Ду расонаи ҳукуматӣ ва ду расонаи наздик ба ҳукумат, ки ҳамроҳ бо созмонҳои журналистӣ пештар аз Далери Имомал ҳимоят карда буданд, бо нашри як изҳорот аз иқдоми худ қафокашиданд.

8-уми июни соли 2022 сардабирони рӯзномаи “Садои мардум”, нашрияи расмии парлумони Тоҷикистон, “Минбари халқ”, нашрияи расмии Ҳизби халқӣ-демократии Тоҷикистон, ҳафтаномаҳои “Тоҷикистон” ва “СССР” бо нашри як изҳорот гуфтаанд: “Дар баёния чанд масъала ва бархӯрдҳои дигаре низ оварда шудаанд, ки аслан мо аз тафсилоти онҳо хабар надорем ва зери он имзо нагузоштаем. Изҳорот бояд бо ному насаби мо, на бо унвони расонаҳое, ки дар он фаъолият дорем, мерафт.”

Сарони ин чор нашрия, ки иборатанд аз Самариддин Асозода, Бахтиёр Ҳамдамов, Шарифи Ҳамдампур, Сайёфи Мизроб, лату кӯби журналист ва блогери тоҷик Далери Имомалӣро тавассути кормандони мақомот зери суол бурда, гуфтаанд: “Ӯ, агар мавриди озору шиканҷа қарор гирифта бошад, итминон дорем, ки қонунгузор марҳилаи расмӣ ва ошкори ҳаллу фасли онро пешниҳод менамояд. Зеро ҳама дар назди қонун баробаранд.”

Аммо аз сӯи дигар онҳо дар ин изҳороти худ то ҷое худи журналистони “ҷабрдида”-ро дар мисоли Далери Имомалӣ, Муллораҷаб Юсуфӣ, Барот Юсуфӣ, Анушервон Орипов, Рамзия Мирзобекова ва Насим Исамовро “гунаҳкор” ҳисобида, таъкид ҳам кардаанд, ки “Агар ҳар як журналист, новобаста аз мансубияташ ба кадом як расона, берун аз доираи Қонун амал кунад, бояд ҳатман ошкоро ва бехотирбинӣ ба ҷавобгарӣ кашида шавад.”

Гуфта мешавад, 6-июни соли ҷорӣ 10 созмони рӯзноманигорӣ ва расонаҳои муқими Душанбе бо интишори як баёния аз мақомоти Тоҷикистон хоста буданд, ки бар асоси талаботи қонунгузории кишвар ҳамагуна таҳдиду фишорҳо алайҳи журналистонро хотима бахшида, омилони лату кӯби рӯзноманигоронро боздошт ва ба панҷаи қонун бисупоранд.

Баёнияи созмонҳо ва расонаҳои муқими Душанбе аз ҷониби ҷомеаи шаҳрвандӣ ва корбарони шабакаҳои иҷтимоӣ истиқбол шуд, аммо ин изҳороти қафогардии сарони рӯзномаи “Садои мардум”, “Минбари халқ”, ҳафтаномаи “Тоҷикистон” ва “СССР” бо вокуниши хеле тунд рӯбарӯ шудааст.

Дар як моҳи ахир дар шаҳру ноҳияҳои Бадахшон даҳҳо нафар боздошт шудаанд, вале аксари онҳо вакили мудофеъ надоранд.

Радиои Озодӣ дар Тоҷикистон ба иттилооте даст пайдо карда, ки дар 8 шаҳру ноҳияи Вилояти Мухтори Кӯҳистони Бадахшон ҳамагӣ 4 вакили мудофеъ амалан фаъолият доранд.

Ба иттилои манбаъ, “тибқи рӯйхати Иттифоқи адвокатҳои Тоҷикистон, дар Вилояти Мухтори Кӯҳистони Бадахшон ҳамагӣ 7 вакили дифоъ иҷозати кор доранд. Ба иттилои дарёфтии мо, аз инҳо фақат 4 нафар амалан дар ВМКБ ҳастанд. ” Ва аз ин ҳисоб “як вакили дифоъ дар Ванҷ, як нафар дар Мурғоб ва ду нафар дар шаҳри Хоруғ ҳастанд”.

Вилояти Мухтори Кӯҳистони Бадахшон дорои шаҳри Хоруғ ва 7 ноҳияи дигар аст. Тибқи оморҳои то соли 2019 дар ҳудуди ин вилоят 226,900 нафар аҳолӣ зиндагӣ мекунад ва ба ҳисоб барои ҳар 57 ҳазор нафар як адвокат рост меояд.

Гуфта мешавад, теъдоди адвокатҳо дар ин вилоят бозгӯкунандаи он аст, ки чун талабот ба адвокат камтар аст, амалан сатҳи ҷинояткорӣ низ дар шаҳру ноҳияҳои он ба маротиб камтар аз дигар шаҳру ноҳияҳои Тоҷикистон аст.