Мақомоти Тоҷикистон собиқ раиси Фурӯдгоҳи байнулмилалии Душанбе Исматулло Абдуллозодаро ҳамроҳи муовинонаш боздошт кардаанд.
Радиои Озодӣ дар истинод ба манобеаш менависад, ки Абдуллозода ва ҳамроҳонаш барои аз худ кардани ҳудуди 500 миллион сомонӣ, айбдор мешаванд ва агар зиён ҷуброн шавад, эҳтимол дорад онҳо раҳо шаванд.
Ҳоло ӯ ва собиқ муовинаш Аслиддин Меликов дар Боздоштгоҳи муваққатӣ (СИЗО)-и Душанбе нигаҳдорӣ мешаванд.
Назари худи гумонборан ва наздиконашон дар ин бора маълум нест. Мақомот ҳам то ҳол расман аз боздошти собиқ раиси фурудгоҳ ва ҳамроҳонаш чизе нагуфтааст.
Гуфта мешавад, Исматулло Абдуллозода аз январи соли 2016 дар мақоми Директори генералии ҶСК “Фурӯдгоҳи байналмилалии Душанбе” кор мекард ва ҳамроҳи муовинонаш пас аз санҷиши молиявӣ ва “ошкор шудани камбудиҳои ҷиддӣ дар фаъолияташон” бо фармони раисҷумҳур рӯзи 2-уми майи соли ҷорӣ аз вазифаҳояшон барканор шудаанд.
Худи ҳамон рӯз Эмомалӣ Раҳмон, раисҷумҳури худкомаи Тоҷикистон бо як қарор бародари домодаш Зайнулло Шарифзодаро Директори генералии ҶСК “Фурӯдгоҳи байналмилалии Душанбе” таъйин кард.
Гуфта мешавад, Зайнулло як соли охир дар мақоми мудири Ожонси хариди давлатии мол, кор ва хидматрасонии Тоҷикистон ва дар гузашта ба ҳайси раиси корхонаи “Сементи тоҷик” кор мекард. Ӯ инчунин раиси бошгоҳи футболи “Вахш” ва раиси Федератсияи таеквондо (WT)-и Тоҷикистон мебошад.
Зайнулло аз хонаводаи пурнуфузи Соҳибовҳо мебошад, ки тиҷоратҳои бузурги кишварро дар ихтиёр доранд. Амакаш Маҳмадзоир Соҳибов бо Фирӯза Раҳмонова, духтари калонии Эмомалӣ Раҳмон ва бародараш Шамсулло Соҳибов, молики “Фароз” бо духтари панҷумими раисҷумҳур Рухшона Раҳмонова, ки сафири Тоҷикистон дар Британияи Кабир мебошад, издивоҷ кардаанд.
Ёдовар мешавем, ки шаби 16-уми декабри соли 2022 дар тарабхонаи “ОК” воқеъ дар ноҳияи Шоҳмансури Душанбе, байни Зариф Соҳибов, мудири корхонаи “Тилои тоҷик” ва писари амаи Зайнулло Шарифзода, раиси нави фурӯдгоҳ ва Наврӯз Абдуллоев, соҳибкор ва писари Исматулло Абдуллозода, ҳамакнун собиқ раиси Фурудгоҳи байнулмилалии Душанбе ва ҳамроҳони онҳо барои як духтар ҷанҷол сар зада буд.
Он замон гуфта мешуд, ки ҷанҷол аз пушти духтари як сарояндаи тоҷик шудааст, ки аз мизи Абдуллоев ва ҳамроҳонаш хеста, ба мизи Соҳибов ва ҳамроҳони ӯ нишастааст, ки дар натиҷа гапҳояшон пасту баланд шуда ва бо иштироки беш аз даҳ нафар аз ду тараф ҷанҷоли калон сар мезанад, ки ҳашт кас ҷароҳатҳои гуногун бардошта буданд.
