Дар ҳафт моҳи соли ҷорӣ дар ҷумҳурӣ ба миқдори беш аз 22,2 миллиард сомонӣ маҳсулоти саноатӣ истеҳсол шудааст. Дар ин бора “Avesta” дар истинод ба мақомоти дахлдори блоки иқтисодӣ хабар медиҳад.
Ба қавли манбаъ, дар ҳафт моҳи соли ҷорӣ ҳаҷми истеҳсоли маҳсулоти саноатӣ ба ҳар сари аҳолӣ дар Тоҷикистон, ба ҳисоби миёна беш аз 2,3 ҳазор сомониро ташкил додааст. Ва мувофиқи маълумоти оморӣ, аҳолии кишвар дар аввали моҳи апрели соли ҷорӣ қариб 10 миллион нафар буд.
Ва инчунин дар хабар зикр кардида, ки дар давраи ҳисоботӣ дар кишвар зиёда аз 2,5 хазор корхонаи саноатӣ фаъолият мекард.
Танҳо назари сатҳие бар ин маълумот кифоя аст, ки аз чанд ҷиҳат дурӯғу муболиғанок будани маълумоти пешниҳодшуда аз тарафи мақомоти омориро нишон диҳад:
Аввалан, агар маблағи ҳаҷми умумии истеҳсоли маҳсулоти саноатӣ ба 22,2 миллиард сомонӣ баробар бошад ва аҳолии кишвар 10 миллион бошад, пас ба ҳисоби миёна бар сари ҳар нафар 2,22 ҳазор сомонӣ рост меояд, на бештар аз 2,3 ҳазор сомонӣ, тавре мақомот иддао мекунад.
Сониян, агар 2500 корхонаи саноатӣ дар ҳаҷми 22,2 миллиард сомонӣ, ки аз рӯи қурби асъори имрӯза тақибан ба 2,18 миллиард доллар баробар аст, маҳсулоти саноатӣ истеҳсол карда бошанд, пас ҳар як корхонаи саноатӣ ба миқдори беш аз 8 миллиону 880 ҳазор сомонӣ, ё худ 870 ҳазор доллар маҳсулот истеҳсол кардааст. Албатта, корхонаҳое, ки қудрати ба ин ҳаҷм истеҳсол карданро доранд, дар кишвар ангуштшумор ҳастанд. Ҳамчун мисол, танҳо осиёҳои бузургҳаҷм, ширкатҳои истеҳсоли семент ва корхонаҳои коркарди пахта, корхонаҳои соҳаи саноати маъдани кӯҳӣ ва металлҳои қиматбаҳо, аз қабили тиллоро номбар кардан мумкин аст.
Гуфта мешавад, аксари корхонаҳое, ки дар омори расмӣ ҳамчун корхонаҳои саноатӣ ба қайд гирифта шудаанд, сехҳои дӯзандагӣ мебошанд, ки баъид аст онҳо ба ин ҳаҷм маҳсулот истеҳсол кунанд.
Мақомот таъкид мекунад, ки ҳамасола истеҳсоли маҳсулоти саноатӣ афзоиш ёфта истодааст. Тибқи оморӣ расмӣ, дар соли 2021 ҳаҷми истеҳсоли маҳсулоти саноатӣ ба 38 миллиарду 826 миллион сомонӣ расонида шуда, нисбати соли 2020 ба андозаи 22 дарсад ё 8 млрд сомонӣ зиёд мебошад.
Барои муқоиса, кишвари Чин, яке аз бузургтарин истеҳсолкунандагони маҳсулоти саноатӣ, ки тамоми ҷаҳонро бо маҳсулоташ таъмин мекунад, афзоиши истеҳсоли маҳсулоти саноатӣ дар соли пеш аз пандемия, яъне соли 2019 ба 5,7%, 2020 – ҳамагӣ 2,8% ва 2021, ки аксаран ба барқароршавӣ пас аз пандемия гуфта мешавад, ба 9,6% баробар будааст. Яъне, танҳо афзоиши истеҳсоли маҳсулоти саноатии соли 2021 дар Тоҷикистон ба ҳисоби дарсад баробари сесола афзоиши истеҳсоли маҳсулоти Чин будааст.
Пӯшида нест, ки сабаби асосии чунин афзоиши истеҳсол зиёданависӣ, дурӯғу муболиғаи мақомот мебошад, вагарна чунин суръати афзоиши истеҳсолот ба некӯаҳволии мардум таъсири бевосита мерасонад.
Муҳаммад Раззоқӣ
Аз идораи сомона: Гӯшаи “Блоги Шумо” минбари гуногунандешӣ буда, матолибе, ки дар ин гӯша ба нашр мерасанд, назари шахсӣ ва таҳлили муаллифон буда, баёнгари мавқеи “Azda tv” нестанд.
