Доналд Трамп, раисҷумҳури Амрико рӯзи душанбе аз пешниҳоди нави тарҳи оташбас миёни ҲАМОС ва Исроил хабар дод.
Трамп мегӯяд, Исроил пешниҳоди нав дар мавриди озод намудани гаравгонҳо ва поён додани ҷанг дар Ғаззаро пазируфтааст, вале мунтазири ҷавоби ҲАМОС аҳстанд.
Раисҷумҳури Амрико дар баробари пешниҳоди намудани ин тарҳи худ гуфтааст, ки имкон дорад бо пазируфтани шартҳои пешниҳодӣ ҷанг дар Ғазза поён ёбад, вале ӯ таъкид карда, ки дар ҳоли напазируфтани шартҳояш аз ҷониби ҲАМОС ин “охирин огоҳӣ” ба онҳо хоҳад буд.
Хабаргузории амрикоии “Axsios” бо такя ба манобеи худ хабар дода, ки ҳафтаи гузашта фиристодаи Амрико дар Ховари Миёна Стив Витков ба ҲАМОС тарҳи созишномаи оташбасро пешниҳод кардааст. Зоҳиран, ин ҳамон чизест, ки Трамп имрӯз аз он хабар дод.
Ин расонаи амрикоӣ дар истинод ба ду манбаъ гуфтааст, ки тарҳи оташбаси наве, ки ҳукумати Трамп пешниҳод кардааст, озодии тамоми гаравгонҳо дар як дафъа аз ҷониби ҲАМОС ва дар иваз поён додани ҷанг дар Ғазза аз ҷониби Исроилро дар бар мегирад.
Манбаъ мегӯяд, бо қабули ҲАМОС Исроил маҷбур аст даст аз ишғоли Ғазза бардорад ва барои ворид шудани кумакҳои башардӯстона иҷозат диҳад.
Дар ҳамин ҳол шабакаи телевизионии 12-и Исроил мегӯяд, ин тарҳ нуктаҳоеро дар бар мегирад, ки дар созишномаҳои қаблӣ набуданд. Аз ҷумла:
. Дар рӯзи якуми оташбас бояд ҲАМОС 20 асири зинда ва 28 ҷасади дигарро раҳо кунад.
. Дар муқобил Исроил садҳо зиндонии фаластинӣ, аз ҷумла чанд нафар аз онҳое, ки ҳукми абад гирифтаанд ва ё барои солҳои тӯлонӣ зиндонӣ шудаанд, озод мекунад.
. Исроил амалиёти “Аработи Ҷадъун 2”-ро, ки аввали моҳи сентябр барои ишғоли комили Ғазза оғоз кардааст, мутаваққиф мекунад.
. Гуфтушунидҳо то расидан ба сулҳи ниҳоӣ ва ба таври комил поён додани ҷанг идома мекунад.
Ба гузориши “Ал-Ҷазира”, ҲАМОС шоми якшанбе тариқи миёнаравҳо пешниҳодоте аз ҷониби Амрико дарёфт кардааст. Ин ҷунбиш мегӯяд, омодааст ба мизи музокирот бишанад ва қазияи озодии гаравгонҳоро баррасӣ кунад, ба шарти он ки ҷониби Исроил ба таври возеҳ поёни ҷангро эълон кунад ва ба таври комил артишашро аз Навори Ғазза берун бикашад ва як ҳайате аз фаластиниёни мустақил барои идораи Ғазза ташкил шаваду дар ҳол корро оғоз кунанд.
Яке аз шартҳои дигари ҲАМОС ин аст, ки бояд барои идомаи оташбас замонати пойбандии Исроил ба таври ошкору сареҳ гирифта шавад, ки мисли таҷрибаҳои қаблӣ аҳдшиканӣ ва адами пойбандӣ ба созишномаҳоро такрор намекунад ва он дар шакли як тавофуқи ҷудогона сурат бигирад.
Ин ҳам дар ҳолест, ки 18-уми август кишварҳои миёнҷигар, мисли Қатар ва Миср тарҳи оташбасеро пешниҳод намуда буданд, ки Исроил онро напазируфт. Аз ҷумла, дар он гуфта мешуд, ки оташбас дар марҳилаи аввал 60 рӯз идома мекунад ва то ин муддат гуфтушунидҳо барои ба таври комил поён додани ҷанг идома хоҳанд кард.
Инчунин гуфта мешуд, ки дар давоми 60 рӯз Исроил гузаргоҳҳоро боз мекунад то кумакҳои башардӯстона вориди Ғазза шаванд. Ва ҳамзамон ҲАМОС 10 асири зинда ва 18 ҷасади дигарро ба Исроил таҳвил медиҳад ва дар муқобил Исроил 1700 зиндонии фаластиниро озод мекунад, ки 45 нафарашон ҳукми абад гирифтаанд ва 15 нафари дигар барои солҳои тӯлонӣ зиндонӣ шудаанд.
