Сокинон аз Шаҳри Хуҷанд аз норасоии дастгоҳи нафасдиҳӣ дар беморхонаи сироятии шаҳр хабар медиҳанд. Ба гуфтаи манбаъи “Azda.tv” чанд рӯзе пеш як нафар, ки дар Tcell кор мекардааст аз норасоии дастгоҳи нафасдиҳӣ дар ин беморхона даргузаштааст. Ному насаби ин шахсро мо дар даст дорем, аммо ба хотири озор наёфтани пайвандони марҳум мо аз эълони он худдорӣ мекунем.
Ин манбаъ мегӯяд, то дастгоҳи нафасдиҳиро аз Конибодом оварданд, аллакай дер шуда буд. Ҳамзамон дар беморохонаи вилоятӣ низ аҳвол ҳамин гуна будааст. Ба гуфтаи манбаъ, чанде аз дӯстонаш дар азобанд, чунки пайвандонашон дар беморхона бистариянд ва онҳо ҳоло дар ҷусутҷӯи дастгоҳи нафасдиҳӣ ҳастанд.
Пештар сомонаи “Ахбор” хабар дода буд, ки сардухтури бемористони марказии ноҳияи Спитамени вилояти Суғд рӯзи 4 сентябр дар як ҷаласаи ҳукуматии ин ноҳия аз набуди дастгоҳҳои нафасдиҳии сунъӣ дар беморхонаи ноҳиявӣ бонги изтироб зада, гуфта буд, ки агар то як рӯзи дигар ба таври оҷил дастгоҳҳои нафасдиҳӣ пайдо накунем, 10 беморро аз даст хоҳем дод.
Наимҷон Бобоев, узви Ситоди мубориза бо коронавирус дар беморхонаи марказии ноҳияи Спитамен ба ин хабари “Ахбор” расман посух навишт ва дар посухаш гуфта мешуд, ки бемористони Спитамен бо дастгоҳҳои нафасдиҳӣ таъмин мебошад. Аммо манбаи “Azda.tv” мегӯяд, вазъ дар ҳақиқат вазнин аст ва даъвои Наимҷон Бобоев дӯруст нест.
Ҳамазмон як корбари фейсбук, Иброҳим Юсуфӣ дар чанде аз гурӯҳҳо навишт, ки тайи ду ҳафтаи охир аз беморхонаи шаҳри Хуҷанд бо тартиби муқарраршуда аз 60 то 70 ҷасад берун оварда шудааст, ки ҳамагӣ аз пневмания ё COVID-19 фавтиданд. Мошинҳое, ки ҷасадҳоро берун оварданд, пулис онҳоро ҳамроҳӣ мекардааст. Аксари ҷасадҳо дар қабристони “Гумбази кошук” ва “Болтухон” дафн карда мешаванд. Ба навиштаи ин корбар мақомот хомӯширо ихтиёр кардааст ва вонамуд мекунанд, ки ҳама чиз хуб аст.
Дар Тоҷикистон аз аввали паҳншавии вируси корона мақомоти расмӣ оиди омори дақиқи гирифторон ва фавтидагони ин беморӣ маълумоти дурустро ба сокинон пешкаш намекарданд. Ва ҳоло санҷидани ҳамагуна хабар вобаста ба COVID-19 дар Тоҷикистон душвор мебошад, чун мақомоти амниятӣ онро зери назороти худ доранд.
Пештар фаъолони ҷомеаи шаҳрвандӣ бо роҳандозии як сомонаи махсус барои ҷамъоварии омори дурусти COVID-19 дар Тоҷикистон, номи зиёда аз 400 нафар фавтидагони ин бемориро рӯйхат намуда буданд, аммо дертар мақомот бо баҳонаи пешгирӣ аз оморҳои дурӯғ дар мавриди омори каронавирус, қонунеро қабул намуда, ин сомонаро масдуд кард.
Барои мубориза бо COVID-19 ва оқибатҳои он даҳҳо кишвару созмонҳо то кунун бештар аз 300 миллион доллар ба Тоҷикистон кумак намудаанд, аммо дар бораи сарфи ин кумакҳо мақомот маълумоте барои шаҳрвандон ироа намекунад ва маълум ҳам нест, ки ин кумакҳо дар кӯҷо сарф мешаванд. Дар ҳамин ҳол на як бору ду бор шикояти сокинон аз норасоии лавозимоти тиббӣ ва либосҳои муҳофизатии табибон расонаӣ шудааст. Бино ба гуфтаи коршиносони соҳа бо фарорасии фасли тирамоҳ дар ҷаҳон мавҷи дуюми вируси COVID-19 паҳн шуд, дар баробари ин хабарҳои маргумири сокинон дар Тоҷикистон ҳоло бештар дар шабакаҳои иҷтимоӣ нашр мешаванд.
