Тоҷикистон дар соли 2024 ба ҳаҷми 9.49 миллиард сомонӣ (муодили 871.6 миллион доллар) дар соҳаҳои воридоти таҷҳизоти технологӣ, истеҳсоли маҳсулоту таъсиси корхонаҳои нав сармоягузорӣ кардааст.
Гуфта мешавад, ин маблағҳо аз сармояҳои хориҷӣ ва дохилӣ пардохт шудаанд.
Тавре Вазорати саноат ва технологияҳои нави Тоҷикистон иттилоъ медиҳад, сармоягузорӣ дар соҳаҳои мазкур дар соли 2024 нисбат ба соли 2023 1,62 миллиард сомонӣ бештар мебошад.
Тибқи иттилои вазорат, ин маблағгузорӣ дар бахшҳои гуногун чунин тақсимот шудааст: бахши истихроҷи маъдан – 960,2 миллион сомонӣ (88 миллион доллар), бахши коркард – 1,17 миллиард сомонӣ (107 миллион доллар), истеҳсол ва тақсимоти барқ, газ ва об – 7,36 миллиард сомонӣ (676 ).
Дар маҷмуъ, ҳаҷми истеҳсоли саноатии Тоҷикистон дар соли 2024 ба 53,8 миллиард сомонӣ расида, ки дар муқоиса ба соли гузашта 20 дарсад бештар мебошад.
Рушд дар соҳаи истихроҷи маъдан аз ҳама чашмгиртар буда, 43 дарсад афзоиш ёфтааст, дар ҳоле, ки таъминоти барқ, газ ва кондитсионери ҳаво то 5,7 афзоиш ёфтаанд.
Вазорати саноат ва технологияҳои нав дар гузориши солонаии худ мегӯяд, 3774 корхонаи саноатӣ то 1-уми январи соли 2025 дар кишвар ба қайд гирифта шудааст, ки ин нисбат ба ҳамин давраи соли гузашта 330 адад бештар мебошад.
Ин ҳам дар ҳолест, ки мақомоти кишвар бо ироаи чунин гузоришҳо мегӯянд, сатҳи бекорӣ дар кишвар кам шуда, ҷойҳои кории нав ба шаҳрвандон пайдо мекунанд. Аммо сомонаи “Macrotrends” сатҳи бекорӣ дар Тоҷикистонро соли 2023 6,80% унвон карда буд, ки тақрибан 2% бештар аз миёнгини ҷаҳонӣ аст.
