Расис Шӯрои ҳуқуқи инсони назди Президенти Федератсияи Русия, Валерий Фадеев ба рӯзномаи "Коммерсантъ" изҳор дошт, ки Русия ният дорад муҳлати ихроҷи (депортатсия) муҳоҷирони ғайриқонуниро пас аз 30 сентябр тамдид кунад.
Вай ҷузъиётро ифшо накард ва қайд кард, ки "ба ин мавзӯъ мепардозад".
Дар навбати худ Вазорати корҳои дохилии Русия ҳушдор дод, ки давраи таҳаммулпазирӣ ба охир мерасад ва аз ин рӯ муҳоҷирон бояд то охири ҳамин моҳ вазъияти будубошашанро дар ин кишвар ба таври қонунӣ ба қайд бигиранд, вагарна ихроҷ (депортатсия) карда мешаванд.
Инчунин ин вазорат кормандони ҳифзи ҳуқуқро вазифадор кард, ки тафтишотро оғоз кунанд ва назоратро аз болои вайронкунандагони қонун таъмин намоянд.
Гуфтанист, Вазорати корҳои дохилии Русия нақшаи муҳлати тамдидро рад накард ва рӯзи чоршанбе сардори Сарраёсати муҳоҷирати ВКД-Русия, Валентина Казакова дар ин бора нишасти матбуотӣ баргузор мекунад.
Қаблан Вазорати корҳои дохилии Маскав ба муҳоҷирон хотиррасон карда буд, ки 30-уми сентябр имтиёзҳое, ки дар пасманзари пандемияи коронавирус ҷорӣ шуда хотима меёбад. Дар ин паём, ки рӯзи 27-уми сентябр ба нашр расидааст гуфта мешавад, хориҷиёни муқими Русия бояд то моҳи октябр мақоми будубоши худро дар ин кишвар қонунӣ кунанд.
“Онҳое, ки то 15-уми марти соли 2020 омадаанд ва барои то 16-уми июни соли 2021 дар кишвар будубошашон асосҳои қонунӣ надорад, метавонанд бо навиштани ариза ба Вазорати корҳои дохилӣ муроҷиат кунанд, то худро дар асоси қонуни муҳоҷират ба қайд гиранд.”
