Ҳуқуқ

Вохӯрии Далер бо ҳамсараш дар СИЗО

Ба ҳамсари блогер ва рӯзноманигори шинохтаи тоҷик Далери Имомалӣ, ки дар боздоштгоҳ қарор дорад, иҷоза дода шуд, ки ба дидорбинии ӯ равад.

Бино ба иттилои "Радиои Озодӣ" вохӯрии Далер бо ҳамсараш рӯзи 25-уми июни соли ҷорӣ дар яке аз боздоштгоҳҳои муваққатӣ дар шаҳри Душанбе сурат гирифта, ҳудуди 10-15 дақиқа идома кардааст.

Пайвандонаш аз додани ҷузъиёти бештари ин вохӯрӣ худдорӣ карда, мегӯянд, ки "аҳволи Далер хуб аст". Аммо бо гузашти ду ҳафта мақомот ба наздикони Абдуллоҳ Ғурбатӣ, рӯзноманигори дигари тоҷик, ки ҳамроҳи Далери Имомалӣ боздошт шуда буд, иҷоза надодаанд, ки бо ӯ мулоқот кунанд ва маълум нест, ки вай дар чӣ шароите нигаҳдорӣ мешавад.

Ёдовар мешавем, ки Далери Имомалӣ рӯзи 15-уми июн соли ҷорӣ дар ҳудуди ноҳияи Айнӣ боздошт ва ба Душанбе интиқол дода шуд. Абдуллоҳ Ғурбатӣ низ асри ҳамон рӯз аз сӯи масъулини Додситонии ноҳияи Шоҳмансур даъват ва баъдан боздошт гардид ва сипас ҳар ду барои 2 моҳ ба ҳабси пешакӣ гирифта шудаанд.

Далери Имомалиро мақомот ба "соҳибкории ғайриқонунӣ", "дурӯғпароканӣ" ва "пайравӣ аз созмонҳои мамнуъ" гумонбар дониста, ба парвандааш муҳри махфӣ зада ва ба адвокаташ ҳам ҳақ надоданд, то дар бораи ҷузъиёти парвандаи ӯ бо расонаҳо суҳбат кунад.

Абдулло Ғурбатӣ

Мақомот Абдуллоҳ Ғурбатиро ба он муттаҳам мекунанд, ки гӯё ӯ як корманди милисаро дар бинои ШВКД Шоҳмансур-1 латукӯб кардааст. Аммо Абдураҳмон Шарипов, вакили дифои ӯ мегӯяд, худи Ғурбатӣ рӯзи боздошташ ва рӯзи мурофиа ин иттиҳомро рад кардааст.

Пас аз боздошти ин ду рӯзноманигор фаъолон, Созмонҳои рӯзноманигорӣ ва ҳомии ҳуқуқи башар аз ҳукумати Тоҷикистон хоста буданд, ки Далери Имомалӣ ва Абдуллоҳ Ғурбатиро фавран озод карда, парвандаи онҳоро қатъ кунад, зеро дар кори онҳо ҳеч гуна қонуншикание дида намешавад.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp, Viber ва Imo ба ин рақам:

Матолиби дигари Ҳуқуқ

Тоҷикистон

Эълони ҳукми абад барои қотилони як хонавода дар Ҷайҳун

Ҳуқуқ

Нопадид шудани боз як зодаи Бадахшон дар Русия

Ҳуқуқ

Яке аз рӯҳониёни шинохтаи бадахшонӣ ба 5 соли зиндон маҳкум шуд

Ҳуқуқ

Одиназода иттиҳоми "ифротгароӣ"-ро дар додгоҳ эътироф кард