Холиёр Нурматови 41-сола, ки бар асари таркиш дар нуқтаи фурӯши сӯзишворӣ дар ноҳияи Қубодиён захмӣ шуда буд, дар бемористон даргузаштааст. Дар ин бора Радиои Озодӣ бо истинод ба манобеи худ дар ҳукумати ноҳияи Қубодиён хабар дод.
Ёдовар мешавем, ки 21-уми феврали соли ҷорӣ “дар натиҷаи таркиши зарфи нигоҳдории гази моеъ” дар нуқтаи фурӯши сӯзишвории “Ориёи нафт” дар кӯчаи И.Сомонии ноҳияи Қубодиён таркиш рух дод.
Бар асари таркиш 14 нафар ҷароҳат бардошта, 7 мошин зарар дида, 2 чорвои калон талаф ёфтанд.
То имрӯз аз миёни захмиён 6 нафар ба хона ҷавоб дода шуда, 7 нафар дар беморхона таҳти назорати табибон қарор доранд ва 1 нафар, Холиёри 41-сола аз дуён даргузашт.
Инчунин Вазорати тандурустии кишвар хабар дод, ки Ҷамолиддин Абдуллозода, вазири тандурустӣ ва ҳифзи иҷтимоии аҳолии Тоҷикистон, табобати қурбониёни таркиш дар нуқтаи фурӯши сӯзишворӣ дар ноҳияи Қубодиёнро таҳти назорати шахсӣ гирифтааст.
Вазорати корҳои дохилаи Тоҷикистон гуфта, ки сабабҳо ва омилони таркишро муайян ва хисороти расида ҳисоб карда мешавад.
