Арабистони Саудӣ дар моҳи мубораки Рамазон лоиҳаи “Сабади озӯқаворӣ дар Ҷумҳурии Тоҷикистон”-ро барои соли 2023 оғоз кардааст.
Сафорати Арабистони Саудӣ дар шаҳри Душанбе эълон кардааст, ки ин кишвар дар моҳи мубораки Рамазон лоиҳаи “Сабади озӯқаворӣ дар Ҷумҳурии Тоҷикистон, соли 2023”-ро оғоз кардааст.
Дар касу наворҳое, ки дар ин иқдоми Арабистони Саудӣ дар Тоҷикистон ба шабакаҳои иҷтимоӣ роҳ ёфтаанд, дида мешавад, ки дар ин сабад барои тақсим кардан ба оилаҳои ниёзманд як халта орд, 5 литр равғани растанӣ ва як қуттӣ пур аз дигар маводҳои хӯрока вуҷуд дорад.
Ин кумакҳоро Маркази имдод ва корҳои инсонии шоҳ Салмон дар ҳамкорӣ бо Ҳилоли Аҳмари Тоҷикистон ба оилаҳои ниёзманд тақсим мекунанд. Ин иқдом барои 2 ҳазору 760 оилаи ниёзманд, ки дар маҷмӯъ 13 ҳазору 800 нафарро ташкил медиҳанд, пешбинӣ шудааст.
Ба гуфтаи бархе корбарон, Арабистони Саудӣ медонад, ки дар хеле мавридҳо мақомоти Тоҷикистон кумакҳои башардӯстонаро дуздида дар бозорҳо мефурӯшанд ва ба хотири пешгирӣ кардан аз ин дуздиҳо рӯи тамоми ин маҳсулоте, ки барои тақсим кардан омода шудаанд, таъкид шуда, ки “РОЙГОН ТАҚДИМ КАРДА ШУДА, ФУРӮХТА НАМЕШАВАД!”
