Бо фармони Эмомалӣ Раҳмон аз имрӯз, 1-уми апрел даъвати ҷавонон ба хидмати ҳатмии ҳарбӣ дар Тоҷикистон шуруъ шуд. Дар чанд соати рӯзи аввал ВМКБ, Рашту Фархор нақшаро комилан иҷро карднд.

Бино ба иттилои сомонаи расмии Вазорати мудофиаи Тоҷикистон, тибқи фармони Президент даъвати навбатии ҷавонони аз 18 то 27-сола, ба хидмати ҳарбӣ дар сафи Қувваҳои мусаллаҳи кишвар оғоз гардида, то охири моҳи май идома мекунад.

Ба навиштаи расонаи ҳукуматии “Ховар”, дар рӯзи аввал нақшаи даъват ё “облава”-и баҳориро ноҳияи Фархор, ноҳияҳои минтақаи Рашт ва ҳатто 8 шаҳру ноҳияи ВМКБ пурра иҷро кардаанд.

Нақшаи даъвати ҳатмии ҳарбиро ноҳияҳои Сангвору Лахш 100%, Тоҷикобод 105 %, Нуробод 101% Рашт 100,7 % ва ВМКБ 102,5%  иҷро кардаанд.

Вазорати мудофиаи Тоҷикистон дар рӯзҳои аввал анҷом шудани нақшаи даъватро дар баъзе шаҳру ноҳияҳои кишвар ба “зиёд будани шумораи ҷавонони ихтиёрӣ ва фаъолияти хубу назарраси комиссияҳои даъватӣ” рабт додааст, аммо таҳлилгарон чизи дигар мегӯянд.

Даъват ба саффи Қувваҳои мусаллаҳи Тоҷикистон ҳар сол ду маротиба: дар баҳор аз 1-уми апрел то 31-уми май ва тирамоҳ аз 1-уми октябр то 30-уми ноябр идома мекунад. Аммо Фаридун Маҳмадализода, сухангӯи Вазорати мудофиаи Ҷумҳурии Тоҷикистон гуфта буд, ки ба анҷом расидани муҳлати ҷалби ҷавонон ба артиш, комиссариатҳои ҳарбии вилоятҳо, шаҳрҳо ва ноҳияҳо то оғози маъракаи навбатӣ даъватшавандагонро ба хидмати ҳарбӣ ҷалб мекунанд.

Маҳмадализода тамоми сол ҷалб шудани ҷавонон ба артишро ба омодагии пешакии ҳарбӣ қабл аз адои хидмати дусолаи сарбозӣ рабт дода буд.

Таҳлилгарон дар рӯзҳои аввал иҷро шудани нақшаи даъватро дар баъзе шаҳру ноҳияҳо ба ҳамин  қарори охире, ки ҷавон тамоми сол ба артиш ҷалб мешаванд, рабт медиҳанд.

Ёдовар мешавем, ки 29-уми январи соли 2021 Қонуни Ҷумҳурии Тоҷикистон “Дар бораи уҳдадории ҳарбӣ ва хизмати ҳарбӣ” дар тарҳи нав қабул карда шуд.

Агар дар гузашта, шаҳрвандоне, ки донишгоҳу донишкадаҳоро бо кафедраҳои ҳарбӣ хатм менамуданд, аз хидмати ҳатмии ҳарбӣ озод буданд ва ба онҳо рутбаи афсари хурди таҳмовар (младший лейтенант) дода мешуд, аммо тибқи тарҳи нави қонун баъди 12 моҳи хидмати ҳарбӣ ба онҳо ин рутбаро медиҳанд.

Ҳамчунин тибқи тарҳи нави ин қонун ҷавонон метавонанд бо пардохти 26ҳазору 880 сомонӣ аз хидмат озод шаванд.

Мавзуи ҷалби ҷавонон ба артиш дар Тоҷикистон солҳо боз доғ мемонад. Ҳамасола дар сафи Қувваҳои мусаллаҳи ҶТ чандин нафар шиканҷа ва бар асари он ҷон медиҳанд. Ҳатто ҳолатҳои гум шудани афсарон низ вуҷуд дорад. Бештари ҷавонони тоҷик аз сабаби бад будани шароити хидмат аз артиш мегурезанд ва мақомот бо тарзи маҷбурӣ ё “облава” ҷавононро ба артиш сафарбар мекунанд, ки ин амали мақомдорон ҳамеша дар ҷомеаи Тоҷикистон мавриди баҳс қарор дорад.

Эмомалӣ Раҳмон бидуни ном бурдан аз ҷанги Русия алайҳи Украина гуфт, ки ҳолати ба вуҷуд омада ба вазъияти иқтисодиву иҷтимоии Тоҷикистони мо таъсири ҷиддӣ расонида истодааст.

1-уми апрели соли 2022 Президенти Тоҷикитсон зимни ироаи паёми шодбошиаш ба муносибати фарорасии моҳи рамазон мардумро табрик карда, онҳоро ба сарфаву сариштакорӣ даъват кард.

Эмомалӣ Раҳмон, Президенти Тоҷикистон бахше аз ин паёмро ба нигарониҳои худ дар бораи ҳифзи истиқлолият ва таъмини мардум ба ҷои кору фароҳам овардани шароити беҳтар барои зиндагӣ бахшид.

Вай дар бораи “тағйирёбии иқлим, пайомадҳои манфии он, бемории сироятии КОВИД – 19, камчин гардидани озуқаворӣ ва болоравии нархҳо” дар бораи ҷанги Русия алайҳи Украина ишора карда, бидуни ном бурдани ин кишварҳо изҳори нигаронӣ карда гуфт, ки дунёро “сахт ба ташвиш овардааст.”

Ба таъкиди Президенти Тоҷикистон оқибатҳои ҷанги Русия алайҳи Украина ба як “давраи ниҳоят ҳассоси буҳронӣ, пешгӯинашаванда ва дарозмуддат мебошанд” ва “ба вазъияти иқтисодиву иҷтимоии қариб ҳамаи давлатҳои ҷаҳон, аз ҷумла Тоҷикистони мо таъсири ҷиддӣ расонида истодааст.”

Эмомалӣ Раҳмон мегӯяд: “Мувофиқи хулосаи коршиносон оқибатҳои ин, хусусан соли ҷорӣ барои аҳли башар аз ҳар ҷиҳат ва пеш аз ҳама, аз лиҳози таъминот бо озуқаворӣ соли вазнинтарин ва душвортарин мегардад.”

Президенти Тоҷикистон то кунун расман дар бораи ҳаводиси Украин изҳори назар накардааст, вале ин бори чандум аст, ки бидуни ном бурдан аз ҳамлаҳои Русия алайҳи Украина нигаронии худро баён мекунад.

Ин дафъа ӯ “вазъияти сиёсиву низомӣ ва иқтисодиву иҷтимоии ҷаҳон”-ро “ниҳоят муташанниҷу буҳронӣ ва мураккабу хатарзо” хонда мегӯяд, ки ин раванд “масъалаи истиқлолу озодии кишварҳои алоҳида ва сохти давлатдории онҳоро таҳти саволи ҷиддӣ қарор додааст”.

Эмомалӣ Раҳмон афзуда, ки ҳолати ба вуҷудомада “ҳар яки моро водор месозад, ки иттиҳоду сарҷамъии миллат ва амнияти давлату ҷомеаро боз ҳам таҳким бахшем. Мо вазифадорем, ки барои ҳимояи неъмати бебаҳои зиндагиамон – истиқлоли давлатӣ ва дастовардҳои он – сулҳу оромӣ, суботи сиёсӣ ва ваҳдати миллӣ ҳамеша омода бошем.”

Гуфтанист, Русия ва Украина ҳар ду барои Тоҷикистон аз шарикони стротегӣ ва иқтисодӣ мебошанд ва чун беш аз 2 миллион тоҷикистонӣ дар Русия ҳазорҳо каси дигар дар Украина  кору зиндагӣ мекунанд, ба ин хотир суботи иқтисодиёти Тоҷикистон ба суботи иқтисоди Русия сахт вобастагӣ дорад.