9.9 C
Dushanbe

Дар ОМ аз ҳама зиёд Тоҷикистон журналистонро зиндонӣ кардааст

Кумитаи дифоъ аз журналистон дар гузориши нави худ Тоҷикистонро барои зиндонӣ кардани журналистон дар миёни кишварҳои Осиёи Марказӣ дар ҷойи аввал қарор дод.

Ин гузориш таҳти унвони “Шумори журналистони зиндонӣ ба рекорди нав расид”, рӯзи 14-уми декабри соли ҷорӣ нашр шуд. Дар он гуфта мешавад, ки “Тоҷикистон шаш журналистро паси панҷара кард ва дар миёни кишварҳои Осиёи Марказӣ аз ин назар дар ҷои аввал қарор гирифт”.

Ба навиштаи ин кумита, ҳамаи рӯзноманигорон на дар толорҳои додгоҳ, балки дар боздоштгоҳҳо ва пушти дарҳои баста муҳокима шуда, дар пайи шиканҷа ба муҳлатҳои тӯлонӣ маҳкум ба зиндон шудаанд.

Гуфта мешавад, Тоҷикистон дар миёни ҳамаи кишварҳо дар ҷойи дувоздаҳум қарор дорад. Дар ин рӯйхат Эрон дар ҷойи аввал қарор гирифтааст, зеро ба гуфтаи ин созмон, пас аз тазоҳуротҳои ахир дар ин кишвар мақомоти он 62 рӯзноманигорро боздошту зиндонӣ кардааст.

Дар ҳамин ҳол, Созмони байналмилалии “Хабарнигорони Бидуни Марз” бо нашри як гузориш гуфтааст, ки дар соли 2022 дар саросари ҷаҳон 533 хабарнигор дар боздошт қарор дорад, ки 78 нафарашон зан мебошанд. Инчунин дар соли ҷорӣ  57 нафар рӯзноманигори дигар кушта шуда, 65 хабарнигор дар асоратанд ва 49 нафар бедарак шудаанд.

Котиби генералии ин созмон Кристоф Делуар мегӯяд, ки “Диктаторҳо ва режимҳои авторитарӣ зиндонҳои худро бо рӯзноманигорон бошиддат пур мекунанд. Сабти нави шумораи онҳо зарурати фаврии муқовимат ба ин қувваҳои нопокро нишон дода, бояд бо ҳамаи онҳое, ки идеали озодӣ, истиқлолият ва плюрализми иттилоотиро ҷонибдорӣ мекунанд, ҳамраъии фаъолона карда шавад”.

Ёдовар мешавем, ки мақомоти қудратии Тоҷикистон дар пайи як амалиёти махсус дар соли ҷорӣ чанд тан аз рӯзноманигорон ва блогероне, ки каму беш аз мушкилоти мардум мегуфтанд ва камбуди фаъолияти масъулонро фош мекарданд, боздошту бо баҳонаҳои сохта барои солҳои тӯлонӣ равонаи зиндон карданд.

Дар пайи зиндонӣ кардани рӯзноманигорони тоҷик аксари созмонҳои ҳуқуқи башарӣ ва ҳомиёни рӯзноманигорон, аз ҷумла Мэри Лоулор, ки бо сафари корӣ дар Тоҷикистон қарор дошт, садо баланд карда, озодии онҳоро аз мақомоти кишвар талаб карданд. Аммо мақомот ин гуфтаҳои созмонҳоро мисли ҳамеша нодида гирифт.

Хабарро таблиғ кунед:

БЕШТАР БИХОНЕД
БЕШТАР БИХОНЕД

Ихроҷи тоҷикон аз Кореяи Ҷанубӣ

Бино ба иттилои манобеи Azda tv, мақомоти Кореяи Ҷанубӣ дар ин чанд рӯзи ахир бархе аз муҳоҷирони тоҷикро боздошт ва аз ин кишвар ихроҷ кардаанд.

Ҷойивазкунии мақомдорон дар Тоҷикистон

Бо фармон ва қарорҳои нави Эмомалӣ Раҳмон чанд нафар аз як вазифа озод ва ба вазифа дигар таъйин шуданд.

Истирдоди як фаъоли тоҷик аз Лаҳистон ба Тоҷикистон

Мақомоти Лаҳистон ҳафтаи гузашта боз як фаъоли тоҷикро боздошт ва ба Тоҷикистон истирдод кардааст.

Чаро ҷавонон ифротгаро мешаванд?

Маънои луғавӣ ва истилоҳии ифротгароӣ Ифротгароӣ дар луғат ба маънои аз ҳад гузаштан, аз меъёр гузаштан ва зиёдаравӣ кардан аст (фарҳанги форсии Муин, фарҳанги форсии Амид). Калимаҳои мутародиф ва ё ҳаммаъно бо ифрот иғроқ, газофа, муболиға, сахтгирӣ, ғулув ва монанди ин мебошанд.