Эмомалӣ Раҳмон барои иштирок дар як конфронси байналмилалӣ рӯзи 5-уми август вориди Туркманистон шуд.
Гуфта мешавад, ҳадаф аз сафари раисҷумҳури Тоҷикистон Эмомалӣ Раҳмон ба Туркманистон, иштирок дар Конфронси сеюми Созмони Милали Муттаҳид оид ба кишварҳои аз ҷиҳати иқтисодӣ ақибмонда, ки дастрасӣ ба баҳр надоранд, мебошад. Ҳамоиши мазкур дар шаҳри Туркманбошии ин кишвар аз 5-ум то 8-уми августи соли ҷорӣ баргузор мешавад.
Тавре дафтари матбуоти Президенти Тоҷикистон хабар медиҳад, дар фурӯдгоҳи байнулмилалии шаҳри Туркманбошӣ Эмомалиро раиси Маҷлиси намояндагони халқи Туркманистон Қурбонгулӣ Бердимуҳаммадов пешвоз гирифтааст.
Дар доираи ин сафар, мулоқоти дуҷонибаи Эмомалӣ Раҳмон бо Қурбонгулӣ Бердимуҳаммадов доир гардид. Ҷонибҳо зимни табодули афкор, рушди ҳамкориҳои дуҷонибаи сиёсӣ, иқтисодӣ ва фарҳангиро баррасӣ намуда, ба тавсеаи муколамаи сиёсӣ ва таҳкими муносибатҳои дӯстонаи Тоҷикистону Туркманистон таъкид карданд.
Ёдовар мешавем, Қурбонгулӣ Бердимуҳаммадов, ки солҳои тӯлонӣ Туркманистонро раҳбарӣ мекард, соли 2022 ихтиёран аз мақоми президентӣ канор рафт ва пас аз баргузории интихоботи нав писараш – Сардор Бердимуҳаммадов ба курсии раисҷумҳурӣ нишаст. Қурбонгулӣ Бердимуҳаммадов ҳоло раиси Маҷлиси халқии Туркманистон аст, ки як мақоми калидӣ дар сохтори ҳокимияти давлатӣ ба ҳисоб меравад.
Ба гуфти таҳлилгарон, Эмомалӣ Раҳмон, ки аз соли 1992 инҷониб Тоҷикистонро раҳбарӣ мекунад, эҳтимол аз таҷрибаи Туркманистон дар масъалаи интиқоли қудрат пайравӣ кунад. Гарчанде ҳанӯз изҳороти расмӣ дар ин бора нашр нашудааст, вале таҳаррукҳои сиёсии ахир ва густариши фаъолиятҳои сиёсиву расмии писари ӯ, Рустами Эмомалӣ, шаҳрдори Душанбе ва раиси Маҷлиси миллӣ, эҳтимолҳоро дар мавриди омодагӣ ба интиқоли қудрат тақвият медиҳанд.
