Бархе коршиносони рус иддао доранд, ки Тоҷикистонро дар ояндаи наздик ба кишварҳои туркзабон ҳамроҳ хоҳанд кард.
Рӯзномаи “Независимая” Русия бо нашри як гузориш аз забони бархе коршиносони худ иддао карда, ки “яке аз ҳадафҳои сафари Президенти Озарбойҷон ба Тоҷикистон табдил додани ин кишвари порсизабон ба Созмони Кишварҳои Туркзабон аст.”
Душанбе ва Боку дар доираи созмонҳои минтақаӣ назири Иттиҳоди Давлатҳои Муштаракулманофеъ, Созмони Ҳамкориҳои Шонгҳой, Сомзони Милали Муттаҳид ва ғайра шарики ҳам ҳастанд, вале Тоҷикистон, ки як кишвари порсизабон аст, аз чанд тараф дар иҳотаи кишварҳои туркзабон ҷойгир шудааст.
Бинобар ин Озарбойҷон мехоҳад ҷуғрофиёи таъмини манофеи иқтисодӣ ва лоҷистикии худро дар минтақаи Осиёи Марказӣ афзоиш диҳад. “Аз ин рӯ, сафари раисиҷумҳур Илҳом Алиевро метавон як кӯшиши ҳамгироии Тоҷикистонро, ки кишвари туркзабон нест, ба формати муштараки ҳамкориҳо дар асоси ваҳдати ҷуғрофӣ арзёбӣ кард.”
Тибқи ҳисоботи Кумитаи омори Тоҷикистон ҳаҷми доду гирифтҳои иқтисодӣ ва тиҷоратӣ байни Тоҷикистон ва Озарбойҷон дар соли 2022 шаш миллиону дусад ҳазор доллари амрикоиро ташкил додааст. 6,2 миллион доллар дар маҷмӯъ 01% аз маҷмӯи савдои хориҷии Тоҷикистонро ташкил медиҳад. Тоҷикистон асосан аз Озарбойҷон маҳсулоти нафтӣ ворид кардааст.
Гуфта мешавад, Созмони Кишварҳои Туркзабон дар ҳоли ҳозир 5 узви доим ва ду узви нозир дорад. Соли 2009 он ҳамчун Шӯрои ҳамкориҳои кишварҳои туркзабон тавассути сарони Қазоқистон, Қирғизистон, Озарбойҷон ва Туркия таъсис ёфт. Узбекистон соли 2018 эълон кард, ки ба он мепайвандад. Ин кишвар соли 2019 ба узвияти ин созмон пазируфта шуд. Дар ҳоли ҳозир кишварҳои Туркманистону Маҷористон узви нозир дар ин созмон мебошанд.
