Эмомалӣ Раҳмон бо сӯиистифода аз мансаби давлатӣ бинои чорошёнаи ҳизбашро, ки бо дастгирии Мақомоти иҷроияи ҳокимияти давлатӣ ва пули соҳибкорон дар шаҳри Ваҳдат сохта шуда аст, рафта ба истифода дод.
Субҳи имрӯз, 10-уми ноябри соли 2022 Президенти Тоҷикистон бо сафари корӣ нахуст ба мақарри бинои нав сохташудаи Ҳизби Халқии Демократии Тоҷикистон дар шаҳри Ваҳдат рафта, онро ба истифода дод.
Бино ба иттилои сомонаи Хадамоти матбуоти Президенти Тоҷикистон ин бино "бо дастгирии Кумитаи иҷроияи Ҳизби Халқии Демократии Тоҷикистон дар шаҳри Ваҳдат, Мақомоти иҷроияи ҳокимияти давлатии шаҳр ва саҳми соҳибкорон дар макони мувофиқ ва тарҳи зебо бунёд шуда, ҳуҷраҳои кории он бо мизу курсӣ ва дигар таҷҳизоти зарурӣ таъмин мебошад."
Дар ҳамин ҳол як нафар аз соҳибкорони шаҳри Ваҳдат, ки нахост номаш зикр шавад, мегӯяд, асли гап ин аст, "Кумитаи иҷроияи Ҳизби Халқии Демократии Тоҷкистон дар шаҳри Ваҳдат бо сӯиситифода аз номи Президент ба Мақомоти иҷроияи ҳокимияти давлатии шаҳр "дастур" дода буд, ки барои сохтмони бино шароитро фароҳам биорад ва ба соҳибкорон амр кунад, ки дар рафти корҳои сохтмонӣ, таъмиру тармим ва муҷаҳҳаз сохтани он бо мебелҳо ва дигар ашёи зарурӣ саҳмгузорӣ кунанд. Соҳибкорон ҳам ба хотири аз даст надодани тиҷорат ва ҷойгоҳашон маҷбурӣ то имрӯз саҳмгузорӣ карданд."
Аз сӯи дигар, тибқи қонунгузорӣ ҳам Мақомоти иҷроияи ҳокимияти давлатии шаҳри Ваҳдат ва ё дигар ноҳияҳо дар будҷети худ маблағҳои алоҳидае барои маблағгузорӣ кардани ҳизбҳои сиёсӣ, чи ҳизби ҳоким бошад ва ё ҳизбҳои "кисагӣ" ва ҳизбу ҳаракатҳои марбут ба мухолифин пул надоранд.
Инчунин Моддаи 12 Қонуни Ҷумҳурии Тоҷикистон "Дар бораи Ҳизбҳои сиёсӣ" дарёфти кумакҳои модиро аз: "давлат, шаҳрвандон, корхонаҳо ва ташкилотҳои хориҷӣ, инчунин корхонаҳое, ки дар онҳо кишварҳои хориҷӣ саҳм дорад," манъ карда аст.
Ҳамзамон ҳамин қонун таъкид мекунад, ки "Ҳизби сиёсӣ ҳуқуқ дорад дар шакли амвол ва маблағ аз шахси воқеӣ, корхона ва ташкилотҳо, иттиҳодияҳои ҷамъиятӣ, бунёдҳо ва дигар шахси ҳуқуқии ғайридавлатӣ кумаки моддӣ қабул намояд, агар ин кумаки моддӣ бо ҳуҷҷат тасдиқ ва манбаи он нишон дода шуда бошад. (ҚҶТ аз 8.08.15 с., № 1209)"
Гуфта мешавад, ин бори аввал нест, ки Ҳизби Халқии Демократии Тоҷикистон бо сӯиитифода аз мақоми раҳбарӣ ва аз номи Президент дар шаҳру ноҳияҳои кишвар барои худаш биноҳои нав ва шароити беҳтар мезосанд.
Барои мисол, 11-уми августи соли ҷорӣ низ Эмомалӣ Раҳмон бинои ҳизбашро, ки "бо дастгирии Кумитаи иҷроияи марказӣ ва вилоятии Ҳизби Халқии Демократии Тоҷикистон ва Мақомоти иҷроияи ҳокимияти давлатии шаҳри Конибодом тариқи ҳашар бо сифати баланд бунёд гардида" буд, рафта ба истифода дод.
Амруллоҳи Низом, махсус барои Azda tv
