Тоҷикистон

Тоҷикистон зиёда аз 25 кушта ва даҳҳо захмӣ дорад

Мақомот то ҳол дар бораи теъдоди қурбониёни ҳодисаҳои марзӣ иттилоъ надодаанд, вале як таҳқиқи Azdo tv маълум кард, ки дар ду рӯзи ахир зиёда аз 25 кушта ва даҳҳо нафар захмӣ шудааст.

Бино ба иттилооти сершуморе, ки дар шабакаҳои иҷтимоӣ ва пойгоҳҳои иттилоърасонӣ дар бораи қурбониёни муноқишаҳои мусаллаҳонаи ду рӯзи ахир дар марзҳои муштарак ва манотиқи наздимарзии Тоҷикистон ва Қирғизистон рух додааст, аз ду ҷониб зиёда 50 нафар кушта ва даҳҳо каси дигар захмӣ гардидааст.

Бар асоси иттилооти нашр шуда, дар байни қурбониёни ҳодисаҳои марзӣ бар иловаи сарбозону афсарон занону кӯдакони зиёде низ кушта ва захмӣ шудаанд. Барои мисол, то замоне, ки ин матлаб нашр мешуд, мақомоти расмии Қирғизистон теъдоди кушташудаҳоро 24 нафар ва захмиҳоро 103 кас эълон кардаанд.

подполковник Олимшо Холиқназаров

Аммо мақомоти Тоҷикистон расман дар бораи теъдоди қурбониёни ҳодисаҳои ду рӯзи ахир омори дақиқеро пешниҳод накардаанд, вале гуфтаанд, ки бемористонҳои шаҳри Исфара, Бустон ва Конибодом даҳҳо нафар аз маҷруҳон, аз он ҷумла занону кӯдаконро барои муолиҷа қабул кардаанд.

Бо ин вуҷуд, Azdo tv ба маълумоте даст ётфааст, ки бар асоси он танҳо дар Овчӣ-Қалъачаи ноҳияи Бобоҷон Ғафуров 14 нафар, аз ҷумла ду корманди тиб бо номҳои Солеҷон ва хонум Каромат низ кушта шудааст. Дар ин феҳрист танҳо номи одамони бузургсол ва ғайри низомиҳо зикр шудааст.

афсари 28-сола Хирадманд Усмонзода

Шоми дирӯз, Сарраёсати молияи вилояти Суғд ҳам аз кушта шудани Абдувоҳиди Абдуқаюм, Сардори шуъбаи буҷети соҳаҳои иҷтимоӣ, мудофиа ва мақомоти ҳифзи ҳуқуқ"-и ин вилоят хабар дода буд.

Абдувоҳиди Абдуқаюм

Инчунин дар шабакаҳои иҷтимоӣ хабарҳои зиёде дар бораи кушта шудаҳои ҷониби Тоҷикистон нашр шудааст, аз ҷумла подполковник Олимшо Холиқназаров аз Вилояти Мухтори Кӯҳистони Бадахшон, майори амният Ғолиб Абдунабиев, афсари 28-сола Хирадманд Усмонзода, аз ноҳия Айнӣ ва Аслан Менеқулов, сокини шаҳри Бохтар низ дар марз кушта шудааст.

Аслан Менеқулов, сокини шаҳри Бохтар
Ҳамзамон сокинони ҷамоати Чоркӯҳи Исфара мегӯянд, ки имрӯз ҷанозаи 8 нафарро хондаанд, ки 6 нафари онҳо занону кӯдакони як хонавода, як сарбоз ва як нафари дигарро ҳам хондаанд.

Дар байни занони пиронсоле, ки дар ин ҳодисаҳои хунин аз Тоҷикистон кушта шудаанд, бар иловаи хонум Каромат, як модари 61 солаи сокини шаҳри Исфара низ кушта ва ду наберааш бо ҷароҳатҳои вазнин дар бемористон бистарӣ шудаанд. Инчуни гузориш шудааст, ки як духтарчаи 12-солаи дигаре низ аз Чоркӯҳи Исфара бо ҷароҳатҳои вазнин роҳии бемористон гардидааст.

Гуфта мешавад, омор ва арқоми нашр шуда дар бораи теъдоди қурбониён танҳо касонеро дар бар гирифтааст, ки наздикону пайвандонаш тайи ин ду рӯз дар бораи ҷонбохтани онҳо дар шабакаҳои иҷтимоӣ хабар додаанд, вале теъдоди аскарону афсарон ва онҳое, ки дар бораашон касе маълумот надодааст ё дар вақти таҳқиқ мо дар бораи онҳо иттилоъ пайдо карда натавонистем, ҳисобашон ҷудо аст.

Амруллоҳи Низом, махсус барои Azdo tv

Хонандагони азиз, лутфан, ҳар хабару гузоришеро, ки мушоҳида мекунед ва ё пешниҳоду суоле доред, метавонед онро ба мо, тариқи почтаи электронӣ, Telegram, WhatsApp, Viber ва Imo ба ин рақам:

Матолиби дигари Тоҷикистон

Тоҷикистон

Кӣ рост мегӯяд: Эмомалӣ Раҳмон ё Владимир Путин?

Вокуниши ПМТ ба иттиҳомоти ҷониби Қирғизистон

Тоҷикистон

Мулоқоти Эмомалӣ Раҳмон бо вазири корҳои хориҷаи Саудӣ

Тоҷикистон

Оғози мурофиаи додгоҳии журналист Абдуллоҳи Ғурбатӣ