Хона блог саҳифа 647

Ширкати Эмомалӣ Раҳмон дар Ҷашни Ғалаба дар Маскав ва саҳван Эммануэл хондани номаш

Аз ҷониби
shukhrat
-
0

Владимир Путин ва Эмомалӣ Раҳмон рӯзи 8-уми май дар Кохи Кремл мулоқот анҷом доданд. Дар ин мулоқот Эмомалӣ Раҳмон аз вазъи амнияти Афғонистон пас аз хуруҷи нерӯҳои низомии Амрико аз ин кишвар ибрози нигаронӣ намуда, хостори ёрӣ дар таҳкими ҳифзи марзи Тоҷикистон бо кишвар шудааст. Путин низ ба вазъ дар Афғонистон ишора намуда гуфт, ки вазъи Афғонистон нигарониҳоеро дар Тоҷикистон ба вуҷуд овардааст.

Президенти Русия дар идомаи суҳбаташ иброз дошт, ки “масъалаҳои амниятӣ дар минтақа дар робита ба ҳодисаҳое, ки дар Афғонистон рӯх медиҳанд, хеле муҳиманд”.

Дар ин суҳбат Путин қайд намуд, ки Маскав барои дастгирии Душанбе дар ин самт ҳама корҳоро анҷом дода истодааст ва ба фаъолияти пойгоҳи низомии 201-и Русия дар Тоҷикистон ишора намуд.

“Мо барои таҳкими пойгоҳи низомии 201-и Русия ва тақвияти нерӯҳои мусаллаҳи Тоҷикистон кор намуда истодаем. Ҳамчунин дар ин самт як барномаи муштараку тӯлонӣ барои чанд сол таҳия шудааст ва мо ҳама корҳоро анҷом медиҳем, то ин барнома саривақт иҷро шавад.”- гуфт Президенти ФР.

Путин инчунин ба Раҳмон гуфт, ки Русия барои дастгирии Тоҷикистон дар давраи раёсати Созмони Ҳамкориҳои Шанхай (СҲШ) ҳама корҳои имконпазирро анҷом хоҳад дод.

Ҳамчунин Раҳмон зимни мулоқот бо Путин масъалаи муҳоҷирати меҳнатии шаҳрвандони Тоҷикистонро баррасӣ карда, ба зарурати бештар кардани “хатсайрҳои ҳавоӣ миёни ду кишвар” таъкид кардааст.

Дар идома Президенти Русия гуфт, ки Русия ва Тоҷикистон метавонанд ҳаҷми савдоро ба сатҳи пеш аз пандемия расонанд.

Ёдовар мешавем, ки Эмомалӣ Раҳмон барои иштирок дар паради бахшида ба 76-солгарди Ҷашни Ғалаба озими Маскав шуд. Раҳмон танҳо раҳбари кишваре буд, ки Владимир Путин президенти Русияро рӯзи 9-уми май дар Иди Ғалаба дар Маскав ҳамроҳӣ мекард.

Ҳангоми пахши зинда аз гашти низомӣ дар Маскав, барандаи Шабакаи аввали телевизиони Русия вақти муаррифии Эмомалӣ Раҳмон дар Майдони Сурх иштибоҳан ӯро “Эммануэл Раҳмон” ном бурд, вале зуд хатои худро ислоҳ кард.

Чанде аз расонаҳо ин қисмати муаррифии Раҳмонро буридаанд ва ё бо садои дигаре пӯшондаанд.

Аз ҷумла ширкати алюминийи тоҷик (Талко) низ лаҳзаи муаррифии Эмомалӣ Раҳмонро дар Майдони Сурх дар саҳифаи расмии худ дар Ютуб ҷой дода, аммо лаҳзаи хатои барандаро бо садои дигар иваз кардааст.

Бино ба иттилои Радиои Озодӣ дар гашти низомӣ дар Маскав беш аз 12 ҳазор низомӣ бо 190 техника ва 76 ҳавопаймои низомӣ иштирок намудаанд.

Ҳамдардии раисҷумҳури Тоҷикистон ба хонаводаҳои қурбониён дар Афғонистон

Аз ҷониби
shukhrat
-
0

Раисҷумҳури Тоҷикистон Эмомалӣ Раҳмон дар робита ба ҳамлаи террористӣ ба як мактаби духтаронаи Кобул ба раисҷумҳури Афғонистон барқияи тасаллият фиристод.

Хабаргузории “Спутник” бо такя ба хабари дафтари матбуотии раисҷумҳури Тоҷикистон навишта, ки рғзи 10 май Эмомалӣ Раҳмон ба Ашраф Ғанӣ раисҷумҳури Афғонистон изҳори ҳамдардӣ намуд.

Дар ин барқияи ҳамдардӣ аз ҷумла омада аст “хабари ба ҳалокат расидан ва маҷрӯҳ шудани теъдоди зиёди мардуми осоишта ба шумули духтарони наврас дар натиҷаи ҳамлаи мудҳиш ва разилонаи террористон дар қисмати ғарби Кобул боиси андуҳи амиқ ва нафрати беандозаи мо гардид. Чунин амали хушунатомези золимона ва маргбор, ки нерӯҳои аҳриманӣ дар рӯзҳои охири моҳи шарифи Рамазон ба он даст задаанд нобахшиданист”, афзуда аст Эмомалӣ  Раҳмон.

Раиси ҷумҳури Тоҷикистон ҳамчунин ба мардуми Афғонистон ва хонаводаҳои қурбониёни ин ҳодисаи мудҳиш ҳамдардӣ намуда гуфта аст “дар ин рӯзҳои мотамбор тасалият ва хамдардии самимонаи худ ва мардуми Точикистонро ба наздикон ва пайвандони қурбоншудагон, ҳамчунин ба тамоми мардуми бародари Афғонистон изҳор намуда аз даргоҳи Худованди мутаол шифои комили ҳамаи осебдидагонро масъалат дорам”.

Ёдрас мешавем, ки 8 майи соли ҷорӣ дар ғарби Кобул пойтахти Афғонистон дар  назди мактаби духтаронае нахуст мошине пур аз маводи тарканда мунфаҷир шуд ва сипас ду ҳамлаи мушакии дигар сурат гирифт, ба гуфтаи муаллимони ин мактаб ин ҳамла замоне ба вуқуъ пайваст, ки толибилмон аз дохили бинои мактаб ба берун мебаромаданд. Бар асари ин ҳамлаи террористӣ беш аз 60 нафар фавтида, 150 тани дигар захм бардоштаанд.

Бояд гуфт ин нахустин ҳамлаи бузурги террористӣ пас аз оғози хуруҷи нерӯҳои ИМА ва НАТО аз Афғонистон набуда, ҳанӯз 30 апрел бар асари таркиши бомба дар хобгоҳе дар вилояти Лоҳур ҳадиақал 30 тан кушта шуданд.

Кушта ва захмӣ шудани даҳҳо нафар дар таркише дар як мактаби духтаронаи шаҳри Кобул

Аз ҷониби
shukhrat
-
0

Рӯзи 8-уми май дар мактаби духтаронаи шаҳри Кобул таркиши шадиде рух дод, ки бар асари он беш аз 60 нафар фавтида, 150 тани дигар захм бардоштаанд. Бино ба иттилои расонаҳо бар асари ин таркиш бештар духтарҳо фавтидаанд, чун ҳамла ба мактаби духтарона сурат гирифт.

Ба навиштаи “Tolo News”, назди бинои мактаби духтарона нахуст мошини ҳомили маводи тарканда мунфаҷир шуд ва сипас ду ҳамлаи мушакии дигар сурат гирифт.

Ба гуфтаи муаллимони ин мактаб, ҳамла замоне рух дод, ки толибилмон аз бинои макотиб нав ба берун баромаданд.

Президенти Афғонистон, Ашраф Ғанӣ гуфт, ки ин ҳамлаи даҳшатангезро ҷунбиши ҳаракати Толибон анҷом додааст, вале намояндагони ин гурӯҳ масъулияти ин амали террористиро ба ӯҳда нагирифт ва баръакс онро маҳкум намудаанд.

Лозим ба ёдоварист, ки ин нахустин ҳамлаи бузурги террористӣ пас аз оғози хуруҷи нерӯҳои ИМА ва НАТО аз Афғонистон набуда, рӯзи 30 апрел бар асари таркиши бомба дар хобгоҳи вилояти Лоҳур дасти кам 30 нафар кушта шуданд.

Дар пайи ин ҳодиса “New York Times” дар гузорише гуфт, ки ҳамла ба мактаби духтарон нигарониҳо дар бораи ояндаи занону духтаронро дар Афғонистон ба бор овард. Ба гуфтаи ин хабаргузорӣ, ин ҳамла дар ҳоле сурат гирифт, ки созмонҳои ҳуқуқи башар изҳори нигаронӣ карда буданд, ки бо хуруҷи нерӯҳои ИМА аз Афғонистон дар ин кишвар таҳсилот ва ҳуқуқҳои иҷтимоии занон ва духтарон сахт маҳдуд карда мешавад.

Ба навиштаи ин расона, интизор мерафт, ки созишномаи ИМА бо Толибон барои оташбас, ба кушта шудани шаҳрвандани осоиштаи Афғонистон хотима мебахшад. Аммо ҳодиса рӯзи шанбе нишон дод, ки бо хуруҷи нерӯҳои амрикоӣ бесарусомониҳо зиёдтар мешаванд.

Дар идома ҳамчунин гуфта шудааст, ки ҳатто агар байни ҳукумати Афғонистон ва Толибон созишномаи сулҳ баста шавад, натиҷа он хоҳад буд, ки рамзҳои шадиди Толибон, аз ҷумла манъи таҳсили духтарон дар мактаб, дубора метавонанд роҳандозӣ шаванд.

Ёдовар мешавем, ки вақти ҳуқмронии гурӯҳи Толибон аз соли 1996 то 2001 дар Афғонистон, занон ва духтарон наметавонистанд ба кор ва барои таҳсил ба мактабҳо раванд.

Ба таъхир афтодани баргузории панҷумин Бозиҳои ҳамбастагии исломии Қуния-2021 дар Туркия

Аз ҷониби
shukhrat
-
0

Шӯрои иҷроияи Федератсияи варзишҳои ҳамбастагии исломӣ таҳти раёсати шоҳзода Абдулазиз ибн Туркӣ Ал-Файсал бо Кумитаи тадорукотии панҷумин Бозиҳои ҳамбастагии исломии Қуния-2021 бо роҳбарии вазири ҷавонон ва варзиши Туркия Меҳмет Муҳаррам Касапоғлу мулоқот намуд.

Бино ба иттилои хабаргузории Спутник дар ин дидор ҳаммаи масоил дар иртибот ба тадорукоти панҷумин Бозиҳои ҳамбастагии исломӣ ва вазъияти феълии тандурустии ҷаҳон дар пасманзари пандемияи корнавирус баррасӣ гардиданд.

Гуфта шуд, ки вазъи тандурустии ҷаҳон мумкин аст барои ширкати бисёре аз кишварҳо, ки иммунизатсияи COVID-19 суст ҷараён дорад, монеа эҷод кунад.

Ба хотири онки Федератсияи варзишҳои ҳамбастагии исломӣ ва Кумитаи тадорукоти бозиҳо ҷонибдори ширкати ҳамаи кишварҳои узв дар бозиҳо ҳастанд тасмим гирифта шуд, ки панҷумин Бозиҳои ҳамбастагии исломӣ соли 2022 аз 9-18 август баргузор гардад.

Дар аввал қарор буд бозиҳо 20-29 августи соли 2021 баргузор гардад, вале пас аз онки моҳи марти соли 2020 бозиҳои олимпӣ дар Токио ба соли 2021 гузаронида шуд, санаи баргузории бозиҳои ҳамбастагии исломӣ дар Қуния 10-19 сентябри соли 2021 муайян шуд.

Ба барномаи панҷумин Бозиҳои ҳамбастагии исломӣ 20 намуди варзиш аз ҷумла: варзиши сабук, камонварӣ, бадминтон, баскетбол, 3×3 Бочче, велосипедронӣ, шамшербозӣ, футбол,  гимнастика, ҳендбол, ҷудо, карате, кингбоксинг, шиноварӣ, тениси рӯи миз, таэквандо (WT), волейбол, вазнабардорӣ, гуштини варзишӣ, камонварии анъанавӣ ворид гардидаанд.

Амрико дар садади эҷоди пойгоҳи низомӣ дар Осиёи Марказӣ аст

Аз ҷониби
shukhrat
-
0

Амрико бо наздик шудани замони хуруҷи нерӯҳояш аз Афғонистон дар ҷустуҷӯи маконҳои дигарест дар минтақа барои мустақар намудани пойгоҳҳои низомияш.

Ба гузориши “Аздо тв”, ба нақл аз хабаргузории “The Wall Street Journal”, Вашингтон рӯзи шанбе 8-уми май дар як изҳорот гуфт, ки Амрико барои ҷойгиркунии пойгоҳҳо ва таҷҳизоти низомияш баъд аз хуруҷ аз Афғонистон бо кишварҳои Осиёи Миёна ва Ховари Миёна вориди гуфтугӯ шудааст.

Ин расона менависад, ки бо афзоиши иқдомоти тадорукотӣ барои хуруҷи нерӯҳои Амрико аз Афғонистон, фармондеҳони артиши Амрико мехоҳанд пойгоҳҳое барои нерӯҳои низомӣ, паҳподҳо (ҳавопаймоҳои бидуни сарнишин), ҳавопаймоҳои бомбафкан ва тупхонаҳо барои ҳимояти давлати Афғонистон дар баробари Толибон ва дигар нерӯҳои даҳшатафкан дар мантақа дошта бошанд.

Ҳукумат ва мақомоти низомии Амрико гуфтаанд, гузинаҳои мавриди назари онҳо барои эҷоди пойгоҳ аз кишварҳои ҳамсояи Афғонистон то кишварҳои Халиҷи Форс, Имороти Муттаҳидаи Араб ва киштиҳои нерӯи дарёии Амрикоро дар бар мегирад.

Ба гуфтаи бархе аз мақомоти низомии ҳукумати Байден, беҳтарин гузина барои онҳо ин кишварҳои ҳамҷавори Афғонистон, Узбекистон ва Тоҷикистон мебошанд, ки бо он ҳамарз ҳастанд ва дастарасии сареъро барои онҳо фароҳам мекунад. Аммо ҳузури низомии Русия дар минтақа, нуфузи рӯ ба рушди Чин ва рақобат байни онҳо ва Вашингтон барномаҳои эҷоди пойгоҳои низомӣ дар Осиёи Марказиро печидаву душвор кардааст.

Як масъули амрикоӣ дар суҳбат бо “The Wall Street Journal” гуфтааст: “Баназар мерасад, ки масири тӯлонитареро бояд тай кунем ва ҳанӯз аввали роҳ аст”.

Ҳафтаи гузашта Зулмай Халилзод намояндаи вижаи Амрико дар умури Афғонистон ба Тоҷиктосн ва Узбекистон сафар дошт ва бо мақомоти ин ду кишвар дар мавриди сулҳи Афғонҳо гуфтугӯҳо анҷом дод.

Халилзод талош дорад, ки музокироти байни Афғони пеш аз 11 сентябр – торихи поёони хуруҷи нерӯҳои Амрико аз Афғонситон ба натиҷа бирасад, як масъули амирикоӣ, ки дар ин гуфтгӯҳо ҳузур доштааст, гуфт, мақомоти Тоҷикистон ва Узбекистон хоҳони густаригши ноамниҳо нестанд.

Дар ин гузориш омдааст, ки мақомоти Амрико то ҳанӯз пешниҳоди расмие ба кишварҳои Осиёи Марказӣ барои истиқрори нерӯҳояшон накардаанд, аммо Пентагон мувофиқон ва мухолифонро арзёбӣ дорад ва Вазорати хориҷаи Амрико ва Кохи Сафед низ дар ин тасмим шарик ҳастанд.

Дастёбӣ ба пойгоҳи низомӣ дар Осиёи Марказӣ Амрикоро ба мавқеияте, ки дар солҳои аввали ҷанги Афғонистон қарор дошт бармегардонад. Амрико ду пойгоҳ дар Осиёи Марказӣ дошт, яке дар Узбекистон ва дигаре дар Қирқизистон барои ҷанг дар Афғонистон аз ин пойгоҳо истифода мешуд. Аммо нерӯҳои армикоӣ зери фишори Русия ва Чин Узбекистонро соли 2005 ва Қирғизистонро як даҳа дертар тарк карданд ва инак дубора дар пайи дастёбӣ ба пойгоҳи наве дар минтақа мебошад.

Коршиносон бар ин назаранд, ки шонси кишвари Узбекистон барои ҷой додани нерӯҳои амрикоӣ аз Тоҷикистон бештар аст. Чун нуфузи Русия ва Чин ба Тоҷикистон ин шиносро камтар кардааст.

Коршиноси масоили сиёсӣ, Муҳаммадҷон Кабиров мегӯяд: “Амрико ҳамзамон бо берун кашидани нерӯҳояш аз Афғонистон барои идома ҳимоят аз ҳукумати ин кишвар дар баробари Толибон ва дигар нерӯҳои даҳшатафкан дар пайи эҷоди пойгоҳи низомӣ дар Осиёи Марказӣ мебошад.

Аз кишварҳои Осиёи Марказӣ ин потенсиал бештар дар Тоҷикистону Узбекистон бо сабаби ҳаммарз будан бо Афғонистон дида мешавад. Аммо дар ин авохири равобити низомӣ ва амниятии Тоҷикситон бо Эрон дар ҳоли густариш аст, чанде пеш вазири дифои Тоҷикистон Шералӣ Мирзо ба Эрон ба хотири таҳкими равобити қаблан сардшудаи ин ду кишвар сафар кард. Ва ҳамчунин авохири моҳи апрели соли ҷорӣ вазири дифои Русия Сергей Шайгу ба Тоҷикистон сафар дошт, ки зимни ин сафар Русия бо Тоҷикистон қарордоди эҷоди системаи падофанди ҳавоии ягонаро ба имзо расонд ва ин ба маънои он аст, ки дигар Русия масъули ҳимоят аз осомни Тоҷикистон мебошад, чун Тоҷикистон худ системаи падофанди ҳавоии қавие надорад.

Инчунин ҳузури пойгоҳи низомии Русия дар Тоҷикистон, ҳузури қавии низомӣ ва иқтисодии Чин дар ин кишвар ва низ пойбанд будани Тоҷикистон ба созишномаҳои низомӣ бо Русия дар Созмони СААД, ҳамаи инҳоро агар канори ҳам бичинем Тоҷикистон тақрибан шонсе надорад, ки пойгоҳи низомиеро дар ихтиёри Амрикоиҳо қарор бидиҳад.

Аммо Узбекистон аз вазъияти беҳтар ва муносибтаре бархурдор аст, чун он таҷрибаи ҳамкорӣ бо НАТО-ро дорад ва солҳои 2001 ва 2005 пойгоҳи низомии Амрико дар ин кишвар вуҷуд дошт ва ҳеҷ паймони низомӣ ва амниятиие бо Русия надорад, ки садди роҳаш шавад. Аз ин лиҳоз Узбекистон шонси бештаре дорад барои ҷой додани пойгоҳи низомии Амрико дар хоки худаш. Инҷо Қирғизистон ҳам истисно нест, вале ба ҳар сурат Узбекистон бахотири ҳамарзияш бо Афғонистон шонси бештар дорад”.

Ҳамзамон коршиноси умури кишварҳои собиқ Шӯравӣ,

ВКД дар тамоми нуқтаҳои фурӯши сӯзишвории кишвар санҷишро оғоз кард

Аз ҷониби
shukhrat
-
0

Баъд аз сӯхтор ва таркиши нуқтаи фурӯшӣ сӯзишвории “Эко-ойл” дар шаҳри Душанбе, ки боиси захмӣ шудани беш аз 10 нафар гардид, Вазорати корҳои дохилаи Тоҷикистон бо шумули корманодони мақомоти назорати давлатии бехатарӣ аз сӯхтор ва дигар мақомоти дахлдор гурӯҳи кории муштарак таъсис дода, санҷиши тамоми нуқтаҳои фурӯши сӯзишвории кишварро оғоз кардаанд.

ВКД зимни санҷиши аз нуқтаҳои сӯзишворӣ аз ҷой доштани мушкилот ва ҷавобгӯ набудан ба талаботи бехатарӣ аз сӯхторро дар чанд нуқта сабт карданд. Аз ҷумла дар хабар омада, “Нуқтаи фурӯши сӯзишвории Ҷамъияти дорои масъулияташ маҳдуди «Эҳсонҷон», воқеъ дар кӯчаи Ҷ.Расулов 16-и ноҳияи Синои шаҳри Душанбе, муайян карда шуд, ки аз ҷониби масъули он Муҳаммадҷон Шарипов ба таъмин ва риояи талаботи қоидаҳои бехатарӣ аз сӯхтор диққати зарурӣ дода намешавад”.

Ин нуқтаи фурӯши сӯзишвориро барои надоштани оташхоӯшкунак ва дигар олотҳои лозимии коршоям, инчунин ба сабаби дар зери зарфҳои гази моеъ миқдори зиёди партовҳои сӯзанда ҷой доштан, интиқоли нерӯи барқашро мақомот қатъ карда, нисбати роҳбари он парвандаи ҳуқуқвайронкунии маъмурӣ тартиб доданд.

Тибқи хабари ВКД ба ин монанд низ дар  Нуқтаи фурӯши сӯзишвории “Имон импорт экспорт”, воқеъ дар деҳаи Арбобхотуни ҷамоати деҳоти Чортеппаи ноҳияи Рӯдакӣ ва дар Нуқтаи фурӯши сӯзишвории “Ғайрат 82”, воқеъ дар деҳаи Ҷӯйбодоми ноҳияи Рӯдакӣ ва дар чанд нуқтаи дигар камбудиҳо ошкор шуда, нисбаташон парвандаҳои ҳуқуқвайронкунии маъмурӣ ҷарима тартиб дода шудааст.

Аммо то куҷо ин санҷишҳо метавонанд мушкилоти ҷойдоштаро бартараф созанд, коршиносон бар ин назаранд, ки аз баски сатҳи ришвар ва фасод дар Тоҷикистон хеле вусъат ёфтааст, бисёр душвор аст мушкилоти бехатарӣ дар нуқтаҳои сӯзишворӣ бартараф карда шавад.

Як коршинос, ки нахост номаш зикр шавад, дар суҳбат бо “Аздо тв” гуфт, “Агар ҳар камбудие дар кори тоҷирон дида шавад, бо додани пора он рӯпӯш карда мешавад. Ин мушкилӣ дар тамоми соҳаҳои кишвар вуҷуд дорад. Аз ин рӯ, ин санҷишҳо зоҳиран барои рафъи мушкилоти ҷойдошта роҳандозӣ шудаанд, аммо дар асл чандон корсоз нестанд”.

Имоми каллабур ба хотири ҷиноёти содиркардааш дар солҳои 90-ум дастгир шуд

Аз ҷониби
shukhrat
-
0

Сомонаи “Бомдод” бо такя ба манбааш дар ВКД нигошта, ки муфаттишони шӯъбаи кофтукови ҷиноёти махсусан вазнини Раёсати кофтукови ҷиноятии ВКД ахиран як силсила ҷиноятхои пурсарусадои солҳои ҷанги шаҳрвандиро ошкор кардааст.

ВКД-и Тоҷикистон ҷанганда (боевикхо)-и “Фронти халқӣ” бо раҳбарии Эмомиддин Исломович Муродов мулаққаб ба Эмоми “каллабур” сокини деҳаи Маданияти ҷамоати Сарвати Истиқлоли Кушониёнро, ки дар солҳои 90 дар водии Вахш бедодгарӣ мекарданд, боздошт карда аст.

Дар гузорише, ки шоми 5 май дар барномаи “Ахбори ВКД” нашр шуд гуфта мешавад, ки ҳамроҳи Эмоми каллабур бародари ӯ Муродов Нуриддин Исломович ва ҳамаслакаш Одинаев Саймуҳйиддин Пирмуҳаммадович дастгир шуданд.

Ба гуфтаи тафтишот, аъзои ин гурӯҳ моҳи феврали соли 1995 дар ҳудуди шаҳрҳои Каленинобод ва Қургонтеппа бо истифода аз силоҳ ба ғорати молу мулки сокинони осоишта даст задаанд. Аз ҷумла дар кучаи Айнии шаҳри Қургонтеппа Эмоми каллабур ду сокини ин шаҳр Ҷумъаназар Баротов ва Нуъмонҷон Абдураҳмоновро аз силоҳи автомати Калашников парронда аст, вале ҷабрдидаҳо бо вуҷуди ҷароҳатҳои вазнин бардоштанашон зинда мондаанд.

Ҳамчунин дар моҳи апрели соли 1994 Эмоми каллабур ҳамроҳи Тошев Исмоил Аҳмадович дар дидбонгоҳи Шаҳло кормандони милисаро аз автомати Калашников тирборон кардаанд, ки дар натиҷа чанд нафар маҷрӯҳ гардидаанд.

Моҳи июни соли 1995 дар маросими намози ҷанозаи Асоев Хайриддин, Эмоми каллабур ҳамроҳ бо ҳамаслакаш Исмоил Тошев фармондеҳи бригадаи таъиноти махсуси Вазорати дифои Тоҷикистон полковник Куганов Иззатуллоҳ Абдусамадович истиқоматкунандаи ноҳияи Бохтар (ҳоло Кушониён)-ро бо силоҳи автомати Калашников ба ҳалокат расониданд.

Иззатуллоҳ Куганов яке аз фармондеҳони ҷавон, вале пурнуфузи “Фронти халқӣ” дар водии Вахш ба шумор мерафт ва пас аз кушта шудани Файзалӣ Саидов ба ҷои ӯ фармондеҳи бригадаи таъиноти махсус таъйин гардид.

Иззатуллоҳ Куганов соли 1993 вақте ҳамагӣ 22 сол син дошт соҳиби рутбаи “полковник” шуда буд, ва соли 1995 дар сини 24 солагӣ вакили порлумон интихоб шуд. Ба иллати онки қонун интихоб ба порлумонро то синни 25 иҷоза намедод Иззатуллоҳ Куганов дар ҳуҷҷатҳояш соли таваллудашро ба 1969 иваз кард, вале Куганов, ки он даврон барои густариши қаламравӣ нуфуз дар водии Вахш бо полковник Маҳмуд Худойбердиев дасту панҷа нарм карда буд, ҳамагӣ пас аз чанд моҳ интихоб шуданаш ба вакилии порлумони кишвар кушта шуд.

Ба гуфтаи ВКД Эмоми каллабур ва ҳамаслаконаш боз дар чандин ҷинояти қатлу ғорат дар солҳои ҷанги шаҳрвандӣ, аз ҷумла дар суиқасд ба ҷони корманди милиса Маҷидов муттаҳам мешаванд.

Раҷаби Мирзо аз қатъи ҷамъоварии кумак ба осебдидагони Исфара хабар дод

Аз ҷониби
AZDA TV
-
0

Субҳи имрӯз 7 май рӯзноманигори шинохтаи тоҷик ва фаъоли ҷомеаи шаҳрвандӣ Раҷаби Мирзо аз қатъи ҷамъоварии маблағҳои хайравӣ барои кумак ба осебдидагони даргирии марзии шаҳри Исфара хабар дод.

Ӯ бо чанд ҷумлаи кӯтоҳ аз марудм хост, ки дигар ба он суратҳисобҳои гузошта шуда маблағ нагузаронанд. Аммо дар бораи чаро таваққуф кардани он чизе нагуфтааст. Танҳо навишта, ки тафсилот баъдтар шарҳ дода мешавад.

Хабари қатъи ҷамъоварии кумак аз ҷониби ин рӯзноманигор дар ҳолест, ки як гурӯҳ аз фаъолони ҷомеаи шаҳрвандӣ барои расондани кумакҳои мардум ба оилаи қурбониён ва онҳое, ки хонаҳояшон дар натиҷаи даргирии рӯзҳои 29 ва 30 апрел хароб шуд, кортҳои бонкӣ гузошта буданд. Аз ҷумла худи Раҷаби Мирзо.

Аммо дирӯз 6 май Вазорати корҳои дохилаи Тоҷикистон суратҳисобҳои худро гузошту аз мардум хост барои кумак ба мардуми Воруху Чоркӯҳ ва Хоҷаи Аъло ба онҳо маблағ гузаронанд ва ба онҳое, ки дар шабакаҳои иҷтимоӣ корт гузоштаанд, эътимод накунанд.

Корбарони шабакаҳои иҷтимоӣ дар пай қатъи ташаббуси ҷамъоварии кумакҳоро ба фишор ва таҳдиди мақомот марбут медонанд. Ба гуфтаи онҳо ҳамеша мақомоти Тоҷикистон пеши роҳи хайрхоҳонро гирифтаанд. Ҳатто ҳолатҳое низ вуҷуд дорад, ки бо баҳонаҳои тақаллубкорӣ ва фиреби мардум чунин шахсонро парванда боз карда ва ё ҷаримаҳои ҳангуфт бастаанд.

Қирғизистон 42 шаҳрванди Тоҷикистонро аз хокаш берун кард

Аз ҷониби
shukhrat
-
0

Мақомоти Тоҷикистон мегӯяд, Қирғизистон баъд аз задухӯрдҳо дар марз бо Тоҷикистон 42 шаҳрванди Тоҷикистонро аз қаламраваш рондааст. Дар ин бора Радиои Озодӣ хабар дод.

Бино ба иттилои ин расона, аксари рондашудаҳо қирғизтаборони ноҳияи Лахш (Ҷиргатол) ва донишҷӯ мебошанд.

Ҷониби Қирғизистон сабаби ихроҷи шаҳрвандони Тоҷикистон ва шахсони душаҳрвандиро расман шарҳ надодааст.

Ду донишҷӯи тоҷик, ки аз Қирғизистон ихроҷ шудаанд дар суҳбат ба Радиои Озодӣ гуфтанд, ки онҳоро барои бадтар шудани вазъи паҳншавии коронавирус ҷавоб доданд. Аммо яке аз онҳо дар идомаи суҳбат иброз дошт, ки соли гузашта вазъи паҳншавии коронавирус бадтар буд, аммо касе онҳоро берун накарда буд.

Ҳамчунин дар баробари ин хабар, расонаҳои қирғизӣ низ аз ихроҷи шаҳрвандони ин кишвар аз ноҳияи Лахш хабар доданд, вале мақомоти ноҳия онро рад карданд.

Eurasia Today, АкиПресс ва 24.kg хабар доданд, ки дар ноҳияи Лахш тафтиши шиноснома оғоз шудааст ва шаҳрвандони Қирғизистонро аз Тоҷикистон меронанд.

Дар ҳамин ҳол Вазорати корҳои дохилии Тоҷикистон гузоришҳои расонаҳои қирғизиро дар бораи ихроҷи қирғизҳои муқими минтақаи Лахш рад намуда, хабарҳои дар сайтҳои қирғизӣ нашршударо беэътимод ва ғайривоқеъӣ номид.

Президенти Қирғизистон “Головной”-ро навсозӣ мекунад

Аз ҷониби
shukhrat
-
0

Президенти Қирғизистон Содир Ҷабборов ҳангоми боздид аз Бодканд ба мақомоти дахлдори давлатӣ амр додааст, ки обанбори “Головной”-ро, ки сабаби сар задани задухӯрд дар марз бо Тоҷикистон шуд, навсозӣ кунанд. Дар ин бора хадамоти матбуоти Президенти Қирғизистон хабар дод.

“Пас аз сафар Президент ба мақомоти дахлдори давлатӣ дастур дод, ки ҳолати техникии обанборро навсозӣ кунанд”, – омадааст дар хабар.

Тибқи иттилои хадамоти матбуот, Ҷабборов дар ҷараёни сафараш ба вилояти Бодканд, ба ҷуз аз обанбор, аз полигони низомии Буҷум низ дидан карда, бо хизматчиёни ҳарбӣ суҳбат намудааст.

Президенти Қирғизистон дар ин суҳбаташ гуфтааст,  ки “давлат тамоми ӯҳдадориҳои иҷтимоии худро дар назди қувваҳои мусаллаҳ иҷро мекунад ва роҳбарияти кишвар минбаъд низ ба ҳалли масъалаҳои мавҷудаи сохторҳои қудратӣ диққати махсус медиҳад”.

Ҳамчунин тибқи иттилои хадамоти матбуот, Ҷабборов ҳангоми сафар ба вилояти Бодканд, барои сохтмони шаҳраки низомӣ дар вилояти Лейлек капсула гузошт.

1...646647648...802саҳифаи 647 аз 802