14.9 C
Dushanbe

Собиқ мудири маорифи Панҷ дар ҳамкорӣ бо ҲНИТ айбдор мешавад. ҲНИТ рад кард

Собиқ мудири маорифи ноҳияи Панҷ Мавлуда Боймуродзода ҳамроҳ бо чанд корманди давлатии дигар дар ҳамкорӣ бо Ҳизби наҳзати исломии Тоҷикистон айбдор мешаванд. Аммо ҲНИТ ин иттиҳомро рад карда, онро сохтаи дасти мақомот хонд.

Мурофиаи додгоҳии собиқ мудири маорифи ноҳияи Панҷ Мавлуда Боймуродзода, наворбардор – ҳамкори ТВ “Ҷаҳонамо” дар ноҳияи Панҷ Абдураҳмон Изатуллозода, собиқ корманди идораи беҳдошти замин ва обёрии ноҳия Ҷалол Зоидов ва як шаҳрванди дигар Мамед Шералиев, ки барои ҳамкорӣ ва ирсоли наворҳои чорабиниҳои ноҳия ба намояндаҳои ҲНИТ гумонбар дониста мешаванд, оғоз ёфтааст.  

Бино ба иттилои “Asia Plus”, мурофиаи додгоҳӣ таҳти раисии судяи Суди вилояти Хатлон Аҳлиддин Назарзода ҷараён дошта, Мавлуда Боймуродзода бо моддаи 307 қисми 2 (Даъвати оммавӣ барои амалӣ намудани фаъолияти экстремистӣ (ифротгароӣ) ва сафедкунии оммавии экстремизм) ва 346 (Дидаю дониста расонидани  хабари бардурўғ) Кодекси ҷиноии Ҷумҳурии Тоҷикистон айбдор дониста мешавад. Маълум нест дигар нафарон, ки бо собиқ мудири маориф ба курсии айбдорӣ нишастаанд, ба кадом моддаҳо гумонбар дониста мешаванд.

Аммо мақомот ҳамаи ин нафаронро барои ирсоли наворҳои чорабиниҳои ноҳия ба намояндаҳои ҲНИТ айбдор медонанд.

Аз Суди вилоят гуфтанд, ки судшавандаҳо қисман худро гунаҳгор меҳисобанд, аммо Нурулло Маҷидов, адвокати Мавлуда Боймуродзода дар як суҳбати телефонӣ ба “Asia Plus” гуфтааст, ки зерҳимояаш худро гунаҳгор намеҳисобад.

Дар ҳамин ҳол Бобоҷон Қаюмов, сухангӯи ҲНИТ дар суҳбат ба Azda TV гуфт, ки ҲНИТ дар дохили Тоҷикистон фаъолият надорад ва ин афрод бо Наҳзат ва намояндаҳои он ҳеҷ робитае надоштаанд ва ин иттиҳомот сохта мебошанд.

“Аслан туҳмат задан ва иттиҳом бастан ба дигарон яке аз шеваҳои кори мақомоти Тоҷикистон аст. Ва ҳама медонанд, ки имрӯз агар як нафар ё як гурӯҳ хоҳанд, ки бо гурӯҳи дигар тасвия ҳисоб кунанд, аз чунин иттиҳомот истифода мекунанд. Ҳеҷ санаду далиле, ки ин афрод бо ҲНИТ ҳамкорӣ доштанд, вуҷуд надорад. Зеро ҲНИТ дар дохили кишвар фаъолият надорад”- гуфт Бобоҷон Қаюмов.

Ба гуфтаи Бобоҷон Қаюмов, “Ҳукумат дар арафаи додгоҳи Русия, ки қарор аст рӯзи 14-уми сентябр баргузор шавад ва ҳукми ниҳоиро дар бораи террористӣ эълон кардан ё накардани ҲНИТ содир кунад, мехоҳад ба ҳамин қазия обу ранг диҳанд ва ба шакле дубора ин қазияро доғ намуда, бори дигар қазияи ҲНИТ-ро бар сари забонҳо оранд”.

Ба гуфтаи сухангӯи ҲНИТ, айбдор кардани мардум дар ҳамкорӣ ба ҲНИТ дар байни мақомоти кишвар ба як анъана табдил ёфтааст ва ин метавонад як навъ қасосгирии мақомот аз ҳамдигар бошад, яъне касеро аз майдон дур карданӣ шаванд, аз ин роҳ истифода мекунанд.

Ёдовар мешавем, ки 26-уми июли соли ҷорӣ Игор Краснов, додситони кулли Русия дар мулоқот бо Эмомалӣ Раҳмон изҳор дошта буд, ки Додситонии кулли Федератсияи Русия бо дархосте ба додгоҳ муроҷиат кардааст, ки ҲНИТ дар қаламрави Русия ташкилоти “террористӣ” шинохта шавад. Ва Додгоҳи олии Русия рӯзи 14 сентябр дар ҷаласаи навбатияш ин дархостро баррасӣ мекунад.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Тоҷикистон шомили кишварҳои олудатарини ҷаҳон шуд

Созмони швейтсариягии IQAir, ки сифатнокии ҳаворо дар кишварҳои ҷаҳон таҳқиқ мекунад, дар гузориши тозааш Тоҷикистонро шомили кишварҳои олудатарини дунё кардааст.

Шикояти муҳоҷирони тоҷик дар Русия аз боздошту шиканҷа

Пас аз ҳодисаи ҳамла ба бинои "Крокус Сити Ҳолл" дар Маскав муҳоҷирони тоҷик аз ҷониби пулис ва ҳатто мардуми оддӣ мавриди ҳамлаҳои лафзӣ ва ҷисмӣ қарор гирифтаанд.

Ҳабси пешакии гумонбарон дар ҳамлаи хунини Русия

Пас аз ҳодисаи ҳамла ба бинои "Крокус Сити Ҳоле" дар Маскав муҳоҷирони тоҷик аз ҷониби пулис ва ҳатто мардуми оддӣ мавриди ҳамлаҳои лафзӣ ва ҷисмӣ қарор гирифтаанд.

Баррасии ҳамкориҳои Тоҷикистону Туркия

Мақомоти баландпояи Тоҷикистон ва Туркия дар бораи ҳамкориҳои худ ва аз он ҷумла дар бораи масоили амниятӣ суҳбат карданд.