Додгоҳи олии Тоҷикистон Марат Сатторови 42-сола, посбони мактаби деҳаи Санҷидзори Канибодомро бо иттиҳоми қатли шаш нафар ба ҳабси абад маҳкум кард.
Ҳукм аз ҷониби Коллегияи ҳарбии Додгоҳи олии Тоҷикистон дар охири моҳи ноябр эълон гардид. То ҳол ҳам тафтишот ва ҳам додгоҳ аз ҷузъиёти мурофиа ва ангезаи гумонбаре, ки гӯё даст ба қатли аъзои ду хонавода задааст, чизе нагуфтаанд. Назари маҳкумшуда, пайвандон ва вакили дифоаш низ дастрас нест.
Аммо сокинони маҳаллӣ, аз ҷумла пайвандони қурбониён, ки дар мурофиа ширкат доштаанд, дар ягона ё қотили воқеӣ будани Сатторов шубҳа доранд. Яке аз наздикони кушташудаҳо ба Радиои Озодӣ гуфтааст, ки айбдоршаванда дар додгоҳ суханони зиддунақиз гуфта, гоҳ ба куштор иқрор мешуд, гоҳ онро инкор мекард ва пас аз боздошти ӯ боз қатли як хонавода сурат гирифт.
Қатлҳои занҷираӣ дар шаҳри Конибодом аз моҳи майи соли ҷорӣ бо қатли шаш нафар аз ду хонавода дар деҳаи Санҷидзор оғоз ёфт. Як оилаи кушташуда тоҷик ва хонаводаи дигар қирғиз буда, пайвандонашон гуфтанд, ки дар бадани онҳо аломати куштори маҷбуриро диданд ва ҷасадҳоро дафн карданд. Баъдан дар шаҳр ва атрофи он чанд куштори дигари пурсарусадо рух дод, ки охирини онҳо қатли як хонаводаи шашнафара дар деҳаи Шӯробқалъа буд, ки шаби 8-уми декабр сурат гирифт.
То ҳол ангезаи ин кушторҳо маълум нест. Баъзе наздикони кушташудаҳо бар ин боваранд, ки кушторҳо шояд бо дуздӣ рабт дошта бошад. Масалан, баъди яке аз ҳодисаҳо аз хонаи қурбониён пулу ҷавоҳирот гум шудааст.
Аммо мақомот мегӯянд, ки қисме аз ин кушторҳо бо муноқишаҳои хонаводагӣ рабт дошта, таҳқиқи боқимонда ҳанӯз идома дорад.
Ин силсила кушторҳо дар Конибодом сокинони кишварро нигарон намуда, аз мақомот талаб доранд, ки гунаҳкорони асосиро пайдо ва ба ҷавобгарӣ кашанд.
