Вазорати корҳои хориҷаи Тоҷикистон хабар медиҳад, шарҳвандое, ки мехостанд ба Ватан баргарданд, вале бо сабаби интишори вируси COVID – 19 дар Қазоқистон дармонда буданд, рӯзи 9-уми июл соли 2020 метавонанд ба Ватан баргарданд. Ба гуфтаи Вазорат ин парвоз бо ширкати ҳавоии “Сомон Эйр” анҷом хоҳад шуд.

“Вазорати корҳои хориҷӣ ба таваҷҷуҳи ҳамватанони муқими Қазоқистон мерасонад, ки ба мақсади баргардонидани шаҳрвандони кишвар тибқи дастури Ҳукумати Ҷумҳурии Тоҷикистон 9 июли 2020 танзими парвози махсуси ширкати ҳавопаймоии “Сомон Эйр” дар масири Душанбе-Алмато- Душанбе ба нақша гирифта шудааст”.

Шаҳрвандони Тоҷикистон ҷиҳати бақайдгирӣ ба намояндагиҳои дипломатӣ ва консулии кишвар дар Қазоқистон метавонанд муроҷиат кунанд.

Мушаххасоти намояндагиҳои Тоҷикистон дар Қазоқистон:

Сафорати Тоҷикистон дар Нур – Султон

Тел: +7 7172 24 09 29

E-mail: [email protected]

Консулгарии генералии Тоҷикистон дар Алмато

Тел: +77775883115

E-mail: [email protected]

Шумори зиёде аз шаҳрвандони Тоҷикистонро, ки ба далели баста будани марзҳо дар Қазоқистону Узбекистон дармонда буданд, ба кишвар овардаанд. Вазорати корҳои хориҷии Тоҷикистон дар баёнияи расмӣ гуфтааст, ки рӯзи 3-юми июл аз Қазоқистон 776 нафар баргаштанд. Аз Узбекистон дар ду рӯзи охир тақрибан 140 нафар тавассути гузаргоҳҳои “Дӯстӣ” ва “Фотеҳобод” вориди кишвар шудаанд.

Шаҳрвандони бандмондаи Тоҷикистонро дар Қазоқистон Созмони Ҷаҳонии Муҳоҷират дар ҳамкорӣ бо ЮНИСЕФ ва бо ёрии ҳукумати Норвегия овардааст. Оҷонсии “fergana” менависад гузаргоҳи “Жибек Жоли” дар ноҳияи Сариагаш, дар наздикии марзи Қазоқистону Узбекистон, моҳҳои ахир ҷойи таҷаммӯи садҳо шаҳрванди Тоҷикистон шудааст. Онҳо мехоҳанд, ба Ватан баргарданд.

Бо сабаби густариши бемории COVID-19 кишварҳои Осиёи Марказӣ сарҳадҳои худро бастаанд. Пештар шаҳрвандони бандмонда аз сабаби он ки ҷараёни интиқолашон ба Тоҷикистон ба сустӣ пеш меравад, хашмгин буданд ва аз вазъи ногувор шикоят доштанд. Рӯзи 3-юми июл дар гузаргоҳи “Жибек Жоли” дар ноҳияи Сариагаши вилояти Туркистон тақрибан ду ҳазор шаҳрванди Тоҷикистону Узбекистон дар як истгоҳи мусофирбарӣ ҷамъ омада буданд. Бархе аз муҳоҷирон ба хабарнигори бахши қазоқии Радиои Озодӣ гуфтанд, чанд рӯз инҷониб мунтазири иҷозаи расмии мақомот барои гузаштан аз сарҳад ҳастанд.

“Рӯзона ҳаво бисёр гарм аст, шабона сард. Ҷой намерасад. Дар рӯйи замин коғаз партофта мехобем. Пул надорем, ки хӯрок бихарем”, – гуфт яке аз муҳоҷирон.

Созмони Ҷаҳонии Муҳоҷират дар изҳороте рӯзи 3-юми июл гуфт, “кӯдакон ва модаронашон дар марз дар шароити тоқатфарсо бо дастрасии маҳдуд ба об, ғизо ва маводи беҳдоштӣ ва зери хатари гирифтор шудан ба COVID-19 муддате ба сар бурданд. Ба сабаби набудани паноҳгоҳ, муҳоҷирон дар зери ҳавои кушод ва гарм ба сар бурданд.”

Қаблан низ шаҳрвандони Тоҷикистон дар ҳамин гузаргоҳ банд монда буданд ва баъди тахминан ду моҳи азоби интизорӣ тавониста буданд вориди Ватан бишаванд. Дар оғоз ҳукумати Тоҷикистон ва худи Раҳмонов ҳеҷ иқдоме барои овардани онҳо накарданд ва баракс Раҳмон гуфта буд, афроде, ки дар берун аз кишваранд то рафъи пандемия  бояд мунтазир бошанд. Вале баъдтар бо сабабҳои муайян ҳукумат ночор шуд, ки ба овардани шаҳрвандон шурӯъ кунад.