Вазорати корҳои дохилаи Тоҷикистон аз боздошти ду навҷавони 17 ва 18-сола сокинони ноҳияи Фархори вилояти Хатлон хабар дод, ки ба дуздии наздик ба 700 ҳазор сомон муттаҳам мешаванд.

Бино ба иттилои Вазорати корҳои дохилаи Тоҷикистон Раҳматов Бахтиёр, соли таваллудаш 2004 ва Файзализода Фирдавс, соли таваллудаш 2005, сокинони даҳаи Деҳқонободи ноҳияи Фархор буда, 15-уми марти соли ҷорӣ аз мағозаи Гулов Холназар, сокини ҳамин ноҳия дар мҷмуъ 690 ҳазор сомониро медузданд.

“Номбурдагон аз набудани одамони гирду атроф истифода намуда, вориди саҳни ҳавлии шаҳрванд Гулов Холназар гашта, аз он ҷо бо як адад оҳани дарозшакл гирифта, қулфи дари мағозаро шикаста, ғайриқонунӣ ворид мегарданд.
Сипас аз дохили мағоза ба миқдори 200 сомонӣ тангаҳои оҳанин, 15 ҳазор сомонӣ, 40 ҳазору 150 доллари ИМА ва 1 адад телефонии мобилии тамғаи «Нокия»-ро, ки арзишаш 150 сомонӣ мебошад, тасарруф намуда, аз ҷои ҳодиса ғайб мезананд, ки бо ин кирдори ҷинояткоронаашон ба ҷабрдида ба маблағи 690.000 (шашсаду навад ҳазор) сомонӣ зарари махсусан калон мерасонанд.”, омадааст дар хабари ВКД.

Гуфта мешавад дар шуъбаи тафтишотии ШВКД дар ноҳияи Фархор нисбати гумонбарони ҷинояти дуздӣ парвандаи ҷиноятӣ бо моддаи 244 Кодекси ҷиноятии Ҷумҳурии Тоҷикистон оғоз гардида, тафтишот идома дорад.

Шоми 12-уми апрел дар нуқтаи марзии ҷамоати Хистеварзи ноҳияи Бобоҷон Ғафуров бо деҳаи Борбодуки ноҳияи Лайлаки Қирғизистон байни марзбонон тирпарронӣ рух дода, як марзбони тоҷик баъд аз захми шадид ҷон бохт.

Пештар гуфта мешуд, ки Зоир Саидумаров, як марзбони 27-солаи тоҷик аз қафаси сина ҷароҳати вазнин бардоштааст ва ҳолаташ вахим аст. Баъдтар Радиои Озодӣ бо такя ба манбааш аз мақомоти кишвар кушта шудани Саидумаровро, ки сокини ноҳияи Дӯстии вилояти Хатлон будааст, тасдиқ кард.

Хадамоти марзбонии Қирғизистон дар шарҳи ҳодиса гуфт, ки бар асари тирпарронӣ як марзбонашон захмӣ шудааст ва сокинони наздимарзиро ба ҷои амн интиқол додаанд. Инчунин сабаби сар задани ҳодисаро мақомоти қирғиз танишҳои лафзӣ байни марзбонон гуфтаанд, аммо Хадамоти марзбонии Кумитаи давлатии амнияти милии Тоҷикистон мисли ҳамеша то ҳол ҳодисаро расман шарҳ надодаанд.

Дар ҳамин ҳол масъулони ҷамоати Хистеварз дар сар задани тирпарронӣ ҷониби Қирғизистонро гунаҳкор карданд, Қирғизистон бошад, марзбонони тоҷикро гунаҳкор медонад.

Пас аз сар задани ин ҳодиса мақомоти ду кишвар барои таҳқиқи он дар минтақаи Борбодуки ноҳияи Лайлак ҷамъ омаданд. Дар натиҷаи гуфтушунид ҷонибҳо ба натиҷа расиданд, ки “нерӯҳои худро аз хатти марз ба маҳалли доимияшон бармегардонанд ва сабабу омилҳои муноқишаи ахирро пурра меомӯзанд.”

Сафорати Амрико дар Тоҷикистон ба нерӯҳои марзбонии кишвар маҷмӯи кумакҳоеро тақдим кард, ки маблағи умумии онҳо 1 миллиону 850 долларро ташкил медиҳад.

Тавре сафорати Амрико дар Душанбе хабар медиҳад, 31-март ба марзбонони тоҷик радиостансияҳо ва мошинҳои боркаши Ҷип J8 ба маблағи 1,1 миллион доллар туҳфа кардааст. Ба гуфтаи намояндагии ИМА, ин кумак ба нерӯҳои марзбонӣ имкон медиҳанд, ки дар шароити маҳдуди минтақаи наздимарзӣ ҳаракат ва иртибот барқарор кунанд.

Гуфта мешавад, маблағи умумии кумакҳои Амрико ба нерӯҳои марзбонии Тоҷикистон, ки шомили дастгоҳҳо ва қисмҳои эҳтиётии ҷипҳо, коргоҳи нигоҳдорӣ ва омӯзишӣ аст, 1.85 миллион долларро ташкил медиҳад.  

Аз ин пештар, моҳи ноябри соли 2021 Сафорати ИМА дар Тоҷикистон ба марзбонон 18 адад мошини Ҷип J8 ба маблағи 1,4 миллион доллар тақдим карда буд.

Амрико аз соли 1992 ба ин сӯ ба Тоҷикистон дар самтҳои амният, аз ҷумла омӯзиши низомиён, интиқоли таҷҳизот ва фанновариҳо ба маблағи беш аз 330 миллион доллар кумак кардааст. Намояндагии дипломатӣ таъкид кард, ки дар тӯли ин муддат ба нерӯҳои мусаллаҳи Тоҷикистон 400 адад мошин ба маблағи беш аз 13 миллион доллар супурда шудааст.

Рӯзи 11-уми апрел Эмомалӣ Раҳмон, Расиҷумҳури Тоҷикистон бо судури чанд фармоне шуморе аз мансабдоронро аз вазифаҳояшон сабукдӯш ва ба мақомҳои дигар таъйин кард.

Раҳмон дирӯз бо фармоне Субҳонзода Икром Субҳонро аз вазифаи директори Агентии авиатсияи граждании назди Ҳукумати Ҷумҳурии Тоҷикистон озод карда ва ба вазифаи директори Агентии назорат дар соҳаи маориф ва илми назди Президенти Ҷумҳурии Тоҷикистон таъин кард.

Ҳамчунин бо фармони Эмомалӣ Раҳмон дар чанде аз вазорату корхонаҳои давлатӣ муовинонашон шахсони нав таъйин карда шуд. Аз ҷумла ба вазифаи муовини вазири маориф ва илми Тоҷикистон Абдулозода З. Н. ва муовини вазири молияи кишвар Қурбонзода С. С. ва инчунин муовини раиси Кумитаи дин, муовини вазири корҳои дохилӣ ва дигар сохторҳои кишвар шахсони нав таъйин шуданд.

Ба назари бархе аз коршиносон яке аз мушкилоти асосӣ дар соҳаи кадрии кишвар ин аст, ки кадрҳо мутахассисони соҳа нестанд ва ҳар кас аз ҳисоби наздикӣ ба Раҳмон ва оилаи ӯ ва ё миқдори маблағи додааш метавонад вазифаеро соҳиб шавад, кадри он соҳа нест ва дар натиҷа он соҳа рӯ ба шикаст меорад.