Маҳмурод Одинаев. Сурат: Радиои Озодӣ

Маҳмурод Одинаев муовини раиси ҲСДТ дар саҳифаи фейсбукии худ ба номи раиси шаҳри Душанбе Рустами Эмомалӣ барои иҷозаи гузаронидани гирдиҳамоӣ дар назди қасри Президент ариза навиштааст.

Одинаев дар ин аризаи худ аз 5 мушкилии муҳими мурдум, ки сабаби пастравии шароити зиндагии онҳо дар Тоҷикистон дониста мешавад, ёдовар шуда, мегӯяд:

“Бо шумо барин сиёсатмадорон миллату давлатро обод кардан номумкин аст!”

Ӯ дар идома менависад, ки дар бозорҳо нарху наво гарон шудааст, мардум сарсону саргардонанд ва умеде ба оянда надоранд. Одинаев иброз доштааст, ки мушкилии дигар ин муҳоҷирони дур аз Ватан мебошанд. Ва мепурсад, ки оё президент боре миннатдорӣ карда гуфтааст, ки ободии миллату давлати мо аз меҳнати ҳалоли ҳамин муҳоҷирон мебошад? Ҳамчунин ӯ мушкилии дигарро дар шомил нашудани Тоҷикистон ба “Иттиҳоди гумрукӣ” мебинад ва мегӯяд, ки ин сабагори асосии мушкилии муҳоҷирон мебошад.

Ба назари муовини раиси ҲСДТ мушкилии дигари мардуми тоҷик ин фаъолияти бемаҳдуди ширкати “Фароз” аст, ки ба Шамсулло Соҳибов домоди раисҷумҳур таалуқ дорад. Ба гуфтаи ӯ, беморхонаҳо бо пули калон мардумро ташхис мекунанд, ки ин ҳама ба ширкати “Фароз” ва “ҳаммаслаконаш” меравад ва ин ширкат мардумро ба дод овардааст. Одинаев суол мегузорад, ки “Куҷост инсону инсоф? Куҷост давлату адолат ва куҷост қонун?”

Ҳамчунин дар охири аризааш менависад, “Чӣ бояд кард барои озодии мардумро баргардонидан? Магар ба гуфтан ин масъалаҳоро аз байн бурда метавонем? Мо уҳдадор ҳастем, ба доди ин миллат бирасем. Чун дар оянда шояд дер шавад ва миллат низ моро набахшад.”

Матлаб дар саҳифаи Фейсбук: 👈

Ин дар ҳолест, ки коршиносон мегӯянд, нарху навои баланд дар бозорҳои кишвар ва зиндагии паст мардумро маҷбур месозад, ки ба ҳар коре даст бизананд.

Дар ин чанд рӯзи ахир, ки дар кишвар барқ қатъ мешавад ва сокинон соатҳои дароз барқ надоранд ва инчунин гаронии назарраси маҳсулот дар бозорҳо, мушоҳида мешавад, ки мардум маҷбур шудаанд аз мушкилоти зиндагияшон дар шабакаҳои иҷтимоӣ эътирози худро иброз намоянд.

Аз ҷумла рӯзноманигори тоҷик, Абдусаттор Пирмуҳаммадзода, ки ба мусофиркашонӣ машғул аст, дирӯз дар саҳифаии фейсбукиаш аз набуди ҷои кор, шароити пасти зиндагӣ ва болои ин ҳама фишору ҷаримабандиҳои кормандони БДА дар роҳҳо, шикоят кард.

Пирмуҳаммадзода, ки зиндагиашро аз ҳисоби мусофиркашонӣ мегузаронад, кормандони БДА давоми як моҳ ду маротиба ӯро ба маблағи 580 сомонӣ ҷарима бастаанд.

Ӯ дар муроҷиати видеоияш ба раисҷмуҳур, Эмомалӣ Раҳмон, Озода Раҳмон ва Рустами Эмомалӣ хитоб намуда мегӯяд, ки агар мардумро ба ҷои кор таъмин карда наметавонанд, пас бигзоранд ҳадди ақал мардум худ ризқашонро пайдо кунанд ва нони ёфтаашонро аз даҳонашон кашида нагиранд.

Видео дар саҳифаи Фейсбук: 👈

Баъд аз 5-ум маротиба президент шудани Эмомалӣ Раҳмон мардум умед доштанд, ки нарху наво поин ва шароити зиндагии мардум беҳтар мешавад. Мардум ба умеди зиндагии беҳтаре ин бор ҳам Эмомалӣ Раҳмонро интихоб кардаанд. Вале ба назар мерасад шароити мардум бадтар шуда истодааст. Чун муҳоҷирон наметавонанд ба Русия барои кор бираванд ва зиндагии оилаи худро пеш баранд.

Ба назари коршиносон дар Ватан ҷойи корӣ намерасад ва аксари шаҳрвандони Тоҷикистон барои ёфтани ризқи худ ба хориҷ барои кор мераванд. Болои ин ҳама нархи озуқаворӣ ва хизматрасониҳо дар Тоҷикистон боло рафтааст. Инчунин набуди барқ дар манотиқи гуногуни кишвар низ норозигии мардумро ба бор овардааст.

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp , Viber ва Imo ба ин рақам: +48519767404 бифиристед.