Рӯзи сеюми Ҷоми ҷаҳонии футбол-2022 дар Қатар бо шикасти ғайримунтазири мунтахаби Аргентина аз мунтахаби Арабистони Саудӣ оғоз ёфт.
Дар рӯзи сеюми Ҷоми ҷаҳон-2022 дар Қатар 4 бозӣ дар гурӯҳҳои “С” ва “D” баргузор шуд. Бозии аввал миёни мунтахабҳои Аргентина ва Арабистони Саудӣ сурат гирифт. Аргентина, ки яке аз дастаҳои қавӣ ва беҳтарини ин қаҳрамонӣ ба ҳисоб меравад, аз саудиҳо ба ҳисоби 1:2 шикаст хӯрд.
Дар нимаи аввали бозӣ тӯбро аз пеналти капитани аргентиниҳо, ҳамлагар Лионел Месси ба нишон расонда, ҳисобро боз кард. Дар давоми бозӣ ба футболбозони Аргентина муяссар шуд, ки се тӯби дигарро ба нишон расонанд, аммо гол ҳисобида нашуданд, чун доварон ҳолати офсайд ё вайрон кардани қоидаи бозиро ба қайд гирифтанд.
Дар нимаи дуюми бозӣ, футболбозони Арабистони Саудӣ Ал-Шеҳрӣ Солеҳ (дақиқаи 49) ва Ал-Доссарӣ Салим (дақиқаи 53) ду голро ба самар расонида, Аргентинаро шикаст доданд.
Дар ҷараёни бозӣ сардовар ба шаш бозигари саудиҳо корти зард нишон дод.
Гуфта мешавад мунтахаби Аргентина пеш аз ин дар 36 бозии гузашта бохт надошт ва яке аз дастаҳои бартари Ҷоми ҷаҳон 2022 ба шумор меравад. Шикасти Аргентина барои мухлисони футбол ғайриинтизор буд.
Лозим ба зикр аст, ки Подшоҳи Арабистони Саудӣ Салмон ибн Абдулазиз 23-уми ноябрро барои шаҳрвандонаш ҳамчун “таҷлил аз пирӯзии футболбозон” дар ин кишвар рӯзи истироҳат эълон кард.
Вохӯрии дуюм миёни мунтахабҳои Дания ва Тунис бо ҳисоби 0:0 анҷом ёфт. Дар ин бозӣ футболбозони даниягӣ бар тунисиҳо бартарӣ дошта, 61 дарсад тӯбро дар пои худ дошта бар сӯи дарвозаи Тунис 6 бор заданд, аммо бозигарони Тунис низ бозии хуб нишон дода, нагузоштанд даниягиҳо ҳисобро боз кунанд.
Бозии сеюм миёни мунтахабҳои Мексика ва Лаҳистон низ бо ҳисоби 0:0 анҷом ёфт.
Лаҳистониҳо метавонистанд дар ин бозӣ пирӯз шаванд, аммо дарвозабони мексикоӣ Гилермо Очоа дар дақиқаи 58-ум пеналтии задаи ҳамлагари “Барселона” ва капитани дастаи мунтахабаи Лаҳистон Роберт Левандовскиро гардонд.
Бозии чорум миёни тимҳои Фаронса ва Австралия сурат гирифта, дар дақиқаи 9-ум бозӣ австролиёӣ Гудвин тӯбро ба нишон расонд ва ҳисобро боз кард.
Аммо аз дастаи мунтахаби Фаронса Рабё дар дақиқаи 27, Жиру дар дақиқаҳои 32 ва 71 ва Мбаппе дар дақиқаи 68 ба дарвозаи Австралия гол зада, ба мунтахаби Фаронса пирӯзӣ оварданд.
Ёдовар мешавем, ки дар бозиҳои гузашта Англия Эронро бо ҳисоби 6:2, Ҳолланд Сенегалро бо ҳисоби 2:0 шикаст дода, мизбони Ҷоми ҷаҳон-2022 аз Эквадор бо ҳисоби 0:2 шикаст хӯрд. Танҳо бозии Амрико ва Уэлс мусовӣ 1:1 ба охир расид.
