Дар Сурия ба онҳое, ки барои ҷангидан дар сафи қувваҳои Русия ба Украина меравад, моҳона то 7000 доллари амрикоӣ ваъда кардаанд.
Як сарбози довталаби сурӣ дар гузориши хоссе ба BBC гуфт, барои ҷангидан дар сафи қувваҳои Русия бар зидди қувваҳои Украина ду шартнома вуҷуд дорад, ҷангидан дар сафи пеш 7000 доллар ва дар сафи дифоии ақибгоҳ 3500 доллар пешниҳод шудааст.
Ин сарбози довталаб, ки бо номи мустаори “Ҳасан” ёд мешавад, мегӯяд, аз баски зиндагӣ дар Сурия мушкил аст, шахсони зиёде ба ин пешниҳодҳо розӣ шуда, барои рафтан ба ҷанг омодагӣ мегиранд.
“Хонаводаам рафтанамро ба ҷанг намехоҳанд, вале ман барои ба даст овардани маблағ маҷбурам биравам”, мегӯяд Ҳасан. Ӯ бар ин бовар аст, ки аз ин сафар 90% умеди зинда баргаштан нест.
Аз ин пештар Маскав аз иштироки 16 ҳазор сарбозони хориҷӣ дар сафи қувваҳои Русия хабар дода буд. Гуфта мешавад, Русия дар дохили Сурия 14 маркази ҷамъи довталабон таъсис додааст.
Расонаҳои туркӣ дар оғози ҳамлаи Русия ба Украина аз иштироки зархаридони суриягӣ дар ҷанги Украина хабар дода буданд. Гуфта мешавад, нерӯҳои довталаби сурӣ аз Сурия ба Армения ва аз онҷо ба Русия мунтақил шудаанд.
Пас аз ҷанги дохилӣ дар Сурия иқтисоди ин кишвар хеле поин рафта, сатҳи зиндагии мардум бисёр душвор шудааст.
