӣ мешуд ва ӯро аз рӯзи 29-уми июл дигар дар онҷо пайдо накардаанд.

Наздикони Руслан бар ин боваранд, ки ӯро ҳамроҳи Ораз ва Рамзӣ Вазирбековҳо ба Тоҷикистон фиристодаанд.

Ораз ва Рамзӣ Вазирбековҳо

Ёдовар мешавем, ки Ораз ва Рамзӣ Вазирбековҳо фаъолони зодаи Бадахшон рӯзи 29-уми июл соли 2022 аз фурӯдгоҳи Домодедовои Маскав нопадид шуда буданд ва чанде баъд дар навори видеоие хабар доданд, ки дар Тоҷикистон дар назди мақомот қарор доранд.

Руслан Пулодбеков, сокини ноҳияи Роштқалъаи вилояти Мӯхтори Кӯҳистони Бадахшон буда, ба гуфтаи наздиконаш мақомоти тоҷик ӯро танҳо барои наздиктарин дӯст ва мисли як муҳофиз ҳамеша дар канори Амриддин Аловатшоев будан, таъқиб мекарданд.

Ба гуфтаи айвандони Руслан, ӯ фаъоли иҷтимоӣ набуд ва дар бораи нооромиҳо дар Бадахшон наменавишту ҳатто саҳифаи фейсбукиашро ҳам баста буд.

Мақомоти тоҷик то ҳол дар бораи боздошт ва дар куҷо қарор доштани Руслан Пулодбеков чизе нагуфтаанд.

Амриддин Аловатшоев

Амриддин Аловатшоев, яке аз раҳбарони мардумии Бадахшон 11-уми январи соли ҷорӣ дар Русия боздошт ва ба Тоҷикистон оварда шуда буд. Мақомоти тоҷик то рӯзи 2-юми феврал боздошт ва ба Тоҷикистон истирдод шудани ӯро рад мекарданд. Аловатшоевро мақомот охири моҳи апрел бар асоси панҷ банди Кодекси ҷиноятии Тоҷикистон ба 18 соли зиндон маҳкум карданд.

Дар Истаравшан шавҳар ҳамсари худро буғӣ карда кушт

Аз ҷониби
AZDA TV
-
0

Як сокини 36-солаи шаҳри Истаравшан ҳамсари 27-солаи худро дар натиҷаи муноқишаи оилавӣ буғӣ карда куштааст. Дар ин бора Вазорати корҳои дохилии Тоҷикистон хабар дод.

Тавре ВКД хабар медиҳад, шавҳар ҳамсари худро дар аввал лату кӯби шадид намуда, сипас буғӣ карда куштааст. Ин ҳодиса 1-уми август дар шаҳри Истаравшани вилояти Суғд рух додааст. Аммо дар кадом деҳа рух додани он дар хабари гуфта нашудааст.

Дар шарҳи хабар гуфта мешавад:

“марди 36-солаи сокини шаҳри Истаравшан ҳамчун гумонбар дар содир намудани ҷинояти одамкушӣ дастгир карда шуд.
Номбурда, 1 августи соли 2022, тахминан соати 16:30-дақиқа, дар хонаи истиқоматиаш аз сабаби муноқишаи бамиёномада бо ҳамсараш ҷавонзани 27-сола, бо дасту пойҳояш ба узвҳои муҳими бадани ӯ зада ҷароҳати ҷисмонӣ расонида, сипас бо роҳи бӯғӣ намудан ӯро ба ҳалокат расонидааст.”

Ба иттилои Вазорати дохилаи кишвар, нисбати шахси боздоштшуда бо ҷурми одамкушӣ парвандаи ҷиноятӣ тибқи моддаи 104 қисми 1-и Кодекси ҷиноятии Ҷумҳурии Тоҷикистон оғоз гардида, тафтишот идома дорад.

Аммо назари худи боздоштшуда ва наздиконаш дар бобати ин қазия дастрас нест.

Дар пайи сафари Пелосӣ ба Тайван Чин сафири Амрико дар Пекинро эҳзор кард

Аз ҷониби
AZDA TV
-
0

Пас аз вуруди Нэнси Пелоси, раиси Маҷлиси намояндагони Амрико ба Тайван, Вазорати корҳои хориҷаи Чин сафири Амрико дар Пекинро эҳзор кард.

Хонум Нэнси Пелоси, яке аз намояндагони баландмақоми Амрико бо вуҷуди таҳдидҳои Чин шоми сешанбе бо сафари расмие вориди Тайбэй пайтахти Тайван шуд.

Ӯ рӯзи чоршанбе бо намояндагони парлумони Тайван ва раисҷумҳури он Тсай Инвэн дидору гуфтгӯ кард.

Пелосӣ зимни мулоқот бо раисҷумҳури ин кишвар таъкид кирд, ки Амрико дар тааҳҳуди худ бо Тайван пойбанд мемонад ва афзуд, ки демократҳо ва ҷумҳурихоҳони Амрико барои ҳимоят аз Тайван муттаҳид ҳастанд.

Дар навбати худ Тсай Инвэн, раисҷумҳури Тайван низ аз ҳузури Пелосӣ ба кишвараш изҳори сипос кард ва сафари ӯра дар таҳкими муносибатҳои дӯстонаи ду кишвар муҳим арзёбӣ кард.

Хонум Тсай Инвэн дар ин мулоқот бо ишора ба фишорҳои Чин афзуд, ки “мо қотеона аз ҳокимияти миллии худ дифоъ хоҳем кард ва бо ҳифзи хатти дифоӣ барои амнияти ҷаҳонии худ идома хоҳем дод.”

Дар ҳамин ҳол расонаҳои чинӣ хабар доданд, ки Вазорати корҳои хориҷаи Чин шоми сешанбе Николас Бернс, сафири Амрико дар Чинро фаро хонд, то эътирози шадиди Пекин нисбат ба сафари хонум Пелосӣ ба Тайванро эълом кунад.

Бо вуруди хонум Пелосӣ ба ин кишвар чанд ҷангандаи чинӣ дар тангаи “Тайван” ба парвоз даромаданд. Дар эътироз ба ин сафар Чин ълом кард, ки шуруъ аз рӯзи панҷшанбе размоиши низомии баҳрӣ ва ҳавоӣ дар ин минтақа мегузаронад.

Пештар барои пешгирӣ аз ин сафар Чин ба Амрико бо лаҳни шадид таҳдид карда гуфта буд, ки “бо оташ” бозӣ накунад. Аммо бо вуҷуди таҳдидҳои зиёди Чин ин сафар анҷом шуд.

Дар посух ба таҳдидҳо ва интиқодоти Чин Амрико мегӯяд, сафари раиси Маҷлиси намояндагони Амрико ба Тайван нақзи сиёсати Чин аз сӯи Амрико нест ва хонум Пелосӣ аз ҳаққи худ барои сафар ба Тайван истифода кардааст.

Ҷумҳурии Чин ҷазираи Тайванро ҷузъи замини худ медонад ва ҳукумати онро расман эътироф намекунад. Аммо Тайван барои истиқлоли расмии худ аз Чин талош дорад. Давлати Чин соли 2004 қонуне қабул кард, ки дар ҳолати ҷудоихоҳии Тайван аз Чин ин кишвар метавонад аз ҳар “қуввае” барои бозгардондани он истифода кунад.

Яке аз рӯҳониёни шинохтаи бадахшонӣ ба 5 соли зиндон маҳкум шуд

Аз ҷониби
firuzihait
-
0

Музаффар Давлатмиров, яке аз рӯҳониён ва халифаҳои мардуми Бадахшон ба панҷ соли зиндон маҳкум шуд. Ба иттилои манобеъ, аз даъвати мақомот то судури ҳукми зиндони ин рӯҳонӣ ҳамагӣ як ҳафта тӯл кашидааст.

Дар ин бора расонаи “Pamir Daily News”, ки бештар ахбори Вилояти Мухтори Кӯҳистони Бадахшонро пӯшиш медиҳад, дар истинод ба манобеаш аз Хоруғ хабар дод.

То ҳол маълум нест мурофиаи додгоҳии Музаффар Давлатмиров дар кадом шароит, кай ва дар куҷо баргузор шудааст.

Музаффар Давлатмиров халифаи маҳаллаи Тирчид (УПД)-и Хоруғ буда, ӯ рӯзи 26-уми июли соли ҷорӣ ба Кумитаи давлатии амнияти миллии Тоҷикистон дар ВМКБ барои “сӯҳбат” даъват шуда буд.

Мақомот дар бораи боздошт ва равонаи зиндон намудани Давлатмиров чизе нагуфтаанд ва маълум нест, ки ӯ ба кадом гуноҳ айбдор мешавад, ки тафтишот ва мурофиаи додгоҳӣ дар давоми як ҳафта ба охир расидааст.  

Рустами Ҷонӣ, журналист ва фаъоли ҷомеаи мадании тоҷик, дар пайи боздошти халифа Музаффар Давлатмиров навиштааст, ки “Ӯ халифаи “ҳукуматӣ” набуду нашуд”.

Рустами Ҷонӣ мегӯяд, ки “қабл аз куштори помириҳо насиҳат кард, Ҳукумат аз зӯргӯйӣ даст бикашад ва пеши низомиҳои бенизомро бигирад. Аз Ҳукумат хост, бидуни далел помириҳоро ҷинояткор наноманд ва раҳзан тасвир накунанд”.

Музаффар Давлатмиров аввалин зодаи Бадахшон нест, ки баъд аз ҳодисаҳои охир дар ин вилоят боздошту равонаи зиндон мешавад. Пеш аз ӯ даҳҳо зоддаи дигари Бадахшон боздошт, қисме барои солҳои тулонӣ равонаи зиндон шуданду қисми дигар мунтазири ҳукми додгоҳанд.

Ҳушдори Амрико аз интиқоми эҳтимолии гурӯҳи “Ал-Қоида”

Аз ҷониби
AZDA TV
-
0

Пас аз кушта шудани раҳбари “Ал-Қоида” Айман Аз-Завоҳирӣ дар пойтахти Афғонистон шаҳри Кобул, Амрико аз эҳтимоли ҳамлаи ҷавобии ин гурӯҳ хабар дод.

Кушта шудани Завоҳирӣ вокунишҳои зиёдеро дар ҷомеаи Афғонистон ба бор овардааст. Аксари ҷонибдорони Завоҳирӣ Толибонро ба он гунаҳкор мекунанд, ки натонистанд аз ӯ ҳимоят кунанд. Ҳатто аз намояндагони бо нуфузи Толибон ҳам ин ҳамлаи Амрикоро маҳкум карданд.

Анас Ҳаққонӣ, бародари Сироҷиддин Ҳаққонӣ, сарпарасти Вазорати дохилаи Афғонистон ва яке аз нафароне, ки солҳо дар рӯйхати сиёҳи Амрико қарор дошт, бо навиштае дар Твиттер ин ҳамларо маҳкум намуда, таъкид кард, ки “Ин ҳамлаи Иёлоти Муттаҳида як амали ваҳшиёна аст ва пайомадҳои ҷиддӣ хоҳад дошт.“

Хабаргузории Вашингтон Пост “The Washington Post” аз қавли таҳлилгарон навишт, ки куштани раҳбари Ал-Қоида бо ҳавопаймои бесарнишини амрикоӣ, метавонад муносибати Толибонро бо Амрико тағйир диҳад ва эҳтимол меравад “режими Толибонро ба оғӯши нерӯҳои ифротгаро тела диҳад.”

Дар ҳамин ҳол Вазорати корҳои хориҷаи Амрико рӯзи сешанбе аз ҳамлаи ҷавобӣ ва ё интиқоми гурӯҳи АлҚоида ҳушдор дода, ки “кушта шудани Айман Аз-Завоҳирӣ, раҳбари Ал-Қоида тавассути Амрико мумкин аст ҳомиёни Ал-Қоидаро водор кунад, то таъсисот ва ё шаҳрвандони амрикоиро ҳадаф қарор диҳанд.”

Бо ин ҳол, Вазорати корҳои хориҷаи Амрико аз ба кор бурдани қувваи бештаре дар баробари ҳамлаҳои эҳтимолӣ хабар дод.

Айман Аз-Завоҳирӣ, раҳбари Ал-Қоида рӯзи 1-уми август дар як ҳамлаи ҳамопаймои бесарнишни амрикоӣ дар минтақаи Шерпури шаҳри Кобул кушта шуд.

Боздошти ду ронанда дар Лаҳистон барои интиқоли ғайриқонунии тоҷикон

Аз ҷониби
firuzihait
-
0

Нерӯҳои марзбонии Лаҳистон дар қисмати сарҳади давлатӣ бо Литва ду ронандаро, ки 13 шаҳрванди Тоҷикистону Эронро ғайриқонунӣ ба ин кишвар интиқол медоданд, боздошт кард.

Акс аз “Polskie Radio Bialystok”

Бино ба иттилои Нерӯҳои марзбонии Лаҳистон, рӯзи 1-уми августи соли ҷорӣ сарҳадбонон дар деҳаи Будзиско, ки наздик ба сарҳади Литва аст, ду мошини дорои рақамҳои давлатии Лаҳистонро барои тафтиш боздошт карданд. Дар натиҷаи тафтиш муайян карда шуд, ки ронандагон зодаи Украина буда, хориҷиёни дигарро, ки ҳуҷҷатҳои лозима барои ворид шудан ва иқомат дар Лаҳистонро надоштаанд, ба ин кишвар ғайриқонунӣ интиқол медодаанд.

Ронандаи мошини тамғаи “Волво” шаш шаҳрванди Тоҷикистону як зодаи Эрон ва ронандаи мошини “Тойота” шаш шаҳрванди Эронро ғайриқонунӣ вориди хоки Лаҳистон кардаанд. Гуфта мешавад, ки ин муҳоҷирон аввал аз Белорус вориди хоки Литва шуда, баъдан сарҳади Лаҳистонро ғайриқонунӣ убур кардаанд.  

Дар хабари Нерӯҳои марзбонии Лаҳистон гуфта мешавад, ки ҳамаи онҳо боздошт шуда, дар ихтиёри афсарони посгоҳи марзбонии Рутка-Тартак қарор доранд.

Ду ронандаи зодаи Украина дар кумак ба муҳоҷирон барои убури ғайриқонунии марз муттаҳам шуда, ба онҳо то 8 соли зиндон таҳдид мекунад.

Нисбати 13 шаҳрванди Тоҷикистону Эрон парвандаи маъмурӣ оғоз шуда, онҳо муваззаф карда мешаванд, ки баргарданд.

Бино ба иттилои воҳиди марзбонии Подласке, аз аввали соли ҷорӣ сарҳадбонон танҳо дар марз бо Литва беш аз сесад муҳоҷирро боздошт кардаанд, ки аввал аз Белорус ба Литва ва баъдан ғайриқонуни марзи Лаҳистонро убур кардаанд. Инчунин 53 нафари дигар, ки дар кумак ба муҳоҷирон барои убури ғайриқонунии марзи Литва ва Лаҳистон гумонбаранд, боздошт шудаанд.

Аввалин киштии ҳомили гандум аз Украинӣ ба роҳ баромад

Аз ҷониби
AZDA TV
-
0

Субҳи 1-уми августи соли ҷорӣ аввалин киштии ҳомили гандум аз Украина барои фурӯш ба бозори ҷаҳонӣ ба роҳ баромад.

Акс аз сомонаи “LIGA.net”

Тавре расонаҳо хабар додаданд, дирӯз аввалин киштӣ украинӣ бо 26 хазор тонна ғалладона аз бандари Одесса ба роҳ баромад. Аз охири моҳи феврали соли ҷорӣ бандарҳои Украина аз ҷониби Русия муҳосира шуда буд ва Украина наметавонист ҳосилоти зироатии худро ба бозори ҷаҳонӣ барорад.

Бо миёнҷигарии Туркия ва Созмони Миллали Муттаҳид байни Русия ва Украина тавофуқе ҳосил шуд, ки тибқи он Украина метавонад ғалладонагиҳои худро тариқи бандарҳои муҳосирашуда аз ҷониби Русия ба бозори ҷаҳонӣ барорад.

Дабири кулли СММ Антониу Гутерриш аз ин тавофуқ истиқбол карда ва аз нақшаи асосии Туркия дар ба даст омадани чунин тавофуқот қадрдонӣ кард.

Ҳаракати киштиҳои ҳомили ғалладонаҳои украинӣ умедҳоеро бобати коҳиши камбуди ғизо ва гароншавии нон дар ҷаҳон ба вуҷуд омардааст.

Дар ҳамин ҳол Владимир Зеленский, раисҷумҳури Украина дар телеграм-канали худ навишт, ки “барои хулоса баровардан ва пешгӯии таҳаввулоти минбаъда ҳанӯз барвақт аст, аммо бандар ба кор даромад, содирот ғалладона оғоз шуд“.

Зеленский ҳаракати киштиҳоро “оғози мутбат” номида, таъкид кард, ки ин иқдом аз паҳншавии буҳрони ғизо дар ҷаҳон пешгирӣ хоҳад кард.

“16 киштӣ аллакай барои сафар дар навбат мунтазиранд ва мо омодаем, ки дар муътадил гардондани бозори ҷаҳонии озуқа саҳми муносиб гузорем”, – мегӯяд расиҷумҳури Украина.

Украина дар баробари Русия яке аз умдатарин кишварҳо дар содироти гандум ба шумор меравад, ки аксари кишварҳои дунё, ба хусус кишварҳио абариро бо гандуму ҷуворимакка таъмин мекунад.

1...392393394...746саҳифаи 393 аз 746

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
haze
17.1 ° C
17.1 °
17.1 °
72 %
1kmh
100 %
Wed
16 °
Thu
15 °
Fri
17 °
Sat
18 °
Sun
21 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст