Дар ин бора ба Радиои Озодӣ як манбаи номаълум дар додситонии вилояти Суғди Тоҷикистон иттилоъ дод. Аз мащкумшудащо Абдурозиқ Абдуқаҳҳоров ва Аскар Юнусов ном бурда мешавад, ки додгоҳи ноҳияи Лейлек онҳоро бо моддаҳои “Ҷиноят алайҳи сулҳ” ва “Ғоратгарӣ”-и Кодекси ҷиноии Ҷумҳурии Қирғизистон гунаҳкор дониста буд. Дар аввал ҳарду ба ҳабси абад маҳкум шуда буданд, аммо моҳи декабри соли 2021 Додгоҳи вилояти Бодканд ҳукми онҳоро иваз карда, ҳукми умрбодро бо 20 соли зиндон иваз кард.
Пайвандони Абдурозиқ Абдуқаҳҳоров ва Аскар Юнусов дар суҳбат бо расонаҳо гуфтаанд, ки дар бораи истирдоди наздиконаш ба Тоҷикистон шунидаанд, вале то ҳол ба онҳо аз мақомот дар ин бора чизе нагуфтаанд.
Абдурозиқ Абдуқаҳҳоров ва Аскар Юнусов шаҳрванди Тоҷикистон буда, дар деҳаи Борбодуки вилояти Ботканди Қирғизистон зиндагӣ мекардаанд. Онҳоро баъди муноқишаи мусаллаҳонаи 28-29-уми апрели соли 2021 дар сарҳади Тоҷикистону Қирғизистон, ки аз ҳарду тараф 55 нафар кушта ва беш аз 200 каси дигар маҷруҳ шуда буд, дастгир карданд.
Мақомоти қирғиз гуфтаанд, ки дар телефони яке аз онҳо акси ӯро бо сарбозони тоҷик ёфта, дигариро ба ғоратгарӣ дар айни ҷанг гунаҳкор донистаанд.
Пайвандонашон он замон гуфта буданд, ки иттиҳомоти эълоншуда алайҳи асос надорад ва муҳокима ҳам дар вилояти Ботканд ноодилона ва бо қонуншиканиҳо сурат гирифтааст.
Ба иттилои манбаъ, маҳкумшудаҳо рӯзи 7-уми июн аз Бишкек ба Хуҷанд оварда шудаанд ва ҳоло дар боздоштгоҳи муваққатӣ қарор доранд. Додситонии кулли Тоҷикистон парвандаи онҳоро баррасӣ дорад ва рӯзҳои наздик хулосаи он гуфта мешавад.
Хурсанд Мазоров, Зоир Раҷабов ва Муслим Шерзамонов
Мақомоти интизомии кишвар хабар доданд, ки имрӯз 12-уми июн дар пайи як амалиёти махсус Хурсанд Мазоров ва Зоир Раҷабов, ду раҳбари мардумии Бадахшон ва сокинони шаҳри Хоруғро, ки гӯё худро ба мақомот таслим накарданд, куштанд. Аммо Pamir Daily News аз манобеаш хабар дод, ки онҳо (Мазоров ва Раҷабов) худро мунфаҷир карданд.
Мақомот бо куштани ин ду нафар чандин сокини дигари Бадахшонро бо иттиҳоми “шахсони наздик ба онҳо” боздошт кардааст.
Алим Шерзамонов дар суҳбат бо Azda tv боздошти бародараш Муслим Шерзамоновро таъйид кард ва афзуд, ки аз баски бо пайвандонаш тамос надорад, аз ҷузъиёти бештари ин ҳодиса хабар надорад.
Алим Шерзамонов ва бародараш Муслим Шерзамонов
Шерзамонов ҳамчунин афзуд, ки мақомоти кишвар аз ӯ қасос гирифтан мехоҳанд ва боздошти бародараш маҳз ба ҳамин хотир аст.
Вазорати корҳои дохилии Тоҷикистон як рӯз пеш, 11-уми июн аз боздошти се раҳбарони мардумии Бадахшон, Толиб Аёмбеков, Мунаввар Шанбиев ва Ниёзшо Гулобов расман хабар дода буд. ВКД аз онҳо “саркардагони гурӯҳҳои муташаккили ҷиноятии шаҳри Хоруғ” ном бурда, мегӯяд, дар пайи як амалиёти вежа боздошт шудаанд.
Ба қавли манобеъ, мақомоти интизомии кишвар баъд аз куштани Маҳмадбоқир Маҳмадбоқиров дар шаҳри Хоруғ ҳамарӯза “амалиёти махсус” гузаронда, хона ба хона мегарданд ва ҷавонони зиёдеро бо ҳар баҳонае боздошт ва шиканҷа мекунанд.
Ба гуфтаи Анвар Деркач, раиси Созмони “Рука и Допомоги+”-и Украина, ин шаҳрванди 29-солаи Тоҷикистон (ба хотири ҳифзи амнияташ номаш зикр намешавад) аз ҷониби мақомоти тоҷик ба иттиҳоми пайравӣ аз гурӯҳҳои ифротии ДИИШ ва Алқоида дар пайгард қарор дошт.
Анвар Деркач дар суҳбат ба Azda tv гуфт, ки имрӯз ӯ дар додгоҳ ширкат дошт, вале қозии додгоҳ шаҳодати ӯро ба эътибор нагирифт ва ба далелҳои дифоъии ӯ гӯш надод.
Ҷаноби Деркач мегӯяд, Созмони “Рука и Допомоги+” аз ҳуқуқи ин шаҳрванди Тоҷикистон дар Украина ҳимоят мекард ва мақомоти Украина ин шаҳрванди Тоҷикистонро бо дархости мақомоти Тоҷикистон боздошт карда буданд ва Додистони Украина ҳукми истирдоди ӯро содир карда буд ва баъд аз шикоят ба Додгоҳи Ҳуқуқи Башари Аврупо, ин додгоҳ монеъи истирдоди ин шаҳрванди Тоҷикистон гашт ва то замони ҳамлаи Русия ба Украина ӯ дар Украина ҳамроҳи зан ва ду фарзандаш зиндагӣ мекард.
Azda tv бо модари ин шаҳрванди Тоҷикистон ҳамсуҳбат шуд, (ба хотири ҳифзи амнияти онҳо ва пайвандонашон аз ин модар ба номи мустаори Сония ёд мекунем).
Хонум Соня дар суҳбат бо Azda tv гуфт, ки писараш мутаваллиди соли 1993 буда, Коллеҷи Ҳоҷи Камолро бо баҳои аъло хатм карда, сипас соли 2011 ба Донишгоҳи Химия-Фарматсевтии шаҳри Санкт-Петербурги Русия дохил шуда, то соли 2014 дар ин донишгоҳ таҳсил кардааст. Ва баъд аз мушкилоти иқтисодӣ донишгоҳро тарк карда, ба Туркия рафт, баъд аз кудетои нофарҷоми ҷонибдорони Фатҳулло Гулан дар ин кишвар ба хотири таъқиби шогирдони мактаби ӯ, писараш ба Украина истирдод мешавад ва дар Украина ҳамроҳи зану фарзандаш зиндагӣ дошт. Фарзанди дувумаш дар онҷо ба дунё меояд. Модари ӯ мегӯяд, агар даъвои мақомот дуруст бошад, ки писари ӯ дар суфуфи гурӯҳои ифротӣ будааст, пас чӣ гуна дар ин замон ҳамсараш аз ӯ соҳиби фарзанд шудааст?
Хонум Соня мегӯяд, ӯ аз хонаводаи таҳсилкарда аст ва худаш низ дар донишгоҳи тибби Душанбе дарс хонда, хатмкарда Коллеҷи тиббӣ мебошад ва дар созмонҳои байналмилалӣ, аз ҷумла “Relief International” ва “Наҷоти кӯдакон” кор кардаст. Ӯ писарашро бегуноҳ ва иттиҳомоти эълоншуда алайҳи ӯро беасос медонад. Ин модари тоҷик аз ҳукумати Лаҳистон хоҳиш карда, ки додгоҳи одилона баргузор кунанд, то писараш ба Тоҷикистон истирдод нашавад. Ба гуфтаи ӯ, дар ҳолати истирдод ӯро дар Тҷоикистон ҳабси тӯлонӣ, шиканҷа ва ҳатто марг таҳдид мекунад.
Анвар Деркач, раиси Созмони “Рука и Допомоги+”-и Украина
Анвар Деркач аз қавли Потр Сура, вакили дифои ин шаҳрванди 29-солаи Тоҷикистон гуфт, ки додгҳи шаҳри Пшемишл ҳукми истирдоди ин ҷавони тоҷикро таъйид кард ва ба шаҳодати Анвар Дарчек гӯш надод ва инчунин ҳукми Додгоҳи Ҳуқуқи Башари Аврупо барои манъи истирдоди таҳти ҳимояи ӯ аз Украинаро ба эътибор нагирифт ва гуфт ҳамаи ин ҳукмҳо ва далелҳо марбут ба ҳузури маҳкумшаванда дар Украина мебошад ва мо тибқи шавоҳид ва далелҳои худ тасмим мегирем. Ҷаноби Деркач аз он нигаронӣ дорад, ки додгоҳ бадтар шудани вазъи ҳуқуқи башар дар Тоҷикситон ва саркӯбҳои ахир дар Бадахшонро нодида мегирад. “Барои пешгирӣ аз истирдоди ин шаҳрванди Тоҷикистон бояд ба Додгоҳи Ҳуқуқи башари Аврупо шикоят бурд,- мегӯяд ӯ.
10-уми июни соли 2022 дар шабакаҳои иҷтимоӣ аксе аз назди бинои зиндони нав дар шаҳри Ваҳдат нашр шуд, ки дар он дида мешад, наздикону пайвандони зиндониёни кишвар бо ҳузури кӯдакон зери офтоби сӯзон интизори дохил шудан ба назди зиндониён мебошанд.
Пеш аз ин ҳам дар моҳи августи соли 2021 Аздо тв хабар дода буд, ки зарфи беш аз ду ҳафтае, ки маҳбусон ба зиндони нав интиқол ёфтаанд, аз оддитарин шароити будубош дар зиндон маҳрум ҳастанд. Онҳо на оби тозаи ошомиданӣ доранд ва на хӯроки маъмулие, ки шикамашонро сер кунанд.
Он замон ҳам пайвадони маҳсубонро маҷбур мекарданд, ки қариб тамоми лавозимоти заруриро барои онҳо муҳайё кунанд. Инак бо гузашти қариб як сол ҳамоно масъулини зиндон аз наздикону пайвандони зиндониён мехоҳанд, ки аз коғази ҳоҷатхона то яхдону “кондиционер” зиндонро таъмин кунанд.
Гуфта мешавад, тибқи талаботи қонунгузорӣ ва риояи сохтмони биноҳои дорои хусусияти ҷамъиятӣ бояд ки барои зоирон ва корафтодаҳо шароити мусоид барои интизор шудан фароҳам оварда шавад, аммо дар ин акс дида мешавад, то кунун дар назди ин зиндони нав на маконе махсус барои пазироӣ аз меҳмонону корафтодаҳо сохта шудааст ва на ҷое барои муваққатан нигоҳ доштани дастовез (дачка) ва озуқаворие, ки мардум мехоҳанд ба зиндониён бирасонанд.
