Додситони вилояти Суғд масъулони ҳукумати шаҳри Истаравшанро барои гирифтан ва азхудкардани 1 миллион сомонӣ муттаҳам кардааст. Дар ҳукумати шаҳри Истаравшан қазияро тасдиқ намуда иброз доштанд, ки дар замони собиқ раиси шаҳр Иноятзода сурат гирифтааст.

Бино ба иттилои Радиои Озодӣ, рӯзи 30 декбар Фурқат Хоҷазода Додситони вилояти Суғд дар нишасте дар шаҳри Хуҷанд гуфтааст, масъулони Ҳукумати шаҳри Истаравшан миқдори зиёди маблағро ҳангоми бозсозии қалъаи Муғ ба шахсе додаанд, ки ба сохтмон ва ширкати масъул рабт надошт.

Ба гуфтаи Хоҷазода “Ҳукумат барои бозсозии қалъа бо ширкати “Манора” ба маблағи 1,5 миллион сомонӣ шартнома баста буд. Аз он 532 ҳазор сомониашро супурда, 961 ҳазор сомонии дигарро ба шахсе бо насаби Каримов додаанд, ки ба ширкати “Манора” робитае надошт. Ба мудири ширкат Аюб Азимов зарари калони моддӣ расонданд”.

Дар ҳамин ҳол намояндагони ҳукумати шаҳри Истаравшан гуфтанд, баҳс бар сари 300 ҳазор сомонӣ аст, ки дар замони Иноятзода ба вуҷуд омадааст. Бобоҷон Сабуров, мудири шуъбаи сохтмони асосии ҳукумати Истаравшан, ба Радиои Озодӣ гуфтааст, шартнома замони раиси шаҳр будани Баҳром Иноятзода имзо шудааст.

Сабуров дар идома гуфтааст, “Маъмурони Палатаи ҳисобу Оҷонси зиддифасод омада, тафтиш карда буданд. Мо санадҳоро барои санҷиш ба додситонӣ фиристодем. Ду моҳ пеш барои бозпурсӣ ба додситонии Суғд даъват карданд ва чанд нафари дигарро низ пурсиданд”.

Вале Додситони вилояти Суғд, номи гумонбарони қазияро ошкор накардааст, танҳо гуфтааст, бар зидди онҳо бо гумони суистифода аз ваколатҳои мансабӣ ва исрофкорӣ парванда боз карданд.

Дилором Самиева ҳамсари Баҳром Иноятзода собиқ раиси шаҳри Кӯлоб дар назди бинои додгоҳи ин шаҳр ба хотири он ки чандест ба мулоқоти шавҳараш роҳ намеёбад, даст ба эътироз задааст.

Бино ба иттилои Радиои Озодӣ як манбаъ аз додгоҳи шаҳри Кӯлоб эътирози ҳамсари Иноятзодаро тасдиқ намуда гуфтааст:

“Дилором Самиева пас аз нисфирӯзии 30-юми декабр ба назди бинои додгоҳ   ҳудуди ним соат бо садои баланд дод зад. Фарёд мекашид, ки “маро ҳамроҳ бо шавҳарам зиндонӣ кунед, беинсофҳо”. Посбонҳо ӯро аз назди бино дур карданд”.

Наздикони Дилором Самиева ба Озодӣ гуфтаанд, баъд аз ин ҳодиса фишори ҳамсари Иноятзода баланд шуда, дору истеъмол намудааст ва ҳоло имкони суҳбат кардан надорад.

Ба гуфтаи Муҳаббат Иззатова, хоҳари Баҳром Иноятзода, аз моҳи июн то ба имрӯз ба онҳо иҷозаи мулоқот надодаанд. Ӯ мегӯяд:

“Охир, як бор бинем, ки ӯ чӣ ҳол дорад. Ҳамсараш ба ҷон омад ва имрӯз рафт. Мегӯянд, аз “боло” иҷозат нест. “Боло” кӣ аст? Мисли тӯби футбол шудаем, намедонем, додамонро ба кӣ бигӯем”.

Ёдовар мешавем, ки рӯзи 20-уми ноябри соли равон Баҳром Иноятзодаро 12 сол аз озодӣ маҳрум карданд. Ӯро аз руйи шаш моддаи қонуни ҷиноӣ, аз ҷумла суистифода аз ваколатҳои мансабӣ, гирифтани пора, аз худ кардани молу мулки ба зимааш гузошташуда ва ғайриқонунӣ додани қитъаи замин айбдор намуданд, ки худаш дар додгоҳ ҳукмашро ноодилона хонд.

Иноятзода баъд аз эълони ҳукмаш дар додгоҳ гуфта буд, ки “дар Тоҷикистон адолат нест, барои сохтани биноҳои Ҳукумат 12 сол додаанд, агар хонаамро обод мекардам, як гапи дигар буд”.

Собиқ сардори раёсати молияи шаҳри Панҷакент бо пардохти ҷарима, аз ҷониби Додгоҳ озод карда шуд.

Рӯзи 18 декабри соли равон, суди шаҳри Панҷакент Камолҷон Азимӣ, собиқ сардори раёсати молияи шаҳри Панҷакентро 232 ҳазор сомонӣ ҷарима карда, пас аз се моҳи боздошт аз толори суд озод намудааст.

Хабаргузории “Sputnik” аз қавли манбааш навишта, ки Камолҷон Азимӣ 21 сентябри соли равон аз ҷониби кормандони прокуратураи шаҳри Панҷакент боздошт ва 24 сентябр алайҳи ӯ аз рӯи моддаи 319, қисми 1 – Кодекси ҷиноятии Ҷумҳурии Тоҷикистон – гирифтани пора, парвандаи ҷиноӣ оғоз карда шуд.

Гуфта мешавад, ки Азимӣ Камолҷон Оқилзода, собиқ сардори раёсати молияи шаҳри Панҷакент тибқи як шартномаи тендерӣ ба суратҳисоби ширкати “Ободонии ватан” – и шаҳри Хуҷанд аз маблағҳои буҷетӣ 510 ҳазор сомонӣ интиқол дода, аз намояндаи ин ширкат Нозимов А. 31 ҳазор сомонӣ пора талаб кардааст.

“Ин маблағ барои харидорӣ кардани таҷҳизоти рентгении рақамӣ барои Маркази саломатии шаҳри Панҷакент, ки барои ташхиси бемории “вируси корона” ё COVID – 19 пешбинӣ шудааст, ҷудо шуда буд. Аммо сардори раёсати молия аз намояндаи ширкати “Ободонии ватан” талаб кардааст, ки як қисми маблағро ба ӯ диҳад”, – менависад “Sputnik” Тоҷикистон.

Бо вуҷуди таъсиси ниҳоди зидди фасод дар Тоҷикистон қариб, ки ҳар ҳафтаву ҳар моҳ чандин мансабдор бо гирифтани пора дастгир мешаванд ва ҳатто кормандони худи ниҳоди зидди фасод. Аммо то ҳол ин мушкилӣ ва фасодзадагӣ дар байни мансабдорон роҳи ҳалли худро наёфтааст.

Рустам Азизӣ, диншинос ва таҳлилгари тоҷик дар саҳифаи фейсбукиаш ба суолҳои “Аздо тв” дар мавриди бурду бохти фаъолияти солонаи ҳукумат ва мухолифон посух дод. Ба назари ӯ, фаъолият ва барномаҳои ҳукумат возеҳу равшан аст ва бо фаъолияти мухолифон қиёснашавандаанд.