Дар Қирғизистон писари президенти собиқи кишвар Алмазбек Атамбаев — Кадырбек Атамбаев, инчунин чанд шахси маъруфи сиёсӣ ва соҳибкорон боздошт шудаанд.
Тибқи иттилооти расонаҳои маҳаллӣ, бар зидди онҳо парванда оид ба ташкил ва барангехтани нооромиҳои оммавӣ боз шудааст. Ба гурӯҳи боздоштшудагон собиқ вакилон Эрмек Эрматов, Кубанычбек Кадыров ва соҳибкор Урмат Барыктабасов низ шомил мебошанд. Ҳамаи онҳо бо қарори додгоҳ то 17-уми январи соли 2026 ба боздоштгоҳи тафтишотӣ ирсол шудаанд.
Баъдан Кадырбек Атамбаев изҳор намуд, ки парвандаи ӯ ба моддаи вазнинтари Кодекси ҷиноятӣ гузаронида шудааст. Акнун ӯ бо иттиҳоми “Кӯшиши сарнагунсозии ҳокимият бо зӯр” айбдор мешавад.
Қаблан Вазорати корҳои дохилии Қирғизистон иттилоъ дода буд, ки як гурӯҳи харобкор мехостанд баъди интихоботи Жогорку Кенеш силсилаи эътирозҳо ва нооромиҳоро дар саросари кишвар ташкил намоянд. Ба гуфтаи мақомоти тафтишотӣ, гурӯҳ аз сиёсатмадорон, собиқ мансабдорон ва намояндагони сохторҳои қудратӣ иборат буда, барои амалисозии нақшаҳои худ тарафдорон, аз ҷумла гурӯҳҳои ҷиноии созмонёфта ва варзишгаронро ҷалб мекардааст.
Мақомот мегӯянд, ки дар нақшаи боздоштшудагон ташкили гирдиҳамоиҳои пайдарпай, паҳн намудани даъватҳои зиддиконститутсионӣ ва эҳтимоли ишғоли биноҳои давлатӣ, шабакаҳои телевизионӣ, муассисаҳои қудратӣ ва зиндонҳо ҷой дошт.
Ин дар ҳолест, ки чанде пеш як шаҳрванди дигари Қирғизистон низ бо гумони паҳн кардани даъватҳо ба нооромиҳои оммавӣ ва зӯран ғасб намудани ҳокимият дастгир шуда буд.
Аммо назари боздошшудаҳо ва ё наздикону вакилони дифоашон дар ин бора то ҳанӯз дастраси расонаҳо нашудааст ва маъулм нест, ки онҳо ба ин ҷурми эълоншуда бар зиддашон эъроф кардаанд ё на.
