Ҳукумати Ҷумҳурии Тоҷикистон барои бунёди Роғун аз давлатҳои хориҷа миллионҳо доллари дигар қарз гирифтанист.
Тоҷикистон аллакай барои сохтмони ин нерӯгоҳи тақдирсоз ба чандин кишварҳо барои сармоягзорӣ муроҷиат кардааст.
Аз ҷумла ба Арабистони Саудӣ Иморот, Кувайт ва Қатар намояндагони Ҳукумат музокира кардаанд, мақомоти ин кишварҳо гуфтаанд, ки баъд аз поён ёфтани пандемияи COVID -19 дар ин замина тасмим хоҳанд гирифт.
Аммо ба назари Ҳоҷимуҳаммад Умаров, иқтисоддони шинохтаи тоҷик, танҳо Чин метавонад барои такмили нерӯгоҳи Роғуни Тоҷикистон солона 340 миллион доллар сармоягузорӣ намояд.
Бино ба навиштаи “Супутник” Умаров мегӯяд, дар ин шароит, ки аксари кишварҳо бо буҳрони молии ношӣ аз густариши вируси корона рӯ ба рӯ шудаанд, танҳо Чин метавонад барои идомаи сохти нерӯгоҳи барқи обии Роғун ба Тоҷикистон қарз диҳад.
Ин дар ҳолест, ки қаблан Файзиддин Қаҳҳорзода, вазири молияи Тоҷикистон, дар Парлумон зимни баррасии барномаи қарзгирии кишвар барои соли 2021 ва дурнамои нишондиҳандаҳои он барои солҳои 2022-2023 аз нақшаи қарзгирӣ барои сохтмони НБО “Роғун” гуфта буд, ки феълан 8 созишномаи қарзӣ дар сатҳи лоиҳавӣ қарор доранд, ки калонтаринашон қарз барои сохтмони НБО “Роғун” 340 миллион евро мебошад.
Дар мавриди қарздиҳандагон Қаҳҳорзода иброз дошта буд, ки тибқи нақша бояд аз бонкҳои аврупоӣ – Credit Suisse ва Landesbank Baden – Wiirttember қарз гирифта шавад.
Нерӯгоҳи Роғун бо садди хокии 335 метрӣ ва зарфияти тавлиди 17 миллиард киловатт соат барқ дар сол, бузургтарин тарҳи барқи обии минтақа гуфта мешавад.
