Қарор аст имсол ҷашни бо дабдабаи Наврӯзӣ дар ноҳияи Ҷалолиддини Балхӣ бо ҳузури Раисҷумҳур Эмомалӣ Раҳмон баргузор шавад. Сокинон мегӯянд, барои омодагӣ ба ин ҷашн мақомоти ноҳия аз онҳо маблағ ҷамъоварӣ мекунанд.

Як манбаъ аз ин ноҳия, ки нахост номаш зикр шавад, ба Аздо тв гуфт, дар маркази ноҳия ва деҳаҳои гирду атроф мақомот хона ба хона гашта барои баргузории ҷашни Наврузӣ 20-30 сомонӣ ва аз соҳибкорон аз ин бештар талаб доранд.

Ҳамчунин як манбаи дигар низ аз ҳамин ноҳия гуфт, ки мақомот аз мардум то шаҳодномаҳои таваллудро талаб карда, тамоми афроди оиларо ба рӯйхат мегиранд ва сипас маблағ талаб мекунанд.

“Вақте хона омаданд, аввал ҳуҷҷатҳои тамоми афроди оиларо хоста ва тафтиш карданд ва баъд 20 сомонӣ маблағ талаб карданд, пурсидам, ки 20 сомонӣ барои чӣ? Яке аз онҳо гуфт, медонӣ, ки имсол Наврӯзӣ дар ноҳияи мо ҷашн гирифта мешавад ва Ҷаноб меояд. Мо барои сабзазор кардани варзишгоҳи марказӣ аз мардум маблағ ҷамъ дорем. Бояд ҳар хонавода на камтар аз 20 сомонӣ бидиҳад.”, мегӯяд манбаъ.

Дар аксҳое, ки аз гугул гирифта шудааст, дида мешавад, ки варзишгоҳ нимсохта ва майдони он то ҳол сабзазор нашудааст. Варзишгоҳи марказии ноҳия тибқи нақша бо 15 ҳазор ҷои нишаст ва дар гирду атрофаш мактабу биноҳои замонӣ сохта ва бояд то ҷашни Наврӯз ба истифода дода шавад. Аммо аз гуфтаи сокинони ноҳия бармеояд, ки ё барои идомаи сохтмон маблағ намерасад ва ё ин ки мақомот мехоҳанд бо баҳонаи ҷашни Наврӯз аз мардум барои фоидаи худ маблағ ҷамъоварӣ кунанд.

Маблағ ҷамъоварӣ кардани мақомот аз сокинони гирду атрофи ноҳия дар ҳолест, ки барои чунин сохтмуонҳои бузург аз буҷаи кишвар миллионҳо сомонӣ ҷудо мешавад, ки то пурра сохтани он басанда аст. Аммо бар иловаи ҷудо шудани чунин маблағҳо мақомоти ноҳияҳо аз соҳибкорон ва мардуми оддӣ маблағҳое бо ҳар баҳона ҷамъоварӣ мекунанд.

Садриддин Наҷмиддин, сарояндаи шинохтаи Тоҷикистон бо нашри шеъри “ИЛТИҶО АЗ КАМОНМАРДОН“-и устод Лоиқи Шералӣ аз мақомоти Тоҷикистон хостааст: “Агар хоҳед фардоро ба даст оред, Камон аз даст бигзоред!”

Садриддин Наҷмиддин ин шеъри “ИЛТИҶО АЗ КАМОНМАРДОН”-и устод Лоиқро дар саҳфае нашр карда, ки беш аз 164 ҳазор пайгиркунанда дорад ва аксар ҳаводорони ӯ инро ба маънои ҳимоят аз мардуми Вилояти Мухтори Кӯҳистони Бадахшон қабул карда, ба вай таҳсину офарин хондаанд.

Ин сарояндаи эстрадаи тоҷик ба фарқ аз дигар санъаткорони Тоҷикистон дар хеле аз маворид ва ҳодисаҳои кишвар мавқеи худро озодона ва ошкоро дар шабакаҳои иҷтимоӣ баён мекунад ва дар ин авохир фаъолиятҳои ӯ дар бахши корҳои хайрия низ хеле барҷаста шудааст.

Гуфтанист, вазъият дар Вилояти Мухтори Кӯҳистони Бадахшон пас аз ҳодисаҳои 25-28-уми ноябри соли 2021 то кунун ором нашуда, балки лашкаркашии мақомоти қудратӣ ба ин минтақа ва тақвияти постгоҳҳо ва тавлиди истеҳкомоти бетонии ҷадид дар шаҳри Хоруғ на натанҳо мардуми ин вилоят, балки аксари тоҷикистониҳоро дар дохил ва хориҷ аз кишвар ба ташвиш овардааст.

Пеш аз ин мақомоти Тоҷикистон ба раҳбарони мардумии ин вилоят, аз он ҷумла Мамадбоқир Мамадбоқиров ва дигарон ёрони ӯ шарт гузошта буданд, ки то 15-уми феврали соли ҷорӣ худро ба мақомот таслим кунанд, дар ғайри он кормандони мақомоти қудратӣ барои боздошти онҳо ба муддати як ҳафта аз 15-23-юми феврал дар дохили шаҳри амалиёти низомӣ худро баргузор мекунанд.

Аз сӯи дигар мухолифини Ҳукумати Тоҷикистон ва сокинони Вилояти Мухтори Кӯҳистони Бадахшон, ки хориҷи кишвар дар дигар давлатҳо кору зиндагӣ мекунанд, гоҳ дар танҳоӣ ва гоҳҳое дигар ба таври дастаҷамъӣ талаб доранд, ки бояд мақомоти қудратӣ ба худ биоянд ва вазъият дар ин вилоятро бо роҳи гуфтугӯ ҳаллу фасл кунанд, на бо роҳӣ зӯрӣ ва хунрезӣ.