Муовини амниятӣ ва интизомии вазири кишвари Эрон ба Тоҷикистон сафар карда ва бо Вазири корҳои дохилии Тоҷикистон мулоқот ва гуфтугӯ кардааст.
20-уми июни соли 2022 расонаҳои эронӣ гузориш доданд, ки Сайид Маҷид Мираҳмадӣ, муъовини амниятӣ ва интизомии вазорати кишвари Эрон барои ширкат дар нахустин нишасти “коргурӯҳи муштарки амнияти Эрон ва Тоҷикистон” ба Душанбе сафар кардааст ва дар ин сафар бо Рамазон Раҳимзода, Вазири корҳои дохилии Тоҷикситон дидор ва гуфтугӯ кардааст.
Ҳамзамон сомонаи ВКД-и Тоҷикистон низ аз дидори Рамазон Раҳимзода бо ҳайати эронӣ хабар дода ва ҳадафи сафари ин ҳайати Эронро амалӣ намудани созишномаҳои қаблан ба имзорасида байни ду кишвар унвон кардааст.
ВКД Тоҷикистон мегӯяд, “ҷонибҳо масъалаҳои таҳким бахшидани ҳамкориҳои якҷояро дар самти мубориза бар зидди терроризм, экстремизм ва мубодилаи иттилоот мавриди баррасӣ қарор доданд ва хостори зудтари амалишудани тавофуқоти сарони ду кишвар дар дидори ахири онҳо шуданд”.
Гуфта мешавад, Сайид Маҷид Мираҳмадӣ, муъовини амниятӣ ва интизомии вазорати кишвари Эрон коргуруҳи муштараки амниятии ду кишварро боиси таҳкими амнияти ду кишвар ва хунсо шудани таҳдидҳои ду миллат донист ва бар иродаи ҷидди тарафи эронӣ барои иҷроӣ шудани тавофуқҳо ва фармонҳои сарони ду кишвар барои тақвияти равобит дар ҳама заминаҳо такид кард.
