Гитанас Науседа, раиси ҷумҳурии Литва муътақид аст, ки Александр Лукашенкоро наметавон мисли қабл лидери қонунии Белорус ҳисоб кард. Хабаргузории ТАСС-и Русия дар ин бора хабар додааст.

Сардори давлати Литва,ки рӯзи панҷшанбе бо шабакаи Sky News-и Бритониё мусоҳаба кардааст, гуфтааст мо наметавонем мисли пешина Лукашенкоро сардори давлат эътироф кунем:

"Фикр намекунам,ки мо чун дар гузашта метавонем Лукашенкоро роҳбари машрӯъ ва мунтахаб (сардори давлат) биномем, зеро дар Белорус интихоботи озод ва шаффофу демократӣ баргузор нашудааст", - гуфтааст Гитанас Науседа, раиси ҷумҳурии Литва.

Науседа ҳамчунин огоҳ кардааст, агарки вазъияти буҳронии ношӣ аз интихоботи раёсати ҷумҳурӣ ба таври мусолиматомез роҳи ҳал пайдо накунад, дар қиболи Минск “имкони ҷорӣ кардани таҳрим”, вуҷуд дорад.

Президенти Литва ин фарзияро матраҳ кардааст, ки Русия “барои давлати таҳти нуфузаш манфиатдор” аст. Ӯ мегӯяд:

“Агар мо коҳилона ба ончики дар Белорус ҷараён дорад назора кунем,имкон дорад он комилан дар ҳайати Русия мулҳақ шавад. Мо-на танҳо Литва,балки ҳамаи Иттиҳоди Аврупо манфиатдорем,ки Белорус давлати орому собит, демократӣ ва мустақил бошад”.

Рӯзи чаҳоршанбе ҷаноби Науседа хабар дод,ки Литва, Латвия ва Лаҳистон нақшаи рафъи буҳрон дар Белорусро омода кардаанд. Вай аз се банд иборат аст:

  • ҳукумат аз истифодаи силоҳ муқобили норозиёни натоиҷи интихоботи 9 август даст бикашад;
  • боздоштшудаҳоро озод кунад;
  • бо ниҳодҳои ҷомеаи маданӣ музокиротро оғоз намояд.

Ба андешаи Науседа барномаи музокирот, метавонад дар доираи Шӯрои мусолаҳаи миллӣ оғоз шавад,ки намояндагони ҳукумат ва ҷомеаи маданӣ дар он ширкат варзанд.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.