Русия барои вуруди шаҳрвандони Тоҷикистон ба ин кишвар шурути наверо роҳандозӣ карда, ки аз 1 сентябри соли равон дар ҳукми иҷро медарояд.
Вазорати тандурустӣ ва ҳифзи иҷтимоии аҳолии Тоҷикистон бо нашри матлабе эълом кард, шаҳрвандоне, ки ба Русия сафар мекунанд, бояд пеш аз сафар ҳуҷҷат дар намуди "QR-code" дошта бошанд, зеро Русия бидуни ин код шаҳрвандони Тоҷикистонро ба қаламраваш роҳ намедиҳад.
Дар баёнияи вазорат гуфта мешавад, ки ин қарор аз ҷониби ҳукумати Русия аз 20-уми июли соли 2021 таҳти рақами №1998 гирифта шудааст ва бояд аз аввали моҳи сентябр амалӣ шавад.
Тавре вазорат мегӯяд, аз ин ба баъд гирифтор набудани шахс ба вируси COVID-19 тариқи расмзи "QR-code" - нишондиҳандаи электронии натиҷаи ташхиси бемории коронавирус санҷида мешавад. Ин барнома дар телефонҳои дастӣ насб гардида, ҳангоми вуруд ба Русия ба марзбонон нишон дода мешавад.
Қаблан мусофироне, ки ба Русия сафар мекарданд, ташхис дар бораи гирифтор набудан ба вируси COVID-19-ро пеш аз 72 соат аз сафар аз озмоишгоҳҳо дастрас мекарданд ва ҳангоми вуруд онро нишон медоданд.
Бино ба тавзеҳи Вазорати тандурустии кишвар тартиби дурусти пайдо намудани ин ҳуҷҷат ин аст, ки нафаре мехоҳад сафар кунад, нахуст дар телефони мобилии худ аз интернет-мағозаҳо барномаи наверо бо номи “Путешествую без COVID-19” насб намуда, маълумоти лозимаро ворид мекунад.
Дар ин барнома пас ворид кардани маълумот ба мусофир нишон дода мешавад, ки барои гирифтани код ба куҷо муроҷиат кунад ва пас аз гузаштани ташхис, мусофир тамоми маълумоти лозимиро дар шакли рамзи "QR-code" ба барномаи дар телефон насбшуда ворид мекунад.
Вазорати тандурустӣ мегӯяд, хоҳишмандон метавонанд ин кодро дар шаҳри Душанбе аз озмоишгоҳҳои давлатӣ ва ғайридавлатӣ, махсусан аз Хадамоти назорати давлатии санитарию эпидемиологӣ ва марказҳои ин хадамот дар шаҳрҳои Кӯлоб, Бохтар ва Хуҷанд ва Озмоишгоҳи миллии референсӣ (воқеъ дар Қараболо) дастрас намоянд.
