Раисҷумҳури Қазоқистон, Қосим-Ҷомарт Тоқаев рӯзи 17-уми сентябри соли ҷорӣ бо судури фармоне номи пойтахти кишвараш Нур-Султонро ба номи қаблияш Остона баргардонд.
Гуфта мешавад, Тоҷқаев пас аз мувофиқати комили парлумони Қазоқистон барои тағйири номи пойтахт ба номи қаблияш, зери ин фаромн имзо гузоштааст.
Тағйири ном кардани пойтахти Қазоқистон аз Нур-Султон ба номи қаблияш Остона дар ҳолест, ки моҳи марти соли 2019 бо ташаббуси худи Тоқаев, ки он замон раиси парлумони кишвараш буд, барои “хидматҳои шоистаи”-и аввалин раисҷуҳур ва “пешвои миллат”-и қазоқҳо Нурсултон Назарбоев пойтахти Қазоқистон аз Остона ба Нур-Султон номгузорӣ шуд.
Соли 2019 Нурсултон Назарбоев, собиқ раисҷумҳури Қазоқистон пас аз 30 соли ҳукумадорӣ аз мақомаш канор рафт ва он замон ӯ Тоқаевро шахси боэътимоди худ муаррифӣ карда буд, ки метавонад кишварро дуруст идора кунад. Аммо, ба гуфтаи коршиносон, пас аз қудратро ба даст гирифтани Тоқаев тавре Назарбоев интизор дошт, кор чунин пеш нарафт. Баракс, дар як муддати кӯтоҳ дасти Назарбоев ва хонаводаи ӯро аз қудрат кӯтоҳтар кард ва ҳатто унвони “Пешвои миллат”-ро аз ӯ гирифт ва инак номи пойтахтро, ки маҳз ба номи Назарбоев гузошта шуда буд, ба номи қаблияш баргардонд.
