Сафорати Тоҷикистон дар Русия рӯзи 26 сентябр, пас аз як рӯзи ҳодисаи лату кӯб шудани кормандонаш зимни як гузориши расмӣ оиди ҷузъиёти он изҳорот пахш кард.
Дар изҳороти сафорати Тоҷикистон гуфта шудааст, ба кормандони сафорат ҳангоми ба руйхат гирифтани шаҳрвандоне, ки аз Русия ба Тоҷикистон сафар мекунанд, ҳамла сурат гирифтааст, ки ҳамлагар аз ҷониби мақомоти ҳифзи ҳуқуқи Русия дастгир карда шуд.
Сабаби мавриди лату кӯб қарор гирифтани кормандони сафоратро расонаҳо дар муомилаи дағалона кормандон гуфта буданд, ки худи масъулони сафорат дуруштмуомилагии кормандонашро рад мекунад.
“Азия Плюс” бо такя ба як манбаи наздик ба сафорат хабар дода буд, ки шахсони гумонбар дар ин кор зодагони Вилояти мухтори куҳистони Бадахшони Тоҷикистон будаанд, ки далели ин корро дар вақти пурсиши мақомоти ҳифзи ҳуқуқ муносибати ғайриҳирфавии масъулони қабули шаҳрвандони сафорат гуфта буданд.
Ёдовар мешавем, ки рӯзи 25 сентябр ду корманди бахши қабули шаҳрвандони сафорати Тоҷикистон дар Маскав мавриди лату кӯб қарор гирифтанд.
Қаблан расонаҳои Русия хабар доданд, ки як мутахассиси пешбар ва ронандаи сафорат, ки масунияти дипломатӣ надоштанд, мавриди ҳамла қарор гирифта, бинӣ ва ангушти дасти мутахассиси сафорат шикаста, косахонаи сараш осеб дидааст ва мағзи сараш ҷунбидааст.
Шабакаи телевизионии РЕН ТВ аз қавли як манбааш хабар дода буд, ки вақте кормандони мақомоти ҳифзи ҳуқуқ ба ҷойи ҳодиса омадаанд, як шаҳрванди 38-солаи Тоҷикистонро ба ҳамчун гумонбар дастгир карданд.
Аз рӯйи ин ҳодиса шуъбаи пулиси Пресненскии Маскав пурсуҷӯ кардааст ва нисбати шаҳрванди Тоҷикистон ба хотири нақзи қоидаҳои вуруд ба қаламрави Русия санади маъмурӣ тартиб дода шудааст.
Ин бори аввал аст, ки дар Русия кормандони сафоратро лату кӯб менамоянд, чанде қабл шаҳрвандони Тоҷикистон ба хотири роҳ наёфтан ба парвозҳои четерӣ аз Русия ба Тоҷикистон дар назди сафорат ҷамъ омада буданд ва иддао мекарданд, ки намояндагони сафорат маблағҳои барзиёд гирифта билетҳоро ба дигарон мефурӯшанд, нафарони бемор ва занҳои кӯдакдорро дар кӯча гузоштаанд.
