Ҷустуҷӯ кунед
Ҷустуҷӯ
23.9 C
Dushanbe
Хона блог саҳифа 500

Куштор дар Роштқалъа ва эътирози сокинон дар Хорӯғ

Аз ҷониби
amrullokhi
-
0

Кормандони прокуратураи Вилояти Мухтори Кӯҳистони Бадахшон дар Роштқалъа як сокини маҳаллиро дар манзили зисташ ба қатл расониданд.

Баъд аз кушта шудани ин ҷавон сокинон ҷасади ӯро рӯи дастонашон гирифта ба маркази Вилоят оварданд ва аз мақомот суол мекунанд, ки бо чӣ ҷурме ӯро куштанд?

Ба гуфтаи манбаи Аздо тв аз Хорӯғ, шаби 24-ум ба 25-уми ноябри соли ҷорӣ Гулбуддин Зиёбеков, як сокини ноҳияи Роштқалъаи Вилояти Мухтори Кӯҳистони Бадахшон дар хонаи истиқоматиаш тавассути кормандони прокуратураи вилоят аз ноҳияи сараш парронда шуд.

Аммо Додоҷони Атовулло, раҳбари созмони “Ватандор”, дар сафҳаи Фесбукиаш қатли Гулбуддин Зиёбековро “амали террористӣ” хонда, навиштааст, ки тавассути “гурӯҳи мусаллаҳи ниқобпӯш” сурат гирифтааст.

Ҳамзамон “Pamir Daily News” дар саҳфаи Фейсбукиаш хабар дода, ки пас аз қатли Гулбуддин Зиёбеков “аз Хорӯғ гузориш мешавад, ки вазъият бадтар гардида ва садои тир ҳам шунида мешавад.” Гурӯҳе аз ҷавонони ин вилоят ҳам дар маркази шаҳри Хорӯғ ҷамъ шуда, хостори баргузории тазоҳурот мебошанд.

Манбаи Аздо тв, дар идома афзуд, ки ба эҳтимоли зиёд, парвандаи Гулбуддин Зиёбеков аз қабл дар дасти мақомот вуҷуд дошт, зеро вай яке аз ширкаткунандагони эътирозҳои соли гузашта дар Хорӯғ ба хотири дастдарозии яке аз кормадони мақомоти қудратӣ ба ҷавондухтаре аз Роштқалъа буд.

Вай гуфт, дирӯз, пеш аз манзили Гулбуддин Зиёбеков рафтан ҳамон кормандони мақомоти прокуратура дар Нуқтаи фурӯши сӯзишворие истода, ҳангоми хариди маводи сӯхт корманди НФС аз қасди онҳо бохабар мешавад. Вай фавран ба Гулбиддин тамос гирифта, ӯро огоҳ мекунад. Аммо ин гуфтугӯи онҳо тавассути КДАМ шунуд шуда, фавран корманди НФС-ро боздошт ва сипас қотилонро ба хонаи Гулбуддин Зиёбеков мефиристанд.

Бозори “Султони Кабир” баста мешавад

Аз ҷониби
AZDA TV
-
0

Бозори “Султони Кабир”, яке аз бузургтарин бозорҳои шаҳри Душанбе, ки дар он масолеҳи сохтмонӣ фурӯхта мешавад, аз 1-уми марти соли 2022 баста мешавад. Дар ин бора дафтари матбуоти шаҳрдори Душанбе 24-уми ноябр хабар дод.

Мақомот сабаби барҳам додани ин бозорро дар мутобиқ сохтани кӯчаҳои Душанбе ба талаботи меъморию шаҳрсозии муосир гуфтаанд.

Инчунин мақомоти шаҳрдорӣ таъкид мекунанд, ки ба монанди бозори “Султони Кабир” низ Ҷамъияти дорои масъулияти маҳдуди “Файзи Саид”-“Осиё” ва гирду атрофи он дар ноҳияи Фирдавсӣ, ҳамчунин маркази савдои “Мадад” дар кӯчаи А. Ҷомии ноҳияи Сино низ баста мешаванд.

Мақомоти шаҳри Душанбе мегӯянд, ки соҳибкорони ин бозору марказҳои савдо ба дигар маҳал кӯчонида мешавад. Аммо бозори “Султони Кабир” ба куҷо кӯчонида мешавад, чизе гуфта нашудааст.

Бозори “Султони Кабир” яке аз бузургтарин бозорҳои Душанбе буда дар кӯчаи Неъмат Қарабоев ҷойгир аст ва он соли 2000 сохта шудааст.

Путин созишнома байни Русия ва Тоҷикистонро ба Дума фиристод

Аз ҷониби
firuzihait
-
0

Раисиҷумҳури Русия Владимир Путин созишнома дар бораи таъсиси системаи ягонаи дифои ҳавоии Федератсияи Русия ва Тоҷикистонро барои тасвиб ба Думаи давлатӣ пешниҳод кард.

Тавре дар санади нашршуда дар сомонаи палатаи поёнии Парлумон гуфта мешавад, Маскав ва Душанбе як системаи ягонаи дифои ҳавоии минтақавӣ таъсис медиҳанд, ки ба системаи ягонаи дифои ҳавоии кишварҳои узви Иттиҳоди Давлатҳои Мустақил дохил мешавад.

Созишномаи таъсиси низоми ягонаи дифои ҳавоӣ байни Русия ва Тоҷикистон моҳи апрели соли ҷорӣ зимни сафари кории Сергей Шойгу, вазири дифои Русия ба Душанбе бо Шералӣ Мирзо, вазири дифои Тоҷикистон ба имзо расида буд.

Баъдан ҷонибҳо шарҳ доданд, ки ҳадаф аз имзои ин созишнома баланд бардоштани эътимоднокии ҳифзи марзи давлатӣ дар ҳарими ҳавоӣ мебошад.

Сокинони шаҳри Хуҷанд бо оби тоза таъмин шуданд

Аз ҷониби
AZDA TV
-
0

Бонки аврупоии таҷдид ва рушд (БАТР) пойгоҳи асосии обкашӣ дар шаҳри Хуҷандро таъмиру навсозӣ кард ва инак сокинони шаҳр бо оби ошомидании тоза таъмин шуданд. Дар ин бора “Азия-Плюс” хабар дод.

Ҳангоми бозкушоии пойгоҳи обкашии шаҳри Хуҷанд. Акс аз “Азия – Плюс”

Гуфта мешавад, ин пойгоҳи бо сармоягузории бевоситаи БАТР бозсозӣ шуда, тамоми аҳолии шаҳри Хуҷанд, ки беш аз 180 ҳазор нафар ҳастанд мунтазам ба оби тозаи нӯшокӣ дастрасӣ пайдо намуданд.

Ба иттилои манбаъ, маросими анҷоми корҳо бо иштироки муовини аввали раиси шаҳри Хуҷанд Хайрулло Ғайбуллозода ва роҳбари намояндагии БАТР дар Тоҷикистон Рика Иши, инчунин муовини директори Дафтари ҳамкории Швейтсария (SECO) дар Тоҷикитсон Ричард Ченевард баргузор шуд.

Дар хабар гуфта нашудааст, ки бо чӣ миқдор маблағ ин тарҳ ба анҷом расидааст. Танҳо қайд мешавад, ки маблағи зарурӣ барои амалисозии лоиҳаи корҳои таъмиру таҷдид аз ҷониби БАТР ва ҳукумати Швейтсария ҷудо шудааст.

Таҷлили Рӯзи Парчами давлатӣ дар Тоҷикистон

Аз ҷониби
amrullokhi
-
0

Имрӯз, 24-уми ноябр Рӯзи Парчами давлатии Ҷумҳурии Тоҷикистон дар саросари кишвар таҷлил карда мешавад.

Нақши кунунии Парчами давлатии Тоҷикистон 24-уми ноябри соли 1992 дар Иҷлосияи 16-уми Шӯрои олӣ дар шаҳри Хуҷанд ҳамчун рамзи давлати соҳибистиқлол тарҳрезӣ ва ба тасвиб расида буд.

Эмомалӣ Раҳмон, Президенти Тоҷикистон зимни ироаи табрикоти худ дар Рӯзи Парчами давлатӣ, аз ҷумла таъкид кард, ки “Мо вазифадорем, ки Парчами миллии худро ҳифз намоем, эҳтироми онро ҳамчун нишонаи давлатдории миллӣ, истиқлолу озодӣ ва арзиши бебаҳои миллӣ ба ҷо оварем.”

Гуфтанист, 20-уми ноябри соли 2009 бо фармони Эмомалӣ Раҳмон 24-уми ноябр – Рӯзи Парчами давлатии Ҷумҳурии Тоҷикистон эълон гардида буд.

Афзоиши сафари муҳоҷирони тоҷик ба Русия баъд аз пандемия

Аз ҷониби
firuzihait
-
0

Тибқи омори расмӣ дар даҳ моҳи соли ҷорӣ танҳо ба шаҳри Санкт-Петербурги Русия зиёда аз 51 ҳазор шаҳрванди Тоҷикистон барои кору зиндагӣ сафар кардааст.

Ба гуфтаи муовини аввали раиси Кумитаи муносибатҳои байни миллатҳо ва татбиқи сиёсати муҳоҷират Алексей Силкин, дар ин давра теъдоди муҳоҷирони хориҷие, ки аз гузаргоҳҳои Санкт-Петербург вориди Русия шудаанд, аз 352 ҳазор нафар гузаштааст. Ин рақам 131 ҳазору 789 нафар ё 59,8% бештар аз ҳамин давраи соли гузашта мебошад.

Аз ин шумораи муҳоҷирон, шаҳрвандони Ӯзбакистон – 127 ҳазору 144 нафар, Тоҷикистон – 51 ҳазору 76 нафар ва Қирғизистон – 31 ҳазору 87 нафарро ташкил медиҳанд.

Гуфтанист, дар Русия зиёда аз як миллион шаҳрванди Тоҷикистон кору иқомат мекунанд

Ҳавасмандии ҳамкории Иттиҳоди Аврупо дар соҳаҳои иқтисоди сабз бо Тоҷикистон

Аз ҷониби
amrullokhi
-
0

Дар шаҳри Нораки вилояти Хатлон ба Намояндаи олии сиёсати хориҷии Иттиҳоди Аврупо Ҷозеп Боррелл ҷомаву тоқии тоҷикӣ пӯшонида, ҳавасмандии Иттиҳоди Аврупо ба ҳамкорӣ дар соҳаҳои иқтисоди сабз бо Тоҷикистонро ҷалб карданд.

Намояндаҳои воломақоми Иттиҳоди Аврупо, ки бо сафари чоррӯза дар Тоҷикистон ҳузур доранд, 23-уми ноябр ҳангоми боздид аз Нерӯгоҳи обии барқии Норак эълом карданд, ки ҳавасманди ҳамкорӣ дар рушди иқтисоди сабз бо Тоҷикистон ҳастанд.

Вазорати корҳои хориҷии Тоҷикистон хабар дода, ки дирӯз ин ҳайъати воломақоми Иттиҳоди Аврупо ба шаҳри Норак рафта, аз Нерӯгоҳи обии барқии Норак дидан кардаанд ва “ҳавасмандии худро барои тақвияти бештари ҳамкориҳо миёни Ҷумҳурии Тоҷикистон ва Иттиҳоди Аврупо дар соҳаҳои иқтисоди сабз, энергетика, тағйирёбии иқлим ва масъалаҳои вобаста ба об дар чаҳорчӯби абзорҳои дуҷониба ва бисёрҷониба иброз намуданд.”

Ҳамзамон Ваколатдор оид ба ҳамкории байналмилалии Иттиҳоди Аврупо хонум Ютта Урпилайнен дар сафҳаи тветтериаш гуфта, ки “маъмурияти олии мо дар Тоҷикистон ба охир расид. Ман бар таъуҳҳуди қавии Иттиҳоди Аврупоро ба шарикони мо дар Осиёи Марказӣ ва дурнамои ҳамкорӣ дар соҳаҳои иқтисоди сабз ва тавсеаи инсонӣ таъкид кардам.”

Қонуни буҷети давлатӣ барои соли 2022 дар Пралумон тасдиқ шуд

Аз ҷониби
AZDA TV
-
0

Парлумони Тоҷикистон буҷети давлатӣ барои соли 2022-ро пазируфт, ки он нисбат ба соли ҷорӣ 19,4 дарсад бештар буда, 33 миллард сомониро ташкил медиҳад.

Намояндагони Парлумони Тоҷикистон имрӯз 24-уми ноябр дар ҷаласаи навбатии Маҷлиси намояндагони Маҷлиси Олии Ҷумҳурии Тоҷикистон Қонуни “Дар бораи Буҷети давлатии Ҷумҳурии Тоҷикистон барои соли 2022” ва дурнамои нишондиҳандаҳои буҷети давлатӣ барои солҳои 2023-2024-ро қабул карданд.

Қонуни мазкур аз ҷониби Вазорати молияи Тоҷикистон барои баррасӣ ба Маҷлиси намояндагони Маҷлиси олии кишвар пешниҳод гардид. Ва вазири молияи кишвар Файзиддин Қаҳорзода онро дар Парлумон матраҳ кад.

Дар Буҷети нави давлатии Тоҷикистон барои соли 2022 Маҷмӯи маҳсулоти дохилӣ ба андозаи 7,9 дарсад ба маблағи 103,9 млрд. сомонӣ, индекси дефлятори ММД – 3,4 дарсад пешбинӣ шудааст.

Ҳаҷми умумии даромади Буҷети давлатии Ҷумҳурии Тоҷикистон дар соли 2022 ба маблағи 33 млрд. сомонӣ пешбинӣ гардидааст, ки ба 31,7 фоизи Маҷмӯи маҳсулоти дохилӣ баробар мебошад. Даромади буҷет нисбат ба соли 2021 ба андозаи 19,4 фоиз ё 5,3 млрд. сомонӣ зиёд мебошад.

Тибқи тарҳи нав дар соли 2022 даромади буҷети ҷумҳуриявӣ 12 млрд. 964 млн. сомонӣ, ба нақша гирифта шудааст, ки ин нисбат ба соли 2021 ба маблағи 1 млрд. 465 млн. сомонӣ зиёд мебошад.

Ҳаҷми умумии хароҷоти Буҷети давлатӣ барои соли 2022 аз ҳисоби ҳамаи манбаъҳои маблағгузорӣ дар ҳаҷми 33 млрд. 626 млн. сомонӣ ба нақша гирифта шудааст ва 32,3 дарсади Маҷмӯи маҳсулоти дохилиро ташкил медиҳад, ки нисбати буҷети давлатӣ соли 2021 ба маблағи 5 млрд. 517 млн. сомонӣ зиёд мебошад.

NASA мехоҳад дар сатҳи кураи Моҳ нерӯгоҳи ҳастаӣ бисозад

Аз ҷониби
AZDA TV
-
0

Идораи миллии ҳавонавардии Амрико (NASA) дар ҷустуҷӯи сохтани нерӯгоҳи ҳастаӣ бар рӯйи сатҳи Моҳ аст.

Ба гузориши “Cursorinfo” донишмандони NASA ва Озмоишгоҳи милии Айдаҳо (Idaho National Laboratory) дар талоши роҳандозии нерӯгоҳи ҳастаӣ бар рӯйи кураи Моҳ ҳастанд ва умедворанд, ки барои маъмуриятҳои ояндаи худ ба моҳ то охири даҳсолаи ҷорӣ ба манбаи энерже, ки ҷудо аз энержии офтоб бошад, дастрасӣ пайдо мекунанд.

Ба назари онҳо, ба даст овардани системаи пуриқтидори энержӣ дар рӯйи Моҳ “кадами навбатии инсон дар роҳи иктишофи кайҳон” хоҳад буд.

Донишмандон бар ин назаранд, ки ҳузури устувори инсон бар кураи Моҳ метавонад дар ниҳоят роҳро барои сафар ба Миррих боз кунад. Ба гуфтаи олимони NASA, интихоби энержии ҳастаӣ ба он хотир сурат гирифта, ки нерӯгоҳи ҳастаии ҷудо аз шароити муҳитӣ бар рӯйи сатҳи Моҳ ё сайёраи Миррих метавонад энержии ғанӣ ва пойдорро таъмин кунад.

Солҳост, ки донишмандон барои сафари инсон ба Миррих таҳқиқот мекунанд. Онҳо барои ин кор дар талоши роҳҳои пайдо кардани энержии қавитар ва пойдортар ҳастанд то битавонанд заминаи сафари инсон ба Миррихро муҳайё созад.

“Истиқлол” қаҳрамони даҳкаратаи Тоҷикистон шуд

Аз ҷониби
firuzihait
-
0

Дастаи футболи “Истиқлол”-и Душанбе баъд аз ғалаба бар дастаи “Душанбе” бори даҳум аст, ки қаҳрамони футболи Тоҷикистон мешавад.

Дар даври 25-уми Қаҳрамонии футболи Тоҷикистон миёни дастаҳои лигаи олӣ, дастаи “Истиқлол” бар дастаи “Душанбе” бо ҳисоби 8:0 пирӯз гардида, пеш аз муҳлат қаҳрамони Тоҷикистон шуд.

Дастаи “Истиқлол” аз соли 2014 то кунун пайҳам қаҳрамони футболи Тоҷикистон мешавад. Дар маҷмуъ ин дастаи футболи кишвар дар солҳои 2010, 2011, 2014, 2015, 2016, 2017, 2018, 2019 ва 2020 қаҳрамони кишвар гардида буд.

Ҳамчунин пеш аз анҷоми мусобиқаи қаҳрамонӣ, ки ду давр мондааст, тими “Душанбе” аз ҳаққи иштирок дар бозиҳои мавсими ояндаи лигаи олӣ маҳрум шуд. Аз се дастаи дигар (“Эсхата”, “Файзканд” ва “Куктош”) як даста метавонад баъд аз натиҷаи бозиҳои баъдӣ, лигаи олиро тарк кунад.

Ҷойи дуввум дар қаҳрамонии кишвар насиби тими “Хуҷанд” шуд. Дастаҳои “Истаравшан” ва КМВА барои ҷойи сеюм дар лигаи олӣ мубориза мебаранд. Имрӯз 23-юми ноябр, ин ду даста дар Истаравшан бо вомехӯранд.

1...499500501...747саҳифаи 500 аз 747

Дар бораи мо

АЗДО ТВ бо ҳадафи рушди озодии баён, нашри арзишҳои демократӣ, риояи гуногунандешӣ ва додани минбари озод барои тамоми қишрҳои ҷомеа рӯйи кор омадааст. Тарҳ аз ҷониби Фонди (NED) сармоягузорӣ мешавад. Мо дар фаъолияти расонаии худ пойбанди меъёрҳои байналмилалӣ ва ахлоқи журналистӣ ҳастем. Бознашри матолиби АЗДО ТВ бо зикри манбаъ иҷозат дода мешавад. Шиори мо: Озодии расона зербинои ҷомеаи демократист!

Dushanbe
broken clouds
24.1 ° C
24.1 °
24.1 °
35 %
3kmh
75 %
Tue
22 °
Wed
20 °
Thu
25 °
Fri
26 °
Sat
26 °

© 2023 АЗДО ТВ шабакаи хабаррасонӣ ва таҳлилӣ мебошад - Ҳамаи ҳуқуқ маҳфуз аст