Омодагиҳо барои сафари Эмомалӣ Раҳмон дар Ворух ҷараён дорад. Корбарон бо ирсоли наворҳо ба “Аздо тв” хабар доданд, ки масъулини шаҳри Исфара барои сафари қарибулвуқуи раисҷумҳур ба ин шаҳр, хусусан ба ҷамоати Ворух шабу рӯз ба ободкориҳо машғуланд.
Дар наворҳое, ки ба дасти “Аздо тв” расид, дида мешавад, ки гурӯҳе аз ҷавондухтаронро барои пешвозгирии Раҳмон бо суруди “Зинда бодо пешвои қаҳрамон” омода доранд.
Як сокини Ворух дар тамос бо “Аздо тв” гуфт, ба эҳтимоли зиёд Эмомалӣ Раҳмон рӯзи 14 апрел ба ин ҷамоат сафар дорад. Ба гуфтаи манбаъ, тибқи нақша дар як деги яктонна оши Наврӯзӣ мепазанд. Ва инчунин аз чанд маҳаллаи дигар ҳам талаб шудааст, ки бо ибтикори худ ош пӯхта ба мардум бидиҳанд.
Сокинон наворе фиристоданд, ки дида мешавад, лулаи обкаше назди як боғ обод шудааст. Ба гуфтаи сокинон онро як муҳоҷири корӣ бо пули Русия обод кардааст. Тибқи маълумоти сокисонон, ин маконро бояд Эмомалӣ Раҳмон рафта кушояд. Ба қавле “лентабурӣ кунад”.
Пештар аз ин ҳам Котиби матбуоти Президент, Абдуфаттоҳ Саидзода ба расонаҳо аз сафари Раҳмон хабар дода буд, аммо рӯзу барномаи сафар номушаххас буд.
Гуфта мешавад пеш аз сафари Раҳмон ба ҷамоати Ворух иддае аз намояндагони мақомоти баландпояи кишвар паси ҳам ба шаҳри Исфара, хусусан ба Ворух сафар намуда аз онҷо дидан доранд.
28 март Раиси ноҳияи Мастчоҳ Тоҳир Азизода бо ҳайате аз масъулони ноҳия ва соҳибкорон ба Ворух сафар дошт, инчунин баъд аз ӯ рӯзи 2 апрел вазири меҳнат Ширин Амонзода низ ба онҷо сафари корӣ анҷом дод.
Дар пайи вазири меҳнат, раиси шаҳри Хуҷанд Фирдавс Шарифзода дирӯз 4 апрел низ ба Ворух сафар кард. Ба иттилои дафтари матбуоти шаҳри Хуҷанд, раиси шаҳрро дар ин сафари корӣ инчунин соҳибкорон, варзишгарон, вакилони шаҳрӣ, фаъолони бахшҳои гуногунии хоҷагии халқи ҳамроҳӣ карданд.
Пас аз изҳороти раиси КДАМ-и Қирғизистон Қамчибек Тошиев дар мавриди гирифтани Воруху додани замин аз гӯшаи вилояти Бодканд, зоҳиран танишҳо афзудааст. Баҳси марз байни Тоҷикистону Қирғизистон солҳост, ки идома дорад. Бо вуҷуди вохӯриҳои сатҳи болои ду кишвар, ҳанӯз ҳам норӯшаниҳо боқист.
