Мақомоти Русия дар аксари минтақаҳои ин кишвар "шикори" муҳоҷирон ва бахусус тоҷикҳо, узбекҳо ва дигар ҷавонони аз кишварҳои Осиёи Марказӣ омадаро пурзӯр кардаанд.
Бархе муҳоҷирони тоҷик бо ирсоли наворе аз Хабаровски Русия мегӯянд, дар ҳафтаҳои ахир мақомоти ин кишвар "шикори" ҷавонписарони тоҷикро барои ҷалб кардан ба сафи қувваҳои мусаллаҳи ин кишвар дар минтақа афзоиш додаанд.
Ба қавли муаллифони ин навор, дар чанд соли ахир муҳоҷирати хонаводагии тоҷикистониҳо ба ин минтақа хеле зиёд шудааст ва аксар ҷавонони тоҷик, ки тибқи барнома шаҳрвандии Русияро дарёфта карда, ҳамроҳ бо хонаводаҳояшон ба ин минтақа муҳоҷир шудаанд.
Ба таъкиди онҳо, хеле аз ҷавонписарони тоҷик, ки то ҳол хидмати ҳарбӣ накардаанд, аз тарси он ки дар ин шароит онҳоро ба сафи қувваҳои мусаллаҳи Русия ва ҷанг дар Украина ҷалб накунанд, номи худро дар комиссариатҳои ҳарбӣ сабт намекунанд. Мақомоти Русия ҳам мисли мақомоти Тоҷикистон онҳоро аз кӯчаву бозорҳо "облава" карда мебаранд.
Гуфта мешавад, аз замоне ки дар 24-уми феврали соли 2022 Русия алайҳи Украина ҳамлаҳои низомии худро оғоз кард, садҳо ҳазор ҷавонони рус аз тарси он ки онҳоро дастгир карда маҷбурӣ ба ҷанг набаранд, ба дигар кишварҳо фирор карданд.
Дар ин шароити ҷангӣ мақомоти Русия ба ҷои ҷавонони рус, ки гурехта ба хориҷ рафтанд, "шикори" ҷавонони муҳоҷирро оғоз карда, бо найрангҳои мухталиф ин ҷавононро ба ҷанг фиристодаанд ва то кунун садҳҳо нафари онҳо кушта ва захмӣ ва беному нишон шудаанд.
