Хона блог саҳифа 77

Ихроҷи беш аз 4 ҳазор муҳоҷир аз Русия

Аз ҷониби
AZDA-TV
-
0

Дар Русия амалиёти васеи “Нелегал-2025”, ки ба иддаои мақомоти ин кишвар ба ошкор ва пешгирии қонуншиканиҳо дар соҳаи муҳоҷират равона шуда буд, хотима ёфтааст.

Гуфта мешавад, марҳилаи аввали амалиёти васеи “Нелегал-2025” аз 16 то 25-уми июн ва дуюмаш аз 13 то 22-уми октябри соли ҷорӣ баргузор гардида, кормандони интизомӣ ва қудратии Русия ҳамроҳи гурӯҳҳои миллатгаро муҳоҷиронро дар ҷойи истиқомату кор, кӯчаву бозорҳо ва ҳатто толорҳои консерту варзишӣ тафтиш кардаанд.

Тибқи иттилои Раёсати корҳои дохилии вилояти Маскав, дар натиҷаи ин рейдҳо додгоҳҳо беш аз 4,3 ҳазор қарор дар бораи ихроҷи шаҳрвандони хориҷӣ аз ҳудуди Федератсияи Русияро содир кардаанд.

Дар ҷараёни ду марҳилаи рейд, кормандони пулис зиёда аз 15,7 ҳазор ҳуқуқвайронкуниҳои маъмуриро ошкор намуда, беш аз 10 ҳазор протокол барои вайрон кардани қоидаҳои будубош дар Русия ва 2,1 ҳазор барои фаъолияти ғайриқонунии шуғлӣ тартиб дода шудааст.

Ҳамчунин нисбат ба корфармонҳое, ки муҳоҷиронро ғайриқонунӣ ба кор ҷалб кардаанд, беш аз 1,6 ҳазор протоколи маъмурӣ тартиб дода шуда, 748 парвандаи ҷиноятӣ оғоз гардидааст, ки аз онҳо 430 барои ба қайдгирии сохта ва 235 барои қалбакӣ кардани ҳуҷҷатҳои муҳоҷиратӣ мебошанд.

Ин ҳам дар ҳолест, ки дар ҳашт моҳи соли 2025 Хадамоти федералии иҷрои қарорҳои додгоҳии Русия аллакай беш 35 ҳазор шаҳрванди хориҷӣ ва шахсони бешаҳрвандиро аз ин кишвар ихроҷ кардаанд. 

Ва то ҳол Вазорати корҳои дохилии Русия, ки ҳаққи бидуни қарори додгоҳ ихроҷ кардани шаҳрвандони хориҷиро дорад, омори ихроҷшудаҳо аз тамоми Русияро нашр накардааст. Аммо пештар иттилоъ дода буд, ки дар моҳҳои январ-сентябри соли ҷорӣ танҳо дар Маскав 7632 амалиёти махсуси тафтишу бозҷӯии муҳоҷиронро гузаронда, нисбат ба 1400 муҳоҷир қарор дар бораи ихроҷро содир кардааст.

AI: ИМА бояд масъалаи ҳуқуқи инсонро бо раҳбарони кишварҳои ОМ ба миён гузорад

Аз ҷониби
AZDA-TV
-
0

Дар арафаи саммити C5+1, ки Иёлоти Муттаҳидаи Амрико роҳбарони кишварҳои Осиёи Марказиро мизбонӣ мекунад, Amnesty International бо нашри изҳороте аз сиёсатмадорони амрикоӣ даъват намуд, то масъалаи риояи ҳуқуқи инсонро дар меҳвари гуфтугӯҳояшон қарор диҳанд.

Дар ин изҳорот, ки 5-уми ноябр нашр шудааст, гуфта мешавад, дар пасманзари рушди авторитаризм дар Осиёи Марказӣ саммити мазкур имкониятест барои баррасии саркӯби озодии ВАО ва фазои шаҳрвандӣ минтақа ва бояд Президенти ИМА Доналд Трамп роҳбарони Осиёи Марказиро даъват кунад, то ба рияои ҳуқуқи инсон рӯ оваранд.

Директори бахши Аврупо ва Осиёи Марказии Amnesty International USA Бен Линден бар ин бовар аст, ки саммит имконият ва озмоишест барои Иёлоти Муттаҳида, то нишон диҳад, ки метавонад нақши мусбат дар соҳаи ҳуқуқи инсон бозад ва интизорие, ки гӯё ин вохӯрӣ танҳо хусусияти тиҷоратӣ дорад, рад намояд.

Ба гуфтаи Amnesty International, дар саросари Осиёи Марказӣ саркӯби мухолифон ва маҳдуд кардани озодиҳои инсонӣ идома дошта, бо назорати сахт бар расонаҳо ва ҷомеаи шаҳрвандӣ, мақомот озодии баён ва ҷамъомадҳоро маҳдуд кардаанд ва садои рӯзноманигорон хомӯш шудаву созмонҳои ғайриҳукуматӣ маҷбуран баста шудаанд.

Дар ин изҳорот барои намуна аз поймол шудани ҳуқуқи инсон, ба 28 сол зиндон маҳкум шудани вакили мудофеъ Бузургмеҳр Ёров дар Тоҷикистон оварда шудааст.

Директори бахши Аврупо ва Осиёи Марказии Amnesty International ҳамчунин гуфтааст, ки агар президент Трамп мавзуи ҳуқуқи инсонро дар миён нагузорад, пас, бояд аъзои Конгресс аз роҳбарони Осиёи Марказӣ талаб кунанд, то 2 ҳамла ба ҷомеаи шаҳрвандиро бас кунанд.

Ба гуфтаи Линден, хомӯшӣ дар ин маврид ба маънои чароғи сабз нишон додан ба ҳукуматҳои минтақа аст, ки бидуни ҷазо дидан ба саркӯб идома диҳанд ва сиёсатмадорони амрикоӣ бояд мақомоти Осиёи Марказиро ба риояи ҳуқуқи башар ва эҷоди фазои мусоид барои кори озодонаи ҷомеаи маданӣ водор кунанд.

Ҳамчунин дар изҳорити ин созмони ҳуқуқӣ гуфта мешавад, ки ҳукуматҳои кишварҳои Осиёи Марказӣ мехоҳанд лоиҳаҳои истихроҷи маъданҳои муҳими стратегиро густариш диҳанд, ки ин мавриди таваҷҷуҳи маъмурияти Трамп қарор дорад ва бояд Конгресс назорати созишномаҳои эҳтимолии саммитро таъмин намуда, мақомоти давлатӣ бояд бо ҷомеаҳои маҳаллӣ машварат кунанд ва нигарониҳои онҳо дар бораи муҳитзист ва ҳуқуқи инсонро ба назар гиранд.

Ёдовар мешавем, ки 6-уми ноябри соли 2025 дар Вашингтон саммити C5+1 бо иштироки роҳбарони Қазоқистон, Қирғизистон, Тоҷикистон, Туркманистон, Узбекистон ва ИМА баргузор мегардад. Дар рӯзномаи он энергетика, сармоягузорӣ ба маъданҳои муҳими стратегӣ, роҳҳои тиҷоратӣ ва масъалаҳои амнияти минтақавӣ ҷой доранд.

Пеш аз Amnesty International созмонҳои ҳуқуқӣ ва гурӯҳе аз мухолифони тоҷик низ аз Амрико даъват карда буданд, ки дар мулоқоташ бо раҳбарони кишварҳои Осиёи Марказӣ мавзуи ҳуқуқи инсонро ба бахши калидии ин нишаст табдил диҳад.

Ҳамчунин аз Доналд Трамп, раисҷумҳури ИМА хоста буданд, ки дар мулоқот бо раҳбарони кишварҳои Осиёи Марказӣ масъалаи фишорҳо ва саркӯбиҳои сиёсӣ дар Тоҷикистонро матраҳ намуда, ба озод намудани фаврии зиндониёни сиёсӣ даъват кунад ва барои оғоз намудани муколамаи байналмилалӣ доир ба раванди сиёсати осоишта ва фарогир дар Тоҷикистон мусоидат намояд.

Аммо то ҳанӯз маъулум нест дар ин нишаст Доналд Трамп аз вазъи ҳуқуқи башар дар Осиёи Марказӣ хоҳад гуфт ё на.

Никоҳ дар пахши зинда дар Истаграм баҳсбарангез шуд

Аз ҷониби
Azda TV 3
-
0
Screenshot

Чанд рӯз аст, ки як ақди никоҳи ғайриоддӣ миёни як ҷавони тоҷик ва духтари рус дар шабакаҳои иҷтимоӣ сару садои зиёд ба вуҷуд овардааст.

Дар навори мазкур дида мешавад, ки ақди никоҳ дар пахши зинда ва бо ҳузури ду блогери тоҷик, аз ҷумла блогере, ки бо номи Ҳоҷи Маъруф дар шабакаҳои иҷтимоӣ шинохта мешавад, анҷом мегирад. Зохиран Ҳоҷӣ Маъруф дар ин маросим ҳамчун шоҳид иштирок мекунад.

Бисёре аз корбарон дар вокуниш ба ин навор навиштаанд, ки дар саҳеҳ будани чунин никоҳ аз нигоҳи шариати исломӣ шубҳа доранд. Дар пайи баҳсҳо, саволҳои зиёде матраҳ шуданд, аз ҷумла оё ақди никоҳ тавассути телефон ва ё пахши зинда қобили қабул ва муътабар аст?

То ба ҳол ниҳоди расмии мазҳабӣ дар Тоҷикистон, ба монанди Шӯрои уламои Маркази исломӣ, дар бораи ин ҳодиса изҳори назар накардааст. Аммо ба назари коршиносони динӣ, ин тарзи ақди никоҳ дуруст аст, вале бояд шартҳои никоҳ пурра иҷро шаванд.

Аммо мутахассисони улуми динӣ мегӯянд, агарчи ин тарзи никоҳ дуруст аст, вале аз баски никоҳ аз амалҳои бисёр муҳим ва бузург дар ҷомеа ва рушди наслҳо ба ҳисоб меравад, роиҷ шудани чунин амал боиси нодида гирифтан ва таҳқири аҳкоми шариат ва арзишҳои динӣ аз ҷониби ҷавонони камсавод мегардад. Ба гуфтаи онҳо, набояд аҳкоми шаръӣ мавриди масхара ва камбинӣ байни ҷавонон табдил шавад.

Конститутсия ба Эмомалӣ Раҳмон чӣ дод?

Аз ҷониби
AZDA.TV
-
0

Эмомалӣ Раҳмон, раисҷумҳури Тоҷикистон зимни паёми шодбошӣ ба Рӯзи Конститутсия гуфт, ки татбиқи меъёрҳои Конститутсия дар кишвар “суботи сиёсӣ ва ваҳдати миллӣ”-ро таъмин кардааст.

Рӯзи 6-уми ноябр ҳамасола ҳамчун Рӯзи Конститутсия дар кишвар таҷлил мешавад. Эмомлаӣ Раҳмон ҳар сол дар ин рӯз аз саҳми Сарқонуни ҷумҳурӣ нақл мекунад ва онро сабаби тамоми хубию хушӣ медонад. Оё дар воқеъ Сарқонуни кишвар суботу оромӣ ва рушди иқтисодиро барои ҳама баробар таъмин кард ё танҳо барои баъзе?

Раисҷумҳур зимни суханронии имрӯзааш гуфт, ки мақсади Кониститутсия “фароҳам овардани шароити зиндагии арзанда ва инкишофи озодона барои ҳар як инсон мебошад.” Ин ҳам дар ҳолест, ки беш аз ду миллион шаҳрванди нерӯи кории Тоҷикистон ба хориҷ аз кишвар сафар карда, дар орзуи зиндагии арзанда ва рушди шахсии хеш ва хонаводаашон дар сахттарин ҳолат ба сар мебаранд.

Эмомалӣ таъкид мекунад, ки маҳз бо амалӣ шудани меъёрҳои Конститутсия дар кишвар “фазои орому осуда, волоияти қонун ва тартиботи ҷамъиятӣ таъмин шуда, барои рушди бонизом ва устувори иқтисодиву иҷтимоии ҷомеа шароити мусоид муҳайё гардид.”

Аммо ба назари таҳлилгарон ва мунтақидони Ҳукумат, амалӣ шудани меъёрҳои Кониститутсия аз ҷониби мақомдорон ҷои суол дорад. Ба гуфтаи онҳо, агар меъёрҳои Кониститутсия дар кишвар амалӣ мешуд ва ба он эҳтиром гузошта мешуд, Эмомалӣ то ҳол раисҷумҳур боқӣ намемонд ва ё худро “подшоҳи якумра” эълон намекард.

Ба таъкиди коршиносон, Конститутсия бештар аз оне, ки дар хидмати халқ бошаду амният ва суботи иҷтимоиву иқтисодии мардумро таъмин кунад, дар хидмати худи Эмомалӣ ва хонаводааш аст. Барои ӯ ва хешу табори дуру наздикаш ҳам фазои амнияту оромӣ ва ҳам шароити хеле хуби рушди шахсӣ ва иқтисодиро ба дараҷаи аъло таъмин кардааст. Вале садҳо ҳазор аҳолии оддӣ аз зиндагии оддӣ маҳрум, ҳуқуқҳояшон поймол ва обрӯяшон ҳифз намешаваду маҷбур хоки Ватани худро тарк мекунанд.

Раисҷумҳури кишвар ҳамчунин меафзояд, ки татбиқи Конститутсия дар кишвар “суботи сиёсӣ, ваҳдати миллӣ, қонунияту тартибот”-ро ба вуҷуд овардааст. Ин ҳам дар ҳолест, ки ҳукумати ташкилкардаи Эмомалӣ даҳҳо дигарандеш, рӯзноманигорон, мухолифони сиёсии худро ба хотири хомӯш кунондани онҳо равонаи зиндон кард ва ҳатто баъзе мухолифони сиёсии худро барои як умр аз озодӣ маҳрум сохт.

Таъмини ҳуқуқҳои оддии шаҳрвнадон, озодии баён, муҳоҷирти аҳолӣ ба кишварҳои дигар, фирори мағзҳо, набуди барқу шароити бади тандурустӣ, ришварву фасод дар вазорату идораҳо, вазъи асафбори артишу сарбозшикор аз мушкилоте ҳастанд, ки ҳамеша мухолифони сиёсӣ, равшанфикрон, рӯзноманигорони мустақил ва фаъолони ҷомеа ҳалли онҳоро матраҳ мекарданд, вале худи онҳо барои солҳои тӯлонӣ равонаи зиндон шуданд ва садояшон мувофиқи ҳамин “Конуститутсияи” сохтаи Эмомалӣ хомӯш кунонида шуд.

Вазорати дифоъ: Навори “бурдани маҷбурии домод ба хидмати ҳарбӣ” шӯхи буд

Аз ҷониби
Azda TV 3
-
0

Муаллифони навори “бурдани як ҷавон ба артиш дар рӯзи тӯяш”, дар шароити номаълум иқрор карданд, ки он воқеият надошт ва ҳадафашон шӯхӣ буд.

Вазорати дифои Тоҷикистон дар вокуниш ба он навори паҳншуда дар шабакаҳои иҷтимоӣ гуфт, ки “ин ҳодиса ба хидмати артиш рабт надорад ва танҳо шӯхии бемаврид будааст.”

Муаллифи навор Сайдалӣ Сайдалиев тасдиқ кардааст, ки онро бо мақсади шӯхӣ ва ба даст овардани маблағ аз шабакаҳои иҷтимоӣ сабт ва нашр кардааст. Домод, Султон Сайдалиев низ гуфтааст, ки ҷӯраҳояш бо мақсади шӯхӣ ва маслиҳати пешакӣ ӯро маҷбуран ба мошин савор карда ва ин наворро сабт карданд.

Дар пайи ин ҳодиса, чор нафар рафиқони домод барои “кирдорҳои зиддиҳуқуқӣ ва паст задани шаъну шараф”-и домод дастгир ва ба муҳлати 10 шабонарӯз ҳабс шудаанд. Нисбати Сайдалӣ Сайдалиев маводҳои санҷишӣ тартиб дода шуда, чораҳо барои оғози парвандаи ҷиноятӣ андешида мешаванд.

Нашри ин навор дар шабакаҳои иҷтимоӣ боиси баҳсҳо гардида, мақомот таъкид кардаанд, ки нақшаи даъвати тирамоҳии ҷавонон ба артиш дар Хатлон ва тамоми кишвар бо сатҳи баланд иҷро гардидааст.

Ёдовар мешавем, ки чанде пеш низ мақомот бо таври иҷборӣ ҷалб кардани як ҷавон ба аратиш дар шаҳри Кӯлобро рад карда, паҳншавии хабар дар бораи “облава”-ро бо фурӯши маводи нашъаовар рабт дода буданд, ки суолҳои зиёдеро миёни корбарони шабакаҳои иҷтимоӣ ба бор оварда буд.

Шойгу: Хатари нуфузи террористон аз Афғонистон ба кишварҳои минтақа ҳанӯз боқӣ аст

Аз ҷониби
Azda TV 3
-
0

Дар нишасти ахири котибони Шӯрои амнияти кишварҳои Иттиҳоди Давлатҳои Мустақил (ИДМ) ҳушдор доданд, ки ҳанӯз хатари ҳамлаи террористӣ аз Афғонистон ба кишварҳои ҳамсоя боқист.

Сергей Шойгу, котиби Шӯрои амнияти Русия дар робита ба таҳкими марзҳо ҳушдор дод, ки “таҳдиди ворид шудани гурӯҳҳои террористӣ ва ифротгароён аз қаламрави Афғонистон ба кишварҳои Осиёи Марказӣ то ҳол аз байн нарафтааст.” Ба гуфтаи ӯ, таҳкими амнияти марзи Тоҷикистону Афғонистон яке аз омилҳои калидӣ дар таъмини суботи тамоми минтақа мебшад.

Ин ҳушдорҳои Шойгу рӯзи чоршанбеи 5-уми ноябр дар ҷаласаи котибони Шӯрои амнияти кишварҳои Иттиҳоди Давлатҳои Мустақил (ИДМ) дар Маскав садо дод. Ӯ гуфт, ки хатари густариши гурӯҳҳои мусаллаҳи террористӣ ва ифротӣ аз Афғонистон на танҳо ба кишварҳои Осиёи Марказӣ, балки ба тамоми кишварҳои узви Созмони Паймони Амнияти Дастаҷамъӣ (СПАД) таҳдид мекуқнад.

Ӯ ҳамчунин афзуд, ки ҳамкориҳои муштараки кишварҳои минтақа дар мубориза бо қочоқи маводи мухаддир аҳамияти хосса доарнд. Ба гуфтаи Шойгу, роҳандозии барномаи мақсадноки байнидавлатӣ барои таҳкими марзи Тоҷикистону Афғонистон, ки имсол амалӣ мегардад, як қадами муҳим дар самти таъмини амният ба шумор меравад. Вай ҳамчунин таъкид намуд, ки ҷалби Афғонистон ба равандҳои иқтисодии минтақавӣ метавонад ба суботу амният мусоидат кунад.

Бар асоси ин барнома, кишварҳои узви СПАД уҳдадоранд, ки манбаъҳои заруриро барои тақвияти муҳофизати марзи Тоҷикистону Афғонистон ҷудо намоянд.

Кишварҳои узви СПАД дар чанд соли охир борҳо аз афзоиши эҳтимоли ифротгароӣ ва нуфузи гурӯҳҳои тундрав аз Афғонистон ба Осиёи Марказӣ изҳори нигаронӣ кардаанд. Вале, ҳамзамон талош доранд муносибатҳои дипломатики худро бо Толибон ба роҳ андозанд.

Бояд зикр кард, ки моҳи сентябри соли ҷорӣ Шойгу изҳор дошта буд, ки дар қаламрави таҳти назорати Толибон беш аз 23 ҳазор ҷангҷӯи гурӯҳҳои террористии байналмилалӣ ҳузур доранд, ки ин таҳдиди ҷиддӣ ба амнияти минтақа ва ҷаҳон ба ҳисоб меравад.

Эмомалӣ Раҳмон назди Доналд Трамп рафт

Аз ҷониби
AZDA-TV
-
0

Раисҷумҳури худкомаи Тоҷикистон Эмомалӣ Раҳмон аз Давҳаи Қатар ба Вашинготони ИМА сафар кард.

Сафари Раҳмонов имрӯз, 5-уми ноябр бо даъвати раисҷумҳури Амрико Доналд Трамп сурат гирифтааст. Ӯ 6-уми ноябр дар нишасти сарони давлатҳои “Осиёи Марказӣ – ИМА”, ки бо раҳбарии Доналд Трамп баргузор мешавад, иштирок хоҳад кард.

Ин бори дуюм аст, ки нишасти махсуси кишварҳои Осиёи Марказӣ бо Амрико баргузор мегардад.

Нишасти аввал соли 2023 дар ҳошияи ҷаласаи Маҷмаи умумии Созмони милали муттаҳид дар Ню-Йорк бо ҳузури Ҷо Байден, раисҷумҳури собиқи Амрико ва раисҷумҳурони кишварҳои Осиёи Марказӣ баргузор шуда буд.

Ҳадаф аз ин нишаст дар қолаби “C5+1”, тақвият ва густариши ҳамкориҳои дипломатӣ ва иқтисодии Амрико бо кишварҳои Осиёи Марказӣ гуфта мешавад ва маълум нест, ки дар ин нишаст вазъи ҳуқуқи башар, ки дар ин минтақа хеле бад арзёбӣ мешавад, баррасӣ хоҳад шуд ё на.

Аммо пеш аз ин нишаст созмонҳои ҳуқуқӣ ва гурӯҳе аз мухолифони тоҷик аз Амрико даъват карда буданд, ки дар мулоқоташ бо раҳбарони кишварҳои Осиёи Марказӣ (C5+1) мавзуи ҳуқуқи инсонро ба бахши калидии ин нишаст табдил диҳад.

Ҳамчунин аз Доналд Трамп, раисҷумҳури ИМА хоста буданд, ки дар мулоқот бо раҳбарони кишварҳои Осиёи Марказӣ масъалаи фишорҳо ва саркӯбиҳои сиёсӣ дар Тоҷикистонро матраҳ намуда, ба озод намудани фаврии зиндониёни сиёсӣ даъват кунад ва барои оғоз намудани муколамаи байналмилалӣ доир ба раванди сиёсати осоишта ва фарогир дар Тоҷикистон мусоидат намояд.


Дар Ню-Йорк аввалин бор як мусалмон шаҳрдор интихоб шуд

Аз ҷониби
AZDA.TV
-
0

Дар интихоботи дирӯзаи шаҳрдории Ню-Йорк ҷавони 34-солаи мусалмон Зуҳрон Мамадонӣ барандаи интихобот шуд.

Ба гуфтаи расонаҳо, дар таърихи Амрико ин бори аввал аст як мусалмон дар бузургтарин шаҳри Амрико – шаҳри Ню-Йорк ҳоким интихоб мешавад.

Пас аз бастани сандуқҳои интихоботӣ ва шумориши овозҳо Мамадонии 34-сола дар баробари дигар номзадҳо, аз ҷумла номзади ҳизби ҳоким, шаҳрдори собиқи Ню-Йорк ва як номзади мустақил пешӣ гирифт ва 50,4% овозҳоро ба даст овардааст.

Дар интихоботи ҳокимони штатҳои бузурги Амрико, Мамадонӣ номзад аз Ҳизби демократӣ дар Ню-Йорк ва инчунин ду номзади дигари демократҳо дар штатҳои Вирҷиния ва Ню-Ҷерси баранда шуданд.

Зуҳрон Мамадонӣ, ба хотири ҳимояташ аз Ғазза ва интиқодоташ аз Исроил хеле мавриди таваҷҷуҳи расонаҳо қарор гирифта буд. Ӯ борҳо гуфта буд, ки агар дар интихобот пирӯз шавад, намегузорад Натанёҳу ба Ню-Йорк биёяд ва агар омад, боздошташ хоҳад кард.

Мамадонӣ пас аз эълони пирӯзияш шоми дирӯз дар назди ҳаводоронаш суханронӣ намуда, гуфт, ки дар моҳи январ барои ин мансаб ба ҳайси шаҳрдори нав қасам ёд мекунад ва ба кор шуруъ хоҳад кард. Ӯ зимни суханронияш таъкид кард, ки Ню-Йорк шаҳри муҳоҷирон буд ва боқӣ хоҳад монд.

Ӯ зимни хитоб ба ҳаводоронаш ишора кард, ки “Шумо ба ман ба хотири тағйир додани вазъ ва эҷоди сиёсати нав фурсат додед.” Ҳамчунин таъкид кард, ки вазъи иҷтимоӣ ва иқтисодии Ню-Йоркро аз ҳоло беҳтар хоҳад кард. Ӯ аз тамоми коргарон аз ҳар қавму миллате, ки ҳастанд ва дар Ню-Йорк кор мекунанд, изҳори сипос кард.

Мамадониро зодаи шаҳри Кампалаи пойтахти Уганда медонанд, ки дар хурдияш ҳамроҳи падару модараш ба Амрико муҳоҷират кардааст. Падараш Маҳмуд Мамадонӣ, аз устодони барҷастаи улуми сиёсӣ ва ҷомеашиносӣ дар Донишгоҳи Колумбия аст ва модараш Мера Ноир филмсоз аст.

Дар бораи дидгоҳи мазҳабии Мамадонӣ ва хонаводааш иттилооти кам дастрас аст, вале гуфта мешавад, падари ӯ аз аҳли Гаҷароти Ҳинд аст, ки умдатан мусалмонони шиаи дувоздаҳимома ҳастанд. Модари ӯ низ аз хонаводаи ҳинду аз иёлати Панҷоб аст.

Талаби HRW аз Доналд Трамп: Саркӯбҳо дар ОМ дар ҳоли афзоиш аст

Аз ҷониби
AZDA-TV
-
0

Созмони Human Rights Watch (HRW) аз Амрико талаб намудааст, ки дар мулоқоташ бо раҳбарони кишварҳои Осиёи Марказӣ (C5+1) мавзуи ҳуқуқи инсонро ба бахши калидии ин нишаст табдил диҳад.

Ба гуфтаи ин созмон, саркӯбҳои густарда дар тамоми кишварҳои Осиёи Марказӣ, бахусус дар Тоҷикистон дар ҳоли афзудан аст.

HRW дар изҳороташ, ки 3-уми ноябр нашр шуд, мегӯяд, ки вазъи ҳуқуқи инсон дар минтақаи Осиёи Марказӣ рӯ ба бадшавӣ дорад, аммо дар Тоҷикистон сатҳи саркӯбгарӣ махсусан баланд буда, ҳукумат фишорро болои ҷомеаи шаҳрвандӣ, расонаҳои мустақил ва мухолифон шадидан афзоиш додааст.

Ба иттилои ин созмони ҳомии ҳуқуқ, мақомот садҳо созмони ғайриҳукуматиро баста, даҳҳо рӯзноманигор, блогер ва шахсиятҳои ҷамъиятиро боздошт ва ҳизбу ҳаракатҳои мухолиф, аз ҷумла Ҳизби наҳзати исломии Тоҷикистон (ҲНИТ) ва «Гурӯҳи 24», мамнуъ эълон кардаву аъзои онҳоро бо иттиҳомҳои сиёсӣ ба муҳлатҳои тӯлонӣ равонаи зиндонӣ шудаанд.

HRW инчунин аз вазъ дар Вилояти Мухтори Кӯҳистони Бадахшон, ки пас аз эътирозҳои солҳои 2021–2022 мақомоти кишвар амалиётҳои саркӯбгарона анҷом додаанд, изҳори нигаронӣ карда, таъкид кардааст, ки дар соли 2025 панҷ маҳбуси помирӣ, ки дар пайи ин таъқибҳо боздошт шуда буданд, дар зиндон фавтидаанд.

Ҳю Уилямсон, раҳбари бахши Аврупо ва Осиёи Марказии HRW гуфтааст, ки “Равандҳои ислоҳоти иқтисодӣ ва иҷтимоӣ дар Осиёи Марказӣ сазовори дастгирии байналмилалӣ мебошанд, аммо онҳо бояд бар пояи эҳтиром ба ҳуқуқи инсон ва волоияти қонун асос ёбанд, то қонуният ва эътибор дошта бошанд. ин ягона роҳест, ки 82 миллион сокини минтақа метавонанд воқеан аз ҳар гуна тавофуқоте, ки роҳбаронашон дар Вашингтон ба даст меоранд, баҳра баранд”.

Пештар аз ин гуруҳе аз мухолифони тоҷик бо навиштани номае аз Доналд Трамп, раисҷумҳури ИМА хоста буданд, ки дар мулоқот бо раҳбарони кишварҳои Осиёи Марказӣ масъалаи фишорҳо ва саркӯбиҳои сиёсӣ дар Тоҷикистонро матраҳ намуда, ба озод намудани фаврии зиндониёни сиёсӣ даъват кунад ва барои оғоз намудани муколамаи байналмилалӣ доир ба раванди сиёсати осоишта ва фарогир дар Тоҷикистон мусоидат намояд.

Гуфта мешавад, ин нишаст, ки 6-уми ноябр дар Вашингтон таҳти раёсати президенти ИМА Доналд Трамп баргузор мешавад, роҳбарони Қазоқистон, Қирғизистон, Узбекистон, Тоҷикистон ва Туркманистонро гирд меорад.

Қаблан Департаменти давлатии ИМА аз вайронкуниҳои ҷиддии ҳуқуқи инсон, аз ҷумда шиканҷа, боздоштҳои худсарона ва набудани мустақилияти низоми судӣ дар Осиёи Марказӣ, бахусус Тоҷикистон гузориш дода буд.

Рӯзи тӯяш домодро аз ҳавлӣ ва аз бари арӯсаш “Облава” бурд

Аз ҷониби
AZDA.TV
-
0

Наворе дар шабакаҳои иҷтимоӣ нашр шуда, ки гуфта мешавад, маъмурони комиссарияти ҳарбӣ як ҷавонро маҷбуран аз дохили мошин ва аз бари арӯсаш ба хидмати ҳарбӣ мебаранд.

Дар шабакаҳои иҷтимоӣ дар мавриди ин навор навиштаанд, ки ҳодиса рӯзи 2-юми ноябр дар ноҳияи Мир Саид Алии Ҳамадонии вилояти Хатлон рух додааст. Зӯран бурдани домод ба хидмати ҳарбӣ рӯзи тӯйи арӯсияш, ҳангоми баргаштан аз хонаи арӯс ва ворид шудан ба хонаи домод сурат гирифтааст.

Гуфта мешавад, баъд аз “Облава” шудани писар ва бурдани ӯ, модараш ба сакта дучор шуда, вазъи саломатияш вахим арзёбӣ мешавад.

То ҳанӯз дар мавриди ҷузъиёти ҳодиса иттилои расмие вуҷуд надорад. Аммо ин бори аввал нест, ки кормандони ҳарбӣ бо шиддат ва дар ҳолатҳои хос ба хонаи мардум ҳуҷум карда, писаронро ба артиш мебаранд.

Ин ҳам дар ҳолест, ки 2-уми октябр расонаҳои ҳукуматӣ аз иҷрои пурраи нақшаи даъват дар 9 ноҳияи вилояти Хатлон, аз ҷумла Фархор, Ховалинг, Левакант, Бохтар, Норак, Хуросон, Данғара, Муъминобод, Дӯстӣ ва Ҷамоатҳои деҳоти Ворух ва Чоркӯҳи шаҳри Исфара хабар дода буданд.

Ёдовар мешавем, ки даъвати тирамоҳӣ ба артиш аз 1-уми октябр оғоз шуда, то 30-уми ноябри соли ҷорӣ идома хоҳад кард ва ҷавононе, ки солҳои таваллудашон 1998-2007 мебошад, ба артиш бурда мешаванд.  

Мақомоти кишвар пурра иҷро шудани нақшаро дар минтақаҳои гуногуни кишвар дар рӯзҳои аввал ба зиёд шудани шумораи ҷавонони ихтиёрӣ ва ба корҳои фаҳмондадиҳии комиссияҳои даъватӣ рабт медиҳанд.

Аммо хабару гузоришҳо аз дохили кишвар акси гуфтаҳои мақомотро нишон дода, дар рӯзи аввали оғози давъвати тирамоҳӣ ҳадди ақал ду навори ҷалби иҷбории ҷавонон ба артиш нашр шуда буд.

Қаблан сокинон аз рафтори хашини маъмурони комиссариятҳои ҳарбӣ шикоят мекарданд. Ҳатто ҳолатҳое буда, ки мақомот барқи сокинонро дар баъзе деҳаҳо пурра қатъ карда ва бар ивази додани барқ сарбоз ё пул талаб кардаанд.

Инчунин гуфта мешавад, мақомот аз роҳҳои дигар низ, ба мисли додани ҳуҷҷати ронандагӣ бар иваз хидмат ва асир гирифтани наздикони сарбозон, истифода бурда истодаанд.

Ба назари таҳлилгарони маҳаллӣ, яке аз сабабҳои гурезон шудани ҷавонон аз хидмати низомӣ дар сафи Қувваҳои мусаллаҳи кишвар, ин бадрафторӣ бо сарбозон ва кушта шудани ҷавонон бар асари латтукӯб дар қимсҳои низомӣ гуфта мешавад.

Ва мақомоти Тоҷикистон барои пур кардани сафи артиши кишвар аз усули “облава” ё ҳамон сарбозшикор истифода намуда, ҷавононро аз хонаву кӯчаҳо ва ҳатто донишҷӯёнро аз назди донишгоҳҳо ва баъзе нафарони бемору маъюбро низ боздошт карда, зӯран ба артиш мебаранд.

Чанд соли охир масъулони Вазорати дифои кишвар ғайричашмдошт вуҷуди мушкилотро дар ростои хидмати артиш ва “облава” эътироф карда, аз зердастони худ хоста буданд, ки зимни даъвати тирамоҳии ҷавонон ба артиш даст ба қонуншиканӣ назананд.

Аммо коршиносон бар ин назаранд, ки то дар системаи Вазорати дифоъ тағйироти куллӣ сурат нагирад, бо дастуру супоришҳо ин мушкилот бартараф нахоҳанд шуд.

1...767778...785саҳифаи 77 аз 785